Deuteronomio 33:19 - Chayahuita (Shahui)

¹⁹ Aꞌnapita Israiro huëntonoꞌsa përaponaꞌ: ‘Huëco paꞌahua Sinioro chinotërëhuaso motopiquë, ina chinotahuaꞌ,’ taponaꞌ. Inaquë paatonaꞌ, Sinioro marëꞌ maꞌsha tëpatona chinotaponaꞌ. Paꞌanai marëꞌ, marë paꞌtohuachinaꞌ, nisha nisha nacion nonshinanoꞌsaquë maꞌsha paꞌanatona canaponaꞌ. Ina canapi quëran noya yaꞌhuëaponaꞌ,” tënin.

Deuteronomio 33:19 ပူးပေါင်းရင်းမြစ်များ

Génesis 49:13

‘Quëmasoꞌ Saporono, marë yonsan parti yaꞌhuapon. Panca nancharoꞌsa nonshinanëna yaꞌhuërinquë, yaꞌhuëapon. Noꞌpanënsoꞌ, Sitonquë huarëꞌ naniarin,’ itërin.

Salmos 107:22

“Ma noyacha Siniorosoꞌ nosororinpoa paya,” taꞌtëhua ina chinotahuaꞌ. Noya ancantatëhuaꞌ, nani maꞌsha naporinso shaꞌhuiahuaꞌ.

Salmos 2:6

“Quirosarin ninanosoꞌ, cari huayonahuë. Inaquë huaꞌanëntacaso marëꞌ ¡nani copirno acorahuë!” itërin.

Salmos 51:19

Naporoꞌ tëhuënchinsoꞌ, quëma marëꞌ maꞌsha nininsoꞌ tëpaarai. Aꞌnaquën yaꞌipi ahuiquitarai. Aꞌnaquëontaꞌ, piꞌpian ahuiquitarai. Naporoꞌ, artaronënquë toroaꞌhuaroꞌsa ahuiquitatoi chinotarainquën.

Éxodo 15:17

Sinioro quëmasoꞌ noyasáchin ninan. Huaꞌanëntëranquë chachin quëpacoi. Yaꞌhuëmiatamaso marëꞌ motopi nani huayonan. Chinotiinënquënso pëi quëmari chachin ninan, inaquë quëpacoi yaꞌhuëmiachi.

Isaías 2:3

Notohuaroꞌ piyapiroꞌsa huëꞌsahuatonaꞌ: “Huëco Sinioro motopinënquë pantaꞌahuaꞌ. Israiroꞌsari chinotërinso pëinënquë pantaꞌahuaꞌ. Pënëntërinsopita aꞌchinchinpoaꞌ. Aꞌchintohuachinpoa noya natëahuaꞌ. Sion motopi quëran Yosë chachin aꞌchintarinpoaꞌ. Quirosarin ninano quëran nanamën aꞌchinapi,” tëcaponaꞌ.

Isaías 60:16

Noya noya cosharonënaꞌ, nacionoꞌsa quëshiponëmaꞌ. Copirnonënantaꞌ, paꞌton nininsopita maꞌshanëna quëshiponëmaꞌ. Ca Sinioroco niꞌton, nichaꞌëranquëmasoꞌ nitotaponaꞌ. Chiníquën nanantërahuëso marëꞌ iráca Cacopontaꞌ, chinotërinco. Inapochinco niꞌton, nichaꞌëranquëmasoꞌ nitotapi.

Isaías 60:5

Inapita nicaton, capa cancantomiataran. Marë soꞌtonoꞌsaquë yaꞌhuëpisopita, maꞌsha naꞌcon naꞌcon paꞌtërinsoꞌ quëshiarinëmaꞌ. Nisha nisha piyapiꞌsa maꞌhuanatona huaꞌanëntopisoꞌ, quëtáponëmaꞌ.

Miqueas 4:2

Notohuaroꞌ nisha nisha piyapiꞌsa huëcapona pochin: “Huëco pantatëhua Sion motopiquë Sinioro chinotahuaꞌ. Inaquë pëinën yaꞌhuërin niꞌton, yaꞌipi israiroꞌsari chinotërin. Inasoꞌ nanamën aꞌchintarinpoaꞌ. Onpopinsona nanpicasoꞌ, anitotarinpoaꞌ,” tosapi. Ninapotatonaꞌ, Quirosarinquë paponaꞌ. Inaquë Sinioro nanamën aꞌchinapi niꞌton, paꞌsapi. Inaquë Siniorosoꞌ piyapinënpita nanamën anitotarin.

Deuteronomio 32:13

Motopiroꞌsa parti quëninpoaꞌ. Catahuarinpoa niꞌton, inimicoroꞌsa minsërëhuaꞌ. Nisha nisha nitërinsopita aꞌcarinpoaꞌ. Natëtëquë ninoiꞌ yaꞌhuërinso oꞌshitërinpoaꞌ. Naꞌpiro nininquë oripo nararoꞌsa huanirin. Ina quëran toma ocoiaton quëtërinpoaꞌ.

1 Pedro 2:5

Imaramaꞌ niꞌton, canpitantaꞌ noya naꞌpiroꞌsa pochin nisaramaꞌ. Nanpimiataramaꞌ. Yaꞌipi imarëhuasopita Yosë acorinpoaꞌ pëinën pochin nicacaso marëꞌ. Cancanënpoa quëran huarëꞌ ina naꞌcon chinotërëhuaꞌ niꞌton, corto huaꞌanoꞌsa pochin nisarëhuaꞌ. Nani tahuëri ina chinotatëhuaꞌ, “Yosparinquën Sinioro,” itahuaꞌ. Nicatahuacasontaꞌ ama naniantahuasohuëꞌ. Quisocristo catahuarinpoaꞌ ina pochin nicacasoꞌ. Ina marëꞌ Yosë noya niꞌsarinpoaꞌ.