Éxodo 15:26 - Chayahuita (Shahui)

²⁶ “Caso Sinioroco. Canpitaso chinotëramaco. Casáchin nanitërahuë anoyatacasoꞌ. Nonahuësopita nóya natancoꞌ. Noya natanatomaꞌ, nohuantërahuëso nicoꞌ. Camaitërahuësopita natëtoma noya nipatamaꞌ, carinquëmanta noya niꞌsaranquëmaꞌ. Noya nicatënquëma canpitasoꞌ, catahuaaranquëmaꞌ. Iquipitoroꞌsasoꞌ, nisha nisha quëran anaꞌintërahuë. Canpitaso co ina pochin anaꞌintaponquëmahuëꞌ,” itërin.

Éxodo 15:26 ပူးပေါင်းရင်းမြစ်များ

1 Reyes 11:33

Saromonsoꞌ aꞌporahuatonco, mamanshiroꞌsa moshapatërin. Siton mamanshi paya Asotariti itopisoꞌ mosharin. Quimosi itopisonta mosharin. Inasoꞌ, moaporoꞌsari mosharinsoꞌ. Mircon itopisonta mosharin. Inanta amonoꞌsari mosharin. Inapoaton co costarincosohuëꞌ ninin. Pënëntërahuësopita, anitotërahuësopita, inapita co inaso paꞌpinco pochin natërinhuëꞌ niꞌton, napotarahuë.

1 Reyes 11:38

Yaꞌipi camairanquënsopita natëton noya nipatansoꞌ, noya niꞌsaranquën. Tapisoꞌ iráca nanpipon, pënëntërahuësoꞌ, camaitërahuësoꞌ, inapita natërin. Ina pochin quëmanta natëhuatanco, carinquën catahuaranquën niꞌton, quëmá quëran pipipisopitaráchin israiroꞌsa huaꞌanëntaponaꞌ. Tapi shaꞌhuitërahuëso chachin quëmanta nitaranquën.

2 Reyes 2:21

huinanquë paꞌsahuaton inaquë taꞌsaitërin. Inapoapon pochin: —Naporin Sinioro: “Cari iso huinan anoyaitërahuë. Iporasoꞌ co huachi ina oꞌorama quëran caniotoma chiminapomahuëꞌ. Co noꞌpaꞌ tëranta tapiarinhuëꞌ. Iporasoꞌ maꞌsha shaꞌpatamaꞌ, noyatapon huachi,” tënin, itërin.

2 Reyes 22:2

Cosiasë huaꞌanëntapon noyasáchin ninin. Noꞌtëquën Sinioro natërin. Iráca shimashonën Tapi naporinso pochin inanta ninin.

Copo naporinso' 5:18

Ina nohuanton caniohuatan, ina nohuanton chachin noyatapon. Ina nohuanton parisitohuatan, ina chachin inquitapënquën.

Salmos 103:3

Yaꞌipi co noyahuëꞌ ninahuësoꞌ inquitërinco. Yaꞌipi caniorahuësontaꞌ, anoyatërinco.

Éxodo 12:29

Yono tashi nisapasoꞌ, yaꞌipi Iquipitoquë paninanoꞌsa quëmapi nipisoꞌ, Siniorori tëparin. Copirno huiꞌnin paninantërinsontaꞌ, chiminin. Inari paꞌpin huaꞌanëntacaso nani catahuarapirinhuëꞌ, chiminin. Tashinan pëiquë apinaꞌpiroꞌsa paninantopisopitantaꞌ, chiminpi. Pëꞌtahuanëna quëmapi yaꞌnan huaꞌhuatopiso quëran huarëꞌ chiminpi.

Éxodo 19:5

Yaꞌipi isoroꞌpaquë nisha nisha piyapiꞌsa cari huaꞌanëntërahuë. Napoaton canpitasoꞌ, yaꞌipi camaitërahuëso natëcoꞌ. Maꞌsona taꞌtëhua canpitarëꞌco anoyatërahuësonta coꞌsoꞌ naniantohuatamahuëꞌ, noya niꞌsaranquëmaꞌ. Aꞌnapita piyapiroꞌsa quëran, noya noya niꞌsaranquëmaꞌ.

Éxodo 19:6

Carinquëma huaꞌanëntaranquëmaꞌ. Canpitaso corto huaꞌanoꞌsa nicacamaso marëꞌ acoranquëmaꞌ. Piyapinëhuëpita nicacamaso marëꞌ acoranquëmaꞌ. Nisha nisha piyapiꞌsa anohuitaramaco huachi. Yaꞌipi inapita israiroꞌsa shaꞌhuitëquëꞌ, itërin.

Éxodo 20:2

“Ca Sinioroco huaꞌanëntaranquëmaꞌ. Iquipitoquë chiníquën asacatopirinënquëmahuëꞌ, nani ocoiranquëma huachi. Apira noya natëamacoso marëꞌ shaꞌhuichinquëma natancoꞌ.

Isaías 55:3

Huëcapairahuatomaco noya natancoꞌ. Natanpatamaco nanpiaramaꞌ. Tapi nosoroato nani shaꞌhuitërahuë. Ina nanicaso marëꞌ canpitaroꞌco anoyatomiatarahuë.

Jeremías 7:23

Isocha tëhuënchinsoꞌ camairahuë: ‘Yaꞌipi camaitërahuëso natëcoꞌ. Inapohuatamaꞌ, ca Yosënëmaco nisarahuë. Canpitantaꞌ, piyapinëhuëpita nisaramaꞌ. Onpopinsona cancantamasoꞌ, nani camairanquëmaꞌ. Ina chachin nicoꞌ. Inapohuatamaꞌ, noya yaꞌhuëaramaꞌ,’ itëranquëmaꞌ.

Ezequiel 18:5

Noya ninaꞌpisoꞌ, noꞌtëquën yonquiaton noyasáchin ninin.

Oseas 11:3

Napopirinahuëꞌ, cari chachin israiroꞌsa ira aꞌnotërëso pochin nitërahuë. Huaꞌhuaroꞌsa iratacaso marëꞌ aꞌchintërëso pochin nitërahuë. Sanapi huaꞌhuin nosoroaton paꞌpoyarin, nocomarin, napotërin. Inapochachin carinta nitopirahuëꞌ, co tahuërëtatonacohuëꞌ, aꞌporinaco. Napopiso marëꞌ Iquipitoquë chachin paꞌmantaponaꞌ. Naporahuaton asiriaroꞌsari huaꞌanëntapon.

Oseas 6:1

Canpitaso israiroꞌsanquëma naporamaꞌ: “Huëco yaꞌipinpoa Sinioro chachin chinotaantaꞌahuaꞌ. Chiníquën anaꞌintopirinpoahuëꞌ, nontohuatëhua anoyataantarinpoaꞌ. Apisáchin pochin acopirinpoahuëꞌ, inachachin nonëantarinpoaꞌ. Noya chinotohuatëhuaꞌ, aꞌnaroáchin anoyatarinpoaꞌ. Ananpitaantarinpoaso pochin catahuararinpoa niꞌton, noya niꞌsarinpoaꞌ. Chiníquën cancantatëhua Sinioro nohuitahuaꞌ. Inapohuatëhuaꞌ, Siniorosoꞌ huëcapaiantarinpoaꞌ. Nani tahuëri piꞌi pipirinso pochin, oꞌnápiquë noꞌpaꞌ caniororinso pochin huëcapaiantarinpoaꞌ,” tënamaꞌ.

Deuteronomio 12:25

Co huënainën caꞌpatamahuëꞌ, noya yaꞌhuëaramaꞌ. Huiꞌnamapitanta noya yaꞌhuëaponaꞌ. Noya ninamaso marëꞌ Yosë noya niꞌsarinquëmaꞌ.

Deuteronomio 12:28

Yaꞌipi ipora shaꞌhuitëranquëmasopita, paꞌyatatoma natëcoꞌ. Inapohuatama noya yaꞌhuëaramaꞌ. Huiꞌnamapitanta noya yaꞌhuëaponaꞌ. Noya ninamaso marëꞌ Yosë noya niꞌsarinquëmaꞌ,” itërin.

Deuteronomio 32:39

Casáchin Yosëco. Mamanshiroꞌsasoꞌ, co ca pochin nipihuëꞌ. Ca nohuanto piyapiꞌsa nanpirapi, ca nohuanto chiminapi. Ca nohuanto piyapiꞌsa maꞌsha onpopi. Ca nohuanto chachin noyataantapi. Anaꞌintaꞌhuaso chinotohuato, co insonta chaꞌëtarincohuëꞌ. Chini chiníquënco niꞌto, anaꞌintarahuë.

Deuteronomio 7:15

Sinioro paꞌpoyarinquëma niꞌton, co manta canio masarinquëmahuëꞌ. Iquipitoroꞌsasoꞌ, iráca nisha nisha quëran anaꞌintërin. Nani canpita ina nitotëramaꞌ. Co canpitaso ina pochin anaꞌintarinquëmahuëꞌ. Yaꞌipi inimiconëma tëhuënchinsoꞌ ina pochin anaꞌintapon.