Efesios 2:14 - Chayahuita (Shahui)

¹⁴ Quisocristo chiminin niꞌton, nanan anoyatërinpoaꞌ. Iráca cotioroꞌsacoi co noyahuëꞌ niꞌnainquëmaꞌ. Nisha piyapinquëmaꞌ niꞌton, inimicoroꞌsa pochin niꞌpirainquëmahuëꞌ. Inasoꞌ chiminaton, paira pochin yaꞌcopirinpoasoꞌ nani chiꞌhuincarin. Iporasoꞌ yaꞌipinpoaꞌ Quisocristo imarëhuasopita aꞌna huëntoínchin ninëhuaꞌ.

Efesios 2:14 ပူးပေါင်းရင်းမြစ်များ

Miqueas 5:5

Ina nohuanton yaꞌipi parti sano yaꞌhuarihua huachi. Naporoꞌ asiriaroꞌsa huëcapairahuatënënpoaꞌ, noyápiachin pëinënpoapitaquë yaꞌcontaponënpoaꞌ. Inapotohuachinënpoa canpoantaꞌ, nanirinso chachin huaꞌanoꞌsaꞌ, sontaroꞌsaꞌ, inapita aꞌpatarihuaꞌ. Asiriaroꞌsa ahuëcaiso marëꞌ napoarihuaꞌ. Inapitari asiriaroꞌsa minsërahuatona nichaꞌësarinpoaꞌ. Naporoꞌ huaꞌanoꞌsa aꞌparëhuasopitasoꞌ, inatohua huaꞌanëntaponaꞌ. Ina noꞌpa chachin Nimorotontaꞌ, iráca huaꞌanëntërin.

Lucas 1:79

Tashinan pochin cancantopirëhuahuëꞌ, aꞌpintatë pochin nitarinpoaꞌ noya nanpicaso marëꞌ. Anoyacancantohuachinpoaꞌ, sano cancantarihuaꞌ,” tënin Sacariasë.

Lucas 2:14

“¡Ma noyacha Yosëso paya! Inápaquë yaꞌhuaponahuëꞌ, piyapinquëmaꞌ yonquirinquëmaꞌ. Cancantatoma ina yanatëramasopitasoꞌ sano cancantaramaꞌ,” itopi anquëniroꞌsari.

Juan 10:16

Aꞌnapita piyapiꞌsantaꞌ oshaquëran imasarinaco. Nisha piyapiroꞌsaꞌ niponaraihuëꞌ, yaimarinaco. Inapitantaꞌ nohuantërahuë imainacoso marëꞌ. Aꞌchintacasoꞌ yaꞌhuërin. Nanamëhuë natanpachinaꞌ, natëarinaco. Yaꞌipi imarinacosopita aꞌna huëntoínchin nisapi. Carisachin huaꞌanëntarahuë.

Juan 11:52

Nipirinhuëꞌ, co cotioroꞌsa marëáchin chiminarinhuëꞌ. Yaꞌipi piyapiꞌsaꞌ yaꞌhuërënamën chiminarin. Natëhuachinaꞌ, Yosëri huiꞌninpita pochin niꞌsarin. Aꞌnaquën aquë yaꞌhuëpirinahuëꞌ, imapachinaꞌ, aꞌna huëntoíchin pochin nisapi.

Juan 16:33

Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.

Hechos 10:28

Nani ninontohuachinara, Pitrori itërin: —Cotioroꞌsacoi inachintëraisoꞌ, nani iyaroꞌsaꞌ nitotëramaꞌ. Co onporontaꞌ nisha piyapiroꞌsataquë niꞌtapoi paꞌnaihuëꞌ. Co inapitaroꞌcoi niyontonaihuëꞌ. “Co Yosë nohuantërinhuëꞌ,” topiraihuëꞌ. Iporaso nipirinhuëꞌ Yosë nani anitotërinco. Insosona Yosëri noya niꞌpachina, cantaꞌ noya niꞌi. Yaꞌipi piyapi napopianachin noya nicaꞌhuasoꞌ yaꞌhuërin, tënahuë.

Hechos 10:36

Iráca israiroꞌsacoi noya nanan shaꞌhuitërincoi. Piyapinënpita pochin nicatoncoi, Yosë anitotërincoi. Oshahuanëhuaꞌ niꞌton, Yosë inimicotopirëhuahuëꞌ, Quisocristo aꞌpaimarin nanan anoyatinpoaso marëꞌ. Inasoꞌ yaꞌipi piyapinpoaꞌ yahuaꞌanëntërinpoaꞌ.

Romanos 5:1

“Sinioro Quisocristoíchin nichaꞌësarinpoaꞌ,” taꞌtëhuaꞌ, imarëhuaꞌ. Oshanënpoaꞌ inquitërinpoaꞌ niꞌton, Yosë noya niꞌninpoaꞌ. Co inimiconënpita pochin niꞌninpoahuëꞌ.

Gálatas 3:28

Yosësoꞌ co nisha nisha yonquirinpoahuëꞌ. Aꞌnaquënpoaꞌ cotio piyapinpoaꞌ, aꞌnaquëontaꞌ nisha piyapiꞌsaꞌ. Aꞌnaquëontaꞌ patronoꞌsaꞌ, aꞌnaquënsoꞌ piyapinënpita. Aꞌnaquën sanapiꞌsaꞌ, aꞌnaquënpoaꞌ quëmapinpoaꞌ nipirëhuahuëꞌ, yaꞌipinpoaꞌ Quisocristo imapatëhuaꞌ, aꞌna huëntoínchin pochin ninëhuaꞌ.

Efesios 2:15

Quisocristo nasha nanan quëtërinpoaꞌ. Co huachi iráca pënëntërinsoꞌ yonquicasoꞌ yaꞌhuërinhuëꞌ. Yaꞌipinpoaꞌ Quisocristo imapatëhuaꞌ, nasha huëntonquë ayaꞌconinpoaꞌ. Quisocristo huëntonënquë yaꞌconatëhuaꞌ, co huachi nisha chinotërëhuahuëꞌ. Nisha nisha piyapinpoaꞌ nirihuarahuëꞌ, noya niniꞌtëhuaꞌ yaꞌhuërëhuaꞌ.

Efesios 2:17

Quisocristo isoroꞌpaquë oꞌmaton, noya nanan shaꞌhuitërinpoaꞌ. “Yaꞌipinquëmaꞌ nichaꞌësaranquëmaꞌ,” itërinpoaꞌ. Canpitasoꞌ co piꞌpisha tërantaꞌ Yosë nohuitatomarahuëꞌ, áquë pochin nipiramahuëꞌ, nanan anoyatërinquëmaꞌ. Cotioroꞌsacointaꞌ yaꞌcarisha pochin ninaisoꞌ nanan anoyatërincoi.

Efesios 3:15

Inasoꞌ yaꞌipinpoaꞌ huaꞌanëntërinpoaꞌ. Aꞌnaquën inápaquë yaꞌhuërapi. Aꞌnaquënpoantaꞌ isoroꞌpaquë chachin yaꞌhuëarëhuaꞌ.

Efesios 4:16

Ina natëhuatëhuaꞌ, noya niniꞌtëhuaꞌ, yaꞌhuarihuaꞌ. Yaꞌipinpoaꞌ nicatahuacasoꞌ yaꞌhuërin. Nisha nisha nicatahuarihuaꞌ noya noya imacaso marëꞌ. Quisocristo chachin catahuahuachinpoaꞌ, noya nicatahuarihuaꞌ. Ina quëran ninosoroatëhuaꞌ, yaꞌipinpoaꞌ noya noya cancantarihuaꞌ.

Colosenses 1:20

Iráca oshahuanëhuaꞌ niꞌton, yaꞌipinpoaꞌ Yosë inimicotopirëhuahuëꞌ. Yosë nohuanton, Quisocristo chiminin nanan anoyatinpoaso marëꞌ. Isoroꞌpaquë yaꞌhuërinsopita, inápaquë yaꞌhuërinsopita, yaꞌipiya nohuantërin anoyatacasoꞌ. Canpoa marëꞌ huënainën paꞌnin. Corosëquë chiminin niꞌton, co huachi Yosë inimicotacasoꞌ yaꞌhuërinhuëꞌ.

Colosenses 2:20

Iráca Quisocristo chiminin. Canpitantaꞌ ina imapatamaꞌ, inarëꞌquëmaꞌ chiminamaso pochin ninamaꞌ niꞌton, co huachi aꞌnapita pochin nisha nisha chiníquën nanantopisopita imaramahuëꞌ. Inapitasoꞌ inahuara yonquinëna quëran nisha aꞌchinpi. “Nani maꞌsha natëhuatoi, chaꞌësarai,” taꞌtonaꞌ, “Ama ina caꞌcosohuë. Ama piꞌnicosohuëꞌ. Ama sëꞌhuayátëracosohuëꞌ,” itarinënquëmaꞌ. ¿Maꞌmarëtaꞌ ipora huantaꞌ ina natëcamasoꞌ yonquiramaꞌ? tënahuë yonquiato.

Colosenses 3:11

Quisocristo imapatëhuaꞌ, napopináchin Yosë niꞌninpoaꞌ. Aꞌnaquën cotioroꞌsaꞌ, aꞌnaquënso nipirinhuëꞌ cricoroꞌsaꞌ. Aꞌnaquën marca niacotopisoꞌ, aꞌnaquënso nipirinhuëꞌ co niacotopihuëꞌ. Aꞌnaquën nisha piyapiꞌsaꞌ, aꞌnaquëntaꞌ quëmaroꞌsaꞌ. Aꞌnaquën patron piyapinënpita, aꞌnaquënso nipirinhuëꞌ inahuara marëꞌ sacatopi. Nisha nisha nicarihuarahuëꞌ, napopináchin Yosë niꞌninpoaꞌ. Quisocristoíchin yonquicasoꞌ yaꞌhuërin. Ina imapatëhuaꞌ, yaꞌipinpoaꞌ yaꞌcoancantërinpoaꞌ. Co mantaꞌ pahuantarinpoahuëꞌ noya cancantacaso marëꞌ.

Colosenses 3:15

Quisocristoíchin asanocancaninpoaꞌ. Ina yonquihuatëhuaꞌ, noya ninicatëhuaꞌ, yaꞌhuarëhuaꞌ. Ina marëꞌ aꞌna huënton pochin Yosë acorinpoaꞌ. Ina catahuahuachinpoaꞌ, co huachi paꞌyanarihuahuëꞌ. Napoaton inasáchin yonquicoꞌ asanocancainquëmaꞌ. Nani tahuëri: “Yosparinquën Sinioro,” itocoꞌ.

Hebreos 13:20

Yosë catahuainquëmaꞌ noya ninicatomaꞌ yaꞌhuëcamasoꞌ. Inasáchin asanocancaninpoaꞌ. Inari chachin iráca Quisocristo ananpitaantarin. Iporasoꞌ ohuicanënpita pochin nicatonpoaꞌ, Sinioro Quisoso aꞌpairinpoaꞌ. Huënainën paꞌnin niꞌton, nasha quëran anoyatërinso shaꞌhuitërinpoaꞌ imacaso marëꞌ. Ina anoyatërinsosoꞌ yaꞌhuëmiatarin. Co onporontaꞌ nishataponhuëꞌ.

Hebreos 7:2

Nani nontohuachina, Apraani nani maꞌsha canarin quëran diesmo Yosë marëꞌ acorinsoꞌ quëtërin. Miriquisosoꞌ nóya huaꞌan. Nininën chachin “huaꞌan noya nicacasoꞌ yonquirinsoꞌ” tapon naporin. Naporahuaton, Sarimo huaꞌan niꞌton, “huaꞌan sano cancantërinsoꞌ” tapon naporin.