Eclesiastés 3:12 - Chayahuita (Shahui)

^12-13 Napoaton nanpisëhuasoꞌ, noya ancatatëhua yaꞌhuëcaso yaꞌhuërin. Sinioro nani quëtërinpoaꞌ, capacasoꞌ, oꞌocasoꞌ, sacatatë canacasoꞌ, inapita acotërinpoa niꞌton, noya ancantahuaꞌ.

Eclesiastés 3:12 ပူးပေါင်းရင်းမြစ်များ

Salmos 37:3

Canpitaso noya nicatoma Sinioro natëcoꞌ. Inasáchin cancantatoma isoroꞌpaquë yaꞌhuëcoꞌ.

Eclesiastés 3:22

Napoaton piyapinpoa isoroꞌpaquë nanpisëhua chachin, sacatërëhuaso marëꞌ noya coshatahuaꞌ, noya oꞌoahuaꞌ, nohuantërëhuasopita maꞌpatahuaꞌ, napoaꞌahuaꞌ. Inayara canpoasoꞌ acanatë pochin Yosë quëtërinpoaꞌ. Chiminpatëhuaꞌ, yaꞌipi patarihuaꞌ. Ina piquëran maꞌsona isoroꞌpaquë onporapisoꞌ aꞌnotiinënpoaso marëꞌ co insonta quësarinpoahuëꞌ.

Isaías 64:5

Noya cancantatona noya nipisopita, nohuantëransoráchin nipisopita, inapita quëmarisoꞌ noya niꞌnan. Iporaso nipirinhuëꞌ, oshahuanai niꞌton, noꞌhuirancoi. Nani huaꞌqui co quëma costaransohuëꞌ ninai.

Lucas 11:41

Cancanëma quëran huarëꞌ saꞌahuaroꞌsaꞌ catahuacoꞌ. Nosorohuatamaꞌ, noyápiachin cancantaramaꞌ.

Hechos 20:35

Canpitantaꞌ nonanco. Sacatatomaꞌ, pahuantërinsopita maꞌsha quëtocoꞌ. Sinioro Quisoso noninsoꞌ yonquicoꞌ. ‘Aꞌnapita maꞌsha topinan quëtohuachinquëmaꞌ, noya cancantëramaꞌ. Nipirinhuëꞌ, canpitarintaꞌ nosoroatomaꞌ, topinan quëtohuatamaꞌ, noya noya cancantaramaꞌ,’ tënin Quisoso,” itërin Paonori.

Deuteronomio 12:18

Insëquësona Siniorori huayonin niꞌton, ina chinotacaso nëꞌmëtë pëi acoramaꞌ. Inaquësáchin inasoꞌ, quëpatoma caꞌsaramaꞌ. Huiꞌnamaꞌ, piyapinëmaꞌ, inapitanta canpitarë chachin capa cancantaponaꞌ. Nihuiroꞌsanta canpitarë yaꞌhuërinsoꞌ, naporo capa cancanchinaꞌ. Sacatëramaquë, pëꞌtahuatëramaquë, inaquëpita Yosë catahuarinquëmaso yonquiatomaꞌ, capa cancantaramaꞌ.

Deuteronomio 12:7

Inaquë Sinioro yonquiatomaꞌ: Saꞌamaꞌ, huiꞌnamaꞌ, quëmopiroꞌsaꞌ, inapita coshataramaꞌ. Sacatëramaquë, pëꞌtahuatëramaquë, inaquëpita Yosë catahuamiatërinquëmaꞌ. Ina yonquiatoma capa cancantaramaꞌ.

Deuteronomio 26:11

Ina piquëran Sinioro marëꞌ pita nisaran. Quëmopinënpitarëꞌquën chachin nani maꞌsha Sinioro quëtërinquën. Ina yonquiaton, capa cancantaran. Naporo chachin nihuiroꞌsaꞌ, nisha piyapiroꞌsa yacaparinquëmasopita, inapitanta canpitarë chachin capa cancantapi antaꞌ,” itërin.

1 Timoteo 6:18

Naꞌa coriqui yaꞌhuëtohuachinquëmaꞌ, aꞌnapita nosoroatomaꞌ, catahuacoꞌ. Maꞌsha pahuantohuachina, quëtocoꞌ. Ama mantaꞌ apiracosohuëꞌ. Noya nicoꞌ.