Efesios 5:11 - Chayahuita (Shahui)

¹¹ Aꞌnaquën tashi pochin cancantatonaꞌ, co noyahuëꞌ nipi. Topinan quëran yaꞌhuërapi niꞌton, ama inapita pochin cancantocosohuëꞌ. Noꞌtëquën shaꞌhuitocoꞌ co noyahuëꞌ nipisopita naniantacaiso marëꞌ.

Efesios 5:11 ပူးပေါင်းရင်းမြစ်များ

Génesis 20:16

Sarantaꞌ, itapon: —Niꞌquë imoya, yoꞌyo masho huaranca coriqui prata quëran nininsoꞌ quëtërahuë. Yaꞌipiya quëran co tëhuëransohuëꞌ nitotacaiso marëꞌ ina nápo quëtarahuë. Co insonta pinoinquënso yaꞌhuërinhuëꞌ.

Proverbios 1:10

Oshahuanoꞌsa yanonpintohuachinquën, ama piꞌpian tëranta natëquësohuëꞌ.

Proverbios 1:31

Napoaton ina naꞌintarinquëma parisitamaso yaꞌhuërin. Amiquë huarëꞌ caꞌnëso pochin parisitaramaꞌ. ‘Caora nohuantato napoarahuë,’ tënamaso marëꞌ napoaramaꞌ.

Proverbios 13:18

Pënënpisoꞌ nocanpachinaꞌ, popriyataponaꞌ. Naporahuatona co noya nicaponahuëꞌ. Natëhuachinaso nipirinhuëꞌ, aꞌnapitari naꞌcon noya nicaponaꞌ.

Jeremías 15:17

Aꞌnaquën capa cancantacaisoáchin yonquipi. Caso inapitarëꞌco co nipayacaꞌhuasoꞌ nohuantërahuëꞌ. Yaꞌcoancantëranco quëran huarëꞌ caoraíchin pochin paꞌnahuë. Piyapiꞌsa co noyahuëꞌ nipachinara, quëmariso noꞌhuiran. Inapochachin canta cancantërahuë.

Levítico 19:17

Aꞌna piyapi tëhuëtohuachinquën, ama cancanën quëran noꞌhuiráquësohuëꞌ. Aꞌna piyapi tëhuëhuachin, noꞌtëquën pënënamaso yaꞌhuërin. Co pënënpatanhuëꞌ, quëmarinta catahuaran oshahuanacasoꞌ.

Mateo 18:15

Ina quëran Quisosori pënëantarin. “Imapatamaco, iyaparima pochin ninicamasoꞌ yaꞌhuërin. Aꞌnaquën maꞌsha onpotohuachinquën, quëmaora paaton, nanan anoyatëquëꞌ. Ina quëran oshaquëran pënënquëꞌ noya yonquiantaꞌin. Noya natëhuachinquën, oshanën marëꞌ tëhuënchachin sëtohuachin, noya cancantaantarin. Iyaparima pochin ninosoroantarama huachi.

Lucas 3:19

Irotisëntaꞌ huaꞌan nipirinhuëꞌ pënënin. “Quëmasoꞌ paꞌpi co noyahuëꞌ ninan. Naporahuaton, iyaparin saꞌin osërëtaton, manan. Pinipi saꞌin chachin manan. Irotiasa itopisoꞌ. Ina marëꞌ oshahuanan,” itërin.

Hechos 26:18

Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Romanos 13:12

Huaꞌquiꞌ piyapiꞌsaꞌ co noyahuëꞌ nicatonaꞌ, tashi pochin cancantopirinahuëꞌ. Iporasoꞌ Sinioro tahuërinën yaꞌcaritëriarin. Napoaton ama tashi pochin cancantahuasohuëꞌ. Sontaroꞌsaꞌ huaꞌna quëran aꞌmopiso pochin tahuëri pochin cancantatëhuaꞌ, noyasáchin niahuaꞌ.

Romanos 16:17

Quisocristo nanamën nóya aꞌchintërinënquëmaꞌ. Aꞌnaquënso nipirinhuëꞌ co noꞌtëquën aꞌchinpihuëꞌ. Yaanishacancantopi. Niꞌcona, iyaroꞌsaꞌ, nonpintochinënquëmaꞌ. Insëquësona aꞌchintohuachinara, nisha nisha yonquiapi. Ama inapita natancosohuëꞌ. Tananpitocoꞌ paꞌinaꞌ.

Romanos 6:21

Inapohuatamara, ¿maꞌtaꞌ ina marëꞌ canaramaꞌ? Co ina marëꞌ canamiataramahuëꞌ. Topinan quëran yaꞌhuëramaꞌ. Ina pochin cancantohuatamaꞌ, chiminpatamaꞌ, parisitopiquë paꞌsaramaꞌ. Iráca ina pochin nipiramahuëꞌ, iporaso ina marëꞌ tapanamaꞌ.

Gálatas 6:8

Inapochachin co noyahuëꞌ yonquirápatëhuaꞌ, co noyahuëꞌ nisarëhuaꞌ. Ina marëꞌ anaꞌintinpoasoꞌ yaꞌhuërin. Nipirinhuëꞌ, Ispirito Santo natëhuatëhuaꞌ, nani tahuëri catahuarinpoaꞌ noya cancantacaso marëꞌ. Ina quëran Yosëꞌpaꞌ noya nanpicontarihuaꞌ.

Efesios 4:22

Iráca paꞌpi co noyahuëꞌ ninamaꞌ. Noꞌpiramaꞌ, monshihuanamaꞌ, nisha nisha yonquiramaꞌ. Inapohuatamara, “noya cancantarëhuaꞌ,” topiramahuëꞌ, ninonpintëramaꞌ. Co tëhuënchachin noya cancantëramahuëꞌ. Iráca naporamasoꞌ chanatërinso pochin Yosë niꞌninquëmaꞌ. Iporasoꞌ yaꞌipi co noyahuëꞌ yonquiramasopita naniantoco huachi.

Efesios 5:12

Paꞌpi co noyahuëꞌ nipi. Poꞌoana quëran aꞌnaratipita nipi. Napopiso aꞌninquëchin shaꞌhuirahuëꞌ naporini, paꞌpi tapaintërihuahuëꞌ.

Efesios 5:7

Napoaton ama inapitarëꞌquëmaꞌ nipayacosohuëꞌ.

Colosenses 1:12

Nani anoyacancantohuachinpoara, huëntonënquë chachin ayaꞌconinpoaꞌ. Huiꞌninpita pochin niꞌsarinpoaꞌ. Iporasoꞌ ina catahuahuachinpoaꞌ, tahuëri pochin cancantarihuaꞌ. Naporahuatëhuaꞌ, yaꞌhuërinquë chachin yaꞌhuëcontarihuaꞌ. Ina marëꞌ noya cancantatëhuaꞌ “Yosparinquën Sinioro,” itarihuaꞌ.

1 Tesalonicenses 5:7

Yahuëꞌëpachinara, tashiꞌ huëꞌëpi. Yanoꞌpihuachinarantaꞌ, tashiꞌ noꞌpipi.

2 Tesalonicenses 3:14

Nani ninshitatoi, pënënainquëmaꞌ. Inso tërantaꞌ co yanatëhuachincoihuëꞌ, pënëncoꞌ. Co natëtohuachinahuëꞌ, ama inapitarëꞌquëmaꞌ nipayacosohuëꞌ oshanëna marëꞌ tapainaꞌ.

2 Tesalonicenses 3:6

Sinioro Quisocristo nanan quëtërincoi niꞌton, noꞌtëquën iyaroꞌsaꞌ pënënainquëmaꞌ. Aꞌnaquëmasoꞌ imapomarahuëꞌ, co sacatatomahuëꞌ, nisha nisha yonquiramaꞌ. Yosë nanamën noꞌtëquën aꞌchintopirainquëmahuëꞌ, co natëramacoihuëꞌ. Insosona inapohuachin, ama inapitarëꞌquëmaꞌ nipayacosohuëꞌ.

1 Timoteo 5:20

Ansiano tëhuënchachin co noyahuëꞌ nipachina, pënënacasoꞌ yaꞌhuërin. Yaꞌipi imapisopita ayontonahuaton, chiníquën pënënquëꞌ. Aꞌnapitantaꞌ tëꞌhuatatonaꞌ, noya nicacaiso marëꞌ pënënquëꞌ.

1 Timoteo 5:22

Ansiano yaacohuatan, noya yonquiaton, oshaquëran acoquëꞌ. Aꞌnaroáchin acohuatan, co noyahuëꞌ nipachina, quëmantaꞌ naꞌianan. Noyasáchin niquëꞌ.

1 Timoteo 6:5

Nitapicancantatonaꞌ, co niquëꞌyapihuëꞌ. Iráca Yosë nanamën nitotopirinahuëꞌ, ina naniantatonaꞌ, co huachi noꞌtëquën yonquipihuëꞌ. Maꞌsha canacaiso marëꞌ Yosë yaimaconpi. Co ina marëꞌ imacasohuëꞌ nipirinhuëꞌ, napopi. Ama inapitasoꞌ natanquësohuëꞌ.

2 Timoteo 3:5

“Quiyantaꞌ Yosë imarai,” topirinahuëꞌ, co tëhuënchachin imapihuëꞌ. Chinotopirinahuëꞌ, co cancanëna quëran huarëꞌ natëpihuëꞌ niꞌton, co Yosëri catahuarinhuëꞌ ina pochin cancantacaisoꞌ. Ama inapita natanquësohuëꞌ. Tananpitëquëꞌ paꞌinaꞌ.

2 Timoteo 4:2

Nanamën aꞌchináquëꞌ. Piyapiꞌsaꞌ yanatanpachinaꞌ, aꞌchintëquëꞌ. Sacaiꞌ aꞌchinacaso nipirinhuëꞌ, onpopiontaꞌ aꞌchináquëꞌ. Aꞌnaquënsoꞌ co yaimapachinahuëꞌ, noꞌtëquën shaꞌhuitëquëꞌ natëinaꞌ. Co noyahuëꞌ nipachinaꞌ, pënënquëꞌ. Noya nontëquëꞌ chiníquën cancantatonaꞌ, imainaꞌ. Yaꞌipi piyapiꞌsaꞌ aꞌchintëquëꞌ noya nicacaiso marëꞌ. Nipirinhuëꞌ, ama noꞌhuiquësohuëꞌ. Sanoanan quëran pënënquëꞌ.

Tito 2:15

Ina nanan aꞌchintáquëꞌ. Noya nontaton, achinicancanquëꞌ. Co noyahuëꞌ nipachinaꞌ, chiníquën nanantaton, pënënquëꞌ. Co mashonquënhuëꞌ niponahuëꞌ, Quisocristo nanamën aꞌchintëran niꞌton, natëinënquënsoꞌ yaꞌhuërin.

Apocalipsis 18:4

Ina topachina, inápa quëran aꞌnari itërin: —Yaꞌipi imaramasopita pënënaranquëmaꞌ, natanco. Niꞌcona papironiaroꞌsaꞌ anishacancantochinënquëmaꞌ. Ina quëran pipiramaso pochin nicatomaꞌ, ama inapita pochin cancantocosohuëꞌ. Co noyahuëꞌ nipatamaꞌ, Yosë anaꞌintarinquëmaꞌ canpitantaꞌ.