Efesios 1:7 - Chayahuita (Shahui)

⁷ Quisocristo corosëquë chiminaton, nichaꞌërinpoaꞌ. Huënainën paꞌnin niꞌton, oshanënpoaꞌ inquitërinpoaꞌ. Inaora nohuanton, Yosë naꞌcon nosororinpoaꞌ.

Efesios 1:7 ပူးပေါင်းရင်းမြစ်များ

Salmos 130:4

Nipirinhuëꞌ oshanëhuëi inquitërancoi niꞌton, noya nicatëinquën chinotarainquën.

Salmos 130:7

Yaꞌipi israiroꞌsanpoa Sinioro ninahuaꞌ. Inasoꞌ nosororinpoa niꞌton, noyá nichaꞌësarinpoaꞌ.

Éxodo 34:7

Piyapinëhuëpita nosoroato, huaranca shinpita huënton yaꞌhuëaquë huarëntaꞌ, co nisha cancantarahuëꞌ. Co noyahuëꞌ nipirinahuëꞌ, oshanën inquitato nanan anoyatërahuë. Co natëtochináchinhuëꞌ cancantatona oshahuanpachinarantaꞌ, inapotërahuë. Napoaponahuëꞌ, insosona tëhuëhuachin, onpopionta anaꞌintarahuë. Huiꞌninpita, shinpita, inapitanta anaꞌintarahuë. Shinpita huiꞌninaquë huarënta anaꞌintarahuë, tënin.

Isaías 43:25

Inapopiramahuëꞌ, Yosënëmaco niꞌto, paꞌpi co noyahuëꞌ ninamasopita, inquitaranquëmaꞌ. Co yanatëtatomahuëꞌ anoꞌhuitopiramacohuëꞌ, co huachi inapita yonquiarahuëꞌ.

Jeremías 31:34

Co huachi insonta aꞌnapita aꞌchintaponhuëꞌ. Co iin nontaton: ‘Sinioro nohuitëquëꞌ,’ co itaponhuëꞌ. Yaꞌipiya quëran nohuitarinaco. Huaꞌhuishinoꞌsa quëran mashoroꞌsaquë huarëꞌ nohuitarinaco niꞌton, co huachi niaꞌchintaponahuëꞌ. Inapitasoꞌ co noyahuëꞌ nicatona oshahuanpirinahuëꞌ, oshanëna inquitato nanan anoyatarahuë. Ca Sinioroco shaꞌhuitaranquëmaꞌ,” tënin.

Daniel 9:19

¡Sinioro onpopionta natancoi! Tëhuëtopirainquënhuëꞌ, nichaꞌëcoi. Nontaranquënsoꞌ natanaton, catahuacoi. Noya nicatënënquën paꞌyatiinënso marëꞌ catahuacoi. Quëma pëinënsoꞌ, Quirosarinquë yaꞌhuërin. Ina ninanonta yonquiaton catahuacoi. Piyapinënpitacointa chinotërainquënso yonquiaton, aꞌnaroáchin catahuacoi,” itërahuë.

Daniel 9:9

Quëmaso napoaponahuëꞌ, Yosënëhuëinquën niꞌton, nosorocoi. Nosoroatoncoi nichaꞌëcoi. Quiyasoꞌ co natëtëinquënhuë, pënënancoisopita co natanaihuë pochin ninai. Pënëntonaꞌpiroꞌsa quëran aꞌchintopirancoihuëꞌ, co natëraihuëꞌ.

Miqueas 7:18

Siniorosoꞌ noya niꞌton, ina nontato: “¡Quëmaíchin Yosënquën. Co aꞌna quëma pochin yaꞌhuërinhuëꞌ! Piyapiꞌsa co noyahuëꞌ nipirinahuëꞌ, oshanëna marëꞌ sëtatona nontërinën niꞌton, nichaꞌëran. Caraya israiroꞌsacoi quëparitëraisopita, co natantochináchinhuëꞌ cancantatoi tëhuëtërainquën. Inapopiraihuëꞌ nontërainquën niꞌton, tëhuëtërainquënsoꞌ naniantëran. Noꞌhuípiro nipiraihuëꞌ nosororancoi niꞌton, noꞌhuitëransoꞌ asanoran. Inapoaton catahuantarancoi.

Zacarías 9:11

Quirosarinquë yaꞌhuëramasopita. Isontaꞌ, Sinioro shaꞌhuitarinquëmaꞌ: “Aꞌnaquën israiroꞌsa nisha nisha nacionquë ipora huanta yaꞌhuëapi. Inapitasoꞌ, poso yaninantë pochin nininquë yaꞌhuëapi niꞌton, cari nichaꞌësarahuë. Iráca shimashonëmapitaroꞌco anoyatërahuë niꞌton, napoarahuë. Inapohuatoira, maꞌsharoꞌsa tëparahuatona huënainën aꞌpatopi,” tënin.

Mateo 20:28

Cantaꞌ Yosë quëran quëmapico niporahuëꞌ, co aꞌnapita camaicaꞌhuaso marëꞌ oꞌmarahuëꞌ. Piyapiꞌsaꞌ catahuacaꞌhuaso marëꞌ oꞌmarahuë. Chiminarahuë naꞌa piyapiꞌsaꞌ nichaꞌëcaꞌhuaso marëꞌ, itërin Quisosori.

Mateo 26:28

Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

Mateo 6:12

Co noyahuëꞌ nicatoi, oshahuanai. Nosoroatoncoi, oshanëhuëi inquitocoi. Aꞌnapita maꞌsha onpotohuachincoi, nanan anoyatëraiso pochachin oshanëhuëi inquitatoncoi, anoyacancantocoi.

Marcos 14:24

—Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

Lucas 1:77

Yosë piyapinënpita itapon: ‘Oshanëmaꞌ inquitatënquëmaꞌ, Sinioro anoyacancantarinquëmaꞌ,’ itaran.

Lucas 24:47

Ina nanan chachin shaꞌhuicasoꞌ yaꞌhuërin. “Co noyahuëꞌ yonquiramasopita naniantohuatamaꞌ, oshanëmaꞌ inquitarinquëmaꞌ,” itocoꞌ. Quirosarinquëꞌton shaꞌhuicasoꞌ yaꞌhuërin. Ina quëran nisha nisha nananquë nonpisopita shaꞌhuitacasoꞌ yaꞌhuërin.

Juan 20:23

Insosona natëhuachinquëmaꞌ, “Oshanën iyasha Yosë inquitarinquën,” itocoꞌ. Inquitarin mini. Nipirinhuëꞌ, co yanatëhuachinquëmahuëꞌ, “Co oshanën iyasha inquitarinquënhuëꞌ,” itocoꞌ. Tëhuënchachin co inquitarinhuëꞌ, itërincoi. Itahuatoncoi, paꞌnin.

Hechos 10:43

Iráca quëran huarëꞌ pënëntonaꞌpiroꞌsaꞌ Quisoso ninotonaꞌ, shaꞌhuitërinënpoaꞌ ina natëcaso marëꞌ. Cancanënpoa quëran huarëꞌ ina natëcasoꞌ yaꞌhuërin. Oshanënpoa marëꞌ chiminin niꞌton, imapatëhuaꞌ, yaꞌipi oshanënpoaꞌ inquitarinpoaꞌ. “Ca oshanëhuë marëꞌ mini Quisocristo chiminin,” topatëhuaꞌ, inquitarinpoaꞌ, itërin Pitrori.

Hechos 2:38

Napotohuachinara, Pitrori itaantarin: —Yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. “Quisocristo imarahuë,” taꞌtomaꞌ, aporihuancoꞌ. Ina imapatamaꞌ, Yosë oshanëmaꞌ inquitarinquëmaꞌ. Ina quëran Ispirito Santo ayaꞌcoancantarinquëmaꞌ canpitantaꞌ.

Hechos 20:28

Canpitantaꞌ niꞌcona piꞌpian tërantaꞌ Yosë naniantotamaꞌ. Quisoso imapisopitantaꞌ noya niꞌcoꞌ. Ispirito Santo nani acorinquëmaꞌ huaꞌanën pochin nicacamaso marëꞌ. Inapitantaꞌ Yosë huëntonënquë yaꞌconpi. Quisoso chiminaton, ayaꞌconinpoaꞌ.

Hechos 3:19

Napoaton iyaroꞌsaꞌ yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ oshanëmaꞌ inquichinquëmaꞌ.

Romanos 2:4

Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

Romanos 3:24

Nipirinhuëꞌ, inaora nohuanton, Yosë nosororinpoaꞌ. Nosoroatonpoaꞌ, Quisocristo aꞌpaimarin nichaꞌëinpoaso marëꞌ. Ina imapatëhuaꞌ, Yosë noya niꞌsarinpoaꞌ.

Romanos 3:25

Yosë nohuanton, Quisocristo chiminin. Oshanënpoaꞌ inquitinpoaso marëꞌ chiminin. “Ca marëꞌ chiminin,” topatëhuaꞌ, oshanënpoaꞌ inquitarinpoaꞌ. Huënainën quëran anoyacancantarinpoaꞌ. Iráca piyapiꞌsaꞌ oshahuanpirinahuëꞌ, Yosëri co aꞌnaroáchin anaꞌintërinhuëꞌ. “Aꞌna tahuëri Quisocristo chiminpachin, oshanënaꞌ inquitarahuë,” taꞌton, co anaꞌintërinhuëꞌ.

Romanos 9:23

Aꞌnaquënpoaso nipirinhuëꞌ, nosoroatonpoaꞌ nichaꞌësarinpoaꞌ. Inaora nohuanton, nosororinpoaꞌ. Iráca chachin yonquirinpoaꞌ nichaꞌëinpoaso marëꞌ. Anoyacancantohuachinpoaꞌ, piyapiꞌsaꞌ naꞌcon Yosë yonquiapi. “Ma noyacha catahuarin paya,” tosapi.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

2 Corintios 8:9

Sinioro Quisocristo nosoroatonpoaꞌ, catahuarinpoasoꞌ nani nitotëramaꞌ. Iráca noya noya inápaquë yaꞌhuëpirinhuëꞌ, isoroꞌpaquë oꞌmarin nichaꞌëinquëmaso marëꞌ. Co mantaꞌ isëquë yaꞌhuëtërinhuëꞌ. Parisitërin quëran nichaꞌërinquemaꞌ noya noya cancantacaso marëꞌ. Parisitaton, naꞌcon catahuarinquëmaꞌ.

Efesios 1:14

Quisocristo imapatëhuaꞌ, Ispirito Santo yaꞌcoancantomiatërinpoaꞌ. Inaꞌton quëtërinpoaꞌ niꞌton: “Tëhuënchachin aꞌna tahuëri Yosëꞌpaꞌ quëpantarinpoaꞌ,” tënëhuaꞌ. Nani Yosë nichaꞌërinpoaꞌ niꞌton, oꞌmantacasoꞌ tahuëri nanihuachin, yaꞌhuërinꞌpaꞌ quëpantarinpoaꞌ. Inaquë noya noya yaꞌhuëcontarihuaꞌ. Ina yonquiatëhuaꞌ: “Ma noyacha Tata Yosëso yonquirinpoa paya,” tënëhuaꞌ.

Efesios 1:18

Yaꞌipi nanamën Sinioro noyá anitotëquëꞌ. Quëma huëntonënquë chachin ayaꞌconancoi noya cancantaꞌhuaiso marëꞌ. Catahuaquëꞌ ina yonquiatonaꞌ, noya cancanchinaꞌ. Aꞌna tahuëri yaꞌhuëranquë chachin noya noya yaꞌhuëcontarai. Ina naꞌcon yonquiꞌinaꞌ.

Efesios 1:6

Huiꞌnin naꞌcon nosororin. Ina imapatëhuaꞌ, canpoantaꞌ naꞌcon nosoroarinpoaꞌ. Ina yonquiatëhuaꞌ, “Ma noyacha Tata Yosësoꞌ niꞌton, inaora nohuanton, nosororinpoa paya,” tosarëhuaꞌ.

Efesios 1:8

Nosoroatonpoaꞌ, naꞌcon catahuarinpoaꞌ noꞌtëquën yonquicaso marëꞌ. Yonquinën chachin anitotërinpoaꞌ.

Efesios 2:4

Yosëso nipirinhuëꞌ naꞌcon nosororinpoaꞌ. Nosoroatonpoaꞌ, yanichaꞌërinpoaꞌ.

Efesios 2:7

Yosë inaora nohuanton, naꞌcon nosororinpoaꞌ. Quisocristo imapatëhuaꞌ, noya catahuarinpoaꞌ. Aꞌna tahuëri aꞌnapitantaꞌ nicatënënpoaꞌ, Yosë chinotapi: “Ma noyacha Yosëri nosororin paya,” tosapi.

Efesios 3:16

Napoaton canpita yonquiatënquëmaꞌ, Yosë nontërahuë. “Quëmasoꞌ Sinioro chini chiníquën nanantëran. Noya noyanquën niꞌton, imarinënsopita nosoroaton, catahuaquëꞌ chiníquën cancanchinaꞌ. Ispirito Santori achinicancain noya noya imainënquën.

Efesios 3:8

Casoꞌ aꞌnapita imapisopita quëran naꞌcon naꞌcon co noyahuëꞌ nipirahuëꞌ, anoyacancantërinco. Ina quëran nosoroatonco, acorinco nisha piyapiꞌsaꞌ shaꞌhuitaꞌhuaso marëꞌ. Quisocristo nanamënsoꞌ noyápiachin. Ma inacha niꞌton, nosoromiatërinpoa paya, tënahuë yonquiato.

Filipenses 4:19

Canpitantaꞌ maꞌsona pahuantohuachinquëmaꞌ, Yosë chachin quëtarinquëmaꞌ. Yaꞌipi huaꞌanëntaton, nanitaparin. Quisocristo imaramaꞌ niꞌton, catahuarinquëmaꞌ. Co huachi pahuantarinquëmahuëꞌ.

Colosenses 1:14

Ina chiminin niꞌton, nichaꞌërinpoaꞌ. Oshanënpoaꞌ inquitërinpoa huachi.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

Colosenses 2:13

Iráca canpitasoꞌ oshahuanatomaꞌ, chimipi pochin ninamaꞌ. Co noyahuëꞌ nicacasoráchin yonquiramaꞌ. Co Yosë piyapinënpita ninamahuëꞌ. Iporaso nipirinhuëꞌ Quisocristo imaramaꞌ niꞌton, anoyacancantërinquëmaꞌ. Oshanëmaꞌ inquitatënquëmaꞌ, nanpiantarinso pochin niꞌninquëmaꞌ.

Colosenses 2:2

Yaꞌipinquëmaꞌ yonquiatënquëmaꞌ, Yosë nontárahuë. “Catahuaquëꞌ Sinioro chiníquën cancanchinaꞌ. Noya ninosoroꞌinaꞌ. Ina quëran aꞌna huëntoínchin pochin nisapi. Ma noyacha quëmasoꞌ yonquirancoi paya. Catahuaquëꞌ quëma nanamën noya yonquiꞌinaꞌ. Quisocristo chachin nohuichinaꞌ. Iracasoꞌ co piyapiꞌsari nohuitopirinahuëꞌ. Iporaso nipirinhuëꞌ anohuitërancoi. Ina nohuitatoi, tëhuënchachin noya cancantarai,” itërahuë, Yosë nontato.

1 Timoteo 2:6

Quisocristo inaora nohuanton, nichaꞌëinpoaso marëꞌ chiminin. Chiminaton, oshanënpoaꞌ inquitërinpoaꞌ. Tahuëri nanihuachinaꞌ, Yosë yanichaꞌërinpoasoꞌ anitotërinpoaꞌ.

Tito 2:14

Iráca canpoa marëꞌ chiminin oshanënpoaꞌ inquitinpoaso marëꞌ. Anoyacancantërinpoaꞌ piyapinënpita nicacaso marëꞌ. Huëntonënquë chachin yaꞌconpatëhuaꞌ, noya nicacasoráchin nohuantarihuaꞌ.

Tito 3:6

Quisocristo anoyacancantërinpoaꞌ niꞌton, Ispirito Santo aꞌpatimarinpoaꞌ yaꞌcoancantinpoaso marëꞌ. Noyá yaꞌcoancantohuachinpoaꞌ, naꞌcon catahuarinpoaꞌ.

Hebreos 9:22

Iráca pënëntërinso imapachinara, nani maꞌsha huënaiquë taꞌsatopi anoyatacaiso marëꞌ. “Co huënaiꞌ taꞌsatohuatëhuahuëꞌ, co Yosë noya niꞌsarinpoahuëꞌ,” topi. Tëhuënchachin co huënaiꞌ paꞌpachinhuëꞌ, Yosë co onporontaꞌ oshanënpoaꞌ inquitërinpoahuëꞌ.

1 Pedro 2:24

Quisocristo isoroꞌpaquë oꞌmaton, piyapi chachin nasitimarin. Oshanënpoa marëꞌ corosëquë chiminin. Inaora yaꞌhuërëtërinpoaꞌ. Yaꞌipi co noyahuëꞌ yonquirëhuasopita naniantatëhuaꞌ noya nicacaso marëꞌ chiminin. Corosëquë parisitaton, anoyacancantërinpoaꞌ.

1 Pedro 3:18

Quisocristontaꞌ nóya niponahuëꞌ, oshahuanëhuaso marëꞌ parisitërin. Oshanënpoaꞌ inquitinpoaso marëꞌ chiminin. Aꞌnaromarëáchin chiminin. Noya niponahuëꞌ, oshahuanoꞌsa marëꞌ chiminin. Canpoantaꞌ Yosë nohuitacaso marëꞌ chiminin. Piyapi niꞌton tëhuënchachin tëpapi. Chiminaponahuëꞌ, nanpiantarin niꞌton, noya noya yaꞌhuantarin.

1 Juan 2:12

Canpitasoꞌ imaramaꞌ niꞌton, ninshitaranquëmaꞌ. Huiꞌnahuëpita pochin nicatënquëmaꞌ, ninshitaranquëmaꞌ. Quisocristo canpoa marëꞌ chiminin. Imapatamaꞌ, oshanëmaꞌ inquitërinquëmaꞌ.

1 Juan 2:2

Yaꞌhuërënamënpoaꞌ chiminin niꞌton, nontohuatëhuaꞌ, oshanënpoaꞌ inquitarinpoaꞌ. Oshanënpoaꞌ inquitatonpoaꞌ, nanan anoyatërinpoaꞌ. Yaꞌipi piyapi marëꞌ chiminin. Yaꞌipinpoaꞌ oshanënpoaꞌ inquitinpoasoꞌ nohuantopirinhuëꞌ.

1 Juan 4:10

Co canpoarisoꞌ nosoropirëhuahuëꞌ, Yosësoꞌ naꞌcon nosororinpoaꞌ. Ina nohuanton, huiꞌnin chachin oꞌmarahuaton, chiminin. Yaꞌhuërënamënpoaꞌ chiminin niꞌton, oshanënpoaꞌ inquitatonpoaꞌ, nanan anoyatërinpoaꞌ.

Apocalipsis 14:4

Noyápiachin cancantapi. Co piꞌpisha tërantaꞌ monshihuanaꞌpi pochin cancantopihuëꞌ. Yosëíchin yonquiapi. Insëquësona Carniroaꞌhua paꞌpachin, imasapi. Isoroꞌpaquë yaꞌhuëpirinahuëꞌ, nani Yosëri nichaꞌërin. Yaꞌnan cayarinso macatëꞌ Yosë quëtërëso pochin nicatonaꞌ, inasáchin chinotapi. Nani tahuëri Carniroaꞌhuantaꞌ chinotapi.

Apocalipsis 5:9

Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.