Deuteronomio 9:4 - Chayahuita (Shahui)

⁴ Sinioro nohuanton nani inapita aꞌpahuatamaꞌ: ‘Noya ninëhuaso marëꞌ Sinioro catahuarinpoa inapita aꞌpatëhuaꞌ, noꞌpanëna matërëhuaꞌ,’ ama tocosohuëꞌ. Co ina marëꞌ aꞌparinhuëꞌ. Paꞌpi co noyahuëꞌ nipi niꞌton, aꞌparin.

Deuteronomio 9:4 ပူးပေါင်းရင်းမြစ်များ

Génesis 15:16

Catapini shinpita huënton, yaꞌhuërin piquëran, shiparinpita isëquë chachin huëntaponaꞌ. Amororoꞌsa co noyahuëꞌ nipisoꞌ, co aquëtë huarëꞌ nishátërarinhuëꞌ. Napoaton naporo tahuëriꞌsa huarëꞌ anaꞌintarahuë huachi.

Ezequiel 36:22

Napoaton Siniorosoꞌ israiroꞌsa nontaꞌhuasoꞌ camairinco: “Sinioro naporin: ‘Canpitasoꞌ co nichaꞌëahuanquëmasoꞌ inashitëramahuëꞌ. Napoaponahuëꞌ, canpita naꞌin quëran nisha nisha parti quëparinëmaquë, piyapiꞌsa naponin yonquirapirinaco. Inapoatona tëhuarinaco. Napoaton napopisoꞌ acopitaꞌhuaso marëꞌ nichaꞌësaranquëmaꞌ. Inapotohuatënquëmaꞌ, nisha nisha piyapiꞌsasoꞌ Sinioroco niꞌto, chiníquën nanantërahuëso nitotapi: “Israiroꞌsasoꞌ, noꞌtën Yosë chachin chinotopi,” tëcaponaꞌ. Ca Sinioroco niꞌto, shaꞌhuitëranquëmaso chachin nisarahuë.

Ezequiel 36:32

Ama ninonpintocosohuëꞌ. Co canpita noya ninamaso marëꞌ ina pochin acoaranquëmahuëꞌ. Canpitaso co noyahuëꞌ ninama niꞌton, tapanamaso yaꞌhuërin.

Romanos 11:20

Yosëri tananpitërin mini. Nipirinhuëꞌ, co ina marëꞌ tananpitërinhuëꞌ. Co Quisocristo nohuantopihuëꞌ niꞌton, tananpitërin. Canpitantaꞌ imaramaꞌ niꞌton, noya niꞌninquëmaꞌ. Napoaton ama inapita nocancosohuëꞌ. Niꞌcona canpitantaꞌ Quisocristo naniantotamaꞌ.

Romanos 11:6

Inaora nohuanton, catahuarin. Co noya nipiso marëꞌ catahuarinhuëꞌ. Noya nipiso marëꞌ huayonin naporini, co huachi inaora nohuanton, catahuacasoꞌ yaꞌhuëꞌitonhuëꞌ.

1 Corintios 4:4

Noya mini natërahuë, topirahuëꞌ, co casoꞌ Yosë pochin nitotërahuëꞌ. “Noyaco,” tënahuëso marëꞌ co Yosë noya niꞌsarincohuëꞌ. Inaíchin yaꞌipi nitotaton, noꞌtëquën shaꞌhuitarinpoaꞌ.

1 Corintios 4:7

Yosë nohuanton, nisha nisha nitotërëhuaꞌ. Co canpoara nohuanton, nitotërëhuahuëꞌ. Yosëíchin catahuarinpoaꞌ noya noya nicacasoꞌ. Co catahuarinpoahuëꞌ naporini, co mantaꞌ nitochitërihuahuëꞌ. Napoaton co nocantacasoꞌ yaꞌhuërinhuëꞌ.

Deuteronomio 12:31

Ama Sinioro aꞌpocosohuëꞌ. Ama ina yaꞌhuërënamën, mamanshiroꞌsa moshacosohuëꞌ. Inaquë yaꞌhuëpisopitasoꞌ, inapoatonaꞌ co Sinioro costarinsohuëꞌ nipi. Aꞌnaquënsoꞌ, huiꞌninapitaquë huarëꞌ pënquë ahuiquitopi. Mamanshinëna moshacaiso marëꞌ napopi. Ama canpitaso Yosë chinotohuatamaꞌ, ina pochin nicosohuëꞌ.

Deuteronomio 31:27

Nani co natantochináchinhuëꞌ cancantëramasoꞌ, nitotërahuë. Niꞌcoꞌ. Nanpichinapo chachinta Sinioro co natëtomarahuë tëhuëtëramaꞌ. Aquëtë huarëꞌ nisarama chiminpatosoꞌ.

Deuteronomio 8:17

‘Quiyaora sacatatoi yaꞌipi isopita maꞌsha canarai,’ ama tocosohuëꞌ.

Deuteronomio 9:24

Yaꞌnan nohuitëranquëma quëran huarëꞌ, canpitaso co natantochináchinhuëꞌ cancantëramaꞌ. Ina pochin cancantatomaꞌ, co Sinioro natëramahuëꞌ.

Deuteronomio 9:5

Tëhuënchachin co canpita noya ninamaso marëꞌ, inapita noꞌpanëna masaramahuëꞌ. Inapita co noyahuëꞌ nipiso marëꞌ, aꞌpararin. Naporahuaton, shimashonëmapita: Apraan, Isaco, Cacopo, inapita shaꞌhuitërinsoꞌ yonquiaton inapotarin.

Deuteronomio 9:7

Naquëranchin Moisësëri israiroꞌsa nontaantarin: “Inotëro parti paasëmaꞌ, Sinioro tëhuëtëramasoꞌ ama naniantocosohuëꞌ. Iquipito quëran pipirama quëran isëquë canquiama huarëꞌ co natantochináchinhuëꞌ cancantëramaꞌ. Ina pochin cancantatoma Sinioro tëhuëtëramaꞌ.

2 Timoteo 1:9

Yosë chachin anoyacancantërinpoaꞌ. Oshanënpoaꞌ inquitatonpoaꞌ, acorinpoaꞌ nóya nicacaso marëꞌ. Inaora nohuanton, nosororinpoaꞌ. Co noyahuëꞌ nipirëhuahuëꞌ, nosoroatonpoaꞌ, catahuarinpoaꞌ. Coꞌhuara isoroꞌpaꞌ acoyátërasohuëꞌ, ninotonpoaꞌ, nosororinpoaꞌ. Naporoꞌ chinotërin Quisocristo aꞌpaimacasoꞌ. Ina imapatëhuaꞌ, anoyacancantërinpoaꞌ.