Eclesiastés 9:11 - Chayahuita (Shahui)

¹¹ Isopitantaꞌ, isoroꞌpaquë niꞌnahuë: Taꞌapisopita nicanahuachinara, co chini chiníquën taꞌapisopitaráchin canatopihuëꞌ. Ahuëtohuachinarantaꞌ, co chiníquën cancantopisopitaráchin canatopihuëꞌ. Co yonquínahuan nipisopitaráchin cosharohuanpihuëꞌ. Co yonqui yonquicharapisopitaráchin maꞌhuanpihuëꞌ. Co nitotonoꞌsaráchin piyapiꞌsari noya niꞌpihuëꞌ. Yaꞌipinpoa capainchiaquë huarëꞌ noya ninëhuaꞌ.

Eclesiastés 9:11 ပူးပေါင်းရင်းမြစ်များ

2 Samuel 17:14

Apësaron, Israiro ansianoꞌsaꞌ, inapitaso Osai naporinso natanpi. Ina natanatonaꞌ: “Osaicha, Aitohuiro quëran noya noya pënëninpoa paya,” topi. Aitohuirori noꞌtëquën pënënpirinhuëꞌ, Sinioro nohuanton co ina imapihuëꞌ. Tapiri, Apësaron canacaso marëꞌ naporin.

2 Samuel 17:23

Aitohuirosoꞌ: “Noꞌtëquën pënënpirahuëꞌ, co Apësaron natërincohuëꞌ. Co natërincohuëꞌ niꞌquëhuarëꞌ, paꞌpini canapon,” tënin. Ina yonquiaton moranën taparin. Inaquë yaꞌmitëahuaton huaꞌhuatërinso ninanoquë paꞌnin. Canconahuaton quëmopinënpita, piyapinënpita, inapita nontërin. Maꞌpitaso nicacaisoꞌ camaitërin. Inaporahuaton, noninquë nihuënquëconorin quëran chiminin. Napohuachina, inanta paꞌpincoꞌ poꞌmopiquë chachin poꞌmoontapi.

Proverbios 1:5

Yonquínahuan nipisopitasoꞌ, pënëinpoaso marëꞌ ninshitopisoꞌ, paꞌyatapona natanacaisoꞌ. Inapoatonaꞌ, yonqui yonquínahuanoꞌsa nicaponaꞌ.

Eclesiastés 3:14

Nani maꞌsha Yosë acorinsopitasoꞌ, ina chachin yaꞌhuëmiatarin. “Iso pahuantërin niꞌton, acochi. Isoso yaꞌsotërin niꞌton, machi,” co taꞌcaso yaꞌhuërinhuëꞌ. Ina pochin Yosëri acorin. Tëꞌhuatatëhua ina chinotacaso marëꞌ naporin.

Eclesiastés 3:17

Napoaponahuëꞌ, isoroꞌpaquëso maꞌsha nicacaiso tahuërinën yaꞌhuëtëraꞌpiarin. Ina yonquiato co huachi aquëtë sëtërahuëꞌ. Noya nipisopita, co noyahuëꞌ nipisopita, tahuërinën nanihuachin, Yosëri coisë pochin nicaton maꞌsona onpotacasoꞌ, noꞌtëquën shaꞌhuitapon.

Jeremías 9:23

Sinioro chachin ina pochin shaꞌhuitërinpoaꞌ. Naquëranchin Sinioro taantapon: “Aꞌnaquëma nani maꞌsha nitotëramaꞌ. Napoapomarahuëꞌ: ‘Ma noyacha caso nitotërahuë paya,’ ama tocosohuëꞌ. Chiníquënquëma nipatamantaꞌ: ‘Ma noyacha caso chinirahuë paya,’ ama tocosohuëꞌ. Nani maꞌsha yaꞌhuëtohuachinquëmantaꞌ: ‘Ma noyacha caso nani maꞌsha yaꞌhuëtërinco paya,’ ama tocosohuëꞌ.

Daniel 4:35

Isoroꞌpaquë yaꞌhuëpisopita quëma marësoꞌ, co máquënoꞌsahuëꞌ. Inápaquë yaꞌhuëpisopita, nohuantëransoráchin nipi. Isoroꞌpaquëntaꞌ, ina pochachin nipi. Chini chiníquën nanantëran niꞌton, co insonta nanitarinhuëꞌ, chinitiinquënsoꞌ. Maꞌsha nipataontaꞌ: ‘¿Onpoatonta ina pochin nisaran?’ co itiinënso yaꞌhuërinhuëꞌ,” itërahuë.

Malaquías 3:18

Noya nipisopitasoꞌ, noya nicato nichaꞌësarahuë. Co noyahuëꞌ nipisopitasoꞌ, noꞌtëquën anaꞌintarahuë. Ina nicatoma canpitasoꞌ: ‘Yosësoꞌ, co napopináchin piyapinpoa niꞌninpoahuëꞌ. Ina chinotohuatëhuaꞌ, noya acoarinpoaꞌ. Coꞌsoꞌ chinotohuatëhuahuëꞌ, noꞌtëquën anaꞌintarinpoaꞌ,’ tosarama huachi,” tënin.

Efesios 1:11

Inaora nohuanton, acorinpoaꞌ piyapinënpita nicacaso marëꞌ. Quisocristo imapatëhuaꞌ, huiꞌnin pochin niꞌsarinpoaꞌ. Napoaton aꞌna tahuëri Yosëꞌpaꞌ noya noya acoarinpoaꞌ. Iráca chachin yonquirinpoaꞌ niꞌton, huëntonënquë ayaꞌconinpoaꞌ.

Deuteronomio 8:17

‘Quiyaora sacatatoi yaꞌipi isopita maꞌsha canarai,’ ama tocosohuëꞌ.

Deuteronomio 8:18

Sinioro achinirinquëma niꞌton, sacatatoma nani maꞌsha maꞌpatëramaꞌ. Shimashonënpoapitarëꞌ anoyataton, shaꞌhuitërinsoꞌ nanicaso marëꞌ catahuarinquëmaꞌ. Ama ina naniantocosohuëꞌ.

1 Samuel 17:50

Inapotaton Tapiri Coriato canarin. Naꞌpira aꞌparinquëáchin nipirinhuëꞌ, acohuachina, nitëpatëpatarin. Tapisoꞌ co sahuënihuanhuë niꞌton, yaꞌcariconin. Yacariconahuaton inaora sahuëninën chachin ocoitahuaton, tëpachanin. Ina piquëran nishitëconotërin. Aꞌnapita huiristino sontaroꞌsasoꞌ chini chiníquën sontaronëna chimininso niꞌpi. Ina nicatona taꞌapi huachi.

1 Samuel 6:9

Napoaponahuëꞌ, insëchinsona ohuacaroꞌsa paꞌsapisoꞌ niꞌcoꞌ. Noꞌpanënpoa notënanquë Israiro ninano Piti-simisi itopiso yaꞌhuërin. Inaso ninanoꞌ, Sinioro caposonën noꞌpanënquë chachin yaꞌhuërin. Ina parti paꞌpachin, noꞌtëquën yonquiarihuaꞌ: “Tëhuënchachin Sinioro nohuanton maꞌsha onporëhuaꞌ,” tëcarihuaꞌ. Napoaponahuëꞌ, ohuacaroꞌsaso huaꞌhuina yonquiatonaꞌ, tënpaanquë paꞌpachinaꞌ: “Co Sinioro nohuanton maꞌsha onporëhuahuëꞌ, topinan naporëhuaꞌ,” tëcarihuaꞌ, itopi.