Deuteronomio 9:1 - Chayahuita (Shahui)

¹ Naquëranchin Moisësëri israiroꞌsa nontaantarin: “Natanco israiroꞌsanquëmaꞌ: Nani nanirin Cortaniiꞌ pëntontatomaꞌ, chini chiníquën nacionoꞌsa yaꞌcontatoma minsëamasoꞌ. Inaquë inápa pairahuan ninanoroꞌsa yaꞌhuëpirinhuëꞌ, canpitari yaꞌcontatoma minsëaramaꞌ.

Deuteronomio 9:1 ပူးပေါင်းရင်းမြစ်များ

Génesis 11:4

Ina quëran ninontaantapi: “Huëco chiníquën cancantatëhuaꞌ, ninano ocoiaꞌahuaꞌ. Ina nisahuatëhuaꞌ, aꞌna torinta piꞌiroꞌtëquë huarëꞌ nincaninso niahuaꞌ. Inapoatëhuaꞌ, sacóshin nahuinarihuaꞌ. Naporahuaton, co huachi itohua itohua yanquëcaso yaꞌhuaponhuëꞌ,” nitopi.

Éxodo 32:1

Israiroꞌsaso Moisësë huaꞌquirinso niꞌsahuatonaꞌ, Aaron paahuapi: —Moisësë Iquipito quëran ocoipirincoihuëꞌ. ¿Intohuaso paꞌmara? Co nitotëraihuëꞌ. Napoaton catahuaincoiso marëꞌ, mamanshi nitocoi, itopi.

Daniel 4:11

Inasoꞌ nara aꞌshinahuaton, aquë aquëtë pancanantërin. Huiꞌnimotën quëran piꞌiroꞌtëquë huarëꞌ nincanin. Yaꞌipi isoroꞌpaꞌ quëran nanitopi quënanacaisoꞌ.

Amós 2:9

Ina quëran Siniorosoꞌ, piyapinënpita itapon: “Iráca caso shimashonëmapita isoporinquë poꞌmocaꞌhuaso marëꞌ amororoꞌsa ataꞌhuantërahuë. Inapitasoꞌ nonara pochin inapatopirinahuëꞌ, ataꞌhuantërahuë nopri nara pochin chiníquënoꞌsa nipirinahuëꞌ, inapotërahuë.

Deuteronomio 4:1

Moisësëri israiroꞌsa nontaton itapon: “Iporaso huachi, Sinioro pënëntërinsoꞌ natëcoꞌ. Camairinquëmasopitantaꞌ, natëcoꞌ. Nani yaꞌipi carinquëma aꞌchintëranquëmaꞌ. Ama topinan quëran natanatomarahuëꞌ, ina nohuantërinso nicoꞌ. Inapohuatamaꞌ, noya nanpitoma Yosë quihuitërinpoasoꞌ noꞌpaquë yaꞌconatoma huaꞌanëntaramaꞌ. Shimashonënpoapita shaꞌhuitërinso chachin quëtarinpoaꞌ.

Deuteronomio 6:10

Naquëranchin Moisësëri israiroꞌsa pënëantarin: “Shimashonënpoapita Apraan, Isaco, Cacopo, inapita nani shaꞌhuitërin: ‘Caso Yosëco niꞌto, iso noꞌpaꞌ quëtaranquëmaꞌ,’ itërin. Shaꞌhuitërinso chachin Sinioronënpoa inaquë ayaꞌcoaninquëmaꞌ. Inaquësoꞌ, panca ninanoroꞌsa noyápiachináchin yaꞌhuërin. Co canpitari ninamahuëꞌ.

Deuteronomio 7:1

Naquëranchin Moisësëri israiroꞌsa nontaantarin: “Sinioroso Yosënënpoa niꞌton, catahuarinquëma noꞌpaꞌ quëtarinquëmaquë yaꞌconacamasoꞌ. Ina marëꞌ canchisë nacionoꞌsa aꞌpararin. Canpita quëran naꞌcon naꞌcon niꞌtona chini chiníquën nanantopirinahuëꞌ, aꞌpararin. Cananoꞌsaꞌ, itiroꞌsaꞌ, amororoꞌsaꞌ, huirisëroꞌsaꞌ, quiriquiroꞌsaꞌ, iporoꞌsaꞌ, quiposoroꞌsaꞌ, inapita itopisoꞌ aꞌpararin.

Josué 1:11

“Yaꞌipi yaꞌhuëarëhuataëchin paꞌtocoꞌ. Paꞌsahuatoma israiroꞌsa camaico cosharo carahuasoꞌ, niinaꞌ. Cara tahuëri quëran Cortaniiꞌ pëntontarihuaꞌ. Sinioro noꞌpaꞌ quëtarinpoaquë, yaꞌconacaso marëꞌ napoarihuaꞌ. Inaquë naꞌa inimicoroꞌsa yaꞌhuëpirinahuëꞌ, Yosë catahuarinpoa niꞌton, minsëarihuaꞌ. Minsërahuatëhuaꞌ, noꞌpanëna matarihuaꞌ,” itërin.

Josué 1:15

Quëmopinëmanta Siniorori catahuapon. Canpita catahuarimaso pochachin inapitanta noꞌpaꞌ quëtohuachina, sano cancantapi huachi. Nani inapitanta noꞌpaꞌ huaꞌanëntohuachinaꞌ, canpitanta yaꞌhuëramaquë chachin huënantapomaꞌ. Noꞌpanëmaquë yaꞌhuëmiatamaso marëꞌ huënantapomaꞌ, itërin.

Josué 3:14

(Naporo tahuëriꞌsa shaꞌtopisoꞌ macacaiso tahuëriꞌsa nisarin. Napoaton Cortaniiꞌ paquiitarin.) Cosoiri napotohuachina israiroꞌsasoꞌ, yaꞌhuëapi quëran pipipi. Pipirahuatona corto huaꞌanoꞌsa imapi. Inapitasoꞌ Siniororëꞌ anoyatopiso caposonën, pitënpi quëran iꞌnaitomapi. Iꞌnaitasoi chachin pëtëtëran iꞌsha oꞌmarinsoꞌ, iꞌ paꞌcopitopiquë chinirinso pochin ninin.

Josué 3:16

Co inaꞌhuaya naporinhuëꞌ. Atamo ninanoquë naporin. Inaso ninanoꞌ, Sarëtan itopiso yaꞌcari yaꞌhuërin. Sarëtansoꞌ, sontaroꞌsa noyá niacorapipiquë. Pëꞌnatëran iꞌ paꞌmarinsoso nipirinhuëꞌ, Chimiriiꞌ marëꞌpaꞌ nitiquimarin. Ina pochin Siniorori Cortaniiꞌ patomairin. Inapohuachina israiroꞌsasoꞌ, Quirico ninano notënanquë pëntonpi huachi.

Josué 3:6

Tahuëririnquë corto huaꞌanoꞌsantaꞌ, itapon: “Yosërëꞌquënpoa anoyatërëhuaso caposonën pitënama quëran quëpacoꞌ. Quëchitahuatoma ina pitënama quëran Cortaniiꞌ pëntontocoꞌ,” itërin. Napotohuachina corto huaꞌanoꞌsasoꞌ, Cosoi camaitërinso chachin nipi.

Josué 4:19

Pascoa yoquiquë shonca tahuëritapasoꞌ, israiroꞌsa Cortaniiꞌ yanirin quëran pëntonpi. Pëntonahuatona Quiricaro itopiquë chinotai marëꞌ nëꞌmëtë pëinëna ótëantapi. Quiricarosoꞌ Quirico quëran, piꞌi pipirinso parti quëparitërin.

Josué 4:5

Huëꞌpachinara itapon: “Cortaniiꞌ yanirinquë huancanaquë huarëꞌ, pacoꞌ. Sinioronënpoa caposonën notënanquë aꞌnaya aꞌnayama aꞌnara naꞌpi macoꞌ. Israiroꞌsanpoasoꞌ, shonca cato huënton ninëhuaꞌ. Napoaton, aꞌnaya aꞌnaya mapatamaꞌ, shonca cato yaꞌipiya quëran naniarin.