Deuteronomio 34:9 - Chayahuita (Shahui)

⁹ Moisësë coꞌhuara chiminyátëraponhuëꞌ, Cosoi marëꞌ Yosë nontërin. Sëꞌhuamotorahuaton huaꞌan acocaso marëꞌ, nontërin. Napoaton Siniorori catahuarin noya yonquiaton, israiroꞌsa camaicasoꞌ. Camaitohuachina, yaꞌipi israiroꞌsari natëpi. Siniorori Moisësë shaꞌhuitërinso chachin nipi.

Deuteronomio 34:9 ပူးပေါင်းရင်းမြစ်များ

1 Reyes 3:12

Napoaton natanancosoꞌ, carinquën quëtaranquën. Ca nohuanton aꞌnapita quëran yonqui yonquínahuan nisaran. Iráca quëran huarëꞌ co insonta quëma pochin nininhuëꞌ. Aꞌna tahuërinta yaꞌhuëpirinahuëꞌ co quëma pochin nisapihuëꞌ.

1 Reyes 3:9

Ina pochin nacionsoꞌ, co insonta nanitërinhuëꞌ inaora noya huaꞌanëntacasoꞌ. ¡Quëmari anitotohuatan tëhuënchinsoꞌ, noya camaitapon! Napoaton yonquínahuan nicaꞌhuaso marëꞌ catahuaco. Noya nininsoꞌ, co noyahuëꞌ, nininsoꞌ inapita nitochi. Inapita nitotohuato piyanënpita noya huaꞌanëntarahuë,” itërin.

2 Reyes 2:15

Naporinso nicatona pënëntonaꞌpiroꞌsa Quiricoquë yaꞌhuëpisopitasoꞌ: “Iniasë yaꞌcoancantërinso chachin, iporaso Irisionta yaꞌcoancantërin,” topi. Naporoꞌ paaparahuatona nontopi. Mónsho tahuatonaꞌ: —Niꞌquë maistro. Quiyasoꞌ, aꞌnatërápo shonca yaꞌpi chiníquën cancantonaꞌpicoi huëꞌnai. Paatoi maistronën yoniꞌi. Tapona Sinioro ispiritonëni otërahuaton, onpopinquë tëꞌyatërin. Motopiroꞌsaquëhuë nipon, motopianaroꞌsaquëhuë nipon tëꞌyatërinso yoniriꞌi, topiraihuëꞌ, itopi. Inariso napoaponahuëꞌ, itapon: —Ama pacosohuëꞌ, itërin.

2 Reyes 2:9

Aquëtëran nipachinara, Iniasëri itapon: —Ipora tahuëri pataranquën. Coꞌhuara pachátëraponquënhuëꞌ, shaꞌhuitoco maꞌsona nohuantëransoꞌ acochinquën, itërin. Napotohuachina, inariso itapon: —Quëmaso maistro, Sinioro ispiritonën yaꞌcoancantërinquën niꞌton, nani maꞌsha nanitaparan. Caso nipirinhuëꞌ, quëmá quëran naꞌcon naꞌcon yaꞌcoancanchinco topirahuë, itërin.

Éxodo 12:28

Ina quëran israiroꞌsasoꞌ, Siniorori Moisësë, Aaron, inapita camairinso chachin nipi.

Isaías 11:2

Sinioro ispiritonëni yaꞌcoancantomiatapon. Inari yonquínahuan nicacasoꞌ quëtapon. Nitopënëntahuaton, chiníquën nanantapon. Sinioro noya nohuitaton, natëpon.

Daniel 6:3

Inaso napoaponahuëꞌ, noya noya nitotaton aꞌnapita huaꞌanoꞌsaꞌ, chirinchiroꞌsaꞌ, inapita yaꞌcotërin. Ina nicaton copirnosoꞌ, yaꞌipi huaꞌanëntërinquë camaitacaso marëꞌ ina yaacorin.

Números 11:17

Inaquë oꞌmarahuato nontaranquën. Naporoꞌ inapita ayaꞌcoancatacaso marëꞌ, napoinchin ispirito quëtëranquënsoꞌ mataranquën. Inapitanta quëma pochin cancantatonaꞌ, israiroꞌsa quëpacaisoꞌ catahuapënën.

Juan 3:34

Quisososoꞌ Yosë nanamën chachin nonin. Ispirito Santori noyá yaꞌcoancantërin niꞌton, noꞌtëquënáchin nonin.

Hechos 6:6

Inapita huayonahuatonaꞌ, caꞌtanoꞌsaquë quëpi. Yosë nontahuatonaꞌ, sëꞌhuamotopi acocaiso marëꞌ. Inapotatonaꞌ, acopi huachi.

Deuteronomio 34:8

Cara shonca tahuëri israiroꞌsaꞌ, Moisësë chimininso yonquiatonaꞌ, naꞌnërápi. Moapo inotëro parti napopi. Inachintopiso niꞌton, inanapo tahuëri naꞌnëtopi.

Colosenses 2:3

Quisocristo yaꞌipi nitotërin. Noꞌtëquën yonquirin. Inasáchin catahuarinpoaꞌ noꞌtëquën yonquicasoꞌ. Ina naꞌcon yonquihuatëhuaꞌ, noya noya nitotarihuaꞌ. Naꞌa piyapiꞌsaꞌ co nitotopirinahuëꞌ, Yosë anitotërinpoaꞌ Quisocristo pochin yonquicaso marëꞌ.

1 Timoteo 4:14

Iráca ansianoꞌsaꞌ niyontonahuatonaꞌ, acorinënquën Yosë nanamën aꞌchinamaso marëꞌ. Sëꞌhuamotorahuatënënquën, nanan quëtërinënquën aꞌchinamaso marëꞌ. Ina quëran Yosë catahuarinquën nóya aꞌchinamasoꞌ. Ama ina naniantaton, topinan yaꞌhuëquësohuëꞌ.

1 Timoteo 5:22

Ansiano yaacohuatan, noya yonquiaton, oshaquëran acoquëꞌ. Aꞌnaroáchin acohuatan, co noyahuëꞌ nipachina, quëmantaꞌ naꞌianan. Noyasáchin niquëꞌ.