Deuteronomio 6:2 - Chayahuita (Shahui)

² Ina pochin mini Sinioro noya nicatë natëcaso yaꞌhuërin. Pënëntërinsopita, camaitërinsopita, inapita chiminaquë huarëꞌ natëcoꞌ. Naporahuaton huiꞌnamapita, shiparimapita, inapitanta natëchinaꞌ. Inapohuatamaꞌ, huaꞌqui tahuëri niꞌsaramaꞌ.

Deuteronomio 6:2 ပူးပေါင်းရင်းမြစ်များ

Génesis 18:19

Nani ina huayonahuë huiꞌninpita, shinpita, inapita noya pënënacaso marëꞌ. Aꞌchintërahuësopita natëtonaꞌ, noya nicacaiso marëꞌ pënënarin. Inapohuachin, shaꞌhuitërahuëso chachin quëtarahuë huachi,” tënin yonquiaton.

Génesis 22:12

Sinioro anquëninënisoꞌ, itapon: —Ama huiꞌnan tëpaquësohuëꞌ. Tëniponquën napotopiranquënhuëꞌ, iporasoꞌ nani nitotërahuë. Yaꞌipi cancanën quëran huarëꞌ imaranco tënahuë. Huiꞌnan aꞌnaíchin nipirinhuëꞌ, co apiratërancohuë niꞌton, nitotërahuë, itërin.

1 Reyes 8:40

Inapotohuatan, shimashonëna noꞌpaꞌ quëtëranquë yaꞌhuëaponaꞌ. Inaquë yaꞌhuëapona pochin noya nicatënën chinotáponën.

Salmos 91:16

Huaꞌqui tahuëri nanpitomaꞌ, noya yaꞌhuëapomaꞌ. Nichaꞌëranquëmasoꞌ yonquiatomaꞌ, capa cancantaramaꞌ,” itërinpoaꞌ.

Éxodo 20:12

Tatama noya nicatoma natëcoꞌ. Mamamanta natëcoꞌ. Natëhuatamaꞌ, naꞌcon catahuaranquëmaꞌ. Canaan noꞌpaꞌ quëtohuatënquëmaꞌ, huaꞌqui inaquë noya yaꞌhuaramaꞌ.

Éxodo 20:20

—Ama paꞌyancosohuëꞌ, Yosë oꞌmarin tëniinquëmaso marëꞌ. Ina pochin yaꞌnotërinquëmaꞌ, ina tëꞌhuatatoma ama oshahuanamaso marëhuëꞌ, itërin.

Proverbios 3:16

Inchinan quëran ihuëtatë pochin huaꞌqui tahuëri nanpicasoꞌ quëtarinpoaꞌ. Ahuënan quëran ihuëtatë pochin maꞌhuanacasoꞌ, noya nicatënënpoa natëinënpoasoꞌ, inapita quëtarinpoaꞌ.

Lucas 12:5

Yosë tëhuënchinsoꞌ tëꞌhuatacasoꞌ yaꞌhuërin, tënahuë. Co noyahuëꞌ nipatamaꞌ, Yosë huaꞌyanëmaꞌ matahuatënquëmaꞌ, parisitopiquë aꞌpamiatarinquëmaꞌ. Napoaton ina naꞌcon naꞌcon tëꞌhuatocoꞌ. Co piyapiꞌsaꞌ tëꞌhuatacasoꞌ yaꞌhuërinhuëꞌ.

Deuteronomio 10:20

Siniorosoꞌ Yosë niꞌton, noya niꞌcoꞌ. Noya nicatomaꞌ, inasáchin cancanëma quëran huarëꞌ chinotocoꞌ. Inasáchin cancantocoꞌ. Natëinëmaso marëꞌ shaꞌhuihuatamaꞌ, Yoscoarëꞌ taꞌtoma shaꞌhuicoꞌ.

Deuteronomio 13:4

Siniorosoꞌ Yosë niꞌton, inaíchin noya nicatoma imacoꞌ. Camairinquëmasopita natëcoꞌ. Nohuantërinsoꞌ nitotatomaꞌ, ina inachachin nicoꞌ. Inasáchin cancantatoma yaꞌipi cancanëma quëran chinotocoꞌ.

Deuteronomio 30:19

Ipora tahuëri chachin huayonacamaso marëꞌ shaꞌhuitëranquëmaꞌ. Noya nanpiamasohuë nipon, chiminamasohuë nipon. Yosë catahuainquëmasohuë nipon, anaꞌintiinquëmasohuë nipon. Sinioro natëtoma noya nanpicamasoꞌ huayoncoꞌ. Shiparimapitanta ina chachin huayoinaꞌ. Piꞌiroꞌtëꞌ, isoroꞌpaꞌ, inapita yaꞌhuërinso niꞌnëhuaꞌ. Inapochachin shaꞌhuitaranquëmasontaꞌ, noꞌtëquën nisarin.

Deuteronomio 30:20

Sinioronënpoasoꞌ Yosë niꞌton, inasáchin cancantatoma nosorocoꞌ. Nosoroatoma noꞌtëquën natëcoꞌ. Inapohuatamaꞌ, huaꞌqui tahuëri noꞌpaꞌ quëtarinquëmaquë, yaꞌhuëaramaꞌ. Nani shimashonëmapita Apraan, Isaco, Cacopo, inapita: ‘Caso Yosëco niꞌto, shiparimapita iso noꞌpaꞌ quëtarahuë,’ itërin,” tënin Moisësë.

Deuteronomio 4:10

Ina quëran itaantarin: “Iráca Sinai motopi notënanquë niꞌsëmaꞌ, Sinioro nontatonco napotërinco: ‘Israiroꞌsa ayontonquë nonahuësoꞌ natanacaiso marëꞌ. Noya nicatonaco chiminai huarëꞌ imainacoso marëꞌ pënënarahuë. Ina quëran huiꞌninapitanta aꞌchintohuachinaꞌ, inahuanta imasarinaco,’ itërinco.

Deuteronomio 4:40

Yaꞌipi pënëninquëmasopita natëcoꞌ. Camairinquëmasopitantaꞌ, natëcoꞌ. Inapita ipora tahuëri carinquëma shaꞌhuitaranquëmaꞌ. Inapohuatamaꞌ, Yosë noꞌpaꞌ quëtarinquëmaquë noya yaꞌhuëaramaꞌ. Naporahuaton huaꞌqui tahuëri niꞌsaramaꞌ. Shiparimapitanta noya yaꞌhuëaponaꞌ. Co incari tëranta ina noꞌpaso osërëtarinquëmahuëꞌ,” itërin Moisësëri.

Deuteronomio 4:9

Niꞌcona nani maꞌsha niꞌnamasopita naniantotamaꞌ. Aꞌchintëranquëmasopitanta yonquirácoꞌ. Ipora aꞌchintëranquëmasopita ama naniantatomarahuëꞌ, huiꞌnamapitanta aꞌchintocoꞌ. Shiparimapitanta inapotocoꞌ,” itërin.

Deuteronomio 6:1

Naquëranchin Moisësëri israiroꞌsa nontaton itapon: “Yosë camairinco niꞌton, pënëntërinsopita, camaitërinsopita, inapita natëcamaso marëꞌ apira shaꞌhuitaantaranquëmaꞌ. Yosë noꞌpaꞌ quëtarinquëmaquë yaꞌhuëhuatamaꞌ, inapita noꞌtëquën natëcoꞌ.

Deuteronomio 6:24

Ina quëran Sinioro shaꞌhuitërinpoa yaꞌipi camaitërinsopita natëcaso marëꞌ. Naporahuaton ina paꞌyatatëhua noya niꞌcasoꞌ shaꞌhuitërinpoaꞌ. Inapohuatëhua nani tahuëri catahuarinpoaꞌ. Ina nohuanton, ipora nanpirëhuaso pochin, noya yaꞌhuëáparihuaꞌ.

Deuteronomio 6:7

Huiꞌnamapitantaꞌ, apira apira ina aꞌchintocoꞌ. Pëinëmaquë yaꞌhuëhuatamaꞌ, shaꞌhuitocoꞌ. Iratasëmanta inapotocoꞌ. Yahuëꞌëpatamaꞌ, capayatohuatamaꞌ, naporonta aꞌchintamaso yaꞌhuërin.

Josué 4:24

Ina pochin shaꞌhuihuatamaꞌ, yaꞌipi isoroꞌpaquë nisha nisha piyapi nipisopita Sinioro chini chiníquën nanantërinso nitotaponaꞌ. Naporahuaton canpitantaꞌ, ‘Sinioroso Yosënënpoa niꞌton, noya nicatëhua natërápaso yaꞌhuëchinpoaꞌ,’ tosaramaꞌ,” itërin Cosoiri.

1 Pedro 1:17

Yosë nontohuatamara, “Tata,” itëramaꞌ. Aꞌna tahuëri inasoꞌ coisë pochin niꞌton, yaꞌipi piyapiꞌsaꞌ noꞌtëquën shaꞌhuitarin. Co noyahuëꞌ nipisopita noꞌtëquën anaꞌintarin. Yaꞌipi oshahuaninsopita anaꞌintarin niꞌton, tëꞌhuatacasoꞌ yaꞌhuërin. Chiminaquë huarëꞌ ina yonquiatomaꞌ, noya nicoꞌ.