Efesios 1:10 - Chayahuita (Shahui)

¹⁰ Ina tahuërinën nanihuachin, Quisocristo yaꞌipiya huaꞌanëntarin. Isoroꞌpaquë yaꞌhuërinsopita, inápaquë yaꞌhuërinsopita inapita huaꞌanëntarin. Aꞌna huëntoínchin pochin acoarin. Ina Yosë naꞌcon nohuantërin.

Efesios 1:10 ပူးပေါင်းရင်းမြစ်များ

Génesis 49:10

Co inso tëranta huaꞌan quëran, quëmasoꞌ Cota, ocoiarinënhuëꞌ. Huara sëꞌquëranso co insonta mataponënhuëꞌ. Huaꞌanën chachin oꞌmaquë huarëꞌ co nanitapaponënhuëꞌ. Ina oꞌmahuachin, yaꞌipi nacionoꞌsari natëpona huachi.

Daniel 2:44

Ina copirnoroꞌsa huaꞌanëntasoiꞌ, Yosë inápaquë yaꞌhuërinso huaꞌanëntarin. Ina huaꞌanëntërinsoꞌ, co onporonta taꞌhuantarinhuëꞌ. Co aꞌnapita nacionoꞌsari minsëarinhuëꞌ. Aꞌnapita huaꞌanëntopisoꞌ, yaꞌipi ataꞌhuantapon. Yaꞌhuërëꞌ ina huaꞌanëntërinsosoꞌ, yaꞌhuëmiatapon.

Amós 9:11

Naquëranchin Sinioro taantarin: “Co huaꞌquiya quëranhuëꞌ israiroꞌsa noya acoantarahuë. Iráca Tapi copirnori huaꞌanëntapon naporinso pochachin acoantarahuë.

Malaquías 3:1

Yosë yaꞌipi nanitapaton shaꞌhuitaantarinquëmaꞌ: “Niꞌcoꞌ. Co huaꞌquiya quëranhuëꞌ, comisionëhuë aꞌpararahuë. Inasoꞌ, pënënatënquëma cancanëma anoyatarinquëmaꞌ. Noya ninarëso pochin nicasëmaꞌ, Sinioro oꞌmacaso marëꞌ napoarin. Ina Sinioro huaꞌqui ninarápiramahuëꞌ, aꞌnanaya chinotëramacoso pëiquë yaꞌconarin. Canpitaroꞌco anoyatërahuëso anitotiinquëmaso marëꞌ aꞌparahuësoꞌ, nani oꞌmacaso naniriarin. Ina canpitasoꞌ, naꞌcon nohuantërama niꞌcamasoꞌ.

Mateo 25:32

Yosë nohuanton, nisha nisha nananquë nonpisopita niyontonapi. Niyontonpachinaꞌ, pëꞌtahuatonaꞌpi pochin nisarahuë. Niꞌcoꞌ. Tahuëri nipachina, ohuicaroꞌsaꞌ, chiporoꞌsaꞌ napopianachin paꞌsapi coshatacaiso marëꞌ. Inaquëráchin yaꞌhuëpirinahuëꞌ, tashihuachina, nisha nisha acorin huachi.

Marcos 1:15

“Nani tahuëri nanirin huachi. Iso tahuëriꞌsaꞌ Yosë yahuaꞌanëntarinquëmaꞌ. Napoaton yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. Naporahuaton noya nanan natëcoꞌ Yosë nichaꞌëinquëmaꞌ,” itërarin.

1 Corintios 10:11

Yosë nohuanton, iráca napopisopita quiricanënquë ninshitopi pënëinpoaso marëꞌ. Inapita pochin nipatëhuaꞌ, anaꞌintarinpoaꞌ canpoantaꞌ. Nani anaꞌintacasoꞌ tahuëri naniriarin.

1 Corintios 11:3

Isontaꞌ iyaroꞌsaꞌ aꞌchinchinquëmaꞌ nitotocoꞌ. Co insontaꞌ inaora nohuanton yaꞌhuërinhuëꞌ. Tëhuënchachin natëcasoꞌ yaꞌhuërin, tënahuë. Sanapiꞌsasoꞌ soꞌinaꞌ natëinaꞌ. Quëmapiꞌsantaꞌ Quisocristo natëinaꞌ. Quisocristosoꞌ Tata Yosë natërin.

Gálatas 4:4

Ina quëran tahuërinën nanihuachina, Yosëri huiꞌnin aꞌpaimarin. Sanapi quëran nasitaton, piyapi chachin ninin. Cotio quëmapi niꞌton, iráca pënëntërinsoꞌ natëcasoꞌ yaꞌhuërin.

Efesios 1:22

Yosëri chachin Quisocristo nanan quëtërin yaꞌipi yaꞌhuërinsopita huaꞌanëntacaso marëꞌ. Naporahuaton, yaꞌipi imarëhuasopita catahuainpoaso marëꞌ acorin. Naꞌaquënpoaꞌ nipirëhuahuëꞌ, aꞌna huëntoínchin pochin ninëhuaꞌ. Inasoꞌ motënpoa pochin nicaton, yaꞌipiya huaꞌanëntarinpoaꞌ.

Efesios 2:15

Quisocristo nasha nanan quëtërinpoaꞌ. Co huachi iráca pënëntërinsoꞌ yonquicasoꞌ yaꞌhuërinhuëꞌ. Yaꞌipinpoaꞌ Quisocristo imapatëhuaꞌ, nasha huëntonquë ayaꞌconinpoaꞌ. Quisocristo huëntonënquë yaꞌconatëhuaꞌ, co huachi nisha chinotërëhuahuëꞌ. Nisha nisha piyapinpoaꞌ nirihuarahuëꞌ, noya niniꞌtëhuaꞌ yaꞌhuërëhuaꞌ.

Efesios 3:15

Inasoꞌ yaꞌipinpoaꞌ huaꞌanëntërinpoaꞌ. Aꞌnaquën inápaquë yaꞌhuërapi. Aꞌnaquënpoantaꞌ isoroꞌpaquë chachin yaꞌhuëarëhuaꞌ.

Efesios 3:2

Inaora nohuanton, Yosë chachin acorinco aꞌchintaꞌhuanquëmaso marëꞌ. Naꞌcon catahuarinco niꞌton, nanamën shaꞌhuiárahuë, natantëramaꞌ.

Colosenses 1:16

Yosë nohuanton, inarë chachin yaꞌipi maꞌsha ninin. Inápaquë yaꞌhuërinsopita, isoroꞌpaquë yaꞌhuërinsopita, inapita acorin. Aꞌnaquën quënanëꞌ. Aꞌnaquënso co quënanëhuëꞌ. Anquëniroꞌsaꞌ, inápaquë chiníquën nanantërinsopita, nisha nisha nininsopita, inapitantaꞌ ninin. Quisocristoíchin chinotacaiso marëꞌ yaꞌipiya yaꞌhuërin. Ina marëꞌ acorin.

Colosenses 1:20

Iráca oshahuanëhuaꞌ niꞌton, yaꞌipinpoaꞌ Yosë inimicotopirëhuahuëꞌ. Yosë nohuanton, Quisocristo chiminin nanan anoyatinpoaso marëꞌ. Isoroꞌpaquë yaꞌhuërinsopita, inápaquë yaꞌhuërinsopita, yaꞌipiya nohuantërin anoyatacasoꞌ. Canpoa marëꞌ huënainën paꞌnin. Corosëquë chiminin niꞌton, co huachi Yosë inimicotacasoꞌ yaꞌhuërinhuëꞌ.

Colosenses 3:11

Quisocristo imapatëhuaꞌ, napopináchin Yosë niꞌninpoaꞌ. Aꞌnaquën cotioroꞌsaꞌ, aꞌnaquënso nipirinhuëꞌ cricoroꞌsaꞌ. Aꞌnaquën marca niacotopisoꞌ, aꞌnaquënso nipirinhuëꞌ co niacotopihuëꞌ. Aꞌnaquën nisha piyapiꞌsaꞌ, aꞌnaquëntaꞌ quëmaroꞌsaꞌ. Aꞌnaquën patron piyapinënpita, aꞌnaquënso nipirinhuëꞌ inahuara marëꞌ sacatopi. Nisha nisha nicarihuarahuëꞌ, napopináchin Yosë niꞌninpoaꞌ. Quisocristoíchin yonquicasoꞌ yaꞌhuërin. Ina imapatëhuaꞌ, yaꞌipinpoaꞌ yaꞌcoancantërinpoaꞌ. Co mantaꞌ pahuantarinpoahuëꞌ noya cancantacaso marëꞌ.

Hebreos 1:2

Iporaso nipirinhuëꞌ, huiꞌnin quëran nontërinpoaꞌ. Iráca Yosëri shaꞌhuitohuachina, Quisocristori isoroꞌpaꞌ, inápaquë yaꞌhuërinsopita, yaꞌipi ninin. Aꞌna tahuëri Yosë nohuanton, yaꞌipi huaꞌanëntarin.

Hebreos 11:40

Canpoantaꞌ yonquiatonpoaꞌ, Yosë ninararinpoaꞌ. Iporasoꞌ Quisocristo nani chiminin niꞌton, yaꞌipinpoaꞌ anoyacancantërinpoaꞌ. Iráca imapisopita, ipora canpoantaꞌ, yaꞌipinpoaꞌ anoyacancantërinpoaꞌ. Aꞌna tahuërintaꞌ inápaquë paꞌpatëhuaꞌ, Yosë noyá nohuitarihuaꞌ.

Hebreos 9:10

Iráca nisha nisha cosharoꞌ aꞌpopi. Nisha nisha oꞌocasontaꞌ aꞌpopi. Co noyahuëꞌ nipachinara, “Oshanëhuë inquiꞌi,” taꞌtonaꞌ, nisha nisha paꞌmopi. “Inapotohuatëhuaꞌ, Yosë noya niꞌsarinpoaꞌ,” topirinahuëꞌ, co ina marëꞌ noya cancantopihuëꞌ. Yosëri nasha nanan shaꞌhuitaton, anoyataquë huarëꞌ inapocaisoꞌ yaꞌhuërin.

1 Pedro 1:20

Iráca coꞌhuara isoroꞌpaꞌ yaꞌhuëyátërasohuëꞌ, Yosë yonquirin huiꞌnin aꞌpaimacaso marëꞌ. Ipora huarëꞌ yaꞌnorin canpitantaꞌ nichaꞌëinquëmaso marëꞌ. Nani ayaroꞌ tahuëri yaꞌcaritapon chachin yaꞌnorin.

Apocalipsis 5:9

Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.