Efesios 5:18 - Chayahuita (Shahui)

¹⁸ Aꞌnaquën noꞌpicasoáchin cancantopi. “Huëcoꞌ noꞌpiahuaꞌ. Capa cancantahuaꞌ,” nitopirinahuëꞌ. Ama canpitasoꞌ noꞌpicosohuëꞌ, nishacancantotamaꞌ. Yosë nontocoꞌ Ispirito Santo noyá yaꞌcoancanchinquëmaꞌ. Nani tahuëri yaꞌcoancantomiachinquëmaꞌ. Ina quëran co noꞌpipomarahuëꞌ, tëhuënchachin capa cancantomiataramaꞌ.

Efesios 5:18 ပူးပေါင်းရင်းမြစ်များ

Génesis 9:21

Aꞌna tahuëri Noi huino oꞌoton, noꞌpirin. Noꞌpiton, nëꞌmëtë pëinën huáncana notataton, iꞌnanpirashitë quëhuëánin.

Salmos 69:12

Naní quëran chinotárinaco. Ninano yaꞌcoanaroꞌsaquë huënsëpisopitantaꞌ, pinorinaco. Noꞌpirahuëroꞌsa quëran huarëꞌ, cantahuachinara aꞌpiantërinaco.

Proverbios 20:1

Huinoso paꞌyatohuatëra, co panorohuanhuëꞌ acorinpoaꞌ. Máin oꞌopatëra, anishacancantërinpoaꞌ. Noꞌpiraoꞌ maꞌsha nipatëra, co manta noya nisarëhuahuëꞌ.

Isaías 55:1

Sinioro tënin: “Yamororëso pochin cancantohuatamaꞌ, huëco anoyacancanchinquëmaꞌ. Co coriqui yaꞌhuëtopirinquëmahuëꞌ, catahuararanquëmaꞌ. Nontohuatamaco cosharo achinitërinso pochachin achincancanaranquëmaꞌ. Huino, ohuaca shoꞌshoiꞌ, inapita achinitërinso pochin asanocancanaranquëmaꞌ.

Mateo 23:25

Canpitasoꞌ nonpintënquëma niꞌton, ¡maꞌhuantacha nisarama paya! Tëhuënchachin yanonpinamaꞌ. Niꞌcoꞌ. Aꞌnaquën minëꞌ, sënan, inapita paꞌmohuachinara, aipiáchin paꞌmopi. Acoposo nipirinhuëꞌ, nëꞌhuënantëtërin. Inapochachin canpitasoꞌ piyapiꞌsaꞌ noya nicainënquëmasoachin yonquipiramahuëꞌ, acopoꞌ cancanëma quëransoꞌ, co noya yonquiramahuëꞌ. Nonpinatomaꞌ, yaihuatëramaꞌ. Maꞌsharáchin nohuantatomaꞌ, co Yosë nohuantërinsoꞌ ninamahuëꞌ. Ina marëꞌ Yosë anaꞌintarinquëmaꞌ.

Mateo 24:49

piyapinënpita ahuëapon. Pita nicacasoáchin cancantapon. Noꞌpirápon.

Lucas 1:15

Inasoꞌ nóya quëmapi nipon. Yosëri catahuaarin niꞌton, noya noya nisarin. Naporahuaton, co piꞌpian tërantaꞌ main oꞌoponhuëꞌ. Coꞌhuara nasichátëraponhuëꞌ, Ispirito Santori yaꞌcoancantarin. Inasáchin natëarin.

Lucas 11:13

Canpitasoꞌ co noyahuëꞌ yonquiapomarahuëꞌ, huiꞌnamaꞌ nosororamaꞌ. Noya maꞌsha quëtëramaꞌ. Yosësoꞌ noya noya niꞌton, naꞌcon naꞌcon nosororinquëmaꞌ. Inápaquë yaꞌhuaponahuëꞌ, huiꞌninpita pochin niꞌninquëmaꞌ. Nontohuatamaꞌ, ‘Ispirito Santo ayaꞌcoancantoco,’ itohuatamaꞌ, ayaꞌcoancantarinquëmaꞌ,” itërin.

Lucas 12:45

Nipirinhuëꞌ, inpriatonën nisha cancantohuachin, tapon: ‘Patron huaꞌquirarin. Co aꞌnaroáchin huëntaponhuëꞌ,’ taꞌton, piyapinënpita ahuëapon. Cosonanënpitantaꞌ ahuëapon. Pita nicacasoáchin cancantapon. Noꞌpirápon.

Lucas 21:34

Niꞌcona naniantotamaco. Ama pita paꞌyatacasoachin cancantocosohuëꞌ. Ama noꞌpicosohuëꞌ. Ama maꞌsharáchin yonquicosohuëꞌ. Ina pochin cancantohuatamaꞌ, co aquëtëꞌ yonquiaramacohuëꞌ. Co noya ninahuatamacohuëꞌ,

Juan 2:10

Huëꞌpachina, itërin: —¡Maꞌpitacha ninan paya! Iso huinosoꞌ noya noya, yashin yashin oꞌocasoꞌ. Yaꞌipi piyapiꞌsaꞌ noya noya huino nininsoꞌton oꞌshipi. Ina quëran nani natëhuachinara, co onpopinchin noyahuëꞌ nininsoꞌ oꞌshiantarapi. Quëmaso nipirinhuëꞌ ipora huarëꞌ noya noya huino oꞌshitërancoi, itërin. Quisoso naporinsoꞌ co nitotatonhuëꞌ, naporin.

Romanos 13:13

Tahuëri nipachina, aꞌninquëchin niꞌton, noyasáchin ninëꞌ. Aꞌnaquënso nipirinhuëꞌ pitasachin paꞌyatopi. Naꞌa tahuëri nansarápi, oꞌosápi, coshatápi, noꞌpiápi. Ama pitasoꞌ paꞌyatocosohuëꞌ. Ama noꞌpicosohuëꞌ. Ama piꞌpisha tërantaꞌ nimonshitacamasoꞌ yonquicosohuëꞌ. Ama ninoꞌhuicosohuëꞌ. Ama aꞌna piyapi noyapatomaꞌ, noꞌhuicosohuëꞌ.

1 Corintios 11:21

Aꞌnaquëmaꞌ co ninosoroatomahuëꞌ, niapiratëramaꞌ. Aꞌnaroáchin canpitaora cosharonëmaꞌ caꞌnamaꞌ. Co nipatomatëramahuëꞌ. Inapotohuatamara, aꞌnaquën tanapi. Aꞌnaquënso nipirinhuëꞌ naꞌcon oꞌotonaꞌ, noꞌpipi. Napoatomaꞌ, co nanitëramahuëꞌ Quisocristo chimininsoꞌ yonquiatomaꞌ coshatacamasoꞌ.

1 Corintios 5:11

Aꞌnaquënso nipirinhuëꞌ. “Cantaꞌ imarahuë,” taponahuëꞌ, monshihuanárin. Aꞌnantaꞌ apirarin. Aꞌnaquëontaꞌ ipora huantaꞌ mamanshi moshararin. Aꞌnapitantaꞌ pinotapi, noꞌpirapi, ihuatapi, naporapi. Napoaponaraihuëꞌ: “Quiyantaꞌ imarai,” topi. Ama inapitarëꞌquëmaꞌ nipayacosohuëꞌ. Yosë nonpintapi niꞌton, ama inapitarëꞌquëmaꞌ coshatocosohuëꞌ.

1 Corintios 6:10

Aꞌnaquëontaꞌ maꞌsha ihuatopi, apirapi, noꞌpipi, pinotopi. Aꞌnaquën aꞌnapita ahuëatonaꞌ, maꞌshanënaꞌ matopi. Yaꞌipi co noyahuëꞌ nipisopita co Yosë huaꞌanëntërinquë yaꞌcoanpihuëꞌ.

1 Tesalonicenses 5:7

Yahuëꞌëpachinara, tashiꞌ huëꞌëpi. Yanoꞌpihuachinarantaꞌ, tashiꞌ noꞌpipi.

Tito 1:6

Ansianoꞌsaꞌ yaacohuatan, noya imapisopitaráchin acoquëꞌ. Aꞌnaíchin saꞌin yaꞌhuëtërinsoꞌ. Huiꞌninpitantaꞌ Quisocristo imainaꞌ. Aꞌnaquënsoꞌ ansiano yayaꞌconpirinahuëꞌ, huiꞌninpita co noya cancantopihuëꞌ. Co yonquínahuan nipihuëꞌ. Co paꞌpinaꞌ yanatëpihuëꞌ. Co huiꞌninpita tërantaꞌ pënënpachinahuëꞌ, aꞌnapitarintaꞌ co yanatëponahuëꞌ. Napoaton co inapita acocasoꞌ yaꞌhuërinhuëꞌ.