Efesios 4:30 - Chayahuita (Shahui)

³⁰ Co noyahuëꞌ nipatamaꞌ, Ispirito Santo sëtarin. Quisocristo imapatamara, sichoquë marca acotërëso pochin Ispirito Santo ayaꞌcoancantërinquëmaꞌ. Ayaroꞌ tahuëriquë huarëꞌ aꞌpaiarinquëmaꞌ. Naporoꞌ noyá nichaꞌësarinquëmaꞌ. Napoaton ama Ispirito Santo asëtocosohuëꞌ.

Efesios 4:30 ပူးပေါင်းရင်းမြစ်များ

Génesis 6:3

Napoaponahuëꞌ, Siniorori co costatonhuëꞌ tapon: “Co piyapiꞌsa yaꞌhuëmiatápaiso yaꞌhuërinhuëꞌ. Piyapi niꞌton, chiminacaiso yaꞌhuërin. Napoaton pasa cato shonca piꞌipiraꞌ, nanpiponaꞌ,” tënin.

Génesis 6:6

Ina nicaton, sëtërin: “Maꞌmarëcha piyapi acorahuë paya. Ataꞌhuanchi nipachin. Yaꞌipi pëꞌtahuaroꞌsaꞌ, anpiantëhuanoꞌsaꞌ, noꞌpaquë niohuaratërinsopita, inapitarë chachin ataꞌhuantarahuë huachi,” tënin.

Isaías 43:24

Co pimo nashinan paꞌanahuatomaꞌ, quëshiamacosoꞌ natananquëmahuëꞌ. Noya nicaꞌhuanquëmaso marëꞌ co maꞌsharoꞌsa tëpatoma tomaquën ahuiquitamaso tërantaꞌ, natananquëmahuëꞌ. Co noyahuëꞌ nicatoma oshahuanamaso tëhuënchinsoꞌ, amiaquë huarëꞌ niꞌnahuë.

Isaías 63:10

Israiroꞌsaso napoaponahuëꞌ, co Sinioro yanatëpihuëꞌ. Inasoꞌ noyasáchin nipirinhuëꞌ, noꞌhuipi. Napotopiso marëꞌ inimiconënpita pochin nicaton, ahuërin.

Isaías 7:13

Naporoꞌ Isaiasëso taantapon: “Tapi copirno shinpitanquëma huaꞌan yaꞌconamasoꞌ, noya natancoꞌ. Canpitaso piyapiꞌsa maꞌsha onpotatomaꞌ, apinamaꞌ. ‘Co ina nanirinhuëꞌ,’ tënëso pochin cancantatomaꞌ, ¿Yosë chachinta yaapinamaꞌ ti?

Oseas 13:14

¡Co carima poꞌoroꞌ quëran nichaꞌësaranquëmahuëꞌ! ¡Piyapinëhuëpita nipiramahuëꞌ, co huachi nosoroaponquëmahuëꞌ! Napoaton chimirin përato: ‘Chimirin. Quëmasoꞌ ataꞌhuantonaꞌpinquën. ¿Intohuata iporasoꞌ inapoyantëransoꞌ?’ itërahuë. Poꞌoronta nontato: ‘Poꞌoroꞌ. Quëmantaꞌ naní quëran tëꞌhuachantërinën. ¿Intohuacha iporasoꞌ tëꞌhuachantërinënsoꞌ?’ itërahuë.

Marcos 3:5

Co aꞌpanitohuachinarahuëꞌ, aꞌnaya aꞌnaya niꞌsarin. Co natantochináchinhuëꞌ cancantopi niꞌton, noꞌhuirë pochin cancantaton, co noyahuëꞌ niꞌnin. “Co nosoropihuëꞌ,” taꞌton, paꞌpi sëtërin. —Imiran iyasha ihuëquëꞌ, itërin. Ihuëhuachina, aꞌnaroáchin noyatërin.

Lucas 21:28

Napoaton nisha nisha quira nisahuachinaꞌ, nisha nisha maꞌsha onporahuachinaꞌ, ama paꞌyancosohuëꞌ. Oꞌmantaꞌhuasoꞌ tahuëri naniriarin niꞌton, nóya cancantatomaꞌ, ninaco. Oꞌmantahuato, noya nichaꞌësaranquëmaꞌ. Yosëꞌpaꞌ quëpantaranquëmaꞌ,” itërin Quisosori.

Juan 3:33

Aꞌnaquënpoaso nipirinhuëꞌ natëtërëhuaꞌ. “Yosë noꞌtëquën nonin. Inari aꞌpaimarin,” taꞌtëhuaꞌ, natëtërëhuaꞌ.

Hechos 7:51

Canpitaso nipirinhuëꞌ co piꞌpisha tërantaꞌ yanatëtëramahuëꞌ. Co natantochináchinhuëꞌ cancantëramaꞌ. Co onporontaꞌ Ispirito Santo yanatëramahuëꞌ. Iráca shimashonëmapita co noyahuëꞌ cancantopi. Inapita quëpatomaꞌ, inapochachin cancantëramaꞌ.

Romanos 8:11

Ispirito Santo yaꞌcoancantërinpoaꞌ. Yosë huaꞌyanën chachin niꞌton, achinicancaninpoaꞌ Yosë pochin cancantacaso marëꞌ. Aꞌna tahuërintaꞌ Yosë ananpitaantarinpoaꞌ. Quisocristo ananpitaantarinsoꞌ pochachin ananpitaantarinpoaꞌ canpoantaꞌ. Nonënpoaꞌ chiminacaso yaꞌhuëpirinhuëꞌ, Ispirito Santo yaꞌcoancantërinpoaꞌ niꞌton, nanpiantarihuaꞌ.

Romanos 8:23

Canpoantaꞌ Ispirito Santo nani yaꞌcoancantopirinpoahuëꞌ, parisitërëhuaꞌ. Parisitatëhuaꞌ, manorëhuaꞌ nasha nonënpoaꞌ yaꞌhuëtinpoaso marëꞌ. Ina ninarëhuaꞌ. Nasha nonënpoaꞌ quëtohuachinpoaꞌ, co huachi caniorihuahuëꞌ. Co huachi chiminarihuahuëꞌ. Naporoꞌ Yosë huiꞌninpita chachin nisarëhuaꞌ.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

1 Corintios 15:54

Nisha nonënpoaꞌ quëtohuachinpoaꞌ, nanpiantarihuaꞌ. Yosë quiricanën quëran ninoton, naporin: “Aꞌna tahuëri Yosëri chimirin minsëarin. Co huachi chiminacasoꞌ yaꞌhuaponhuëꞌ.

1 Tesalonicenses 5:19

Ispirito Santo yaꞌcoancantërinquëmaꞌ. Cancanëmaquë nontohuachinquëmaꞌ, aꞌnaroáchin natëcoꞌ. Niꞌcoꞌ. Pën noya orotohuachina, noya napëntërëꞌ. Inapochachin Ispirito Santo yacatahuarinpoaꞌ noya cancantacaso marëꞌ. Ama pën atacopitërëso pochin nitocosohuëꞌ.

Hebreos 10:29

Yosë huiꞌnin chachin aꞌpohuatamaꞌ, ¡aquë aquëtëꞌ anaꞌintinquëmasoꞌ yaꞌhuërin! Quisocristo canpoa marëꞌ chiminin. Huënainën aꞌparin anoyacancantinpoaso marëꞌ. Inapoaton, nasha quëran anoyatërinso shaꞌhuitërinpoaꞌ imacaso marëꞌ. Aꞌnaquënso nipirinhuëꞌ imapirinahuëꞌ. Ina quëran Quisocristo aꞌpopi. Huënainën quëran anoyacancantopirinhuëꞌ, nisha cancantatonaꞌ, ina huënainën chachin nocanpi. Ispirito Santori nosoropirinhuëꞌ, co piꞌpian tërantaꞌ yanatëpihuëꞌ. Inapitasoꞌ Yosëri chini chiníquën anaꞌintarin.

Hebreos 3:10

Napoaton inapita noꞌhuito, napotërahuë: Isopita co onporontaꞌ natërinacohuëꞌ. Co yanohuitërinacohuëꞌ. Co iranëhuë paꞌtopihuëꞌ niꞌton,

Hebreos 3:17

¿Insopitataꞌ catapini shonca piꞌipi Yosëri co noyahuëꞌ niꞌnin? Coꞌtana inapita chachin oshahuanpi niꞌton, noꞌhuiton, anaꞌintërin. Inotëro parti chachin yaꞌipiya chiminpi.