Esdras 7:6 - Chayahuita (Shahui)

^6-9 Istrasësoꞌ, iráca pënëntërinsoꞌ quirica nóya nitotaton, aꞌchinaꞌpi yaꞌconin. Ina quiricaquë Sinioro nohuanton Moisësë ninshitërin. Naporahuaton Siniorori noya catahuarin. Napoaton Artaquirquisë copirnori yaꞌipi nataninsopita catahuacaso marëꞌ quëtërin. Inapoaton inasoꞌ, Papironia quëran Quirosarinquë huëntarin. Aꞌna huëntonaꞌ, israiroꞌsari imaquipi. Inapitasoꞌ aꞌnaquën corto huaꞌanoꞌsaꞌ. Aꞌnaquëntaꞌ, nihuiroꞌsaꞌ. Aꞌnapitasoꞌ, cantanaꞌpiroꞌsaꞌ. Aꞌnapitantaꞌ, yaꞌcoana aꞌpairoꞌsaꞌ. Aꞌnaquënsoꞌ, Yosë chinotacaso pëiquë sacatopisopita. Artaquirquisë nani canchisë piꞌipi copirno yaꞌconinso nisapasoꞌ, Quirosarinquë canquipi. Yaꞌnatiirinso yoquiquë yaꞌnatiirinso tahuëri chachin pipipi. Napoaponaraihuëꞌ, aꞌnatërápo yoqui nisahuaton, aꞌna tahuëri quëran Quirosarinquë canquipi. Siniorori catahuarin niꞌton, noya iratopi.

Esdras 7:6 ပူးပေါင်းရင်းမြစ်များ

Génesis 32:28

Naporoꞌ ina quëmapirisoꞌ itapon: —Co huachi Cacopo itarinënhuëꞌ. Ipora quëran huarëꞌ Israiro itarinën. Yosë chinitëran, piyapiꞌsanta chinitëran. Chinitaton canatëran niꞌton, ina pochin nohuitarinën, itërin.

Esdras 7:21

Ca Artaquirquisë copirnoco camaitarahuë. Iopiratisëiꞌ aquëtëran piꞌi yaꞌconinso parti, naꞌanquëma maꞌsha tapatëramacosopita yaꞌhuëramaꞌ. Ina naponquëma chachin iso pochin camaiaranquëmaꞌ. Corto huaꞌan Istrasë maꞌsona natanpachinquëmaꞌ, quëtocoꞌ. Inasoꞌ, Yosë inápaquë yaꞌhuëaton pënëntërinsoꞌ, noyá nitotërin. Ina nitotaton aꞌchinaꞌpi yaꞌconin.

Nehemías 2:18

Ina quëran Yosë catahuarincosopita shaꞌhuitërahuë. Ina nohuanton copirno nanan quëtërincosonta shaꞌhuitërahuë. Napotohuatora inapitasoꞌ: —¡Huëco paꞌahua caniaritahuaꞌ! topi. Ina quëran sacatacaiso marëꞌ noya ninontatona niachinicancanpi.

Nehemías 2:8

Asahua huaꞌan marëntaꞌ, aninshitërahuë. Inasoꞌ huaꞌan, copirno tananën aꞌpainaꞌpi. Ama nara apiratiincoso marëhuëꞌ aninshitërahuë. Yosë chinotacaso pëi pairanën yaꞌcoanaroꞌsa marëꞌ nohuantarahuë. Ninano pairanën yaꞌcoanaroꞌsa marëntaꞌ, nohuantarahuëꞌ. Caora pëinëhuë marëntaꞌ, nohuantarahuë niꞌton, aninshitërahuë. Inapita natanpatora, Sinioro nohuanton co manta copirno apiratërincohuëꞌ.

Nehemías 4:15

Yosë nohuanton, chinotërinacoiso nitotërai. Inahuanta noyá niacorapiraisoꞌ natantopi. Napoaton co huachi ahuërinacoihuëꞌ. Napohuachina yaꞌipicoi sacataantarai.

Nehemías 8:1

Pascoa yoqui quëran saota yoqui aꞌna tahuëri naꞌhuërapasoꞌ, yaꞌipi cotioroꞌsa aꞌna prasaquë niyontonpi. Inasoꞌ prasa, Iꞌsha maꞌcaisoꞌ yaꞌcoana itopisoꞌ notënanquë yaꞌhuërin. Inaquë niyontonahuatonaꞌ, Istrasë maistro Moisësë pënëntërinsoꞌ quirica nontacaso marëꞌ shaꞌhuitopi. Inasoꞌ quirica, Yosëri chachin israiroꞌsa iráca anitotërin. Napotohuachinara, inaso quësahuaton yaꞌipi quëmapiꞌsaꞌ, sanapiꞌsaꞌ, huaꞌhuaroꞌsa quëran huarëꞌ natantonënquë nontërin. Tashiramiachin quëran huarëꞌ caniaritërinsoꞌ, nontochináchin camotëanatërin. Yaꞌipiya quëran noya natanápi.

Nehemías 8:13

Tahuëririnquë Israiro huaꞌanoꞌsasoꞌ, niyontoantapi. Corto huaꞌanoꞌsaꞌ, nihuiroꞌsaꞌ, inapitanta niyontonpi. Istrasërë chachin Yosë quiricanën nontaantapi.

Nehemías 8:4

Naporoꞌ quirica nontacaso marëꞌ, nontë quëran pëꞌsatë nitopi. Inaquë huanirin quëran nontërin. Inchinan quëran Matataiasë, Sima, Aniasë, Oriasë, Iriquiasë, inapita huanipi. Ahuënan quërantaꞌ, Pitaiasë, Misairo, Marquiasë, Asomo, Asapatana, Sacariasë, Misoramo, inapita huanipi.

Nehemías 8:9

Ina natanatonaꞌ, niyontonpisopitaso naꞌnëpi. Napoaton Niimiasë, Istrasë, maꞌsona tapon naporinsopita shaꞌhuinaꞌpiroꞌsaꞌ, inapitari piyapiꞌsa achinicancanpi. Ama aquëtë sëtatona naꞌnëcaiso marëhuëꞌ, achinicancanpi. Naporahuaton ina tahuërisoꞌ, Sinioro marëꞌ acopiso tahuëri niꞌton, co naꞌnërápaiso marëhuëꞌ napotopi.

Nehemías 9:13

Ina quëran Sinai motopiquë nohuaraimaran. Naporoꞌ inápa quëran noya nicacaiso marëꞌ pënënan, camairan, naporan. Noꞌtën nanan aꞌchintahuaton, yonquínahuan yaꞌhuëcaiso marëꞌ anitotëran. Pënënancoisopita, camairancoisopita, anitotërancoisopita, inapitaso noyasáchin ninin. Chinoto tahuërinta acotëran. Ina tahuëri noya nicatonaꞌ, chinotiinënso marëꞌ acotëran. Piyapinën Moisësë itopiso quëran, yaꞌipi inapita anitotëran.

Salmos 80:18

Catahuaantahuatancoi, co huachi onporonta aꞌpoarainquënhuëꞌ. Ananpitaantarëso pochin nitocoi, chinotaantaꞌinquën.

Proverbios 3:6

Maꞌsona tëranta yanipatamaꞌ: “Anitotoco Sinioro noꞌtëquën yonquiꞌi,” itocoꞌ. Napohuatamaꞌ, anitotarinquëmaꞌ. Ina catahuarinquëma noya nicacamasoꞌ.

Mateo 13:52

—Yosë quiricanën nani nitotaramaꞌ. Yosë huaꞌanëntërinsoꞌ aꞌchintëranquëmaꞌ niꞌton, pëiꞌ huaꞌanën pochin nisaramaꞌ. Pëiꞌ huaꞌanën noya nipachina, yaꞌipi pëinënquë yaꞌhuëpisopita noya nocomarin. Nani naꞌcon aꞌchintëranquëmaꞌ Yosë nanamën aꞌchinacamaso marëꞌ. Iráca ninshitopisoꞌ nitotëramaꞌ. Naporahuaton, aꞌnantaꞌ nashamiachin aꞌchintaranquëmaꞌ. Yaꞌipiya nitotatomaꞌ, aꞌchintëraꞌpiaramaꞌ, itërin Quisosori.

Mateo 23:2

“Tëhuënchachin iyaroꞌsaꞌ, cotio maistroꞌsaꞌ, parisioroꞌsaꞌ, inapita naꞌcon aꞌchintatënënquëmaꞌ: ‘Moisësë pënëninpoasoꞌ noꞌtëquën aꞌchinchinquëmaꞌ,’ topi.

Mateo 28:20

Ina quëran yaꞌipi shaꞌhuitëranquëmasoꞌ aꞌchintocoꞌ natëinaco. Insëquësona paꞌpatamaꞌ, carinquëmaꞌ caꞌtanaranquëmaꞌ. Nani tahuëri catahuaranquëmaꞌ. Ayaroꞌ tahuëri naniquë huarëꞌ caꞌtanaranquëmaꞌ. Co onporontaꞌ pataranquëmahuëꞌ, itërin Quisosori. Nani huachi.

1 Corintios 1:20

Aꞌnaquën inahuara yonquinëna quëran nani maꞌsha nitotopi. Aꞌnaquëntaꞌ nitoaꞌchinapi. Aꞌnaquëontaꞌ míso nonpi. Inapopirinahuëꞌ, ¿maꞌtaꞌ ina marëꞌ canapi? Co mantaꞌ canapihuëꞌ. “Co nanamëhuë imatomahuëꞌ, napoonin yonquiramaꞌ,” itërin Yosëri.

1 Corintios 15:1

Yosë nanamën iyaroꞌsaꞌ, nani aꞌchintëranquëmaꞌ. “Noꞌtëquën nontërincoi,” taꞌtomaꞌ natëramaꞌ. Natëtomaꞌ, imamiataramaꞌ. Ina nanan chachin shaꞌhuitaantaranquëmaꞌ yonquicamaso marëꞌ.

Deuteronomio 4:5

Yaꞌipi Sinioronënpoa pënëntërinsoꞌ, camaitërinsoꞌ, inapita shaꞌhuitërincosoꞌ nani aꞌchintëranquëmaꞌ. Noꞌpaꞌ manamaquë yaꞌhuëhuatamaꞌ, yaꞌipi inapita natëcoꞌ.