Deuteronomio 4:15 - Chayahuita (Shahui)

^15-18 Moisësësoꞌ, israiroꞌsa nontaton itaantapon: “Sinai motopiquë Siniorosoꞌ, pën huáncana quëran nontërinpoaꞌ. Noninsoꞌ mini natanapomarahuëꞌ, naporo co manta quënanamahuëꞌ. Niꞌcona nitapicancanatoma mamanshi nipatamaꞌ. Quëmapi, sanapi, maꞌsharoꞌsaꞌ, anpiantëhuanoꞌsaꞌ, samiroꞌsaꞌ, inapita pochin yaꞌnorinso nitamaꞌ.

Deuteronomio 4:15 ပူးပေါင်းရင်းမြစ်များ

1 Reyes 19:12

Ocoanta copitaꞌso chachin, pën yaꞌhuërëꞌ paantarin. Sinioroso napoaponahuëꞌ, co inaquë tëranta yaꞌhuërinhuëꞌ. Naporoꞌ Iniasësoꞌ, yaꞌcoontarin. Pën naꞌhuërin piquëran, yashin yashin natanchináchin, sanóshin huinpiso irinin.

Éxodo 19:1

Israiroꞌsa Rihuitin quëran pipirahuatonaꞌ, Sinai inotëro parti canconpi. Canconahuatonaꞌ, Sinai motopi notënanquë chachin chinotopi. Iquipito quëran pipipisoꞌ, nani cato yoqui nisahuaton aꞌna tahuëriraꞌ nisarin. Naporoꞌ inatopa canconpi.

Éxodo 20:4

Ama manta nonanpisoꞌ nicatoma moshacosohuëꞌ: Inápaquë yaꞌhuërinsoꞌ, isoroꞌpaquë, acoporoquë, marëquë, co inaquëpita yaꞌhuërinso nonanatomaꞌ, moshacamaso yaꞌhuërinhuëꞌ. Ama manta mamanshi chinotocosohuëꞌ.

Isaías 40:18

¡Co aꞌnaya tëranta Yosë pochin yaꞌhuërinhuëꞌ! ¡Co inso mamanshi tërantaꞌ, ina pochin yaꞌhuërinhuëꞌ! Mamanshisoꞌ, huaꞌna asoquirahuatona nipi. Nitapacaisoꞌ ninaꞌpiri oro quëran pashitërin. Inapotahuaton prata quëran catinaaꞌhuaroꞌsa apëꞌpëconotërin.

Malaquías 2:15

¡Ina Yosëráchin nonënpoaꞌ, ispiritonënpoaꞌ, inapita acotërinpoaꞌ! ¡Tëhuënchachin Yosësoꞌ, ina imarëhuaso capiniráchin nimacacaso nohuantërin! Huiꞌnanpoapitantaꞌ, inanquën nicacaiso marëꞌ naporin. Napoaton ispiritonëma aꞌpaiatomaꞌ, huiꞌnapitasëma sanapi manamasoꞌ, ama nonpintocosohuëꞌ.

Deuteronomio 10:4

Inaquë Siniorori shonca pënëntërinsopita ninshitërin. Yaꞌnan ninshitërinso pochachin ninshitaantarin. Naporoꞌ niyontonëhuaquë, motopi quëran pënëninquëmaso chachin inaquë ninshitërin. Pën huáncana quëran naporo nontërinpoaꞌ. Nani ninshitahuaton quëtohuachincora, nohuaramarahuë. Ina quëran caposoquë naꞌpitëaꞌhuaroꞌsa quëtërincosoꞌ poꞌmorahuë. Sinioro camairincoso chachin poꞌmorahuë. Ipora iso quirica ninshitasoco huarënta inaquë yaꞌhuëarin.

Deuteronomio 4:12

Naporoꞌ Siniorosoꞌ, pën huáncana quëran nontërinpoaꞌ. Noninsoꞌ mini natanapomarahuëꞌ, co manta quënanamahuëꞌ.

Deuteronomio 4:14

Pënëntërinsopita, camaitërinsopita, inapita aꞌchintaꞌhuanquëmaso marëꞌ canta camairinco. Noꞌpaꞌ quëtarinquëmaquë yaꞌconpatama natëcamaso marëꞌ, aꞌchintaranquëmaꞌ,” itërin.

Deuteronomio 4:23

Napoaponahuëꞌ, niꞌcona Siniororëꞌquënpoa anoyatërëhuaso naniantotamaꞌ. Ama manta mamanshi nicatoma moshacosohuëꞌ. Nani Sinioro anitotërinpoaꞌ, ama aꞌnaratipita nonanacaso marëhuëꞌ. Sinioronënpoasoꞌ paꞌpi aꞌpitërinpoaꞌ. Co natëhuatamahuëꞌ, noꞌhuitënquëmaꞌ pënquë ahuiquitërëso pochin anaꞌintarinquëmaꞌ.

Deuteronomio 4:9

Niꞌcona nani maꞌsha niꞌnamasopita naniantotamaꞌ. Aꞌchintëranquëmasopitanta yonquirácoꞌ. Ipora aꞌchintëranquëmasopita ama naniantatomarahuëꞌ, huiꞌnamapitanta aꞌchintocoꞌ. Shiparimapitanta inapotocoꞌ,” itërin.

Deuteronomio 9:10

Inaquë Sinioro cato naꞌpitëaꞌhuaroꞌsa inari chachin ninshitërinsoꞌ quëtërinco. Niyontonëhuaso tahuëri motopi quëran nontërinpoaso chachin inaquë ninshitërin. Pën huáncana quëran naporo pënëninpoaꞌ.

Hebreos 1:3

Inasoꞌ paꞌpin pochachin noya nóya ninin. Ina pochachin niꞌton, inasáchin Yosë noꞌtëquën anohuitërinpoaꞌ. Chiníquën nanantërin niꞌton, ipora huantaꞌ ina nohuanton, maꞌsha yaꞌhuërarin. Co yonquirinpoahuëꞌ naporini, yaꞌipiya taꞌhuanchitërihuahuëꞌ. Iráca oshanënpoaꞌ inquitinpoaso marëꞌ chiminin. Chiminpirinhuëꞌ, nanpiantarahuaton, inápaquë panantarin. Inaquë panantarahuaton, Yosë inchinanën quëran huënsërin. Chiníquën nanantaton, huaꞌanëntarin.