Efesios 6:11 - Chayahuita (Shahui)

¹¹ Sopai huaꞌan noyá nitotërin nonpinacasoꞌ. Nani tahuëri yanonpintërinpoaꞌ. Yosëso nipirinhuëꞌ chini chiníquën nanantaton, yacatahuarinpoaꞌ. Ina nontohuatëhuaꞌ, catahuarinpoaꞌ sopai minsëcasoꞌ. Sontaroꞌsaꞌ aꞌmopiso pochin nininsoꞌ Yosë quëtërinpoaꞌ ama sopai minsëinpoaso marëhuëꞌ.

Efesios 6:11 ပူးပေါင်းရင်းမြစ်များ

Nehemías 4:13

Napotohuachinacoira, sacatoroꞌsa quëmopinënpitarë chachin yapo yaporia paira nininquë acoraꞌpiarahuë. Sahuëninënaꞌ, nansanënaꞌ, pëꞌchinanënaꞌ, inapitarë chachin acoraꞌpiarahuë. Yaꞌcoanaroꞌsaquëntaꞌ, inapotëraꞌpiarahuë.

Marcos 13:22

Naꞌa nonpin nanan pënëntonaꞌpiroꞌsa huëcaponaꞌ. ‘Casoꞌ Cristoco,’ tëcaponaꞌ aꞌnaquën. ‘Casoꞌ ninotonaꞌpico,’ tosapi aꞌnaquëontaꞌ. Sacaiꞌ nininsoꞌ nisapi piyapiꞌsaꞌ nonpintacaiso marëꞌ. Niꞌsahuatonaꞌ: ‘Maꞌpitacha nitotërin paya. ¿Yosë quëran oꞌmamara, ti?’ taꞌtonaꞌ, naꞌa piyapiꞌsari imasapi. Yosëri huayoninsopita quëran huarëꞌ nonpintochinaichin nisapi.

Romanos 13:12

Huaꞌquiꞌ piyapiꞌsaꞌ co noyahuëꞌ nicatonaꞌ, tashi pochin cancantopirinahuëꞌ. Iporasoꞌ Sinioro tahuërinën yaꞌcaritëriarin. Napoaton ama tashi pochin cancantahuasohuëꞌ. Sontaroꞌsaꞌ huaꞌna quëran aꞌmopiso pochin tahuëri pochin cancantatëhuaꞌ, noyasáchin niahuaꞌ.

Romanos 13:14

Sontaroꞌsaꞌ huaꞌna aꞌmopiso pochin Quisocristo yaꞌcopirinpoaꞌ ama sopai minsëinpoaso marëhuëꞌ. Napoaton Quisocristo naꞌcon yonquiatomaꞌ, ina pochachin cancantocoꞌ. Ina natëtomaꞌ, ama piꞌpian tërantaꞌ yonquicosohuëꞌ co noyahuëꞌ nicacamaso marëꞌ.

1 Corintios 10:13

Sopai yaꞌipi piyapinpoaꞌ shaꞌhuitërinpoaꞌ co noyahuëꞌ nicacaso marëꞌ. Yosëso nipirinhuëꞌ catahuarinpoaꞌ. Aꞌnaya aꞌnayanpoaꞌ co nanitërëhuasohuëꞌ nitotaton, niꞌsarinpoaꞌ. “Tananpitëquëꞌ,” itohuachina, co sopai nanitërinhuëꞌ aquëtëꞌ tëniinpoasoꞌ. Cancanënpoa quëran huarëꞌ Yosë natëhuatëhuaꞌ, co sopai minsëarinpoahuëꞌ. Maꞌsha onpopirëhuahuëntaꞌ, Yosë ananitarinpoaꞌ ahuantacasoꞌ. Yosë chachin catahuarinpoaꞌ sopai minsëcaso marëꞌ.

2 Corintios 10:4

Aꞌnaquënsoꞌ inimiconënpita minsëcaiso marëꞌ nisha nisha quihuípi. Quiyaso nipirinhuëꞌ co quiyaora yonquinëhuëi quëran minsëtaraihuëꞌ. Sacaiꞌ nipirinhuëꞌ, Yosë ananitërincoi nonpin nananoꞌsaꞌ minsëcaꞌhuaisoꞌ.

2 Corintios 11:3

Aꞌnaquënso nipirinhuëꞌ yaanishacancantërinënquëmaꞌ. Iráca yaꞌhuani Ipa nonpintërinso pochin yanonpintërinënquëmaꞌ ama Quisocristoíchin yonquicamaso marëhuëꞌ.

2 Corintios 2:11

Co nanan anoyatohuatëhuahuëꞌ, Satanasë minsëarinpoaꞌ. Inasoꞌ nisha nisha yanonpintërinpoasoꞌ nitotërëhuaꞌ.

2 Corintios 4:4

Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

2 Corintios 6:7

Noꞌtëquën aꞌchinai. Yosë naꞌcon catahuarincoi niꞌton, aꞌchinpatoira, naꞌa piyapiꞌsaꞌ natanatonaꞌ, imasapi. Niꞌcoꞌ. Inimicoroꞌsaꞌ huëꞌpachinara, sontaroꞌsaꞌ huaꞌna quëran aꞌmorin ama inimicori paquitacaso marëhuëꞌ. Inapochachin Yosë achinirincoi ama sopai minsëincoiso marëhuëꞌ. Yosë nohuanton, noyasáchin ninai. Noya catahuarincoi niꞌton, sopai minsëarai.

Efesios 4:14

Ina quëran noꞌtëquën yonquiarihuaꞌ. Co huachi huaꞌhuaroꞌsa pochin cancantarihuahuëꞌ. Huaꞌhuaroꞌsasoꞌ co yonquiyatërapihuëꞌ niꞌton, nisha nisha natëtopi. Canpoaso nipirinhuëꞌ chinotënpoa pochin noꞌtëquën yonquiaꞌahuaꞌ. Niꞌcoꞌ. Panca ihuan huëꞌpachina, poti niquëran niquëran ohuërërin. Co noꞌtëquën yanponinhuëꞌ. Inapochachin aꞌnaquën nisha nisha nanan natanpachinara, nisha nisha yonquipi. Co Quisocristo nanamënáchin yonquipihuëꞌ. Aꞌnaquën nisha nisha aꞌchinapi. Noyá nitotopi nonpinacaisoꞌ. Nonpin nanan imatonaꞌ, yanonpintopirinënquëmahuëꞌ, ama piꞌpian tërantaꞌ natëcosohuëꞌ.

Efesios 4:24

Nasha cancan Yosë quëtërinpoaꞌ ina pochin cancantacaso marëꞌ. Napoaton nasha aꞌmorëso pochin nasha cancantocoꞌ. Noꞌtëquën yonquiatomaꞌ, noyasáchin nicoꞌ.

Efesios 6:13

Sopai chiníquën sacatarin minsëinpoaso marëꞌ. Napoaton Yosë nontocoꞌ catahuainquëmaꞌ. Sontaroꞌsaꞌ aꞌmopiso pochin nininsoꞌ Yosë quëtërinquëmaꞌ. Ina masahuatomaꞌ, aꞌmocoꞌ sopai minsëcaso marëꞌ. Noya nitaparëso pochin nicoꞌ. Inapoatomaꞌ, chinitocoꞌ.

Colosenses 3:10

Nasha aꞌmorëso pochin nasha cancan manamaꞌ. Yosë nininpoaꞌ niꞌton, nani tahuëriya catahuarinquëmaꞌ ina pochin cancantacamaso marëꞌ. Ina quëran noya noya ina nohuitaramaꞌ. Ina marëꞌ nasha cancan quëtërinquëmaꞌ.

1 Tesalonicenses 5:8

Canpoaso nipirinhuëꞌ tahuëri pochin cancantacasoꞌ yaꞌhuërin. Napoaton noya yonquiatëhuaꞌ, Yosë imamiatahuaꞌ. Niꞌcoꞌ iyaroꞌsaꞌ. Inimicoroꞌsaꞌ huëꞌpachinara, sontaroꞌsaꞌ co topinan paꞌpihuëꞌ. Coton huaꞌna quëran nininsoꞌ aꞌmopi. Cascontaꞌ huaꞌna quëran nininsoꞌ yancopi ama inimicori ohuanacaso marëhuëꞌ. Noya nitapahuachinara, co inimicori minsërinhuëꞌ. Huaꞌna aꞌmopiso pochin canpoantaꞌ Yosë natëahuaꞌ catahuainpoaꞌ. Ina natëtëhuaꞌ, noya ninosoroaꞌahuaꞌ. “Yosë aꞌpaiarinpoaꞌ. Oꞌmahuachin, noyá nichaꞌësarinpoaꞌ,” taꞌtëhuaꞌ noya ninahuaꞌ.

Hebreos 7:25

Napoaton nanitërin noyá nichaꞌëinpoasoꞌ. “Quisocristoíchin anoyacancantërinpoaꞌ,” taꞌtëhuaꞌ, Yosë imarëhuaꞌ. Iporahuantaꞌ Quisocristo nanpiárin catahuainpoaso marëꞌ. Nani tahuëri canpoa marëꞌ Yosë nontárin.

Santiago 4:7

Napoaton Yosëíchin natëcoꞌ. Ama piꞌpian tërantaꞌ sopai nohuantocosohuëꞌ. Chiníquën cancantocoꞌ. Yosë nontatomaꞌ, sopai aꞌpacoꞌ paꞌin. Co ina natëhuatamahuëꞌ, patarinquëmaꞌ.

1 Pedro 5:8

Sopaisoꞌ inimiconënpoaꞌ. Yacamairinpoaꞌ co noyahuëꞌ nicacaso marëꞌ. Paꞌpiniꞌ yamaninposo pochachin sopai paꞌsarin piyapiꞌsaꞌ minsëcaso marëꞌ. Napoaton noya yonquiatomaꞌ, niꞌsácoꞌ.

Judas 1:24

Tata Yosësoꞌ yaꞌipi nanitaparin. Noya aꞌpaiarinquëmaꞌ ama anotërëso pochin tëhuëcamaso marëhuëꞌ. Catahuahuachinpoaꞌ, co sopai minsëarinpoahuëꞌ. Noya noya tapararinpoaꞌ imamiatacaso marëꞌ. Aꞌna tahuëri yaꞌhuërinquë noya niꞌsarinpoaꞌ. Inatohuasoꞌ noya noya. Capa cancantarihuaꞌ. Tata Yosëíchin huaꞌanëntërinpoaꞌ. Ina nohuanton, Quisocristo nichaꞌësarinpoaꞌ. Inasáchin catahuarinpoaꞌ noya chinotacasoꞌ. Ma noyacha Tata Yosëso paya. Iráca quëra huarëꞌ chini chiníquën nanantërin. Noya noya niꞌton, yaꞌipi piyapiꞌsari chinochinaꞌ. Inasáchin natëahuaꞌ. Ama onporontaꞌ naniantahuasohuëꞌ. Amen. Nani huachi. Cotasë

Apocalipsis 12:9

Inapotatonaꞌ, panca yaꞌhuan pochin nininsoꞌ inápa quëran tëꞌyatopi. Inasoꞌ sopai chachin, Satanasë itopisoꞌ. Yaꞌipi piyapiꞌsaꞌ yanonpintërin. Ina minsërahuatonaꞌ, anquëninënpitarë chachin isoroꞌpaquë tëꞌyatopi.

Apocalipsis 19:20

Quira nipachinara, huiri cahuario aipi huënsërinsoari canarin. Canarahuaton, maꞌsha paꞌpi tëꞌhuatoroꞌ nininsoꞌ masarin. Nonpin nanan pënëntonaꞌpintaꞌ, masarin. Inasoꞌ, sacaiꞌ nininsoꞌ nicaton, notohuaroꞌ piyapiꞌsaꞌ nonpintërin maꞌsha paꞌpi tëꞌhuatoroꞌ nininsoꞌ imacaiso marëꞌ. Marcanën niacotahuatonaꞌ, mamanshinën moshapirinahuëꞌ, minsëarin huachi. Minsërahuaton, cato chachin masahuaton, anaꞌintomiatarin. Nanpirapirinahuëꞌ, parisitopiquë tëꞌyatarin huachi. Inaquë panca sono shaꞌpimoꞌshirë chachin pën tënëntápon. Co onporontaꞌ pipiapihuëꞌ.

Apocalipsis 2:24

Aꞌnaquëmaso nipirinhuëꞌ co nonpin nanan natëramahuëꞌ. ‘Noya noya nitotërai,’ itopirinënquëmahuëꞌ, ‘Sopai imatonaꞌ, napopi,’ taꞌtomaꞌ, co ina natëramahuëꞌ. Iporahuantaꞌ noya imaramaco niꞌton, co aquëtëꞌ pënënaꞌhuanquëmasoꞌ yaꞌhuërinhuëꞌ.