Efesios 4:10 - Chayahuita (Shahui)

¹⁰ Quisocristo chachin isoroꞌpaquë oꞌmarahuaton, inápaquë panantarin. Yosë yaꞌhuërinquë chachin panantarahuaton, huaꞌyanën chachin aꞌpatimarinpoaꞌ yaꞌcoancantinpoaso marëꞌ. Yaꞌipi parti yaꞌhuaton, yaꞌipi huaꞌanëntarin.

Efesios 4:10 ပူးပေါင်းရင်းမြစ်များ

Mateo 24:34

Noꞌtëquën shaꞌhuitëranquëmaꞌ. Coꞌhuara cotioroꞌsaꞌ huënton taꞌhuanchatërasoihuëꞌ, nani maꞌsha onporapi.

Lucas 24:44

—Nani iꞌhua chachin iyaroꞌsaꞌ shaꞌhuitëranquëmaꞌ. Yosë quiricanënquë naꞌcon ninorinaco. Moisësë, pënëntonaꞌpiroꞌsaꞌ, inapita ninorinaco. Sarmoquëntaꞌ ninshitopi. Yaꞌipi iráca ninorinacosopita nanicasoꞌ yaꞌhuërin niꞌton, iso tahuëriꞌsaꞌ ina pochin ninahuë, itërin.

Juan 1:16

Inasoꞌ paꞌpi nosororinpoaꞌ. Nóya niꞌton, nosoroatonpoaꞌ, naꞌcon catahuarinpoaꞌ. Co canpoara nanitopirëhuahuëꞌ, ina imapatëhuaꞌ, nani tahuëri catahuarinpoaꞌ.

Juan 19:24

—Ama oshahuasohuëꞌ. Huëcoꞌ yaꞌnipitëhuaꞌ nicanahuaꞌ, taꞌtonaꞌ yaꞌnipirapi. Inaporahuatonaꞌ, aꞌnari manin. Iráca Yosë quiricanënquë ninoton, tapon: “Aꞌmorahuësoꞌ nipatomatapi. Acopotërahuëso macacaiso marëntaꞌ nicanarapi,” tënin ninshitaton. Naporinso chachin mapi.

Juan 19:28

Quisoso nontahuatoncoi: “Nani yaꞌipi Yosë shaꞌhuitërincosoꞌ natërahuë,” tënin yonquinënquë. Ina quëran, Yosë quiricanënquë ninorinso nanicaso marëꞌ: —Yamororahuë, tënin.

Juan 19:36

Iráca Yosë quiricanënquë ninshitërin: “Co aꞌna nansëquën tërantaꞌ nipantapihuëꞌ,” tënin. Naporinso chachin co inasoꞌ nipantopihuëꞌ.

Hechos 1:11

—¿Maꞌmarëtaꞌ caririaroꞌsanquëmaꞌ inápaquë nëꞌpëtëramaꞌ? Quisoso nani pantarin. Yosëri inápaquë quëpantapirinhuëꞌ, ina chachin oꞌmantararin. Inápaquë paꞌninso pochachin aꞌna tahuëri oꞌmantararin, itërin.

Hechos 1:9

Ina topachina, Yosëri inápaquë quëpantarin. Caꞌtanoꞌsanënpitari nicasoiꞌ, inápaquë pantarin. Nëꞌpërápirinahuëꞌ, chitorori imotërin. Co huachi quënanpihuëꞌ.

Hechos 2:33

Ina quëran Yosëri inápaquë quëpantarin. Chiníquën nanantërin niꞌton, inchinanën quëran ahuënsërin. Inapotahuaton, shaꞌhuitërin: ‘Ispirito Santo aꞌpamaquëꞌ piyapiꞌsaꞌ yaꞌcoancanchin. Iꞌhua shaꞌhuitëranquënsoꞌ,’ itërin. Ina quëran Quisosori Ispirito Santo aꞌpaimarin, yaꞌcoancantërincoi, niꞌnamaꞌ. Napoaton nisha nisha nananquë nonai, natanamaꞌ.

Hechos 3:18

Iráca pënëntonaꞌpiroꞌsaꞌ ninotonaꞌ, ninshitopi. ‘Aꞌna tahuëri Cristo parisitapon,’ topi. Yosë nohuanton, ninopi. Ninopiso pochachin parisitërin.

2 Corintios 12:2

Naporoꞌ inápaquë Yosë yaꞌhuërinquë chachin quëparinco. Nani shonca catapini piꞌipitarin quëparincosoꞌ. Huaꞌyanëhuëichin aꞌnaꞌ paꞌmara. Nonëhuëroꞌco chachin aꞌnaꞌ paꞌmaraco. Co casoꞌ nitotërahuëꞌ. Yosëíchin nitotërin.

Colosenses 1:19

Quisocristosoꞌ Yosë huiꞌnin niꞌton, Yosë chachin antaꞌ. Co piꞌpisha tërantaꞌ pahuantërinhuëꞌ paꞌpin pochin nicacasoꞌ. Tata Yosë nohuanton, naporin.

Colosenses 2:9

Quisocristoíchin natëcasoꞌ yaꞌhuërin. Piyapi chachin niponahuëꞌ, Yosë chachin ninin antaꞌ. Co mantaꞌ pahuantërinhuëꞌ Yosë pochin nicacasoꞌ.

1 Timoteo 3:16

Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ. Yosë huiꞌnin isoroꞌpaquë oꞌmaton, piyapi chachin nasitimarin. Ispirito Santo chachin anitotërinpoaꞌ Yosë huiꞌnin nininsoꞌ. Nanpiantahuachina, anquëniroꞌsarintaꞌ quënanpi. Imapisopitari yaꞌipi parti paatonaꞌ, nanamën shaꞌhuiraꞌpiapi. Naꞌa piyapiꞌsaꞌ natëpi. Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.

Hebreos 4:14

Iporasoꞌ Quisoso imarëhuaꞌ. Yosë huiꞌnin chachin inasoꞌ. Nani inápaquë panantarahuaton, Yosëꞌpaꞌ yaꞌhuarin. Corto huaꞌan chini chiníquën nanantërinso pochin Yosëri acorin catahuainpoaso marëꞌ. Napoaton ama ina naniantatëhuahuëꞌ, imamiatahuaꞌ.

Hebreos 7:26

Quisocristoíchin nanan anoyatërinpoaꞌ. Inasoꞌ corto huaꞌan chini chiníquën nanantërinso pochin nicaton, nóya ninin. Co piꞌpian tërantaꞌ oshahuaninhuëꞌ. Co nëꞌhuëtërinso pochin nininhuëꞌ. Co oshahuanoꞌsa pochin cancantërinhuëꞌ. Inápaquë panantahuachina, Yosëri chini chiníquën nanan quëtërin.

Hebreos 8:1

Noꞌtëquën shaꞌhuitaranquëmaꞌ. Quisocristo inápaquë panantarahuaton, Yosë inchinanën quëran chachin huënsërin. Corto huaꞌan chini chiníquën nanantërinso pochin niꞌton, nanan anoyatërinpoaꞌ.