Deuteronomio 4:9 - Chayahuita (Shahui)

⁹ Niꞌcona nani maꞌsha niꞌnamasopita naniantotamaꞌ. Aꞌchintëranquëmasopitanta yonquirácoꞌ. Ipora aꞌchintëranquëmasopita ama naniantatomarahuëꞌ, huiꞌnamapitanta aꞌchintocoꞌ. Shiparimapitanta inapotocoꞌ,” itërin.

Deuteronomio 4:9 ပူးပေါင်းရင်းမြစ်များ

Génesis 18:19

Nani ina huayonahuë huiꞌninpita, shinpita, inapita noya pënënacaso marëꞌ. Aꞌchintërahuësopita natëtonaꞌ, noya nicacaiso marëꞌ pënënarin. Inapohuachin, shaꞌhuitërahuëso chachin quëtarahuë huachi,” tënin yonquiaton.

Éxodo 10:2

Iquipitoroꞌsa inapotohuato, huiꞌnamapita, shaꞌhuitohuatamaꞌ nitotapi huachi. Shiparimapitanta nitotaponaꞌ. Iquipitoroꞌsaso chinitapirinacohuëꞌ, cariso nipirinhuëꞌ, mona poꞌmotato paꞌpi huëhuëpiro nininsopita anaꞌintaꞌhuaso marëꞌ acorahuë: ‘Tëhuënchachin inaso Sinioro, israiroꞌsanpoa chinotërëhuasoꞌ,’ taꞌcamaso marëꞌ napotarahuë,” itërin.

Proverbios 1:8

Natanquë huaꞌhua pënëinquën: Tataparin aꞌchintohuachinquën, noya natanquëꞌ. Mamaparionta aꞌchintërinquënsoꞌ, ama naniantëquësohuëꞌ.

Proverbios 23:26

Cancantaton huaꞌhua, nanpirahuëso niꞌquëꞌ. Noya nicatonco nonanco.

Proverbios 3:21

Maꞌsona huaꞌhua yanipatan, noya yonquirahuaton niquëꞌ. Ama inapita naniantëquësohuëꞌ.

Proverbios 7:1

Shaꞌhuitaranquënsopita huaꞌhua, natëquëꞌ. Yaꞌipi camairanquënsopita yonquiráquëꞌ.

Isaías 42:20

Naꞌcon catahuaranquëmaso nicapomarahuëꞌ, co yanatëramacohuëꞌ. Noya natantapomarahuëꞌ, shaꞌhuitëranquëmasopita co natëtëramahuëꞌ.

Lucas 8:18

Napoaton noya natancoꞌ. Noya natëhuatamaꞌ, naꞌcon naꞌcon nitotarama. Aꞌnaquënso nipirinhuëꞌ, ‘Nani nitotërahuë,’ topirinahuëꞌ, co yanatëpihuëꞌ niꞌton, piꞌpian tërantaꞌ nitotopisoꞌ Yosëri ananiantarin,” itërin.

Efesios 6:4

Canpitantaꞌ iyaroꞌsaꞌ, huiꞌnamaꞌ noya pënëncoꞌ. Ama apira apira noꞌhuicosohuëꞌ. Apira apira noꞌhuihuatamaꞌ, co natantochináchinhuëꞌ cancantaponaꞌ. Co noyahuëꞌ nipachinaꞌ, sanoanan quëran pënëncoꞌ noya nicacaiso marëꞌ. Yosë nanamën noya aꞌchintocoꞌ Quisocristo imainaꞌ.

Deuteronomio 12:1

Naquëranchin Moisësëri israiroꞌsa nontaantarin: “Isontaꞌ, Yosë pënëntërin. Inasoꞌ, shimashonënpoapitarinta chinotopi. Ina camaitërin niꞌton, chiminaquë huarëꞌ natëcoꞌ. Inachachin noꞌpaꞌ quëtarinpoaꞌ. Inaquë yaꞌhuëhuatamaꞌ, yaꞌipi natëcoꞌ.

Deuteronomio 31:19

Iporaso huachi quëmari Moisësë iso cantanën anitotaranquënso ninshitëquëꞌ. Ina quëran israiroꞌsa yonquinëna quëran nitotatonaꞌ, cantacaiso marëꞌ aꞌchintëquëꞌ. Co natëhuatamacohuëꞌ, anaꞌintaranquëmaꞌ itërahuëso yonquicaiso marëꞌ, aꞌchintëquëꞌ. Nani quëmari aꞌchintëran niꞌton: ‘Coꞌchi inaso nitotëraihuë paya,’ co tosapihuëꞌ.

Deuteronomio 32:46

Nani aꞌchintahuaton itapon: “Yaꞌipi ipora shaꞌhuitëranquëmasopita noya yonquicoꞌ. Ina quëran huiꞌnamaꞌ, shiparimaꞌ, inapitanta camaico yaꞌipi pënëntërinsoꞌ natëcaiso marëꞌ.

Deuteronomio 4:10

Ina quëran itaantarin: “Iráca Sinai motopi notënanquë niꞌsëmaꞌ, Sinioro nontatonco napotërinco: ‘Israiroꞌsa ayontonquë nonahuësoꞌ natanacaiso marëꞌ. Noya nicatonaco chiminai huarëꞌ imainacoso marëꞌ pënënarahuë. Ina quëran huiꞌninapitanta aꞌchintohuachinaꞌ, inahuanta imasarinaco,’ itërinco.

Deuteronomio 4:15

Moisësësoꞌ, israiroꞌsa nontaton itaantapon: “Sinai motopiquë Siniorosoꞌ, pën huáncana quëran nontërinpoaꞌ. Noninsoꞌ mini natanapomarahuëꞌ, naporo co manta quënanamahuëꞌ. Niꞌcona nitapicancanatoma mamanshi nipatamaꞌ. Quëmapi, sanapi, maꞌsharoꞌsaꞌ, anpiantëhuanoꞌsaꞌ, samiroꞌsaꞌ, inapita pochin yaꞌnorinso nitamaꞌ.

Deuteronomio 4:23

Napoaponahuëꞌ, niꞌcona Siniororëꞌquënpoa anoyatërëhuaso naniantotamaꞌ. Ama manta mamanshi nicatoma moshacosohuëꞌ. Nani Sinioro anitotërinpoaꞌ, ama aꞌnaratipita nonanacaso marëhuëꞌ. Sinioronënpoasoꞌ paꞌpi aꞌpitërinpoaꞌ. Co natëhuatamahuëꞌ, noꞌhuitënquëmaꞌ pënquë ahuiquitërëso pochin anaꞌintarinquëmaꞌ.

Deuteronomio 6:12

Inapoapomarahuëꞌ, ama Sinioro naniantocosohuëꞌ. Canpitaso Iquipitoquë parisitapiramahuëꞌ, nichaꞌërinquëmaꞌ.

Deuteronomio 6:2

Ina pochin mini Sinioro noya nicatë natëcaso yaꞌhuërin. Pënëntërinsopita, camaitërinsopita, inapita chiminaquë huarëꞌ natëcoꞌ. Naporahuaton huiꞌnamapita, shiparimapita, inapitanta natëchinaꞌ. Inapohuatamaꞌ, huaꞌqui tahuëri niꞌsaramaꞌ.

Deuteronomio 6:20

Aꞌna tahuëri huiꞌnamaꞌ: ‘¿Maꞌta tapon isopita camaitërinsoꞌ, pënëntërinsoꞌ, inapita Sinioro shaꞌhuitërinpoa natëcaso marëꞌ?’ itohuachinënquëmaꞌ: ‘Quiyasoꞌ Iquipitoquë, copirno camaiatoncoi aparisitápirincoihuëꞌ. Sinioro chiníquën nanantaton ina quëran ocoirincoi.

Deuteronomio 6:7

Huiꞌnamapitantaꞌ, apira apira ina aꞌchintocoꞌ. Pëinëmaquë yaꞌhuëhuatamaꞌ, shaꞌhuitocoꞌ. Iratasëmanta inapotocoꞌ. Yahuëꞌëpatamaꞌ, capayatohuatamaꞌ, naporonta aꞌchintamaso yaꞌhuërin.

Deuteronomio 8:11

Naquëranchin Moisësë israiroꞌsa nontaantarin: “Sinioronënpoasáchin Yosëso niꞌton, niꞌcona ina naniantotamaꞌ. Niꞌcona camaitërinsopita, pënëntërinsopita, inapita naniantotamaꞌ. Inapita ipora tahuëri shaꞌhuitaranquëmaꞌ.

Deuteronomio 8:14

Ina pochin nipatamaꞌ, niꞌcona nocantotamaꞌ. Iquipitoquë canpitasoꞌ, asacatatënënquëma aparisitërinënquëmaꞌ. Inapotápirinënquëmahuëꞌ, Sinioro inaquëran ocoirinquëmaꞌ. Napoaton ama ina naniantocosohuëꞌ.

Hebreos 2:1

Nani noꞌtën nanan natanëhuaꞌ niꞌton, nanamën naꞌcon naꞌcon yonquiaꞌahuaꞌ, ama pëshonacaso marëhuëꞌ. Niꞌcona canpitantaꞌ ina naniantotamaꞌ.

Hebreos 2:3

Iporaso nipirinhuëꞌ, Quisocristo aꞌpaimarin noya nanan shaꞌhuitiinpoaso marëꞌ. Naꞌcon nosoroatonpoaꞌ, yanichaꞌërinpoaꞌ. Huiꞌnin chachin niꞌton, co ina natëhuatëhuahuëꞌ, naꞌcon naꞌcon anaꞌintinpoasoꞌ yaꞌhuërin. Quisocristo chachin noya nanan shaꞌhuirin. Ina quëran caꞌtanoꞌsanënpitari natanahuatonaꞌ, inachachin shaꞌhuitaantarinënpoaꞌ.

Santiago 2:22

“Yosë noꞌtëquën nontërinco,” taꞌton, Apraani natërin. Natëton, noya noya imarin. Co topinan quëran chinotërinhuëꞌ. Yaꞌipi cancanën quëran huarëꞌ natëton, noya imarin.

Josué 1:18

Insosona tëranta quëma camaitëranso co natëhuachinquënhuëꞌ, chimiin. Isoíchin nohuantërai quëma nicacasoꞌ: Ama tëꞌhuatonhuëꞌ, chiníquën cancantëquëꞌ, itopi.

Josué 4:21

Naporahuaton israiroꞌsa itapon: “Aꞌna tahuëri huiꞌnamapita natanaponquëmaꞌ: ‘¿Maꞌta tapoma isopita naꞌpiroꞌsa aꞌmitë aꞌmitëtëramaꞌ?’ itaponënquëmaꞌ.

Apocalipsis 3:3

Yaꞌnan natanapomaꞌ, Yosë nanamën noꞌtëquën aꞌchintërinënquëmaꞌ. Ina yonquiatomaꞌ, yaꞌipi co noyahuëꞌ yonquiramasopita naniantocoꞌ. Yaꞌipi cancanëma quëran casáchin yonquico. Co noya cancantaantahuatamahuëꞌ, aꞌnaroáchin anaꞌintaranquëmaꞌ. Ihuatonaꞌpi huëꞌninso pochachin aꞌnanaya anaꞌintaranquëmaꞌ. Co nitotasënquëmahuëꞌ, oꞌmantararahuë.

Jueces 8:34

Sinioroso Yosënëna nipirinhuëꞌ, ina naniantopi. Yaꞌipi inimiconënapita quëran nichaꞌëpirinhuëꞌ, naniantopi.