Deuteronomio 4:32 - Chayahuita (Shahui)

^32-38 Shimashonëmapita nosoroaton huayoninquëmaꞌ. Chiníquën nanantaton Iquipito quëran nichaꞌërinquëmaꞌ. Aꞌnapitaso canpita quëran chini chiníquënoꞌsaꞌ. Napopirinahuëꞌ, canpitari yaꞌhuërëtamaso marëꞌ inapitaso noꞌpanëna quëran Yosëri aꞌpararin. Ipora tahuëriꞌsa napoarinso chachin aꞌpararin. Inta nipachin yonquiricoꞌ: Coꞌhuara canpita yaꞌhuëyátërasënquëmahuëꞌ, yaꞌnan piyapi Yosëri ninin quëran huarëꞌ napopisoꞌ yonquiricoꞌ. Naporahuaton nisha nisha piyapiꞌsa isoroꞌpaquë yaꞌhuëpisopita natanicoꞌ. Natanpiramahuëꞌ: ¡Co onporo tëranta inahuasoꞌ, canpoa Yosë catahuamiatërinpoaso pochin catahuarinsoꞌ, shaꞌhuitaponënquëmahuëꞌ! Canpoasoꞌ, Yosë chachin pën huáncana quëran nontërinpoaso natanëhuaꞌ. Natanarihuarahuë co chiminëhuahuëꞌ. ¡Co inso nacionquë tëranta inapopihuëꞌ! Canpoasoꞌ, aꞌnapita nacionoꞌsa quëran Yosë huayoninpoaꞌ. Huayonatonpoaꞌ, acorinpoaꞌ piyapinënpita nicacaso marëꞌ. Ina marëꞌ iquipitoroꞌsa Yosëri tëniton, aparisitërin. Nisha nisha maꞌsha sacai nininsopita aꞌnotërin. Ina, yaꞌhuërënamënpoa iquipitoroꞌsa ahuëaton, aꞌpayanin. Inapoaton chiníquën nanantërinsoꞌ aꞌnotërinpoaꞌ. ¡Tëhuënchachin co intopa tëranta Yosë pochin mamanshiroꞌsa nipihuëꞌ! ‘Sinioroíchin Yosësoꞌ. Co aꞌna ina pochin yaꞌhuërinhuëꞌ,’ taꞌcamaso marëꞌ nani maꞌsha ninin. Inápa quëraonta pënënainquëmaso marëꞌ nontërinquëmaꞌ. Isoroꞌpaquëntaꞌ, panca pën aꞌnotërinpoaꞌ. Ina huáncana quëran nontërinpoasonta natanëhuaꞌ.

Deuteronomio 4:32 ပူးပေါင်းရင်းမြစ်များ

Génesis 1:27

Yosëri piyapi acoapon, inaora pochachin acorin. Aꞌnara quëmapi, aꞌnara sanapi. Inaíchin ninin.

2 Samuel 7:23

Israiroꞌsacoisoꞌ, piyapinënpitacoi. Nishatërai niꞌton, co aꞌna nacion tëranta quiya pochin yaꞌhuërinhuëꞌ. Iquipito quëran nichaꞌërahuatoncoi, huaꞌanëntërancoi. Nisha nisha nacionoꞌsa isëquë yaꞌhuëpirinahuëꞌ, ocoiran. Inapitasoꞌ nisha nisha mamanshi moshapirinahuëꞌ, napotëran. Huëhuëpiro nitaton ocoiran niꞌton, sacóshin nahuinan.

Éxodo 34:10

Ina quëran Siniorori napotaantarin: “Noya natanquë shaꞌhuichinquën. Yaꞌipi israiroꞌsanta noya natainaꞌ: Naquëranchin canpitarëꞌco anoyatarahuë. Catahuatënquëmaꞌ, maꞌsha paꞌpi huëhuëpiro nininsopita aꞌnoarahuë. Co inso nacionquë tërantaꞌ, isoroꞌpaquë ina pochin niꞌchinpihuëꞌ. Yaꞌipi piyapiꞌsa insëquësona paꞌnamaquë, ca Sinioroco nanitaparahuësoꞌ niꞌsapi. Canpita catahuatënquëmaꞌ, paꞌpi huëhuëpiro nininsopita aꞌnoarahuësoꞌ, niꞌsaramaꞌ.

Isaías 45:12

Cari isoroꞌpaꞌ ninahuë. Yaꞌipi piyapiroꞌsanta cari ninahuë. Piꞌiroꞌtëntaꞌ, cari nëꞌmëtë pëi ótënatë pochin acorahuë. Ca camaitërahuë quëran yaꞌipi tayoraroꞌsa yaꞌhuërin.

Joel 1:2

Cota huëntonquë mashoyanquëma yaꞌhuëramasopita, yaꞌipi ina huëntonquë yaꞌhuëramasopitantaꞌ, noya natanco shaꞌhuichinquëmaꞌ: ¡Tëhuënchachin co onporonta niꞌnamasohuëꞌ niꞌsaramaꞌ! Shimashonëmapitanta yaꞌhuëaponaꞌ, ¡tëhuënchachin co onporonta ina pochin niꞌchinpihuëꞌ!

Amós 3:2

“Isoroꞌpaquë nisha nisha nacionoꞌsa yaꞌhuëpirinhuëꞌ, canpitasáchin huayonanquëmaꞌ. Inapotopiranquëmahuëꞌ, co noyahuëꞌ ninama niꞌton, anaꞌintaꞌhuanquëmaso yaꞌhuërin.

Mateo 24:31

Oꞌmantarahuato, naꞌa anquëniroꞌsaꞌ aꞌpararahuë. Panca tronpita pihuitonaꞌ, yaꞌipi parti paꞌsapi huayonahuësopita ayontonacaiso marëꞌ.

Marcos 13:27

Oꞌmantahuato, anquëniroꞌsaꞌ aꞌpararahuë Yosëri huayoninsopita yaꞌipi parti quëran ayontonacaiso marëꞌ. Paꞌsahuatonaꞌ, nisha nisha parti quëran huarëꞌ ayontonapi huachi.

Deuteronomio 30:4

Paꞌpi áquë noꞌparoꞌsaquë inimicoroꞌsari ayanquëpirinahuëꞌ, Siniorori noꞌpanënaquë chachin naquëranchin quënantapon.

Deuteronomio 32:7

Tahuërëtërëso pochin nicatomaꞌ, iráca chachin naporinso yonquiricoꞌ. Tataparima natanco shaꞌhuichinquëmaꞌ. Mashoyaroꞌsanta natanco anitochinquëmaꞌ.

Deuteronomio 33:29

¡Mainacha canpoasoꞌ israiroꞌsanpoa ninëhua paya! Co inso nacion tërantaꞌ, canpoa pochin nininhuëꞌ. Sinioro chachin nichaꞌërinpoaꞌ. Ina chachin paꞌpoyarinpoaꞌ. Catahuarinpoaꞌ, napotërinpoaꞌ. Inimiconënpoapita, sahuëninënpoa quëran minsërëhuaꞌ. Ina pochachin Sinioronta catahuarinquëmaꞌ, inimicoroꞌsa minsëaramaꞌ. Inimiconëma ahuërapiramahuëꞌ, co nanitatonaraihuëꞌ moshaponëmaꞌ: ‘Ama huachi niahuëaꞌhuasohuëꞌ. Nohuantëramasoꞌ natancoi quëchinquëmaꞌ,’ itaponënquëmaꞌ. Inapotatoma atapanapoma huachi,” itërin Moisësë israiroꞌsa nontaton.

Deuteronomio 4:7

¡Co inso nacion tërantaꞌ, canpoa pochin Yosë imapihuëꞌ! Inahuasoꞌ, mamanshinënari catahuacaso marëꞌ nontopirinahuëꞌ, co catahuarinhuëꞌ. Canpoaso nipirinhuëꞌ, onporosoꞌ nontohuatëhuara, aꞌnaroáchin aꞌpanirinpoaꞌ.