Efesios 2:3 - Chayahuita (Shahui)

³ Iráca yaꞌipinpoaꞌ co Yosë natërëhuahuëꞌ. Co noyahuëꞌ yonquiatëhuaꞌ, co noyahuëꞌ ninëhuaꞌ. Canpoara nohuantërëhuasoráchin ninëhuaꞌ. Yanoꞌhuitohuatëhuara, noꞌhuitërëhuaꞌ. Yanoꞌpihuatëhuara, noꞌpirëhuaꞌ. Yaahuëtohuatëhuara, ahuëtërëhuaꞌ. Ina marëꞌ yaꞌipinpoaꞌ anaꞌintinpoasoꞌ yaꞌhuërin.

Efesios 2:3 ပူးပေါင်းရင်းမြစ်များ

Génesis 5:3

Atan pasa cara shonca piꞌipitasoꞌ, huiꞌnin nasitërin. Nasitohuachina, Sito itopi. Inasoꞌ, paꞌpin noyá quëparin.

Génesis 6:5

Napoaponaraihuëꞌ, paꞌpi co noyahuëꞌ cancantopi. Co noyahuëꞌ nicacaisoráchin yonquipi niꞌton, Yosëri co noyahuëꞌ niꞌnin.

Génesis 8:21

Maꞌsharoꞌsa ahuiquitërinso pimóchin imërahuaton, Yosëri nóya niꞌnin. Naporoꞌ inaso tapon: “Huaꞌhuatapona quëran huarëꞌ piyapiꞌsaꞌ, co noyahuëꞌ nicacaisoráchin cancantopi. Inaso niponahuëꞌ, co huachi ipora anaꞌintërahuëso pochin, isoroꞌpaꞌ anaꞌintaantapohuëꞌ. Co huachi maꞌsharoꞌsanta inapotapohuëꞌ.

Copo naporinso' 14:4

Piyapicoi co aꞌnayacoi tëranta noyápiachin cancantëraihuëꞌ. Ina pochin nininso huiꞌnarinco niꞌton, nëꞌhuëtërahuëso pochin cancantërahuë.

Salmos 51:5

Tëhuënchachin huaꞌhuatapo quëran huarëꞌ, co noyahuëꞌ cancantërahuë. Mamahuë yoꞌnamënquë yaꞌhuëasoco quëran huarëꞌ, oshahuanchináchin cancantërahuë.

Isaías 53:6

Yaꞌipinpoa ohuicaroꞌsa chihuëpiso pochin ninëhuaꞌ. Canpoara yonquirëhuaso imatëhua naporëhuaꞌ. Napopirëhuahuëꞌ, Siniorori co noyahuëꞌ ninëhuaso marëꞌ inasá aparisitarin.

Marcos 4:19

maꞌsharáchin yonquipi. ‘Naꞌa coriqui, maꞌsha, inapita yaꞌhuëtohuachincoi, noya cancantarai,’ topi. Napoaton nahuanoꞌsari imotërinso pochin, nani maꞌsha nohuantatonaꞌ, Yosë nanamën naniantopi. Co imamiatopihuëꞌ.

Juan 1:13

Yaꞌipinpoaꞌ piyapi quëran nasitërëhuaso nipirëhuahuëꞌ, co ina quëran Yosë huëntonënquë yaꞌconëhuahuëꞌ. Co piyapi nanitërinhuëꞌ ayaꞌcoꞌinpoasoꞌ. Co canpoara nohuanton, yaꞌconëhuahuëꞌ. Yosëíchin ayaꞌconinpoaꞌ. Ina quëran huiꞌninpita pochin niꞌninpoaꞌ.

Juan 8:44

Sopai huaꞌan mini tataparinquëmasoꞌ. Ina pochin cancantatomaꞌ, inasáchin natëaramaꞌ. Iráca quëran huarëꞌ piyapiꞌsaꞌ tëpanaꞌpi inasoꞌ. Co noꞌtëquën nitononinhuëꞌ niꞌton, co piꞌpisha tërantaꞌ natëcasoꞌ yaꞌhuërinhuëꞌ. Paꞌpi nonpintëꞌ inasoꞌ. Inachin, nonpinacasoráchin cancantërin. Ina nohuanton, nonpinëꞌ.

Hechos 14:16

Iráca piyapiꞌsaꞌ co Yosë nohuitopihuëꞌ niꞌton, Yosëri tananpitërin inahuara yonquipisoꞌ imacaiso marëꞌ.

Romanos 1:24

Napoaton Yosëri tananpitërin co noyahuëꞌ yonquipisopita nicacaiso marëꞌ. Aꞌporin. Aꞌpohuachina, paꞌpi co noyahuëꞌ nipi. Taparosáchin yonquiatonaꞌ, nisëꞌhuapi. Co ina pochin nisëꞌhuacasohuëꞌ nipirinhuëꞌ.

Romanos 11:30

Iráca co canpitasoꞌ natëpiramahuëꞌ, co israiroꞌsaꞌ nohuantopihuëꞌ niꞌton, Yosë nosoroatënquëmaꞌ, catahuarinquëmaꞌ.

Romanos 13:14

Sontaroꞌsaꞌ huaꞌna aꞌmopiso pochin Quisocristo yaꞌcopirinpoaꞌ ama sopai minsëinpoaso marëhuëꞌ. Napoaton Quisocristo naꞌcon yonquiatomaꞌ, ina pochachin cancantocoꞌ. Ina natëtomaꞌ, ama piꞌpian tërantaꞌ yonquicosohuëꞌ co noyahuëꞌ nicacamaso marëꞌ.

Romanos 2:14

Nisha piyapiꞌsasoꞌ co Moisësë pënëntërinsoꞌ nitotopihuëꞌ. Co nitotaponaraihuëꞌ, aꞌnaquën noya nipi. Inahuara cancanëna quëran nitotopi niꞌton, napopi.

Romanos 5:10

Iráca oshahuanatëhuaꞌ, Yosë inimicotopirëhuahuëꞌ, huiꞌnin chiminin niꞌton, nanan anoyatërinpoaꞌ. Iporasoꞌ noya nipayarëhuaso pochin ninëhuaꞌ niꞌton, noya noya catahuarinpoaꞌ. Nanpiantarin niꞌton, catahuarinpoaꞌ noya chaꞌëcahuaso marëꞌ.

Romanos 5:9

“Corosëquë huënainën paꞌnin. Oshanënpoa marëꞌ chiminin,” topatëhuaꞌ, Yosë noya niꞌsarinpoaꞌ. Napoaton ayaroꞌ tahuërintaꞌ catahuarinpoaꞌ. Naporoꞌ tahuëri co noyahuëꞌ nipisopita chiníquën anaꞌintarin. Imarëhuasopitaso nipirinhuëꞌ, co anaꞌintarinpoahuëꞌ. Quisocristo chachin nichaꞌësarinpoaꞌ.

Romanos 6:12

Ama oshanëma huaꞌanëntatë pochin nitatënquëmaꞌ camayápainquëmaso nohuantocosohuëꞌ. Yaꞌipi co noyahuëꞌ yonquiramasopita naniantatomaꞌ, noyasáchin yonquicoꞌ.

Romanos 7:18

Caora co noyahuëꞌ cancantërahuë. Co nanitërahuëꞌ noya nicaꞌhuasoꞌ. Inachinco. Yosë yanatëpirahuëꞌ, caora co nanitërahuëꞌ natëcaꞌhuasoꞌ.

Romanos 9:22

Aꞌnaquën co natëpihuëꞌ niꞌton, Yosëri noꞌhuirin. Noꞌhuipiroꞌ nipirinhuëꞌ, co aꞌnaroáchin anaꞌintërinhuëꞌ, ninararin. Co aꞌnaroáchin anaꞌintohuachinahuëꞌ, co ina marëꞌ Yosë noꞌhuicasoꞌ yaꞌhuërinhuëꞌ. Oshaquëran anaꞌintarin. Ina niꞌpachinaꞌ, “Tëhuënchachin Yosë noꞌtëquën yonquirin. Huaꞌquiꞌ tananpitopirinhuëꞌ, iporasoꞌ noꞌtëquën anaꞌintërin. Chini chiníquën nanantërin inasoꞌ,” tosapi.

1 Corintios 4:7

Yosë nohuanton, nisha nisha nitotërëhuaꞌ. Co canpoara nohuanton, nitotërëhuahuëꞌ. Yosëíchin catahuarinpoaꞌ noya noya nicacasoꞌ. Co catahuarinpoahuëꞌ naporini, co mantaꞌ nitochitërihuahuëꞌ. Napoaton co nocantacasoꞌ yaꞌhuërinhuëꞌ.

2 Corintios 7:1

Iyaroꞌsa naꞌcon nosororanquëmaꞌ. Ina pochin Yosë yonquirinpoa niꞌton, yaꞌipi co noyahuëꞌ yonquirëhuasopita naniantahuaꞌ. Yaꞌipi co noyahuëꞌ ninëhuasopitantaꞌ aꞌpoaꞌahuaꞌ. Yosë tëꞌhuatatëhuaꞌ, noyasáchin niahuaꞌ.

Gálatas 3:22

Nipirinhuëꞌ, co insontaꞌ nanitërinhuëꞌ noꞌtëquën natëcasoꞌ. Yaꞌipinpoaꞌ oshahuanëhuaꞌ. Ina marëꞌ anaꞌintinpoasoꞌ yaꞌhuërin, tënin Yosë quiricanën quëran. Napoaton Quisocristoráchin nanitaparin anoyacancantinpoasoꞌ. Inasáchin imapatëhuaꞌ, Yosë noya niꞌsarinpoaꞌ.

Efesios 2:2

Coꞌhuara Quisocristo imashatërapomahuëꞌ, sopai huaꞌan natëtomaꞌ, co noyahuëꞌ ninamaꞌ. Inasoꞌ ihuan yaꞌhuërinquë yaꞌhuaton, yaꞌipi sopairoꞌsaꞌ huaꞌanëntarin. Co quënanpirëhuahuëꞌ, isoroꞌpaquë sacatárin minsëinpoaso marëꞌ. Yonquinëmaquë camairinquëmaꞌ niꞌton, co Yosë natëramahuëꞌ.

Efesios 4:22

Iráca paꞌpi co noyahuëꞌ ninamaꞌ. Noꞌpiramaꞌ, monshihuanamaꞌ, nisha nisha yonquiramaꞌ. Inapohuatamara, “noya cancantarëhuaꞌ,” topiramahuëꞌ, ninonpintëramaꞌ. Co tëhuënchachin noya cancantëramahuëꞌ. Iráca naporamasoꞌ chanatërinso pochin Yosë niꞌninquëmaꞌ. Iporasoꞌ yaꞌipi co noyahuëꞌ yonquiramasopita naniantoco huachi.

Colosenses 1:21

Iráca canpitasoꞌ co Yosë yonquiramahuëꞌ. Co noyahuëꞌ cancantatomaꞌ, Yosë inimicotëramaꞌ. Co noyahuëꞌ ninamaꞌ.

1 Tesalonicenses 4:13

Chiminpisopita maꞌsona onpocaisoꞌ aꞌchinchinquëmaꞌ, nitotocoꞌ. Quisoso imarëhuasopita chiminpatëhuaꞌ, nanpiantarihuaꞌ. Co imapisopitasohuëꞌ nipirinhuëꞌ, quëmopinënpita chiminpachinara, sëtopi. “Co onporontaꞌ quënantarihuahuëꞌ,” taꞌtonaꞌ sëtápi. Ama inapita pochin sëtacaso marëhuëꞌ canpitasoꞌ aꞌchinchinquëmaꞌ.

1 Tesalonicenses 5:6

Napoaton oꞌmantacasoꞌ tahuëri yonquiatëhuaꞌ, noya ninahuaꞌ. Aꞌnaquënsoꞌ huëꞌërëso pochin cancantatonaꞌ, co ina tahuëri yonquipihuëꞌ. Canpoaso nipirinhuëꞌ noꞌtëquën yonquiatëhuaꞌ, sano cancantahuaꞌ.

1 Timoteo 6:9

Aꞌnaquënso nipirinhuëꞌ coriqui canacasoáchin yonquipi. Inasáchin cancantatonaꞌ, sopai natëpi. Nani maꞌsha nohuantatonaꞌ huënsonquë maꞌsha manëso pochin nisapi. Inasáchin yonquiatonaꞌ, aquë aquëtëꞌ nohuantaponaꞌ. Ina marëꞌ Yosëri chiníquën anaꞌintarin.

Tito 3:3

Iráca canpoantaꞌ co noyahuëꞌ cancantërëhuaꞌ. Coꞌhuara Yosë nanamën nitochatërarihuahuëꞌ, co yonquirëhuahuëꞌ. Co yanatërëhuahuëꞌ. Sopai nonpintërinpoaꞌ niꞌton, nisha nisha nicacasoꞌ nohuantërëhuaꞌ. Maꞌpitasona paꞌyatacasoáchin yonquirëhuaꞌ. Aꞌna piyapi maꞌshanënpita noyapatërëhuaꞌ. Ninoꞌhuitëhuaꞌ, co niquëꞌyarëhuahuëꞌ. Noꞌhuípiroꞌ ninëhuaꞌ. Inapoatëhuaꞌ, topinan quëran yaꞌhuërëhuaꞌ.

1 Pedro 1:14

Huaꞌhuaroꞌsaꞌ noya nipachinara, paꞌpinaꞌ natëpi. Inapochachin canpitantaꞌ Yosëíchin natëcoꞌ. Iráca co Yosë nanamën nitotatomarahuëꞌ, co yonquiramahuëꞌ. Yanoꞌpihuatamara, noꞌpiramaꞌ. Co noyahuëꞌ yonquihuatamara, co noyahuëꞌ ninamaꞌ. Iporaso nipirinhuëꞌ ama inapocosohuëꞌ.

2 Pedro 2:14

Sanapi quënanpachinara, monshitacaisoráchin yonquipi. Co nanitopihuëꞌ naniantacaisoꞌ. Co chiníquën cancantopisopitahuëꞌ nonpintatonaꞌ, anishacancantapi. Huënsonquë maꞌsha manëso pochin nonpintapi. Maꞌsharáchin yonquiatonaꞌ, noyapatopi. Napoaton Yosëri anaꞌintarin.

2 Pedro 2:18

Inahuara nipaꞌyatatonaꞌ, topinan quëran nontarinënquëmaꞌ. Nisha nisha yonquipi. Nasha yaꞌconpisopita aꞌnaroáchin nonpintopi. Ipora huarëꞌ co noyahuëꞌ yonquipisopita naniantapirinahuëꞌ. “Huëcoꞌ noꞌpiahuaꞌ. Noya noꞌpicasoꞌ. Noya monshihuanacasoꞌ,” itopi nonpintatonaꞌ.

1 Juan 2:16

Isoroꞌpaquë nisha nisha yaꞌhuërin aoshahuainpoaso marëꞌ: Monshihuanacasoráchin cancantërëꞌ. Maꞌsha quënanpatëra, nohuantapatërëꞌ. Maꞌhuanpatëra, yanocantërëꞌ, naporëꞌ. Inapitasoꞌ co Tata Yosë nohuanton yaꞌhuërinhuëꞌ. Sopai nohuanton, yaꞌhuërin.

1 Juan 2:8

Co nasha camaitërinsohuëꞌ niponahuëꞌ, nasha pochin ninshitaranquëmaꞌ cancanëma quëran huarëꞌ ninosorocamaso marëꞌ. Quisocristo yaꞌipi piyapi nosororin. Nosoroatonquëmaꞌ, aꞌpintërëso pochin anoyacancantërinquëmaꞌ tahuëri pochin cancantacamaso marëꞌ. Ninosorohuatamaꞌ, co huachi tashi pochin cancantaramahuëꞌ.