Deuteronomio 4:39 - Chayahuita (Shahui)

³⁹ Napoaton noya yonquirahuatomaꞌ: ‘Sinioroíchin Yosësoꞌ. Inápaquë huaꞌanëntërinso pochachin isoroꞌpaquënta huaꞌanëntarin. Co aꞌna ina pochin yaꞌhuërinhuëꞌ,’ tocoꞌ.

Deuteronomio 4:39 ပူးပေါင်းရင်းမြစ်များ

2 Samuel 7:22

Quëmaso Sinioro, Yosënquën. Chini chiníquën nanantëran. ¡Ma nóyacha quëmasoꞌ ninan paya! Shimashonëhuëipita yáshaꞌhuitërinacoi: ‘Co insonta ina pochin yaꞌhuërinhuëꞌ. Co aꞌna yosë tëranta ina pochin nininhuëꞌ,’ itërinacoi.

Salmos 100:3

Yosëíchin chini chiníquën nanantërin. Ina nitotoco canpitantaꞌ. Inaso nininpoa niꞌton, huaꞌanëntërinpoaꞌ. Ina piyapinënpoa canpoasoꞌ. Ohuicaroꞌsa huaꞌanëni aꞌpairinso pochin noya aꞌpairinpoaꞌ.

Salmos 115:3

Yosënëhuëisoꞌ, inápaquë yaꞌhuëarin. Inaora nohuanton maꞌsona nohuantërinsoꞌ ninin.

Éxodo 8:10

—¡Tashiraya chachin copichin tënahuë taꞌa! tënin copirno. —Naporanso chachin mini nisarin, tashiraya copi taꞌparinquëmaꞌ. Iꞌquëráchin yaꞌhuëhuachinaꞌ, co huachi apiponquëmahuëꞌ. Inapohuachin: “Tëhuënchachin israiroꞌsari chinotopisoꞌ, chini chiníquën nanantërin tosaran,” itërin Moisësëri.

Isaías 1:3

Torosoꞌ, huaꞌanën nohuitërin. Morantaꞌ, huaꞌanëni pëi acotërinsoꞌ, nohuitërin. Israiroꞌsaso piyapinëhuëpita nipirinahuëꞌ, co nohuitërinacohuëꞌ. Co nohuitatonacohuëꞌ, co manta yonquipisohuë pochin niconpi.

Isaías 43:10

Israiroꞌsanquëmaso nipirinhuëꞌ, nani niꞌnamaco. Piyapinëhuëpita nicacamaso marëꞌ huayonatënquëma acoranquëmaꞌ. Nohuitatomaco chinotamacoso marëꞌ acoranquëmaꞌ. Maꞌninsoꞌ ninahuësontaꞌ, nitotamaso marëꞌ acoranquëmaꞌ. Coꞌhuara ca yaꞌhuëyátërasocohuëꞌ, co aꞌna yosë yaꞌhuërinhuëꞌ. Ca piquërantaꞌ co aꞌna yaꞌhuëaponhuëꞌ.

Isaías 44:8

Ama tëꞌhuacosohuëꞌ, chiníquën cancantocoꞌ. Coꞌta cari iráca quëran huarëꞌ maꞌsona onpoamasoꞌ nani shaꞌhuitëranquëmaꞌ. Canpitaso nani natanamaco. Casáchin Yosëco. Co aꞌna yosë ca pochin paꞌpoyatonaꞌpi yaꞌhuërinhuëꞌ,” tënin.

Daniel 4:35

Isoroꞌpaquë yaꞌhuëpisopita quëma marësoꞌ, co máquënoꞌsahuëꞌ. Inápaquë yaꞌhuëpisopita, nohuantëransoráchin nipi. Isoroꞌpaquëntaꞌ, ina pochachin nipi. Chini chiníquën nanantëran niꞌton, co insonta nanitarinhuëꞌ, chinitiinquënsoꞌ. Maꞌsha nipataontaꞌ: ‘¿Onpoatonta ina pochin nisaran?’ co itiinënso yaꞌhuërinhuëꞌ,” itërahuë.

1 Corintios 8:4

Nosha mamanshi chinotacaiso marëꞌ acopisoꞌ aꞌchinchinquëmaꞌ nitotocoꞌ. Co mamanshi nanpirinhuëꞌ. Co ina chinotacasoꞌ yaꞌhuërinhuëꞌ. Tata Yosëíchin chinotacasoꞌ yaꞌhuërin, tënëhuaꞌ.

1 Corintios 8:6

Canpoaso nipirinhuëꞌ Tata Yosëíchin chinotërëhuaꞌ. Yaꞌipi maꞌsha ninin. Ina marëꞌ acorinpoaꞌ. Quisocristoíchin huaꞌanëntërinpoaꞌ. Ina nininpoaꞌ. Nani nichaꞌërinpoaꞌ ina nohuitatëhuaꞌ nanpicaso marëꞌ.

Deuteronomio 32:12

Sinioroíchin nipirinhuëꞌ noya quëninpoaꞌ. ¡Co inso mamanshiri tërantaꞌ, catahuacaso yaꞌhuërinhuëꞌ!

Deuteronomio 32:29

Yonquinahuanoꞌsa nipi naporini, shaꞌhuitërahuësoꞌ yonquiꞌitonahuëꞌ. Natëtopi naporini, co maꞌsha onpoꞌitonahuëꞌ, tënahuë.

Deuteronomio 6:4

Iporasoꞌ, yaꞌipi israiroꞌsanquëma natancoꞌ. Yosëíchin huaꞌanëntërinpoaꞌ. Inasáchin natërëhuaꞌ. Inasoꞌ Sinioro niꞌton, ina naꞌcon naꞌcon nosorocaso yaꞌhuërin. Yaꞌipi cancanëma quëran, huaꞌyanëma quëran, chinirama quëran, yaꞌipi inaquëranpita nosoromiatocoꞌ.

Deuteronomio 7:9

Naporinso marëꞌ: ‘Sinioroíchin Yosësoꞌ. Shimashonënpoapitarëꞌ anoyatërinsoꞌ, co onporonta naniantarinhuëꞌ. Ina nosoroatëhua camaitërinsopita natëhuatëhuaꞌ, co naniantarinpoahuëꞌ canpoantaꞌ,’ tocoꞌ.

Josué 2:11

Inapita nitotatoi, paꞌpi tëꞌhuatërainquëma huachi. Napoaton co incoi tëranta nanitëraihuëꞌ, chinitaꞌhuainquëmasoꞌ. Canpita Sinioro imaramasosoꞌ, Yosë chachin. Inápaquë huaꞌanëntërinso pochachin isoroꞌpaquënta huaꞌanëntërin.

1 Samuel 2:2

¡Inasáchin noya noyasoꞌ! ¡Co insonta ina pochin paꞌpoyarinpoahuëꞌ! Co aꞌna yosë ina pochin yaꞌhuërinhuëꞌ.