Deuteronomio 7:13 - Chayahuita (Shahui)

¹³ Nosoroatënquëma catahuaarinquëma niꞌton, ina nohuanton naꞌa huiꞌnama yaꞌhuëtarinquëmaꞌ. Huiꞌnamapitantaꞌ, inapochachin catahuamiatarin. Trico, sipata, inapita shaꞌnamasontaꞌ, noya noyatarin. Ina nohuanton huinonta oꞌocamasoꞌ, tomanta capamasoꞌ, co pahuantarinquëmahuëꞌ. Ina nohuanton ohuacanëmantaꞌ, ohuicanëmanta naꞌasarin. Shimashonënpoapita shaꞌhuitaton: ‘Caso Yosëco niꞌto, iso noꞌpaꞌ quëtaranquëmaꞌ,’ itërin. Ina niꞌton quëtarinquëmaꞌ. Inaquë yaꞌcontapamaꞌ, inapotarinquëmaꞌ.

Deuteronomio 7:13 ပူးပေါင်းရင်းမြစ်များ

Nehemías 9:32

Quëmaso Yosënëhuëinquën. Chini chiníquën nanantaton paꞌpi huëhuëpiro nininsopita ninan. Nosororancoisoꞌ co nishatërinhuëꞌ. Quiyarëꞌquën anoyatëransontaꞌ, inachachin nisárin. Napoaton parisitëraisoꞌ noꞌtëquën tantiaquëꞌ. Copirnonëhuëipita, huaꞌanoꞌsaꞌ, corto huaꞌanoꞌsaꞌ, pënëntonaꞌpiroꞌsaꞌ, shimashonëhuëipita, yaꞌipicoi nani nohuantaso parisitërai. Asiria copirnoroꞌsa quëran huarëꞌ aparisitërinacoisoꞌ, ipora huanta inapoarai.

Copo naporinso' 42:12

Iráca coꞌhuara maꞌsha onpoyátëraponhuëꞌ, Yosëri Copo noya catahuarin. Maꞌsha onporin piquëransoꞌ, noya noya catahuarin. Ina nohuanton ohuicanënpita shonca catapini huaranca, camiyonënpitanta saota huaranca, noꞌpaꞌ ohuërërinsopitanta toronënpitarë chachin huaranca, moranënpitanta huaranca, inanapo yaꞌhuëtërin.

Salmos 1:3

Inapohuatëhuaꞌ, iꞌshana yonsanquë sharoꞌsa shaꞌpinan pochin nicarihuaꞌ. Inasoꞌ, monoquën quëran huarëꞌ noya noyataton, tahuërinën nanihuachin nitërin huachi. Ina pochin nipatëhuasoꞌ, yaꞌipi ninëhuasopita noya pipitarinpoaꞌ.

Salmos 107:38

Yosëri catahuarin niꞌton, naꞌamiatopi. Pëꞌtahuanënapitantaꞌ, sacóshin anaꞌatopi.

Salmos 127:3

Sinioro catahuahuachinpoasoꞌ, huiꞌnanpoapita yaꞌhuëtërinpoaꞌ.

Proverbios 15:9

Co noyahuëꞌ nipisopita napopisoꞌ, co Siniorori ahuantërinhuëꞌ. Noyasáchin nipisopitaso nipirinhuëꞌ, nosororin.

Mateo 6:33

Napoaton Yosë naꞌcon naꞌcon yonquicoꞌ. Aꞌnapitantaꞌ catahuacoꞌ huaꞌanëntërinquë yaꞌconacaiso marëꞌ. Yosë nontocoꞌ noyasáchin yonquicamaso marëꞌ. Ina pochin cancantohuatamaꞌ, catahuarinquëmaꞌ. Ina nohuanton, maꞌsha pahuantërinquëmasopita yaꞌhuëtarinquëmaꞌ.

Juan 14:21

Nani pënënanquëmasoꞌ nitotatomaꞌ natëhuatamaco, tëhuënchachin nosoroaramaco, tënahuë. Nosorohuatamaco, Tata Yosëntaꞌ nosoroarinquëmaꞌ. Carinquëmantaꞌ nosoroaranquëmaꞌ. Inápaquë panantaporahuëꞌ, cancanëma quëran nontaranquëmaꞌ. Noya noya nohuitaramaco,” itërin Quisosori.

Juan 15:10

Tata Yosë noꞌtëquën natërahuë niꞌton, paꞌpi nosororinco. Inapochachin natëhuatamaco, carinquëmantaꞌ paꞌpi nosoroaranquëmaꞌ.

Juan 16:27

Tatahuë chachin nosororinquëmaꞌ. Nosororamaco niꞌton, nosororinquëmaꞌ. Ina aꞌpaimarincosoꞌ natëramaꞌ niꞌton, nosororinquëmaꞌ canpitantaꞌ.

Deuteronomio 1:8

Nani yaꞌipi ina noꞌpaꞌ carinquëma quëtëranquëma huaꞌanëntamaso marëꞌ. Napoaton paꞌsahuatomaꞌ, ina noꞌpaꞌ máco huachi. Iráca shimashonëmapita Apraan, Isaco, Cacopo, inapita nani shaꞌhuitërahuë: ‘Caso Sinioroco niꞌto, quëtaranquëmaꞌ, itërahuë,’ itërinpoaꞌ,” tënin Moisësë.

Deuteronomio 30:5

Shimashonëna yaꞌhuërinquë chachin quënantapon. (Canpita yonquiatënquëma napoarahuë.) ‘Noꞌpanëna chachin quëtaantarahuato, noya yaꞌhuëantacaiso marëꞌ catahuantapo. Ca nohuanto canpita quëran naꞌcon naꞌcon huiꞌninpita, yaꞌhuëtaponaꞌ,’ itërinquëma Yosë.

Deuteronomio 7:7

Naquëranchin Moisësëri israiroꞌsa nontaantarin: “Canpitaso aꞌnapita nacionoꞌsa quëran, huaꞌhui huaꞌhuishin nacion ninamaꞌ. Napopiramahuëꞌ, Sinioro nohuantatënquëma huayoninquëmaꞌ.