Efesios 4:5 - Chayahuita (Shahui)

⁵ Quisocristoíchin huaꞌanëntërinpoaꞌ. Ina nanamënáchin natërëhuaꞌ. “Quisocristo imarahuë,” taꞌtëhuaꞌ, aporihuanëhuaꞌ. Co nisha nisha imacaso marëꞌ aporintërinënpoahuëꞌ.

Efesios 4:5 ပူးပေါင်းရင်းမြစ်များ

Mateo 28:19

Napoaton canpita paatomaꞌ, yaꞌipi piyapiꞌsaꞌ aꞌchintocoꞌ. Nisha nisha nananquë nonpisopita aꞌchintocoꞌ imainaco. Insosona natëhuachinaco, iꞌquë aporintocoꞌ. “Tata Yosë, Huiꞌnin, Ispirito Santo inapita nanan quëtërincoi niꞌton, aporintaranquën,” itahuatomaꞌ, aporintocoꞌ.

Hechos 10:36

Iráca israiroꞌsacoi noya nanan shaꞌhuitërincoi. Piyapinënpita pochin nicatoncoi, Yosë anitotërincoi. Oshahuanëhuaꞌ niꞌton, Yosë inimicotopirëhuahuëꞌ, Quisocristo aꞌpaimarin nanan anoyatinpoaso marëꞌ. Inasoꞌ yaꞌipi piyapinpoaꞌ yahuaꞌanëntërinpoaꞌ.

Hechos 2:36

Yosë huiꞌnin chachin iyaroꞌsaꞌ, corosëquë apatanantëramaꞌ. Inapotopiramahuëꞌ, Yosëri noya noya niꞌnin. ‘Inasoꞌ Cristo, aꞌpaimarahuësoꞌ. Sinioro niꞌton, natëcasoꞌ yaꞌhuërin,’ tënin. Noꞌtëquën iyaroꞌsaꞌ nani shaꞌhuitëranquëmaꞌ,” itërin.

Romanos 3:30

Aꞌnaíchin Yosë yaꞌhuërin. Yaꞌipinpoaꞌ napopianachin nosororinpoaꞌ. Cotioroꞌsantaꞌ, nisha piyapiꞌsantaꞌ, Quisocristo imapachinaꞌ, anoyacancantarin.

1 Corintios 1:13

Aꞌnaíchin Cristo yaꞌhuërin imacasoꞌ. ¿Onpoatomataꞌ nipachin nisha nisha imaramaꞌ? ¡Casoꞌ co canpita oshanëma marëꞌ corosëquë patanantërinacohuëꞌ! Aporintohuachinënquëmara, ¿maꞌtaꞌ tënamaꞌ? “Paono imarahuë,” co tënamahuë pora.

1 Corintios 1:2

Corintoquë yaꞌhuëramasopita ninshitaranquëmaꞌ. Canpitantaꞌ Yosë huëntonënquë yaꞌconamaꞌ. Quisocristo imapatamaꞌ, anoyacancantërinquëmaꞌ niꞌton, noyápiachin cancantëramaꞌ. Yosë acorinquëmaꞌ piyapinënpita nicacamaso marëꞌ. Nisha nisha parti aꞌnapitantaꞌ Quisocristo imapi. Yaꞌipinpoaꞌ ina huaꞌanëntërinpoaꞌ. Aꞌna huënton pochin ninëhuaꞌ.

1 Corintios 12:13

Ispirito Santo chachin Quisocristo huëntonënquë ayaꞌconinpoaꞌ. Cotioroꞌsahuë nipon, nisha piyapiꞌsahuë nipon, napopináchin Yosë niꞌninpoaꞌ. Aꞌnaquëmaꞌ canpitaora marëꞌ sacatëramaꞌ. Aꞌnaquëmaꞌ nani tahuëri patronëmaꞌ asacatërinënquëmaꞌ. Nisha nishanpoaꞌ nipirihuahuëꞌ, Ispirito Santo catahuarinpoaꞌ. Quisocristo imarëhuaꞌ niꞌton, huëntonënquë ayaꞌconinpoaꞌ. Aporintohuachinënpoara, aꞌna huëntoínchin ninëhuaꞌ. Yaꞌipi imarëhuasopita Ispirito Santo yaꞌcoancantërinpoaꞌ.

1 Corintios 12:5

Sinioro nohuanton, nisha nisha ninëhuaꞌ aꞌnapita catahuacaso marëꞌ. Nisha nisha nirihuarahuëꞌ, yaꞌipinpoaꞌ Sinioro natërëhuaꞌ.

1 Corintios 8:6

Canpoaso nipirinhuëꞌ Tata Yosëíchin chinotërëhuaꞌ. Yaꞌipi maꞌsha ninin. Ina marëꞌ acorinpoaꞌ. Quisocristoíchin huaꞌanëntërinpoaꞌ. Ina nininpoaꞌ. Nani nichaꞌërinpoaꞌ ina nohuitatëhuaꞌ nanpicaso marëꞌ.

2 Corintios 11:4

Quisocristo imacasoꞌ aꞌchintëranquëmaꞌ. Natëhuatamaꞌ, Ispirito Santo yaꞌcoancantërinquëmaꞌ. Inapitaso nipirinhuëꞌ nisha aꞌchintërinënquëmaꞌ. “Quisocristo nanamën chachin aꞌchintarainquëmaꞌ,” itopirinënquëmahuëꞌ, nisha nanan aꞌchintërinënquëmaꞌ. Nisha ispiritontaꞌ yaꞌhuërin, itërinënquëmaꞌ. Nisha nisha natëcasoꞌ aꞌchintohuachinquëmara, aꞌnaroáchin yaimaramaꞌ.

Gálatas 5:6

Quisocristo imapatëhuaꞌ, co marca yonquiarihuahuëꞌ. Aꞌnaquënsoꞌ nani niacotopi. Aꞌnaquënso nipirinhuëꞌ co niacotopihuëꞌ. Co ina yonquicasoꞌ yaꞌhuërinhuëꞌ. Cancanënpoa quëran huarëꞌ imacasoꞌ yaꞌhuërin. “Quisocristo catahuarinpoaꞌ. Co nonpintarinpoahuëꞌ,” taꞌtëhuaꞌ, yaꞌipi cancanënpoa quëran natëahuaꞌ. Ina natëhuatëhuaꞌ, catahuarinpoaꞌ nóya ninosorocasoꞌ. Ina pochin cancantohuatëhuaꞌ, Yosë noya niꞌsarinpoaꞌ.

Efesios 4:13

Inapohuatëhuaꞌ, yaꞌipinpoaꞌ imarëhuasopita napopináchin yonquiarihuaꞌ. Yosë huiꞌnin chachin nóya nohuitarihuaꞌ. Ina quëran noya noya cancantarihuaꞌ. Soꞌsorëso pochin oshaquëran Quisocristo pochachin cancantacasoꞌ yaꞌhuërin.

Filipenses 2:11

“Quisocristosoꞌ Yosë huiꞌnin niꞌton, yaꞌipiya huaꞌanëntarin,” tëcaponaꞌ. Ina quëran Tata Yosë naꞌcon naꞌcon yonquiarëhua huachi.

Filipenses 3:8

Ina naꞌcon naꞌcon nohuantato, inasáchin yonquirahuë. Iráca cotioroꞌsaꞌ noya niꞌninaco. Huaꞌanoꞌsaquë huarëꞌ noya niꞌpirinacohuëꞌ, Quisocristo imapatëra, aꞌporinaco. Noꞌhuipirinacohuëꞌ, co ina yonquirahuëꞌ. Iráca yonquirahuësoꞌ amoro pochin nicato, co piꞌpisha tërantaꞌ nohuantërahuëꞌ. Quisocristo nohuitaꞌhuasoráchin nohuantërahuë. Ina nohuitacasoꞌ noya noya, tënahuë. Inasáchin huaꞌanëntërinco.

Tito 1:1

Ca Paonoco ninshitaranquën, niꞌquëꞌ. ¿Noya yaꞌhuaran? Noya cantaꞌ yaꞌhuarahuë. Tata Yosë huaꞌanëntërinco niꞌton, inasáchin natërahuë. Quisocristo acorinco nanamën aꞌchinaꞌhuaso marëꞌ. Yosë huayoninpoaꞌ niꞌton, huëntonënquë yaꞌconëhuaꞌ. Nóya natëcaiso marëꞌ aꞌchinarahuë. Noꞌtën nanan aꞌchinaꞌhuaso marëꞌ acorinco. Ina natëhuatëhuaꞌ, noꞌtëquën imasarëhuaꞌ.

Tito 1:4

Titonquën ninshitaranquën. Aꞌchintohuatënquëna natëton, imaran niꞌton, tëhuënchachin huiꞌnahuë pochin niꞌnanquën. Tata Yosë inaora nohuanton, catahuainquën. Asanocancainquën. Quisocristontaꞌ inachachin catahuainquën. Inasoꞌ nichaꞌësarinpoaꞌ.

Hebreos 13:7

Yaꞌnan aꞌchintërinënquëmasopita yonquicoꞌ. Yosë quiricanën noya aꞌchintërinënquëmaꞌ. Chiminaquë huarëꞌ noya nicatonaꞌ, aꞌnapita catahuapi. Napoaton inapita nonanatomaꞌ, noya natëcoꞌ.

Hebreos 6:6

Quisocristo aꞌpohuachinaꞌ, ¿incaricha anoyacancantërëꞌpoiya? Co huachi nanitapihuëꞌ chaꞌëcaisoꞌ. Yosë huiꞌnin chachin canpoa marëꞌ chiminin. Co ina nohuantohuachinahuëꞌ, naquëranchin corosëquë patanantopiso pochin cancantapi. Ina aꞌpohuachinaꞌ, piyapisari Quisoso tëhuaponaꞌ.

Santiago 2:18

Aꞌnaquëmaꞌ tapomaꞌ nimara: “Quëmasoꞌ ‘Yosë imarahuë,’ taꞌton, chinotëran. Caso nipirinhuëꞌ noya ninahuë. Quëmasoꞌ Yosë chinotaponahuëꞌ, co noya nipatanhuëꞌ, topinan quëran nonsaran. Caso nipirinhuëꞌ, noya ninahuëso marëꞌ natërahuësoꞌ yaꞌnoarin,” tapomaꞌ.

1 Pedro 3:21

Inapochachin iporasoꞌ Yosë nichaꞌësarinpoaꞌ. Anoyacancantohuachinpoaꞌ, aporintërinënpoaꞌ. Co nëꞌhuë inquitinënpoaso marëꞌ aporintërinënpoahuëꞌ. Aporintohuachinënpoara, Yosë nontërëhuaꞌ catahuainpoaso marëꞌ. “Yaꞌipi oshanëhuë inquitoco. Catahuaco noyasáchin nicato, noyápiachin cancanchi,” itërëhuaꞌ. Ina marëꞌ anoyacancantërinpoaꞌ. Quisocristo nanpiantarin niꞌton, nichaꞌësarinpoaꞌ.

2 Pedro 1:1

Ca Simon Pitroco ninshitaranquëmaꞌ, niꞌcoꞌ. ¿Noya yaꞌhuaramaꞌ? Noya cantaꞌ yaꞌhuarahuë. Quisocristoíchin huaꞌanëntërinco niꞌton, inasáchin natërahuë. Ina acorinco nanamën aꞌchinaꞌhuaso marëꞌ. Yosë nohuanton, canpitantaꞌ Quisocristo natëramaꞌ. Quiya pochin imaramaꞌ niꞌton, canpitantaꞌ nichaꞌësarinquëmaꞌ. Ma noyacha Quisocristo anoyacancantërinpoa paya, tënëhuaꞌ. Inasoꞌ Yosë niꞌton, chinotërëhuaꞌ. Oshanënpoaꞌ inquitatonpoaꞌ, nóya niꞌninpoaꞌ. Napopianachin nosororinpoaꞌ niꞌton, catahuarinquëmaꞌ canpitantaꞌ cancanëma quëran huarëꞌ natëcamasoꞌ.

Judas 1:20

Canpitaso nipirinhuëꞌ iyaroꞌsaꞌ, Yosë nanamën naꞌcon yonquicoꞌ noya noya imacamaso marëꞌ. Inasáchin noꞌtëquën anitotërinpoaꞌ Yosë pochin cancantacasoꞌ. Naporahuaton, Yosë nontácoꞌ. Ispirito Santo catahuarinquëmaꞌ cancanëma quëran huarëꞌ noya nontacasoꞌ.

Judas 1:3

Carinquëmaꞌ iyaroꞌsaꞌ nosororanquëmaꞌ. Iꞌhuamiáchin yonquirahuë ninshitaꞌhuanquëmaso marëꞌ. Yosë anoyacancantërinpoasoꞌ noya noya yaaꞌchintopiranquëmahuëꞌ, apira nanan natantërahuë. Aꞌnaquënsoꞌ nonpin nanan aꞌchintarinënquëmaꞌ, natantërahuë. Napoaton pënënaꞌhuanquëmasoꞌ yaꞌhuërin, tënahuë. Quisocristo nanamën noꞌtëquën aꞌchintërainquëmaꞌ. Yosë nohuanton, noꞌtëquën ninshitërai yaꞌipi imapisopita nitotacaiso marëꞌ. Nani yaꞌipiya nanamën anitotërinpoaꞌ. Inasáchin natëtomaꞌ, aꞌnapitantaꞌ aꞌchintocoꞌ noꞌtëquën yonquicaiso marë antaꞌ. Ama piꞌpian tërantaꞌ nisha aꞌchintocosohuëꞌ, tënahuë.