Efesios 3:1 - Chayahuita (Shahui)

¹ Napoaton isonahuato, canpita marëꞌ Yosë nontarahuë. Nisha piyapiꞌsanquëmaꞌ nipomarahuëꞌ, Quisocristo nanamën aꞌchintëranquëmaꞌ niꞌton, tashinan pëiquë poꞌmorinaco.

Efesios 3:1 ပူးပေါင်းရင်းမြစ်များ

Lucas 21:12

Coꞌhuara maꞌsha onpoyatërasohuëꞌ, co noya piyapiꞌsahuëꞌ masarinënquëmaꞌ. Imaramacoso marëꞌ aparisitarinënquëmaꞌ. Cotio niyontonpiso pëiquë shaꞌhuirapiarinënquëmaꞌ. Tashinan pëiquë poꞌmorarinënquëmaꞌ. Imaramacoso marëꞌ copirno yaꞌhuërinquëntaꞌ quëpararinënquëmaꞌ.

Hechos 21:33

Capitan huaꞌani canconahuaton, Paono maconin. “Catoꞌ catinaquë tonpotanpatëquëꞌ,” itohuachina, aꞌna sontarori nitonpotanpatërin. Aꞌna tanpain quëraontaꞌ aꞌna sontarori inapotërin. Inapotohuachinara, capitansoꞌ piyapiꞌsaꞌ natanin: “¿Maꞌnintaꞌ iso quëmapi? ¿Maꞌtaꞌ onporinsoꞌ?” tënin.

Hechos 23:18

Napohuachina, huaꞌanënquë quëparahuaton, itonin: —Sontaroꞌsaꞌ yaꞌhuëpiquë Paono amatërinco. “Iso huiꞌnapi huaꞌanënquë quëpaquëꞌ nanan shaꞌhuichin,” itërinco niꞌton, quënahuë, itërin.

Hechos 26:29

—Paꞌpi nohuantërahuë ca pochachin nicamasoꞌ. Yaꞌipinquëmaꞌ natanamacosopita ca pochachin nicacamasoꞌ nohuantopirahuëꞌ. Catinaquëachin tonpoinëmasoꞌ co nohuantërahuëꞌ. Aꞌnaroáchin imarama naporini, noya niitonhuëꞌ. Huaꞌqui quëran imapatamantaꞌ, noya chachin niitonhuëꞌ, itërin Paonori.

Hechos 9:15

“Iꞌhua mini co noyahuëꞌ yonquipirinhuëꞌ, nani huayonahuë ca nanamëhuë aꞌchinacaso marëꞌ. Nisha nisha piyapiꞌsaꞌ aꞌchintarin imainacoso marëꞌ. Huaꞌanoꞌsanënpitantaꞌ shaꞌhuitarin. Israiroꞌsantaꞌ aꞌchintarin imainacoso marëꞌ.

2 Corintios 1:6

Canpitantaꞌ Yosë nohuitacamaso marëꞌ aꞌchintërainquëmaꞌ. Ina marëꞌ aparisitërinacoi. Parisitapiraihuëꞌ, Yosë achinicancanincoi ahuantaꞌhuaiso marëꞌ. Yosë catahuarinquëmaꞌ canpitantaꞌ, tënai. Parisitopiramahuëꞌ achinicancanarinquëmaꞌ quiya pochachin ahuantamaso marëꞌ.

2 Corintios 10:1

Ca Paonoco sanoanan quëran pënënanquëmaꞌ. Aꞌnaquën napopi: “Paono aquë quëran ninshitohuachinpoara, chiníquën nanan aꞌpatirinpoaꞌ. Isëquë chachin yaꞌhuapon, tëꞌhuatatonpoaꞌ, co chiníquën pënëninpoahuëꞌ,” topi natantërahuë. Quisocristosoꞌ chiníquën nanantaponahuëꞌ, co noꞌhuirinpoahuëꞌ. Sanoanan quëran pënëninpoaꞌ. Ina pochin cancantato, cantaꞌ sanoanan quëran pënënanquëmaꞌ.

2 Corintios 11:23

“Quisocristo shaꞌhuitërincoi niꞌtoi, natërai,” itopirinënquëmahuëꞌ. ¡Casoꞌ naꞌcon naꞌcon natërahuë! Inapitasoꞌ nocaninaco niꞌton, huaꞌyantërinso pochin nonato, piꞌpian inapita pochin nonchinquëmaꞌ noꞌtëquën yonquicamaso marëꞌ. Yosë marëꞌ casoꞌ chini chiníquën sacatërahuë. Paꞌsápato, Yosë nanamën aꞌchinahuë. Ina marëꞌ naꞌcon naꞌcon parisitaporahuëꞌ, ahuantërahuë. Inantaꞌ shaꞌhuichinquëmaꞌ. Aꞌchinahuëso marëꞌ naꞌaroꞌ tashinan pëiquë poꞌmorinaco. Naꞌaroꞌ ahuërinaco. Shitëparinaco.

Gálatas 5:11

Aꞌnaquën nonpinapirinaco. —Paonontaꞌ quiya pochin aꞌchinin. “Marca niacotocoꞌ. Co iráca pënëntërinsoꞌ natëhuatamahuëꞌ, co Yosë noya niꞌsarinquëmahuëꞌ,” tënin Paonontaꞌ, toconpi. Co napopirahuëꞌ, nonpinapirinaco. Ina pochin aꞌchinahuë naporini, co cotioroꞌsaꞌ noꞌhuiitonacohuëꞌ. “Quisocristo corosëquë chiminin. Inasáchin imapatëhuaꞌ, anoyacancantarinpoaꞌ,” itërahuëso marëꞌ ipora huantaꞌ aparisitarinaco.

Gálatas 5:2

Ca Paonoco noꞌtëquën shaꞌhuitëranquëmaꞌ. Marca niacotohuatamaꞌ, co Quisocristoíchin yonquiaramahuëꞌ. Ina quëran co anoyacancantarinquëmahuëꞌ.

Gálatas 5:24

Quisocristo corosëquë chiminaton, oshanënpoaꞌ inquitërinpoaꞌ. Napoaton canpoantaꞌ ina imapatëhuaꞌ, co noyahuëꞌ yonquirëhuasopita corosëquë patanantatë pochin nitatëhuaꞌ, naniantacasoꞌ yaꞌhuërin. Co huachi nohuantarihuahuëꞌ sopai pochin cancantacasoꞌ.

Efesios 3:11

Iráca quëran huarëꞌ Yosë yonquirinpoaꞌ imacaso marëꞌ. Quisocristo oꞌmaton, huëntonënquë ayaꞌconinpoaꞌ. Inasáchin huaꞌanëntërinpoaꞌ.

Efesios 3:13

Aꞌchintëranquëmaꞌ niꞌton, tashinan pëiquë poꞌmorinaco. Parisitapirahuëꞌ, chiníquën cancantocoꞌ. Canpitantaꞌ Quisocristo imacamaso marëꞌ parisitërahuë. Ina marëꞌ noya cancantacasoꞌ yaꞌhuërin.

Efesios 3:8

Casoꞌ aꞌnapita imapisopita quëran naꞌcon naꞌcon co noyahuëꞌ nipirahuëꞌ, anoyacancantërinco. Ina quëran nosoroatonco, acorinco nisha piyapiꞌsaꞌ shaꞌhuitaꞌhuaso marëꞌ. Quisocristo nanamënsoꞌ noyápiachin. Ma inacha niꞌton, nosoromiatërinpoa paya, tënahuë yonquiato.

Efesios 4:1

Quisocristo nanamën aꞌchinahuëso marëꞌ tashinan pëiquë poꞌmopirinacohuëꞌ, iporahuantaꞌ pënënáranquëmaꞌ. Yosë nichaꞌëtënquëmaꞌ, huëntonënquë ayaꞌconinquëmaꞌ. Napoaton noyasáchin nicoꞌ.

Efesios 6:20

Quisocristo chachin aꞌparinco aꞌchintaꞌhuaso marëꞌ. Ina marëꞌ tashinan pëiquë poꞌmorinaco. Poꞌmopirinacohuëꞌ, Yosë nontocoꞌ ama tëꞌhuaisohuëꞌ. Chiníquën cancantato, aꞌninquëchin aꞌchintaꞌhuasoꞌ yaꞌhuërin.

Filipenses 1:7

Naꞌcon nosororanquëmaꞌ niꞌton, ina pochin noya yonquiranquëmaꞌ. Iráca Quisocristo nanamën aꞌchinpatëra, catahuaramaco. Tashinan pëiquë poꞌmohuachinacorantaꞌ, co naniantëramacohuëꞌ. Inaquëntaꞌ catahuaramaco. Imarahuëso marëꞌ shaꞌhuirapirinaco. Coisëquë quëpapirinacohuëꞌ, co tapanatohuëꞌ, Yosë nanamën noꞌtëquën shaꞌhuitërahuë. Canpitantaꞌ “Yosë catahuarinpoaꞌ,” taꞌtomaꞌ, co tapanaramahuëꞌ. Napoaton canpita yonquiatënquëmaꞌ, noya cancantërahuë. Iyahuëpita pochachin niꞌnanquëmaꞌ.

Colosenses 1:24

Imarëhuasopita marëꞌ Quisocristo chiníquën parisitërin. Parisitaton, huëntonënquë ayaꞌconinpoaꞌ. Ina quëran imarëhuasopitantaꞌ parisitacasoꞌ yaꞌhuërin aꞌnapitantaꞌ imacaiso marëꞌ. Napoaton ipora cantaꞌ parisitarahuë canpitantaꞌ imacamaso marëꞌ. Parisitaporahuëꞌ, noya cancantërahuë.

Colosenses 4:18

Ca Paonoco naꞌcon yonquiatënquëmaꞌ, saludos aꞌpataranquëmaꞌ. Caora imirahuë quëran isoíchin ninshitaranquëmaꞌ. Tashinan pëiquë yaꞌhuarahuë. Ama naniantocosohuëꞌ. Yosë inaora nohuanton, noya catahuainquëmaꞌ. Nani ninshitëranquëma huachi. Paono

Colosenses 4:3

Quiya marëntaꞌ Yosë nontocoꞌ. Paꞌsápato, Quisocristo nanamën aꞌchinpirahuëꞌ. Ina marëꞌ tashinan pëiquë poꞌmorinaco. Naꞌa piyapiꞌsaꞌ co nanamën nitochátërapihuëꞌ. Inahuantaꞌ nitochinaꞌ. Napoaton Yosë nontohuatamaꞌ, quiya marëntaꞌ nontocoꞌ catahuaincoi aꞌchintohuatoira, Yosë nanamën nohuanchinaꞌ.

2 Timoteo 1:16

Onisiporoso nipirinhuëꞌ, co naniantërincohuëꞌ. Nomaquë huëꞌsahuaton, yonisápatonco, quënaninco. Co tapanatonhuëꞌ, tashinan pëiquë niꞌquirinco. Naꞌaroꞌ achinicancaninco. Ina marëꞌ yaꞌipi pëinënquë yaꞌhuërinsopita Siniorori naꞌcon catahuain, tënahuë.

2 Timoteo 1:8

Ama tapanatonhuëꞌ, Sinioro nanamën aꞌchináquëꞌ. Ina aꞌchinahuëso marëꞌ tashinan pëiquë poꞌmorinaco. Ama ina marëntaꞌ tapanquësohuëꞌ. Quëmantaꞌ aꞌchinanso marëꞌ aparisitohuachinënquën, chiníquën cancantëquëꞌ. Napohuatan, Yosë catahuarinquën noya ahuantamasoꞌ.

Filemón 1:1

Iya Pirimon, ca Paonoco ninshitaranquën, niꞌquëꞌ. ¿Noya quëmantaꞌ yaꞌhuaran? Noya cantaꞌ yaꞌhuarahuë. Quisocristo nanamën aꞌchinahuëso marëꞌ tashinan pëiquë poꞌmorinaco. Iya Timotioroꞌco nanan aꞌpatarainquën. Nosororainquën iyasha. Quëmantaꞌ catahuarancoi aꞌchinaꞌhuaiso marëꞌ.

Filemón 1:23

Iya Ipapërasë saludos aꞌpatarinquën. Inantaꞌ Quisocristo imarin niꞌton, tashinan pëiquë yaꞌhuarin.

Filemón 1:9

Nani casoꞌ mashotërahuë. Quisocristo imarahuëso marëꞌ tashinan pëiquë poꞌmorinaco. Napoaton iyasha nosoroatanco, Onisimontaꞌ nosoroquëꞌ, tënahuë. Tashinan pëiquë yaꞌhuasoco, inasoꞌ niꞌquirinco. Co huiꞌnahuë chachinhuëꞌ nipirinhuëꞌ, pënënpatëra, inantaꞌ Quisocristo imarin niꞌton, huiꞌnahuë pochin niꞌnahuë.

Apocalipsis 2:10

Ipora tahuëriꞌsaꞌ naꞌcon parisitapiramahuëꞌ, ama tëꞌhuacosohuëꞌ. Sopai nohuanton, tashinan pëiquë poꞌmoarinënquëmaꞌ. Yosë aꞌpocamaso marëꞌ napotarinënquëmaꞌ. Shonca tahuëri pochin parisitaramaꞌ. Tëpapirinënquëmaontaꞌ, ama aꞌpocosohuëꞌ. Imamiatohuatamaco, inápaquë acanaranquëmaꞌ. Inatohuaꞌ nanpimiataramaꞌ.