Esdras 1:2 - Chayahuita (Shahui)

² “Caso Siroco. Pirsia copirnoco niꞌto, napotaranquëmaꞌ. Siniorosoꞌ Yosë niꞌton, inápaquë huaꞌanëntërin. Ina acorinco nisha nisha nacionoꞌsa huaꞌanëntaꞌhuaso marëꞌ. Camairinco niꞌton, Quirosarinquë ina chinotacaso pëi anitarahuë. Inaso ninanoꞌ, Cota parti yaꞌhuërin.

Esdras 1:2 ပူးပေါင်းရင်းမြစ်များ

1 Reyes 8:27

Pëi mini nitopiranquënhuëꞌ, co quëmasoꞌ inaquë naniaranhuëꞌ. Co piꞌiroꞌtëquë tëranta naniranhuëꞌ nichinapon chachin, aquëtë huarëꞌ iso pëi nitëranquënquësoꞌ, co naniponhuëꞌ.

Esdras 1:5

Ina nitotatona Cota huënton huaꞌanoꞌsaꞌ, Mincamin huënton huaꞌanoꞌsaꞌ, corto huaꞌanoꞌsaꞌ, nihuiroꞌsaꞌ, inapitaso yonquipi panantacaisoꞌ. Sinioro chinotacaso pëi Quirosarinquë yaanoyataantapi. Sinioro nohuanton ina pochin yonquiatonaꞌ, tapatapi huachi.

Esdras 3:7

Ina quëran pëinaꞌpiroꞌsaꞌ, nontë camayoroꞌsaꞌ, inapita pahuërëpi. Cosharoꞌ, huino, tomaꞌ, inapitanta Tiro piyapiroꞌsa quëtopi. Siton piyapiroꞌsanta inapotopi. Inapitasoꞌ Nipano motopi quëran nonara ocoiatonaꞌ, marë quëpatomacaisoꞌ camaipi niꞌton, inapotopi. Siro copirno camaitërinso chachin nipi.

Esdras 6:10

Inapotohuatamaꞌ, Yosë inápaquë huaꞌanëntërinso noya chinotapi. Ina marëꞌ maꞌsha tëparahuatonaꞌ, ahuiquitapi. Naporahuaton ca marëntaꞌ, Yosë nontapi. Huiꞌnahuëpita marëntaꞌ, Yosë nontapi.

Esdras 6:3

“Siro copirno yaꞌconinso piꞌiquë chachin, Yosë chinotacaso pëi nicacaiso marëꞌ nanan yoꞌnin. Inaso pëiꞌ, Quirosarinquë yaꞌhuërin. Nani iráca yaꞌhuëpirinhuëꞌ ohuatopi niꞌton, inaquë chachin acoantacaiso yaꞌhuërin. Inaquë maꞌsharoꞌsa tëpatonaꞌ, Yosë chinotacaiso marëꞌ nisapi. Iso pochin acocaiso camaitërin: Simintonën noya acorahuatonaꞌ, caniarichinaꞌ. Inaparinsosoꞌ, cato shonca canchisë mitro yaꞌhuëtarin. Pancatërinsontaꞌ, nápo chachin pancanachin. Cara panshin panca naꞌpiroꞌsa quëran acoinaꞌ. Naporahuaton aꞌna panshinaꞌ, nasha nontë quëran acoꞌinaꞌ. Ina acocaiso marëꞌ coriqui taparahuë quëran pahuërëchinaꞌ.

Esdras 7:12

“Ca Artaquirquisë copirnoco Istrasënquën nontaranquën. Quëmasoꞌ corto huaꞌanquën. Naporahuaton Yosë inápaquë yaꞌhuëaton, pënëntërinsoꞌ, noyá nitotëran. Ina nitotaton aꞌchinaꞌpinquën yaꞌconan.

Nehemías 1:4

Ina natanato paꞌpi sëtërahuë. Huënsërahuë quëran naꞌnëmiatërahuë. Naporahuato, naꞌa tahuëri co coshatatorahuëꞌ, Yosë nontërahuë:

Nehemías 1:5

“Quëmasoꞌ Sinioro Yosënquën. Inápaquë yaꞌhuëaton chini chiníquën nanantëran. Paꞌpi huëhuëpiro nininsopita ninan. Nosororinquënsopitarëꞌquën anoyatohuatana, noꞌtëquënáchin catahuaran. Camaitëransopitanta natëhuachinën inapotëran.

Isaías 41:2

¡Ca nohuanton piꞌi pipirinso parti aꞌnara copirno yaꞌconapon! Inasoꞌ, yaꞌipi inimiconënpita minsëapon. Cari catahuarahuë niꞌton, nisha nisha nacionoꞌsa huaꞌanëntapon. Nisha nisha copirnoroꞌsa camaiapon. Sahuëninën, pëꞌchinanën, inapita quëran ahuëaton, trico toꞌnorahuatëra piꞌpitën paꞌsarëso pochin nitapon.

Isaías 44:26

Piyapinëhuëpita maꞌsona onpocaisoꞌ shaꞌhuipisopitaso nipirinhuëꞌ, ca nohuanton naniarin. Maꞌsona yonquipisontaꞌ, ca nohuanton nanipon. Quirosarinquë yaꞌhuëantacaisoꞌ, carima shaꞌhuitaranquëmaꞌ. Cota huënton ninanoroꞌsantaꞌ, nashaquëranchin acoantaponaꞌ. Inapitasoꞌ ataꞌhuantopirinahuëꞌ, naquëranchin acoantaponaꞌ.

Isaías 44:28

Cari Pirsia copirno Siro itopiso shaꞌhuitërahuë: ‘Ohuicanëhuëpita huaꞌanën pochin nicacamaso marëꞌ carinquën acoranquën. Maꞌsona nohuantërahuëso quëma nisaran,’ itërahuë. Quirosarinta shaꞌhuitërahuë: ‘Quëmaso ataꞌhuantopirinënquënhuëꞌ, naquëranchin anoyataantarinën,’ itërahuë. Chinotëramacoso pëinta shaꞌhuitatë pochin: ‘Naquëranchin simintonën acotaantaponën,’ itërahuë,” tënin.

Isaías 45:1

Pirsia copirno nicacaso marëꞌ Siniorori Siro acorin. Imirin quëran sëꞌquëatë quëparëso pochin nacionoꞌsa minsëcaso marëꞌ inari catahuararin. Copirnonënapitanta ahuëtacaiso marëꞌ ohuarapisoꞌ, matapon. Ina nohuanton ninano yaꞌcoanaroꞌsa iꞌsoataponaꞌ. Iꞌsoatohuachinaꞌ, co incari tëranta oncotaponhuëꞌ. Ipora chachin ina shaꞌhuitaton itapon:

Isaías 66:1

Naquëranchin Sinioro taantarin: “Piꞌiroꞌtësoꞌ, huaꞌanëntërahuëso shiranëhuë pochin ninin. Isoroꞌpantaꞌ, nantëhuë ayaꞌnanahuëquë pochin ninin. Ina pochin niꞌton, ¡co insëquë tërantaꞌ, pëi nitamacoso marëꞌ nanirinhuëꞌ! ¡Co insëquë tëranta chinotaꞌhuaso marëꞌ nitamacosoꞌ nanitëramahuëꞌ!

Daniel 1:21

Inapoaton Nanirisoꞌ, Papironia copirno huaꞌanëntërinso pëiquë sacatërin. Pirsia copirno Siro itopisoꞌ, aꞌna piꞌisaꞌ copirno yaꞌconinso naniquë huarëꞌ, inaquëranchin sacatërin.

Daniel 2:21

Quëma nohuanton tahuëriroꞌsa nishatërin. Quëma nohuanton copirnoroꞌsanta yaꞌconpi. Quëmari chachin inapitanta ocoiran. Quëmari yonquinahuanoꞌsanta yonqui quëtëran.

Daniel 4:25

Quëmasoꞌ copirnonquën nipiranhuëꞌ, piyapiroꞌsa yaꞌhuërin quëran ocoiaponën. Maꞌsharoꞌsarëꞌquën yaꞌhuëaran. Toro pochin pasto caꞌsaran. Poroncayontaꞌ, shipitáponquën. Ina pochin sinioro copirno canchisë piꞌipi yaꞌhuapon. ‘Yosëso chini chiníquën nanantaton, yaꞌipi isoroꞌpanta huaꞌanëntërin. Ina nohuanton insosona nohuantërinsoꞌ, copirno nicacaso marëꞌ acorin,’ tëcama huarëꞌ noyataran huachi.

Daniel 4:32

Piyapiroꞌsa yaꞌhuërin quëran ocoiaponën. Inapotohuachinën, maꞌsharoꞌsapitarëꞌquën yaꞌhuapon. Tororoꞌsa pochin canchisë piꞌipi pasto capon. ‘Yosëso chini chiníquën nanantaton yaꞌipi isoroꞌpaquë nacionoꞌsanta huaꞌanëntërin. Ina nohuanton insosona nohuantërinsoꞌ, copirno nicacaso marëꞌ acorin,’ tëcama huarëꞌ ina pochin nisaran,” itërin natanin.

Daniel 5:23

Yosë tëꞌhuataton natëcaso nipirinhuëꞌ, nocanatë pochin ninan. Inapoaton minëroꞌsa ina pëinën quëran quëpiso amatohuatana, quëshirinën. Quëpachinara, inaquë përaransopita huino ichioꞌoran. Naporahuaton mamanshinënpita oro quëran nipisoꞌ, mosharan. Prata, shaꞌpi huaꞌna, huaꞌnamia, nara, naꞌpi, inapita quëran nipisontaꞌ, mosharan. Inapitaso co máquënoꞌsahuë niꞌtonaꞌ, co quënantopihuëꞌ, co natantopihuëꞌ, co manta nitotopihuëꞌ, napopi. Napopirinahuëꞌ, inapitaso chinotëran. Yosëso ananpirinquën. Ina nohuantohuachin maꞌpitaso yonquiranso ninan. Inaso napopirinhuëꞌ, co chinotëranhuëꞌ.

Daniel 6:25

Ina piquëran Tario copirnosoꞌ, quirica ninshitërin: “Ca Tario copirnoco ninshitaranquëmaꞌ. Canpitaso nisha nisha nacionquë yaꞌhuëramaꞌ. Nisha nisha nananquë nonamaꞌ. Naporahuaton nisha nisha piyapinquëmaꞌ. Paꞌpi nohuantërahuë yaꞌipinquëma noya yaꞌhuëatomaꞌ, sano yaꞌhuëcamasoꞌ.

Jonás 1:9

—Caso iprio piyapico niꞌto, Sinioro chinotërahuë. Inaso Yosë, inápaquë huaꞌanëntërin. Inari chachin isoroꞌpaꞌ, marëꞌ, inapita acorin.