Éxodo 12:3 - Chayahuita (Shahui)

^3-5 Yaꞌipi israiroꞌsa nitotacaiso marëꞌ shaꞌhuitocoꞌ. Ipora yoquiráchin shonca tahuëritahuasoꞌ, nani pëiquë yaꞌhuëramasoꞌ, aꞌnara carniroaꞌhuahuë nipon, chipoaꞌhuahuë nipon mainaꞌ. Tëpatona capacaiso marëꞌ nisha acoꞌinaꞌ. Aꞌna piꞌipitërinsoꞌ. Co máquën tëranta tëhuërinsohuëꞌ inapochinaꞌ. Napoaponahuëꞌ, nanicaiso tantiainaꞌ. Aꞌnaquën pëiquë co naꞌashahuëꞌ nipachina, niyaꞌyoranpisoꞌ capini nipatomatatona caꞌinaꞌ.

Éxodo 12:3 ပူးပေါင်းရင်းမြစ်များ

Génesis 22:8

—Yosë nohuanton conpa yaꞌhuapon, itërin paꞌpini. Ina quëran, paantapi.

Génesis 4:4

Apiriso nipirinhuëꞌ, ohuicanënpita yaꞌnan huaꞌhuatopiso quënin. Amo amoshin nininsopita Yosë chinotaton tëpacaso marëꞌ quënin. Yosëso Apiri nóya niꞌnin. Ofrendanëonta nóya niꞌnin.

Éxodo 12:2

“Canpita marësoꞌ iso yoqui, yaꞌnatiirinso yoqui nisarin. Naporahuaton, iso yoqui naꞌcon naꞌcon yonquiaramaꞌ.

Éxodo 12:21

Moisësë, Israiro ansianoꞌsa amatahuaton, itapon: “Yaꞌipi israiroꞌsa shaꞌhuitocoꞌ. Carniroaꞌhuanënahuë nipon, chipoaꞌhuanënahuë nipon macatona tëpaꞌinaꞌ. Pascoa cosharo capacaiso marëꞌ inapochinaꞌ.

Éxodo 12:6

Nani pëꞌtahuanëna nisha acohuachinaꞌ, cara tahuëri tapainaꞌ. Tahuëririnquë, piꞌi yayaꞌconahuaso tëpaꞌinaꞌ. Nani tëpahuachinaꞌ, huënainën mainaꞌ.

Éxodo 14:15

Naporoꞌ Siniorori Moisësë itapon: —Co catahuaꞌhuanquënso marëꞌ nontaancoso yaꞌhuërinhuëꞌ. Israiroꞌsa pacacaiso tëhuënchinsoꞌ, camaiquëꞌ.

Éxodo 20:19

Napoaton Moisësë, itopi: —Ama huachi Yosëso nonchincoisohuëꞌ. Chiminpatoi. Quëmari natanaton shaꞌhuitocoi natëi, itopi.

Éxodo 4:30

Niyontonpachinara, Aaroni huaꞌanoꞌsa shaꞌhuitërin: —Yosë Iquipito quëran ocoinpoaso marëꞌ nani Moisësë acorin, itërin. Naporahuaton Yosëri camairinso chachin, ansianoꞌsari natëcaiso marëꞌ Moisësënta sacai nininsopita ninin.

Éxodo 6:6

Napoaton piyapinëhuëpita iso pochin shaꞌhuitëquëꞌ: “Caso Sinioroco. Carinquëma Iquipito quëran ocoiaranquëmaꞌ. Iporasoꞌ chiníquën asacatopirënënquëmahuëꞌ, carinquëma chiníquën nanantato nichaꞌësaranquëmaꞌ. Chiníquën aparisitërinënquëma niꞌton, carinta noꞌtëquën iꞌhuërëtarahuë. Ocoirahuatënquëmaꞌ, piyapinëhuëpita pochin niꞌsaranquëmaꞌ. Canpitantaꞌ, casáchin chinotaramaco. Iporasoꞌ iquipitoroꞌsa chiníquën asacatatënquëma aparisitapirinënquëmahuëꞌ, ocoiaranquëmaꞌ. Ocoihuatënquëmaꞌ, Sinioroco ninahuësoꞌ nitotarama huachi. Iráca nani Apraan shaꞌhuitërahuë noꞌpaꞌ quëtaꞌhuasoꞌ. Isaco, Cacopo, inapitanta inachachin shaꞌhuitërahuë. Inaquë quëparahuatënquëma ina noꞌpa chachin ahuaꞌanëntaranquëmaꞌ. Caso Sinioroco, tënin,” itëquëꞌ, itërin.

Juan 1:29

Tahuëririnquë inaquë Quisoso huëꞌsarin. Coanshari quënanahuaton, piyapiꞌsaꞌ itërin: “Pasoꞌ quëmapi niꞌcoꞌ. Yosëri aꞌpaimarinsoꞌ. Inasoꞌ carniroaꞌhua pochin nicaton, oshanënpoaꞌ inquitiinpoaso marëꞌ chiminapon.

Juan 12:1

Saota tahuëri pahuanarin Pascoa nanicasoꞌ. Naporoꞌ Quisoso Pitaniaquë paantarin. Inaquë Nasaro yaꞌhuërin, ananpitaantarinsoꞌ.

Juan 12:12

Huaꞌhuayátërahuë piyapiꞌsaꞌ Quirosarinquë paꞌsapi. Pascoa naꞌhuëcaiso marëꞌ inatohuaꞌ paꞌsapi. Tahuëririnquë Quisosontaꞌ inatohua chachin paꞌsarin. Ina natantahuatonaꞌ,

1 Corintios 5:7

Iráca Pascoa cosharoꞌ caꞌpachinara, co piꞌpian tërantaꞌ ahuëpocatërinsoꞌ nohuantopihuëꞌ. Yaꞌipiya tëꞌyatopi. Pascoaquë carniroaꞌhua tëpapiso pochin Quisocristo nani chiminin canpoa marëꞌ. Ina imaramaꞌ niꞌton, nasha cancan quëtërinquëmaꞌ.

Apocalipsis 13:8

Huaꞌhuayatërahuëꞌ piyapiꞌsari natëapi. Carniroaꞌhua imapisopitaíchin co ina chinotapihuëꞌ. Inasoꞌ aꞌna quirica yaꞌhuëtërin. Nanpirin quirica itopisoꞌ. Inaquë nininënpita nani ninshitërin. Isoroꞌpaꞌ ninin quëran huarëꞌ imapisopita ninoton, inaquë ninshitërin. “Canpoa marëꞌ Carniroaꞌhua chiminin,” taꞌtonaꞌ, ina imasapi. Aꞌnapitaso nipirinhuëꞌ co nanpirin quiricaquë nininënpita yaꞌhuërinhuëꞌ niꞌton, maꞌsha marë quëran pipirinsoꞌ chinotapi.

1 Samuel 7:9

Samoirosoꞌ, aꞌnara carniroaꞌhuaya manin. Ina masahuaton, Sinioro marëꞌ tëparin. Inapotahuaton, yaꞌipimiachin ina marëꞌ ahuiquitërin. Ina quëran israiroꞌsa marëꞌ Sinioro nontërin. Nontohuachina inari aꞌpanirin. Carniroaꞌhuaya ahuiquitasoꞌ, huiristinoꞌsa canquirapi. Israiroꞌsa ahuëcaiso marëꞌ pashica taꞌsoi chachin, Sinioro nohuanton panca huira ahuëtërin. Ina natanatona paꞌpi paꞌyanpi. Israiroꞌsasoꞌ, aꞌnaroáchin Mispa quëran pipirahuatonaꞌ, huiristinoꞌsa taꞌarapiso ahuëconpi. Ahuërahuatona notohuaroꞌ inimicoroꞌsa tiquiipi. Piti-caro ninano itopiquë huarëꞌ inapotopi. Inapochin israiroꞌsari huiristinoꞌsa canapi huachi.