Efesios 4:25 - Chayahuita (Shahui)

²⁵ Yaꞌipi imarëhuasopita Yosë huëntonënquë chachin yaꞌconëhuaꞌ. Iyanpoa pochin ninëhuaꞌ. Napoaton ama ninonpintahuasohuëꞌ. Noꞌtëquënáchin ninontahuaꞌ.

Efesios 4:25 ပူးပေါင်းရင်းမြစ်များ

Salmos 15:2

Noya nipisopitaráchin nanitopi inaquë yaꞌhuëcaisoꞌ. Aꞌnapita noꞌtëquën yonquirapicaso yaꞌhuërin. Noꞌtën nanansáchin yonquiatëhuaꞌ, noꞌtëquënáchin nonacaso yaꞌhuërin.

Proverbios 6:17

Caso noya noyaco topisopita. Nonpinacasoráchin cancantopisopita. Co maꞌsha onpotopirinahuëꞌ tëpatopisopita.

Proverbios 8:7

Noꞌtën nanan nininsoꞌ shaꞌhuitaranquëmaꞌ. Nonpinacasosoꞌ, co costarincohuëꞌ.

Isaías 63:8

Inapita yonquiaton Sinioro tënin: “Inapitasoꞌ piyapinëhuëpita. Co onporonta nonpintarinacohuëꞌ,” tënin. Napoaton maꞌsha onpotohuachinara, inaora chachin maꞌsha onpotapiso pochin ninatanin. Ina pochin cancantaton nichaꞌësarin. Co aꞌna aꞌpaton nichaꞌësarinhuëꞌ. Inaora chachin paꞌsahuaton nichaꞌësarin. Nosoromiataton inapotarin. Opatëahuatë iporëso pochin nitarin. Iráca quëran huarëꞌ napotërinsoꞌ, inachachin nisárin.

Levítico 19:11

Ama ihuatocosohuëꞌ. Ama nonpincosohuëꞌ. Naporahuaton, ama ninonpintocosohuëꞌ.

Juan 8:44

Sopai huaꞌan mini tataparinquëmasoꞌ. Ina pochin cancantatomaꞌ, inasáchin natëaramaꞌ. Iráca quëran huarëꞌ piyapiꞌsaꞌ tëpanaꞌpi inasoꞌ. Co noꞌtëquën nitononinhuëꞌ niꞌton, co piꞌpisha tërantaꞌ natëcasoꞌ yaꞌhuërinhuëꞌ. Paꞌpi nonpintëꞌ inasoꞌ. Inachin, nonpinacasoráchin cancantërin. Ina nohuanton, nonpinëꞌ.

Romanos 12:5

Inapochachin yaꞌipi Quisocristo imarëhuasopita aꞌnaíchin nonënpoa pochin ninëhuaꞌ. Yaꞌipinpoaꞌ ina imarëhuaꞌ niꞌton, ina pochin ninëhuaꞌ. Nisha nisha nitotërëhuasoꞌ nirihuarahuëꞌ, nicatahuarëhuaꞌ. Aꞌna huëntonaca ninëhuaꞌ.

1 Corintios 10:17

Quisocristo yonquiatëhuaꞌ, ina cosharoꞌ caꞌnëhuaꞌ. Naꞌaquënpoaꞌ nirihuarahuëꞌ, Quisocristo imarëhuaꞌ niꞌton, aꞌna huëntona pochin ninëhuaꞌ. Napopináchin yonquirëhuaꞌ.

2 Corintios 7:14

Coꞌhuara Tito paꞌshátërasohuëꞌ, shaꞌhuitërahuë: “Corintoquë yaꞌhuëpisopita noya imatonaꞌ, natëarinënquën,” itërahuë. Canpita noꞌtëquën nontërainquëmaso pochachin Titontaꞌ noꞌtëquën nontërahuë. Paꞌpachina, tëhuënchachin noya natëramaꞌ niꞌton, co tapanahuëꞌ.

Efesios 4:15

Quisocristo nanamënso nipirinhuëꞌ noꞌtën nanan. Noya ninosoroatëhuaꞌ, inasáchin niaꞌchintahuaꞌ. Inapohuatëhuaꞌ, oshaquëran Quisocristo pochin cancantarihuaꞌ. Inasoꞌ naꞌcon nosoroatonpoaꞌ, huaꞌanëntarinpoaꞌ. Inaora nonën pochachin niꞌninpoaꞌ. Inasoꞌ motënpoa pochin niꞌton, natëcasoꞌ yaꞌhuërin.

Efesios 4:22

Iráca paꞌpi co noyahuëꞌ ninamaꞌ. Noꞌpiramaꞌ, monshihuanamaꞌ, nisha nisha yonquiramaꞌ. Inapohuatamara, “noya cancantarëhuaꞌ,” topiramahuëꞌ, ninonpintëramaꞌ. Co tëhuënchachin noya cancantëramahuëꞌ. Iráca naporamasoꞌ chanatërinso pochin Yosë niꞌninquëmaꞌ. Iporasoꞌ yaꞌipi co noyahuëꞌ yonquiramasopita naniantoco huachi.

Efesios 4:31

Ama aꞌnapita noꞌhuitomaꞌ, yonquirácosohuëꞌ. Aꞌnaroáchin nanan anoyatocoꞌ. Ama noꞌhuitacamasoꞌ nohuantocosohuëꞌ. Ama noꞌhuito canainquëmasohuëꞌ. Ama iquianan quëran ninontocosohuëꞌ. Nipinocasontaꞌ co noyahuëꞌ. Ama piꞌpian tërantaꞌ co noyahuëꞌ nicosohuëꞌ.

Efesios 5:30

Imarëhuasopitasoꞌ inaora nonën pochin niꞌninpoaꞌ niꞌton, aꞌnaya aꞌnayanpoaꞌ nosororinpoaꞌ.

Colosenses 3:8

Iporaso nipirinhuëꞌ isopitantaꞌ co noyahuëꞌ cancantatomaꞌ naporamasopita aꞌpocoꞌ. Ama noꞌhuitocosohuëꞌ. Ama noꞌhuito canainquëmasohuëꞌ. Ama piyapi naponin yonquirapicosohuëꞌ. Ama yanpitocosohuëꞌ. Ama taparoꞌ noncosohuëꞌ.

Colosenses 3:9

Ama ninonpintocosohuëꞌ. Co noyahuëꞌ yonquiramasopita nani aꞌporamaꞌ niꞌton, co ina yonquicasoꞌ yaꞌhuërinhuëꞌ. Mocarinsoꞌ tëꞌyatërëso pochin iráca naporamasopita aꞌpoatomaꞌ, naniantomiatocoꞌ.

1 Timoteo 1:10

Nisha nisha nicacaisoꞌ yonquipi. Saꞌinaꞌ, soꞌinaꞌ inapita yaꞌhuëtaponaraihuëꞌ, monshihuanpi. Quëmapi capini, sanapi capini nisëꞌhuapi. Piyapiꞌsa chachin ihuatopi paꞌanacaiso marëꞌ. Nonpintopi. “Tëhuënchachin noꞌtëquën nonahuë,” taponaraihuëꞌ, nonpinpi. Yosësoꞌ noya nicacasoꞌ aꞌchintopirinpoahuëꞌ, co nohuantopihuëꞌ natëcaisoꞌ. Ina pochin nipisopita tëhuënchinsoꞌ pënënacasoꞌ yaꞌhuërin.

1 Timoteo 4:2

Naporoꞌ nonpinaꞌpiroꞌsaꞌ yaꞌhuaponaꞌ piyapiꞌsaꞌ nonpintacaiso marëꞌ. “Quiyantaꞌ Yosë imarai,” topirinahuëꞌ, co noꞌtëquën nonsapihuëꞌ. Nitotaponaraihuëꞌ, co cancanhuanhuë pochin nicatonaꞌ, co natëtochináchinhuëꞌ cancantapi. Huaꞌquiꞌ sopai natëtonaꞌ, co huachi nanitapihuëꞌ Yosë natëcaisoꞌ. Inapitasoꞌ nisha aꞌchinapi.

Tito 1:12

Tëhuënchachin Crita parti naꞌa nonpinaꞌpiroꞌsaꞌ yaꞌhuëpi. Aꞌna Crita quëmapi chachin iráca tapon: “Critaroꞌsaꞌ yanonpinpi. Niꞌni pochin cancantopi. Chirotëroꞌsaꞌ nicatonaꞌ, cosharoachin cancantopi,” tënin pënëntonaꞌpi.

Tito 1:2

Quisocristo imapatëhuaꞌ, aꞌna tahuëri inápaquë quëpantarinpoaꞌ. Yaꞌhuërinꞌpaꞌ yaꞌhuëmiatarihuaꞌ. “Ananpitaantarinpoaꞌ,” taꞌtëhuaꞌ, ina ninarëhuaꞌ. Yosë iráca coꞌhuara isoroꞌpaꞌ acoyátërasohuëꞌ, ninotonpoaꞌ yonquirinpoaꞌ. Inasoꞌ co onporontaꞌ nonpintërinpoahuëꞌ.

Hebreos 12:1

Iráca quëran huarëꞌ naꞌa piyapiꞌsaꞌ parisitaponaraihuëꞌ, imamiatopi. “Yosë catahuarinpoaꞌ,” taꞌtonaꞌ, natëpi. Napoaton inapita yonquiatëhuaꞌ, canpoantaꞌ nóya imahuaꞌ. Niꞌcoꞌ. Quëmapiꞌsaꞌ nicanacaiso marëꞌ taꞌahuachinara, chiníquën taꞌapi. Co mantaꞌ quëpapihuëꞌ. Torosarëáchin taꞌapi. Naporopi aꞌmopisoꞌ co ocoihuachinahuëꞌ, co nanitopihuëꞌ chiníquën taꞌacaisoꞌ. Inapochachin canpoantaꞌ naporopi aꞌmopisoꞌ ocoipiso pochin yaꞌipi oshanënpoaꞌ naniantahuaꞌ. Co noyahuëꞌ yonquirëhuasopita naniantatëhuaꞌ, yaꞌipi cancanënpoa quëran Quisocristo imahuaꞌ. Sacaiꞌ nipirinhuëꞌ, ahuantatëhuaꞌ, noya imahuaꞌ.

Santiago 1:21

Napoaton yaꞌipi co noyahuëꞌ yonquiramasopita naniantocoꞌ. Ama huachi oshahuancosohuëꞌ. Yosë nanamën nani aꞌchintërinënquëmaꞌ. “Caora Sinioro co nanitërahuëꞌ noya nicaꞌhuasoꞌ. Catahuaco,” taꞌtomaꞌ, nanamën yonquirácoꞌ. Ina yonquihuatamaꞌ, nichaꞌësarinquëmaꞌ.

1 Pedro 2:1

Yaꞌipi co noyahuëꞌ yonquiramasopita naniantocoꞌ. Ama iyaroꞌsaꞌ ninonpintocosohuëꞌ. Aꞌnaquën noyasha nonaponaraihuëꞌ, poꞌoana quëran co noyahuëꞌ nipi. Ama ina pochin nicosohuëꞌ. Yaꞌipi cancanëma quëran noꞌtëquën ninontocoꞌ. Aꞌnapita noya yaꞌhuëhuachinaꞌ, ama noyapatocosohuëꞌ. Ama pinotocosohuëꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Apocalipsis 22:15

Aꞌnaquënso nipirinhuëꞌ, co onporontaꞌ Yosë yaꞌhuërinquë paꞌsapihuëꞌ. Niꞌni pochin cancantopisopita, pënotonoꞌsaꞌ, monshihuanaꞌpiroꞌsaꞌ, tëpatoroꞌsaꞌ, mamanshi chinotopisopita, inapita aipiran yaꞌhuëmiatapi. Aꞌnaquëontaꞌ nonpinápi niꞌton, co nohuantapihuëꞌ noꞌtën nanan imacaisoꞌ. Inapitantaꞌ co onporontaꞌ Yosëꞌpaꞌ paꞌsapihuëꞌ.

Jueces 16:11

—Nasha caporin co maꞌmarë tëranta camaipinanhuë nininquë tonpohuachinaco, co huachi chiniarahuëꞌ. Piyapimia pochin nicato inapoarahuë, itërin Sansoni.