Deuteronomio 32:39 - Chayahuita (Shahui)

³⁹ Casáchin Yosëco. Mamanshiroꞌsasoꞌ, co ca pochin nipihuëꞌ. Ca nohuanto piyapiꞌsa nanpirapi, ca nohuanto chiminapi. Ca nohuanto piyapiꞌsa maꞌsha onpopi. Ca nohuanto chachin noyataantapi. Anaꞌintaꞌhuaso chinotohuato, co insonta chaꞌëtarincohuëꞌ. Chini chiníquënco niꞌto, anaꞌintarahuë.

Deuteronomio 32:39 ပူးပေါင်းရင်းမြစ်များ

2 Reyes 5:7

Nontohuachina, inaso paꞌyanin. Inapoaton aꞌmorinso osharin. Inaporahuaton piyapinënpita natantonënquë tapon: —¡Co caso Yosëcohuëꞌ! Inacha tëhuënchinsoꞌ nohuantërinsopita ananpirin. Nohuantërinsopitasoꞌ, chiminpi. Siria copirnosoꞌ, co chana caniori maninso anoyataꞌhuaso marëꞌ aꞌpatiincoso yaꞌhuërinhuëꞌ. Inta yonquirico canpitantaꞌ. Ahuëinënpoaso yonquiaton napotarinco inasoꞌ tënahuë, tënin.

Nehemías 9:6

Istrasëntaꞌ, Yosë nontaton tapon: “Quëmasáchin Sinioronquën. Quëmari yaꞌipi piꞌiroꞌtë acoran. Yaꞌipi yaꞌhuërinsopitarë chachin ninan. Isoroꞌpaꞌ, marë, inapitanta ninan. Yaꞌipi inaquëpita yaꞌhuërinsopitarë chachin acoran. Quëma nohuanton yaꞌipi yaꞌhuëapi. Quëma nohuanton chachin yaꞌipi nanpiapi. Piꞌiroꞌtëquë yaꞌhuërinsopita chinotarinën.

Copo naporinso' 5:18

Ina nohuanton caniohuatan, ina nohuanton chachin noyatapon. Ina nohuanton parisitohuatan, ina chachin inquitapënquën.

Salmos 51:8

Co noyahuëꞌ nicato chiníquën sëtopirahuëꞌ. Anoyacancantohuatanco, capa cancantarahuë huachi.

Éxodo 15:26

“Caso Sinioroco. Canpitaso chinotëramaco. Casáchin nanitërahuë anoyatacasoꞌ. Nonahuësopita nóya natancoꞌ. Noya natanatomaꞌ, nohuantërahuëso nicoꞌ. Camaitërahuësopita natëtoma noya nipatamaꞌ, carinquëmanta noya niꞌsaranquëmaꞌ. Noya nicatënquëma canpitasoꞌ, catahuaaranquëmaꞌ. Iquipitoroꞌsasoꞌ, nisha nisha quëran anaꞌintërahuë. Canpitaso co ina pochin anaꞌintaponquëmahuëꞌ,” itërin.

Eclesiastés 3:3

Maꞌsha onpotacaso tahuëri. Nonëntacaso tahuëri. Maꞌsha ninësoꞌ, oquicaso tahuëri. Oquirësonta anoyataantacaso tahuëri.

Isaías 41:4

Casáchin Yosëco niꞌto, inapita acorahuë. Ca nohuanton nani maꞌsha isoroꞌpaquë onpopi. Ca Sinioroco naporahuë. Coꞌhuara isoroꞌpaꞌ yaꞌhuëyátërasohuëꞌ, caꞌton yaꞌhuërahuë. Nani maꞌsha yaꞌhuërinsopita taꞌhuantopiriontaꞌ, caso yaꞌhuëápo.

Isaías 43:10

Israiroꞌsanquëmaso nipirinhuëꞌ, nani niꞌnamaco. Piyapinëhuëpita nicacamaso marëꞌ huayonatënquëma acoranquëmaꞌ. Nohuitatomaco chinotamacoso marëꞌ acoranquëmaꞌ. Maꞌninsoꞌ ninahuësontaꞌ, nitotamaso marëꞌ acoranquëmaꞌ. Coꞌhuara ca yaꞌhuëyátërasocohuëꞌ, co aꞌna yosë yaꞌhuërinhuëꞌ. Ca piquërantaꞌ co aꞌna yaꞌhuëaponhuëꞌ.

Isaías 43:12

Ina quëran Sinioro taantarin: “Iráca chachin nichaꞌëcaꞌhuanquëmasoꞌ anitotëranquëmaꞌ. Napoaton nichaꞌëranquëmaꞌ. Co aꞌna mamanshi tëranta ina pochin nininhuëꞌ. Canpita nani niꞌnamaco.

Isaías 43:13

Coꞌhuara tahuëri yaꞌhuëyátëraponhuëꞌ, caso Yosëco yaꞌhuërahuë. Insosona anaꞌintaꞌhuasoꞌ yonquihuato, co insoari tëranta nichaꞌësarinhuëꞌ. Maꞌsona nisahuato co insonta yaꞌcopiarincohuëꞌ,” tënin.

Isaías 45:18

Siniorosoꞌ Yosë niꞌton, piꞌiroꞌtë acorin. Isoroꞌpanta acohuachina, noyá acorin. Co topinan nicacaso marëꞌ acorinhuëꞌ. Piyapiroꞌsari yaꞌhuëtacaiso marëꞌ acorin. Ina chachin nontatonpoaꞌ: “Caso Sinioroco. Co aꞌninquëchin yaꞌnorahuëꞌ. Co aꞌna ca pochin yaꞌhuërinhuëꞌ.

Isaías 45:22

Nisha nisha parti isoroꞌpaquë yaꞌhuëramasopita, huëco caquë nichaꞌëinquëmaꞌ. Casáchin Yosëco niꞌto, paꞌpi áquë yaꞌhuëpiramahuëꞌ, huëcoꞌ.

Isaías 45:5

Ca mini Sinioroco. Co aꞌna yaꞌhuërinhuëꞌ. Casáchin Yosëco. Co quëma nohuitopirancohuëꞌ, ca nohuanton míso ahuëtaran.

Isaías 46:4

Mashotohuatamantaꞌ, inachachin nitáponquëmaꞌ. Acasáchin nipomarahuëntaꞌ, inachachin nitáponquëmaꞌ. Carima ninanquëmaꞌ. Carima chachin pëꞌpëatë pochin quëparáponquëmaꞌ. Carima achiniaranquëmaꞌ. Carima chachin nichaꞌësaranquëmaꞌ.

Ezequiel 37:12

Inapitaso napopirinahuëꞌ, quëmari pënënaton: ‘Sinioro napotërinquëmaꞌ: “Canpitaso piyapinëhuëpitanquëma nipiramahuëꞌ, chimipiroꞌsa paꞌpitopiquë acoatë pochin nitëranquëmaꞌ. Cari chachin paꞌpitërinënquëma quëran ocoiatë pochin nitaranquëmaꞌ. Áquë quëpirinënquëmahuëꞌ, Israiro noꞌpaquë chachin quëpanantaponquëmaꞌ.

Ezequiel 37:3

Naporoꞌ Sinioro itaponco: “¿Isopita nansëroꞌsa noya ipora nanpiantaꞌitonahuëꞌ ti?” itërinco. “Quëmasáchin Sinioro inasoꞌ nitotëran,” itërahuë carintaꞌ.

Oseas 5:14

Paꞌpiniꞌ, niirahuaton mapintërinso pochin israiroꞌsaꞌ, Cota huënton israiroꞌsaꞌ, inapita nitarahuë. Cari chachin paꞌsa paꞌsatërëso pochin aparisitarahuë. Inapotahuato patarahuë. Quëpatë pochin nipatontaꞌ, co insonta osërëtiincosoꞌ nanitarinhuëꞌ.

Oseas 6:1

Canpitaso israiroꞌsanquëma naporamaꞌ: “Huëco yaꞌipinpoa Sinioro chachin chinotaantaꞌahuaꞌ. Chiníquën anaꞌintopirinpoahuëꞌ, nontohuatëhua anoyataantarinpoaꞌ. Apisáchin pochin acopirinpoahuëꞌ, inachachin nonëantarinpoaꞌ. Noya chinotohuatëhuaꞌ, aꞌnaroáchin anoyatarinpoaꞌ. Ananpitaantarinpoaso pochin catahuararinpoa niꞌton, noya niꞌsarinpoaꞌ. Chiníquën cancantatëhua Sinioro nohuitahuaꞌ. Inapohuatëhuaꞌ, Siniorosoꞌ huëcapaiantarinpoaꞌ. Nani tahuëri piꞌi pipirinso pochin, oꞌnápiquë noꞌpaꞌ caniororinso pochin huëcapaiantarinpoaꞌ,” tënamaꞌ.

Miqueas 5:8

Naporoꞌ aꞌnapitanta nisha nisha nacionquë yacapatapirinahuëꞌ, paꞌpiniꞌ pochin nicaponaꞌ. Yaꞌipi maꞌsharoꞌsa quëran paꞌpinisoꞌ, chini chiníquën ninin. Inapochachin inapitanta nicaponaꞌ. Paꞌpiniri ohuicaroꞌsa yaꞌcontaton, tiquirinso pochin co aꞌnaya tëranta nichaꞌëponahuëꞌ.

Juan 8:24

Napoaton napotëranquëmaꞌ. Caso iráca quëran huarëꞌ yaꞌhuato, yaꞌhuëmiatarahuë. Co natëhuatamacohuëꞌ, oshanëmarëꞌquëma chachin chiminaramaꞌ, itërin.

Deuteronomio 32:12

Sinioroíchin nipirinhuëꞌ noya quëninpoaꞌ. ¡Co inso mamanshiri tërantaꞌ, catahuacaso yaꞌhuërinhuëꞌ!

Deuteronomio 7:9

Naporinso marëꞌ: ‘Sinioroíchin Yosësoꞌ. Shimashonënpoapitarëꞌ anoyatërinsoꞌ, co onporonta naniantarinhuëꞌ. Ina nosoroatëhua camaitërinsopita natëhuatëhuaꞌ, co naniantarinpoahuëꞌ canpoantaꞌ,’ tocoꞌ.

Hebreos 1:12

Aꞌmorëso siꞌpirahuatëꞌ, tëꞌyatërëso pochin yaꞌipi ataꞌhuantaran. Nasha aꞌmorëso pochin, yaꞌipi nasha acoantaran. Quëmaso nipirinhuëꞌ co onporontaꞌ taꞌhuantaranhuëꞌ. Co nishataranhuëꞌ. Inachachin yaꞌhuërápon,” itërin.

Apocalipsis 1:11

Nontatonco, shaꞌhuitërinco: —Apira nani maꞌsha aꞌnotaranquën, quiricaquë ninshitëquëꞌ. Ina quëran canchisë ninanoroꞌsaquë aꞌpatëquëꞌ imarinacosopita nonchinaꞌ. Ipisoquë, Ismirinaquë, Pircamoquë, Tiatiraquë, Sartisiquë, Piratiripiaquë, Naotisiaquë inaquëpita yaꞌhuëpisopita aꞌpatëquëꞌ nitochinaꞌ, itërinco.

Apocalipsis 2:8

Ina quëran shaꞌhuitaantarinco: —Ansiano Ismirinaquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Iráca quëran huarëꞌ yaꞌhuërahuë. Co onporontaꞌ taꞌhuantarahuëꞌ. Chiminaporahuëꞌ, nanpiantarahuë.

1 Samuel 2:6

Sinioro nohuanton chiminarëhuaꞌ. Ina nohuanton chachin huaꞌhuatërëhuaꞌ. Ina topachina chimipiroꞌsa yaꞌhuërinquë paꞌmarihuaꞌ. Ina taantahuachinasoꞌ, inatohua quëran huënantarihuaꞌ.