Deuteronomio 6:3 - Chayahuita (Shahui)

³ Napoaton yaꞌipi israiroꞌsanquëma noꞌtëquën natëcamaso marëꞌ shaꞌhuitaranquëmaꞌ. Natëhuatamaꞌ, Yosë noꞌpaꞌ quëtarinquëmaquë noya yaꞌhuaramaꞌ. Inaquësoꞌ, co manta pahuaninhuëꞌ. Naporahuaton naꞌcon naꞌcon naꞌasaramaꞌ. Shimashonënpoapita Siniorori shaꞌhuitërinso chachin nisarin.

Deuteronomio 6:3 ပူးပေါင်းရင်းမြစ်များ

Génesis 12:2

Aꞌna tahuëri ca nohuanto, shiparinpita panca nacion ocoiaponaꞌ. Carinquën catahuamiataranquën. Inapotaranquën niꞌton, sacóshin nahuinaran. Naporahuaton, quëmá quëran aꞌnapitanta catahuararahuë.

Génesis 13:16

Ca nohuanto shiparinpita paꞌpi notohuaroꞌ naꞌamiataponaꞌ. Moꞌshi co pichicasohuëꞌ ninin. Inapochachin shiparinpitanta co onpo pichicasohuëꞌ naꞌaponaꞌ.

Génesis 15:5

Itahuaton, nëꞌmëtë pëinën quëran ocoirin. Ocoirahuaton, shaꞌhuitërin: —Piꞌiroꞌtë nëꞌpërahuaton, tayoraroꞌsa pichiquëꞌ. Nanitohuatan pichiquëꞌ. Ina nápo shiparinpita yaꞌhuëtarinquën, itërin.

Génesis 22:17

Noya nicatënquën catahuamiataranquën. Ca nohuanto shiparinpita, tayoraroꞌsa nápo naꞌaponaꞌ. Marë yonsanquë inotëraꞌhuaya nápo, naꞌamiataponaꞌ. Naporahuaton, inapitaso inimiconëna minsëraꞌpiaponaꞌ.

Génesis 26:4

Ca nohuanto quëma shiparinpita, naꞌamiataponaꞌ. Tayoraroꞌsa piꞌiroꞌtëquë yaꞌhuërinso nápo, yaꞌhuaponaꞌ. Inapitari yaꞌipi iso noꞌparoꞌsa huaꞌanëntaponaꞌ. Naporahuaton, yaꞌipi isoroꞌpaquë nacionoꞌsa yaꞌhuërinsopitantaꞌ, shiparinpita quëran catahuararahuë.

Génesis 28:14

Ca nohuanto shiparinpita naꞌamiataponaꞌ. Moꞌshi pochin naꞌaponaꞌ. Norti parti, sor parti, piꞌi pipirinso parti, piꞌi yaꞌconiniso parti, yaꞌipi inapita parti huaꞌanëntaponaꞌ. Quëmá quëran, yaꞌipi piyapiꞌsa nisha nisha nipisopita catahuararahuë. Shiparinpita quëraonta inapotarahuë.

Éxodo 1:7

Napoaponahuëꞌ, naꞌa huiꞌninapita yaꞌhuëtopi niꞌton, huaꞌqui quëran paꞌpi notohuaroꞌ naꞌapi. Yaꞌipi Iquipito noꞌpaquë yanquëatona yaꞌhuëpi.

Éxodo 3:6

Ina quëran itaantarin: —Caso Yosëco. Shimashonënpita: Apraan, Isaco, Cacopo, inapita chinotërinaco, itërin. Ina natanahuaton, Moisësë paꞌyanin. Nipaꞌcopirayatahuaton, co huachi Yosë niꞌcaso nohuantërinhuëꞌ.

Jeremías 7:23

Isocha tëhuënchinsoꞌ camairahuë: ‘Yaꞌipi camaitërahuëso natëcoꞌ. Inapohuatamaꞌ, ca Yosënëmaco nisarahuë. Canpitantaꞌ, piyapinëhuëpita nisaramaꞌ. Onpopinsona cancantamasoꞌ, nani camairanquëmaꞌ. Ina chachin nicoꞌ. Inapohuatamaꞌ, noya yaꞌhuëaramaꞌ,’ itëranquëmaꞌ.

Hechos 7:17

Yosëri chachin nani iráca Apraan shaꞌhuitërin Canaan parti huaꞌanëntacasoꞌ. Nipirinhuëꞌ, shinpita co aꞌnaroáchin panantapihuëꞌ. Huaꞌquiꞌ Iquipitoquë yaꞌhuëpi. Inaquë naꞌapi. Panantacaisoꞌ tahuëri yaꞌcaritohuachina, notohuaroꞌ israroꞌsaꞌ yaꞌhuëpi.

Deuteronomio 26:15

Quëmasoꞌ, inápaquë noya noya pëiquë yaꞌhuërëso pochin yaꞌhuëtëran. Inaquë yaꞌhuëaponahuëꞌ, isoroꞌpaquë yaꞌhuëraiso nitotëran. Israiroꞌsacoisoꞌ, quëma piyapinënpitacoi niꞌton, catahuamiatocoi. Noꞌpaꞌ quëtërancoisontaꞌ, nóya. Co manta pahuaninhuëꞌ. Shimashonëhuëpita shaꞌhuitëranso chachin ninin. Inantaꞌ, noya yonquirapiquëꞌ. Quëma nohuanton nani maꞌsha shaꞌnaisopita noya noyachin,’ tosaran,” itërin.

Deuteronomio 26:9

Nani nichaꞌërahuatoncoi, iso noꞌpaquë quënancoi. Isëquësoꞌ, co manta pahuaninhuëꞌ.

Deuteronomio 31:20

Iráca shimashonënapita, shaꞌhuitërahuë: ‘Caso Yosëco niꞌto, iso noꞌpaꞌ shiparimapita quëtarahuë,’ itërahuë. Napotërahuëso chachin, inaquë ayaꞌcoanahuë. Inaquëso co manta pahuaninhuë niꞌton, inaquë yaꞌconatonaꞌ, natëaquë huarëꞌ coshataponaꞌ. Coshatatona amonpachinaꞌ, nisha nisha mamanshiroꞌsa tahuërëtaponaꞌ. Inapoatona nocanaponaco. Napoatona inapitaroꞌco anoyatërahuësoꞌ, tapiaponaꞌ.

Deuteronomio 4:40

Yaꞌipi pënëninquëmasopita natëcoꞌ. Camairinquëmasopitantaꞌ, natëcoꞌ. Inapita ipora tahuëri carinquëma shaꞌhuitaranquëmaꞌ. Inapohuatamaꞌ, Yosë noꞌpaꞌ quëtarinquëmaquë noya yaꞌhuëaramaꞌ. Naporahuaton huaꞌqui tahuëri niꞌsaramaꞌ. Shiparimapitanta noya yaꞌhuëaponaꞌ. Co incari tëranta ina noꞌpaso osërëtarinquëmahuëꞌ,” itërin Moisësëri.

Deuteronomio 4:6

Natëtatomaꞌ, ina inachachin nicoꞌ. Inapohuatamaꞌ, nisha nisha piyapiꞌsa naꞌcon nitotatoma yonquínahuanoꞌsa ninamasoꞌ, nitotapi huachi. Ina nitotohuachinaꞌ: ‘¡Ma noyacha inapitaso pënëntërinso nanan yaꞌhuëtopi paya! Napoaton naꞌcon nitotatonaꞌ, yonquínahuanoꞌsa nipi,’ tosapi.

Deuteronomio 8:8

Trico, sipata, inapita noya noyatërin. Oparoroꞌsaꞌ, iquiraroroꞌsaꞌ, inapita yaꞌhuërin. Cranata huayoroꞌsaꞌ, oripo nararoꞌsaꞌ, inapitanta noyatërin. Ninointa co pahuaninhuëꞌ.