Efesios 1:13 - Chayahuita (Shahui)

¹³ Canpitantaꞌ Yosë nanamën natanamaꞌ. “Quisocristo anoyacancantohuachinquëmaꞌ, nichaꞌësarinquëmaꞌ,” itërainquëmaꞌ. Natanpatamara: “Noꞌtën nanan inasoꞌ,” taꞌtomaꞌ, natëramaꞌ. Quisocristo imapatamaꞌ, huiꞌnin pochin Yosë niꞌninquëmaꞌ. Napoaton Ispirito Santo ayaꞌcoancantërinquëmaꞌ. Sichoquë marca acopiso pochin ayaꞌcoancantërinquëmaꞌ huëntonënquë ayaꞌconinquëmasoꞌ nitotacaso marëꞌ. Iráca shaꞌhuirinso chachin napotërinquëmaꞌ.

Efesios 1:13 ပူးပေါင်းရင်းမြစ်များ

Joel 2:28

Naquëranchin Sinioro taantarin: “Ina tahuëriꞌsa naꞌhuërinso piquëran, ispiritonëhuë yaꞌipi piyapinëhuëpita ayaꞌcoancantarahuë. Inapotohuato, huiꞌnamapita quëmapiꞌsaꞌ, sanapiꞌsaꞌ, yonquirahuëso shaꞌhuiponaꞌ. Mashoyaroꞌsanta huaꞌnataponaꞌ. Huiꞌnapiꞌsanta huaꞌnarëso pochin aꞌnotërahuësoꞌ, niꞌsapi.

Lucas 11:13

Canpitasoꞌ co noyahuëꞌ yonquiapomarahuëꞌ, huiꞌnamaꞌ nosororamaꞌ. Noya maꞌsha quëtëramaꞌ. Yosësoꞌ noya noya niꞌton, naꞌcon naꞌcon nosororinquëmaꞌ. Inápaquë yaꞌhuaponahuëꞌ, huiꞌninpita pochin niꞌninquëmaꞌ. Nontohuatamaꞌ, ‘Ispirito Santo ayaꞌcoancantoco,’ itohuatamaꞌ, ayaꞌcoancantarinquëmaꞌ,” itërin.

Lucas 24:49

Ispirito Santo aꞌpatimaranquëmaꞌ yaꞌcoancantiinquëmaso marëꞌ. Quiricanën quëran tatahuë shaꞌhuitërinquëmaso chachin aꞌpatimaranquëmaꞌ. Napoaton isëquë ninacoꞌ. Ispirito Santo yaꞌcoancantohuachinquëmaꞌ, naporo huarëꞌ nanitaparamaꞌ noya noya nicacamasoꞌ. Nani yaꞌcoancantohuachinquëmaꞌ, noya nanan shaꞌhuitonco huachi, itërin Quisosori.

Juan 1:17

Iráca Yosë nohuanton, Moisësë pënëntërin nani maꞌsha natëcasoꞌ. Pënëntopirinhuëꞌ, co yaꞌipiya anitotërinpoahuëꞌ. Quisocristoso nipirinhuëꞌ nosororinpoaꞌ. Noꞌtëquën nonaton, yaꞌipi nanamën anitotërinpoaꞌ.

Juan 14:26

Inápaquë pantahuato, tatahuë nontarahuë, Ispirito Santo aꞌpatimarinquëmaꞌ. Ca yaꞌhuërënamëhuë oꞌmararin. Inasoꞌ achinicancanarinquëmaꞌ. Yaꞌipi Yosë nanamën aꞌchintarinquëmaꞌ. Catahuaarinquëmaꞌ aꞌchintëranquëmasoꞌ ama naniantacamaso marëhuëꞌ. Catahuahuachinquëmaꞌ, nóya yonquiantaramaꞌ.

Juan 15:26

Yosëꞌpaꞌ pantahuato, Ispirito Santo aꞌpatimaranquëmaꞌ. Inasoꞌ achinicancanarinquëmaꞌ. Noꞌtëquënáchin nonin. Yosë quëran oꞌmarahuaton, piyapiꞌsaꞌ ayonquiarin. Nonahuëso chachin noꞌtëquën ayonquiarinquëmaꞌ.

Juan 3:33

Aꞌnaquënpoaso nipirinhuëꞌ natëtërëhuaꞌ. “Yosë noꞌtëquën nonin. Inari aꞌpaimarin,” taꞌtëhuaꞌ, natëtërëhuaꞌ.

Juan 6:27

Cosharomia aꞌnaroáchin chanatërin. Ama inasáchin nohuantocosohuëꞌ. Cosharo pochin nininsoꞌ yaꞌhuërin. Cancanëma marëꞌ quëtaranquëmaꞌ. Ina co onporontaꞌ chanatarinhuëꞌ. Yaꞌhuëtohuachinquëmaꞌ, Yosë nohuitatomaꞌ nanpimiatarama. Ina naꞌcon naꞌcon yonquicoꞌ. Yosë quëran quëmapico niꞌto, quëtaranquëmaꞌ. Ina marëꞌ Tata Yosë acorinco. Ina nohuanton, nani maꞌsha nanitaparahuë nohuitamacoso marëꞌ, itërin.

Hechos 1:4

Aꞌna tahuëri inapitarëꞌ niꞌsoꞌ, shaꞌhuitërin: —Ama aꞌnaroáchin Quirosarin quëran pipicosohuëꞌ. Isëquë ninacoꞌ Ispirito Santo oꞌmain. “Ispirito Santo aꞌpatimaranquëmaꞌ,” tënin Tata Yosë. Iꞌhua chachin shaꞌhuitëranquëmasoꞌ.

Hechos 13:26

“Canpoasoꞌ iyaroꞌsaꞌ, Apraan shinpitanpoaꞌ niꞌtëhuaꞌ, Yosë nanan aꞌpatirinpoaꞌ nichaꞌëinpoaso marëꞌ. Nisha piyapinquëmantaꞌ Yosë chinotohuatamaꞌ, nichaꞌësarinquëmaꞌ canpitantaꞌ. Napoaton yaꞌipinquëmaꞌ shaꞌhuitaranquëmaꞌ.

Hechos 2:33

Ina quëran Yosëri inápaquë quëpantarin. Chiníquën nanantërin niꞌton, inchinanën quëran ahuënsërin. Inapotahuaton, shaꞌhuitërin: ‘Ispirito Santo aꞌpamaquëꞌ piyapiꞌsaꞌ yaꞌcoancanchin. Iꞌhua shaꞌhuitëranquënsoꞌ,’ itërin. Ina quëran Quisosori Ispirito Santo aꞌpaimarin, yaꞌcoancantërincoi, niꞌnamaꞌ. Napoaton nisha nisha nananquë nonai, natanamaꞌ.

Romanos 1:16

Co casoꞌ tapanahuëꞌ Quisocristo nanamën aꞌchinaꞌhuaso marëꞌ. Piyapiꞌsaꞌ natëhuachinaꞌ, Yosëri anoyacancantarin. Inaíchin nanitaparin nichaꞌëinpoasoꞌ. Cotioroꞌsariꞌton natëhuachinaꞌ, anoyacancantarin. Iporasoꞌ nisha nisha piyapiꞌsantaꞌ anoyacancantarin. Napoaton paꞌyatërahuë nanamën shaꞌhuicaꞌhuasoꞌ.

Romanos 4:11

Yosë natërin niꞌton, inari noya niꞌnin. Coꞌhuara marca niacochatërasohuëꞌ, piyapinën pochachin niꞌnin. Ina piquëran marca niacotërin imarinsoꞌ anitotacaso marëꞌ. “Noꞌtëquën nontërinco,” topachina, noya niꞌnin. Nisha piyapiꞌsantaꞌ ina pochachin natëtohuachinara, Apraan pochin cancantopi. Co marca niacotopirinahuëꞌ, Apraan huiꞌninpita pochin nipi.

Romanos 6:17

Iráca oshanëma natëtomaꞌ, co noyahuëꞌ nipiramahuëꞌ. Quisocristo nanamën aꞌchintohuachinënquëmara, noya natanamaꞌ. Yaꞌipi cancanëma quëran noya natëramaꞌ. Ina yonquiatëhuaꞌ, “Yosparinquën” itërëhuaꞌ Yosë.

2 Corintios 1:22

Huiꞌnin pochin nicatonpoaꞌ, sichoquë marca acorëso pochin Ispirito Santo ayaꞌcoancantërinpoaꞌ. Huaꞌyanën chachin ayaꞌcoancantërinpoaꞌ niꞌton, anitotërinpoaꞌ. “Yaꞌipi shaꞌhuitërinpoasoꞌ chachin quëtarinpoaꞌ,” tënëhuaꞌ.

2 Corintios 6:7

Noꞌtëquën aꞌchinai. Yosë naꞌcon catahuarincoi niꞌton, aꞌchinpatoira, naꞌa piyapiꞌsaꞌ natanatonaꞌ, imasapi. Niꞌcoꞌ. Inimicoroꞌsaꞌ huëꞌpachinara, sontaroꞌsaꞌ huaꞌna quëran aꞌmorin ama inimicori paquitacaso marëhuëꞌ. Inapochachin Yosë achinirincoi ama sopai minsëincoiso marëhuëꞌ. Yosë nohuanton, noyasáchin ninai. Noya catahuarincoi niꞌton, sopai minsëarai.

Gálatas 3:14

“Yosë noꞌtëquën nontërinco,” tënin Apraan. Ina tëninso marëꞌ Yosëri noya niꞌnin. Nisha piyapiroꞌsarintaꞌ imacaiso marëꞌ Quisocristo chiminin. Ina natëhuachinara, Yosëri noya niꞌnin. Yaꞌipinpoaꞌ Quisocristo imapatëhuaꞌ, Ispirito Santo yaꞌcoancantarinpoaꞌ. Iráca Yosë shaꞌhuirinso pochachin yaꞌcoancantarinpoaꞌ.

Efesios 4:21

Inasoꞌ noꞌtëquën anitotërinpoaꞌ. Nanamën nani natanamaꞌ.

Efesios 4:30

Co noyahuëꞌ nipatamaꞌ, Ispirito Santo sëtarin. Quisocristo imapatamara, sichoquë marca acotërëso pochin Ispirito Santo ayaꞌcoancantërinquëmaꞌ. Ayaroꞌ tahuëriquë huarëꞌ aꞌpaiarinquëmaꞌ. Naporoꞌ noyá nichaꞌësarinquëmaꞌ. Napoaton ama Ispirito Santo asëtocosohuëꞌ.

1 Tesalonicenses 2:13

Yosë nanamën aꞌchintohuatëinquëmara, noya natanamaꞌ. “Co piyapi yonquirinsoꞌ aꞌchintërinpoahuëꞌ. Yosë nanamën chachin aꞌchintërinpoaꞌ,” tënamaꞌ. Tëhuënchachin Yosë nanamën niꞌton, ina natëhuatamaꞌ, nanamën quëran anoyacancantarinquëmaꞌ. Ina marëꞌ nani tahuëri “Yosparinquën,” itërai Yosë.

2 Timoteo 2:15

Noyasáchin niquëꞌ Yosë noya niꞌinquën. Yosë nanamën maꞌsona tapon naporinsopita noya nitotaton, noꞌtëquën aꞌchinquëꞌ. Ina marëꞌ noya sacatohuatan, co Yosëꞌpaꞌ tapanaranhuëꞌ.

2 Timoteo 2:19

Yosë nanamënso nipirinhuëꞌ yaꞌhuárin, Yosë chachin acorinsoꞌ. Natëricho pëiꞌ achinirinsoꞌ pochin niꞌton, yaꞌhuëmiatarin. Cato quëran chachin ninshitopi. “Yaꞌipi imapisopita Yosëri nohuitërin,” tënin. “Quisocristo imapisopita nóya cancanchinaꞌ. Yaꞌipi co noyahuëꞌ yonquipisopita nanianchinaꞌ,” tënin antaꞌ.

2 Timoteo 3:15

Huaꞌhuatapon quëra huarëꞌ Yosë quiricanën nohuitëran. Ina quëran Yosë nontërinpoaꞌ nichaꞌëinpoaso marëꞌ. Ina nitotohuatëhuaꞌ, Quisocristo natëhuatëhuaꞌ, cancanënpoaꞌ anoyacancantërinpoaꞌ.

Tito 2:11

Inaora nohuanton, Yosë nosororinpoaꞌ. Niꞌton, huiꞌnin chachin aꞌpaimarin nanamën anitotinpoaso marëꞌ. Inasoꞌ yaꞌipi piyapinpoaꞌ nichaꞌëinpoasoꞌ nohuantërin.

Hebreos 2:3

Iporaso nipirinhuëꞌ, Quisocristo aꞌpaimarin noya nanan shaꞌhuitiinpoaso marëꞌ. Naꞌcon nosoroatonpoaꞌ, yanichaꞌërinpoaꞌ. Huiꞌnin chachin niꞌton, co ina natëhuatëhuahuëꞌ, naꞌcon naꞌcon anaꞌintinpoasoꞌ yaꞌhuërin. Quisocristo chachin noya nanan shaꞌhuirin. Ina quëran caꞌtanoꞌsanënpitari natanahuatonaꞌ, inachachin shaꞌhuitaantarinënpoaꞌ.

Santiago 1:18

Inaora nohuanton, anasitaantatonpoa pochin nasha cancan quëtërinpoaꞌ. Inasoꞌ noꞌtëquën nonin. Nanamën natëhuatëhuaꞌ, huëntonënquë ayaꞌcoaninpoaꞌ. Huiꞌninpita pochachin niꞌninpoaꞌ. Canpoaꞌton anoyacancantërinpoaꞌ. Ina quëran oshaquëran naꞌayaꞌpi anoyacancantarin.

Santiago 1:21

Napoaton yaꞌipi co noyahuëꞌ yonquiramasopita naniantocoꞌ. Ama huachi oshahuancosohuëꞌ. Yosë nanamën nani aꞌchintërinënquëmaꞌ. “Caora Sinioro co nanitërahuëꞌ noya nicaꞌhuasoꞌ. Catahuaco,” taꞌtomaꞌ, nanamën yonquirácoꞌ. Ina yonquihuatamaꞌ, nichaꞌësarinquëmaꞌ.

1 Pedro 2:10

Iráca co Yosë piyapinënpita nipiramahuëꞌ, iporasoꞌ nani huëntonënquë ayaꞌconinquëmaꞌ. Iráca co insontaꞌ tëhuënchachin nosororinquëmahuëꞌ. Iporasoꞌ Yosë nosororinquëmaꞌ.

Apocalipsis 7:2

Ina quëran aꞌnanaya aꞌna anquënintaꞌ yaꞌnoantarin. Piꞌi pipirinsoꞌ parti quëran huëꞌsahuaton, huaꞌnaꞌhuaya quësarin Tata Yosë marcanën acocaso marëꞌ. Inasoꞌ catapini anquëniroꞌsaꞌ shaꞌhuitërin: