Efesios 1:18 - Chayahuita (Shahui)

¹⁸ Yaꞌipi nanamën Sinioro noyá anitotëquëꞌ. Quëma huëntonënquë chachin ayaꞌconancoi noya cancantaꞌhuaiso marëꞌ. Catahuaquëꞌ ina yonquiatonaꞌ, noya cancanchinaꞌ. Aꞌna tahuëri yaꞌhuëranquë chachin noya noya yaꞌhuëcontarai. Ina naꞌcon yonquiꞌinaꞌ.

Efesios 1:18 ပူးပေါင်းရင်းမြစ်များ

Copo naporinso' 42:5

Iꞌhua casoꞌ: ‘Yosë nohuitërahuëꞌ,’ topirahuë. Aꞌnapita shaꞌhuitërinacosoraꞌ yonquiato, naporahuë. Iporaso nipirinhuëꞌ, aꞌninquë quënananquënso pochin nontërancosoꞌ natanahuë.

Isaías 11:2

Sinioro ispiritonëni yaꞌcoancantomiatapon. Inari yonquínahuan nicacasoꞌ quëtapon. Nitopënëntahuaton, chiníquën nanantapon. Sinioro noya nohuitaton, natëpon.

Isaías 32:3

Maꞌsona yanipachinaꞌ, noya niꞌsahuatona acoaponaꞌ. Maꞌsona shaꞌhuitahuachinantaꞌ, noya huëratëhuanatona natanaponaꞌ.

Isaías 42:7

Somarayaroꞌsa anoyarayataran. Sopairi minsëaton huaꞌanëntërinsopita, paꞌpi tashinan pëiquë pochin ichiyaꞌhuërin. Inapitanta ocoiatë pochin nitacaso marëꞌ acoranquën,” itërin.

Isaías 6:10

Piyapinëhuëpita yonquinëna tapitëquëꞌ. Nëꞌhuëya pochin cancanchinaꞌ. Somarayapiso pochin cancantatonaꞌ, ama manta noꞌtëquën yonquiꞌinasohuëꞌ. Shaꞌhuitërahuësoꞌ noꞌtëquën yonquipi naporini, oshanëna aꞌpoitonahuëꞌ. Inapopi naporini, co huachi anaꞌintaꞌhuasoꞌ yaꞌhuëitonhuëꞌ,” itërinco.

Mateo 13:15

Isopitasoꞌ co natantochináchinhuëꞌ cancantopi. Nëꞌhuëya pochin cancantatonaꞌ, co yanatantopihuëꞌ. Tanshirinso pochin cancantatonaꞌ, co yaquënantopihuëꞌ. Noya niꞌpi naporini, quënanchitonahuëꞌ. Noya natanpi naporini, cancanëna quëran nataintonahuëꞌ. Co noyahuëꞌ yonquipisopita naniantatonaꞌ imarinaco naporini, anoyacancanchitohuëꞌ,’ tënin Yosë iráca. Ipora huantaꞌ naꞌa piyapiꞌsaꞌ ina pochin cancantopi.

Marcos 10:17

Ina quëran Quisoso yapaantarapirinhuëꞌ. Aꞌnara quëmapi taꞌaquirahuaton, isonquirin. —Quëmasoꞌ Maistro noyanquën. ¿Maꞌtaꞌ casoꞌ onpoꞌi nanpimiataꞌhuaso marëꞌ? Shaꞌhuitoco cantaꞌ noya nii, itiirin.

Lucas 24:45

Yosë quiricaquë naporinsopita aꞌchintaantarin. Aꞌchintaton, catahuarin noꞌtëquën yonquicaiso marëꞌ.

Hechos 16:14

Aꞌna sanapi inaquë Yosë chinotërin, Niria itopisoꞌ. Tiatira quëran huëꞌnin. Inasoꞌ tintahuan. Maꞌmaroꞌ nëꞌmëtëꞌ paꞌton nininsoꞌ paꞌanin. Inasoꞌ nisha piyapi niponahuëꞌ, Yosë chinotërin niꞌton, Paonori aꞌchintohuachina, nóya natanin. Yosë nohuanton, aꞌnaroáchin cancanën quëran huarëꞌ yaimarin.

Hechos 26:18

Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Romanos 11:29

Nani Yosëri shaꞌhuitohuachin, inachachin nisarin. Co onporontaꞌ nisha nontarinhuëꞌ. Huëntonënquë ayaꞌconpachin, co onporontaꞌ naniantarinhuëꞌ.

Romanos 2:4

Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

2 Corintios 4:4

Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

Gálatas 5:5

Nipirinhuëꞌ, ina imapatëhuaꞌ, Ispirito Santo catahuarinpoaꞌ. “Quisocristoíchin anoyacancantërinpoaꞌ,” topatëhuaꞌ, Yosë noya niꞌsarinpoaꞌ, tënëhuaꞌ. Oshanënpoaꞌ inquitatonpoaꞌ, tëhuënchachin noyápiachin cancan quëtarinpoaꞌ. Ina ninarëhuaꞌ.

Efesios 1:11

Inaora nohuanton, acorinpoaꞌ piyapinënpita nicacaso marëꞌ. Quisocristo imapatëhuaꞌ, huiꞌnin pochin niꞌsarinpoaꞌ. Napoaton aꞌna tahuëri Yosëꞌpaꞌ noya noya acoarinpoaꞌ. Iráca chachin yonquirinpoaꞌ niꞌton, huëntonënquë ayaꞌconinpoaꞌ.

Efesios 1:7

Quisocristo corosëquë chiminaton, nichaꞌërinpoaꞌ. Huënainën paꞌnin niꞌton, oshanënpoaꞌ inquitërinpoaꞌ. Inaora nohuanton, Yosë naꞌcon nosororinpoaꞌ.

Efesios 2:12

Tëhuënchachin coꞌhuara imashatërapomahuëꞌ, co Quisocristo nohuitëramahuëꞌ. Iráca Yosëri israiroꞌsaꞌ huayonin piyapinënpita nicacasoꞌ niꞌton, “Nichaꞌësaranquëmaꞌ,” itërin. Co inapita pochin niꞌninquëmahuëꞌ. Shimashonënapitarëꞌ anoyatërinsoꞌ shaꞌhuitopirinhuëꞌ, co nitotëramahuëꞌ. Topinan quëran yaꞌhuëramaꞌ. Co Yosëꞌpaꞌ pacamasoꞌ ninaramahuëꞌ. Co piꞌpian tërantaꞌ Yosë nohuitëramahuëꞌ.

Efesios 3:16

Napoaton canpita yonquiatënquëmaꞌ, Yosë nontërahuë. “Quëmasoꞌ Sinioro chini chiníquën nanantëran. Noya noyanquën niꞌton, imarinënsopita nosoroaton, catahuaquëꞌ chiníquën cancanchinaꞌ. Ispirito Santori achinicancain noya noya imainënquën.

Efesios 3:8

Casoꞌ aꞌnapita imapisopita quëran naꞌcon naꞌcon co noyahuëꞌ nipirahuëꞌ, anoyacancantërinco. Ina quëran nosoroatonco, acorinco nisha piyapiꞌsaꞌ shaꞌhuitaꞌhuaso marëꞌ. Quisocristo nanamënsoꞌ noyápiachin. Ma inacha niꞌton, nosoromiatërinpoa paya, tënahuë yonquiato.

Efesios 4:1

Quisocristo nanamën aꞌchinahuëso marëꞌ tashinan pëiquë poꞌmopirinacohuëꞌ, iporahuantaꞌ pënënáranquëmaꞌ. Yosë nichaꞌëtënquëmaꞌ, huëntonënquë ayaꞌconinquëmaꞌ. Napoaton noyasáchin nicoꞌ.

Efesios 4:4

Quisocristo imapatëhuaꞌ, yaꞌipinpoaꞌ aꞌna huëntoínchin pochin ninëhuaꞌ. Aꞌnaíchin Ispirito Santo yaꞌhuërinsoꞌ yaꞌcoancantërinpoaꞌ. Imarëhuasopita nichaꞌësarinpoaꞌ yaꞌhuërinquë chachin quëpantaꞌinpoaso marëꞌ. Inasáchin ninarëhuaꞌ.

Efesios 5:8

Iráca tashi pochin cancantopiramahuëꞌ, iporasoꞌ Yosë imaramaꞌ niꞌton, anoyacantërinquëmaꞌ tahuëri pochin nicacamaso marëꞌ. Napoaton tahuëri pochin nicoꞌ.

Filipenses 3:14

Co nisha nisha yonquirahuëꞌ. Quëmapiꞌsaꞌ nicanatonaꞌ taꞌapiso pochin cancantato, Quisocristoíchin yonquiárahuë ina pochin cancantaꞌhuaso marëꞌ. Nani tahuëri nani tahuëri napoarahuë. Ina quëran aꞌna tahuëri Yosëꞌpaꞌ cancontahuato, noya niꞌsarinco. Quisocristo anoyacancantërinco niꞌton, inápaquë quëpantarinco.

Colosenses 1:12

Nani anoyacancantohuachinpoara, huëntonënquë chachin ayaꞌconinpoaꞌ. Huiꞌninpita pochin niꞌsarinpoaꞌ. Iporasoꞌ ina catahuahuachinpoaꞌ, tahuëri pochin cancantarihuaꞌ. Naporahuatëhuaꞌ, yaꞌhuërinquë chachin yaꞌhuëcontarihuaꞌ. Ina marëꞌ noya cancantatëhuaꞌ “Yosparinquën Sinioro,” itarihuaꞌ.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

Colosenses 1:5

Iráca noya nanan natanamaꞌ. “Oshanënpoaꞌ inquitatonpoaꞌ, Quisocristo anoyacancantërinpoaꞌ,” itohuachinënquëmaꞌ, noꞌtëquën aꞌchintërinënquëmaꞌ. Aꞌchintohuachinënquëmaꞌ, natëramaꞌ. “Aꞌna tahuëri Yosëꞌpaꞌ noya ananpitaantarinpoaꞌ,” taꞌtomaꞌ, Quisocristo imaramaꞌ. Ina imatomaꞌ, ina tahuëri ninaramaꞌ.

Colosenses 2:2

Yaꞌipinquëmaꞌ yonquiatënquëmaꞌ, Yosë nontárahuë. “Catahuaquëꞌ Sinioro chiníquën cancanchinaꞌ. Noya ninosoroꞌinaꞌ. Ina quëran aꞌna huëntoínchin pochin nisapi. Ma noyacha quëmasoꞌ yonquirancoi paya. Catahuaquëꞌ quëma nanamën noya yonquiꞌinaꞌ. Quisocristo chachin nohuichinaꞌ. Iracasoꞌ co piyapiꞌsari nohuitopirinahuëꞌ. Iporaso nipirinhuëꞌ anohuitërancoi. Ina nohuitatoi, tëhuënchachin noya cancantarai,” itërahuë, Yosë nontato.

Colosenses 3:15

Quisocristoíchin asanocancaninpoaꞌ. Ina yonquihuatëhuaꞌ, noya ninicatëhuaꞌ, yaꞌhuarëhuaꞌ. Ina marëꞌ aꞌna huënton pochin Yosë acorinpoaꞌ. Ina catahuahuachinpoaꞌ, co huachi paꞌyanarihuahuëꞌ. Napoaton inasáchin yonquicoꞌ asanocancainquëmaꞌ. Nani tahuëri: “Yosparinquën Sinioro,” itocoꞌ.

1 Tesalonicenses 2:12

Achinicancanainquëmaꞌ. “Yosë imaramaꞌ niꞌton, noyasáchin nicoꞌ Yosë noya niꞌinquëmaꞌ,” itërainquëmaꞌ. Ina acorinquëmaꞌ huaꞌanëntërinquë yaꞌconacamasoꞌ. Aꞌna tahuëri yaꞌhuërinꞌpaꞌ quëpantahuachinquëmaꞌ, noya noya yaꞌhuëcontaramaꞌ.

1 Tesalonicenses 5:8

Canpoaso nipirinhuëꞌ tahuëri pochin cancantacasoꞌ yaꞌhuërin. Napoaton noya yonquiatëhuaꞌ, Yosë imamiatahuaꞌ. Niꞌcoꞌ iyaroꞌsaꞌ. Inimicoroꞌsaꞌ huëꞌpachinara, sontaroꞌsaꞌ co topinan paꞌpihuëꞌ. Coton huaꞌna quëran nininsoꞌ aꞌmopi. Cascontaꞌ huaꞌna quëran nininsoꞌ yancopi ama inimicori ohuanacaso marëhuëꞌ. Noya nitapahuachinara, co inimicori minsërinhuëꞌ. Huaꞌna aꞌmopiso pochin canpoantaꞌ Yosë natëahuaꞌ catahuainpoaꞌ. Ina natëtëhuaꞌ, noya ninosoroaꞌahuaꞌ. “Yosë aꞌpaiarinpoaꞌ. Oꞌmahuachin, noyá nichaꞌësarinpoaꞌ,” taꞌtëhuaꞌ noya ninahuaꞌ.

2 Tesalonicenses 1:11

Napoaton nani tahuëri canpita marëꞌ Yosë nontërai: “Quëma nohuanton Sinioro imarinënquën. Napoaton, catahuaquëꞌ noyasáchin niinaꞌ. Noya noya yaimarinënquën niꞌton, catahuaquëꞌ noyápiachin cancanchinaꞌ. Quiyaora co nanitëraihuëꞌ. Quëmasáchin Sinioro ananitaparancoi. Catahuaquëꞌ yaꞌipi cancanëna quëran natëinënquën,” itërahuë, Yosë nontato. Noya nipatamaꞌ, Yosë noya niꞌsarinquëmaꞌ.

2 Tesalonicenses 2:16

Sinioro Quisocristo catahuainquëmaꞌ chiníquën cancantacamaso marëꞌ. Inaora nohuanton, Tata Yosëntaꞌ nosoroatonpoaꞌ, achinicancamiatërinpoaꞌ. Aꞌna tahuëri yaꞌhuërinquë chachin quëpantarinpoaꞌ. Shaꞌhuitërinpoaꞌ niꞌton, ina ninarëhuaꞌ.

1 Timoteo 6:12

Iráca imapisopita niyontonpachinara, chiníquën cancantaton, “Casoꞌ Quisocristo imarahuë,” itëran. Napoaton “Yosë catahuarinco,” taꞌton, sopai minsëquëꞌ. Yosë nani huëntonënquë ayaꞌconinquën niꞌton, imamiatëquëꞌ. Ina quëran aꞌna tahuëri inápaquë nanpimiataran.

Tito 2:13

Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

Tito 3:7

Napoaton iporasoꞌ Yosë noya niꞌninpoaꞌ. Iráca oshahuanpirëhuahuëꞌ, inaora nohuanton, nosoroatonpoaꞌ, nanan anoyatërinpoaꞌ. “Huëntonënquë ayaꞌconinpoaꞌ niꞌton, aꞌna tahuëri yaꞌhuërinꞌpaꞌ yaꞌhuëcontarihuaꞌ,” taꞌtëhuaꞌ, ninarëhuaꞌ. Inatohuaꞌ nanpimiatarihuaꞌ.

Hebreos 10:32

Yaꞌnan imaramasoꞌ tahuëriꞌsaꞌ yonquicoꞌ. Quisocristo nanamën aꞌchintohuachinënquëmara, noya natanatomaꞌ, imaramaꞌ. Ina marëꞌ parisitapomarahuëꞌ, co yaaꞌporamahuëꞌ. Noya ahuantëramaꞌ.

Hebreos 6:4

Ama Quisocristo aꞌpocosohuëꞌ. Ina aꞌpohuatamaꞌ, co nanitërinhuëꞌ anoyacancantinquëmasoꞌ. Aꞌnaquën Quisocristo nanamën nani nitotopi. “Quisocristo nichaꞌësarinpoaꞌ,” taꞌtonaꞌ, imapi. Cosharoꞌ piꞌnirëso pochin piꞌpian nohuitopi. Ispirito Santori chachin catahuarin.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.

1 Pedro 3:9

Piyapiꞌsaꞌ maꞌsha onpotohuachinënquëmaꞌ, ama iꞌhuërëtacamasoꞌ yonquicosohuëꞌ. Pinopachinënquëmaꞌ, ama canpitarisoꞌ pinocosohuëꞌ. Noya nontocoꞌ. Naporahuaton, Yosë nontocoꞌ inapitantaꞌ catahuain. Imapatëhuaꞌ, ina shaꞌhuitërinpoaꞌ aꞌnapitantaꞌ nosorocasoꞌ. Napohuatëhuaꞌ, Yosë noya catahuarinpoaꞌ.

1 Pedro 5:10

Yosë paꞌpi nosororinpoaꞌ. Quisocristo imarëhuaꞌ niꞌton, aꞌna tahuëri inápaquë quëpantarinpoaꞌ. Iporasoꞌ maꞌsha onpopirëhuahuëꞌ, catahuarinpoaꞌ. Co huaꞌquiꞌ parisitarihuahuëꞌ. Ina quëran nosoroatonpoaꞌ, anoyatarinpoaꞌ. Achinicancanarinpoaꞌ. Noya noya acoarinpoaꞌ.