Deuteronomio 30:19 - Chayahuita (Shahui)

¹⁹ Ipora tahuëri chachin huayonacamaso marëꞌ shaꞌhuitëranquëmaꞌ. Noya nanpiamasohuë nipon, chiminamasohuë nipon. Yosë catahuainquëmasohuë nipon, anaꞌintiinquëmasohuë nipon. Sinioro natëtoma noya nanpicamasoꞌ huayoncoꞌ. Shiparimapitanta ina chachin huayoinaꞌ. Piꞌiroꞌtëꞌ, isoroꞌpaꞌ, inapita yaꞌhuërinso niꞌnëhuaꞌ. Inapochachin shaꞌhuitaranquëmasontaꞌ, noꞌtëquën nisarin.

Deuteronomio 30:19 ပူးပေါင်းရင်းမြစ်များ

Génesis 2:17

Anitotacaso nara nitërinsoíchin, co nohuantërahuë capamasoꞌ. Inaso caꞌpatan, noya nininso nitotaponahuëꞌ, co noyahuëꞌ nininsonta nitotaran. Ama ina nitërinso caꞌquësohuëꞌ. Ina caꞌpatan, tëhuënchachin chiminaran,” itërin.

Salmos 119:111

Camaitëransopita quëtëranco niꞌton, huaꞌanëntomiatarahuë. Inapita acapacancaninco niꞌton, napoarahuë.

Proverbios 1:29

Noꞌtëquën yonquicaso nocanama niꞌton, inapotaranquëmaꞌ. Co Sinioronta noya nicatoma natëramaso marëhuëꞌ, napoaramaꞌ.

Proverbios 8:36

Aꞌpohuachinacoso napoaponahuëꞌ, huëhuëpiro nisapi. Insosona co quëꞌyahuachincohuëꞌ, inaora chachin chimirin yonisarin,” tënin yonqui pënëntaton.

Isaías 1:2

Piꞌiroꞌtëquë, isoroꞌpaquë, inaquëpita yaꞌhuëramasoꞌ, yaꞌipinquëma Sinioro noninso natancoꞌ: “Huiꞌnahuëpita huaꞌhuishin quëran huarëꞌ asoꞌsorahuë. Inapotopirahuëꞌ, inahuaso co natërinacohuëꞌ.

Lucas 10:42

Casáchin natancosoꞌ naꞌcon naꞌcon nohuantërahuë. Mariasoꞌ natanatonco, noya noya nisarin. Naꞌcon yonquirinco niꞌton, noya cancantomiatarin tënahuë, itërin Quisosori.

Hechos 2:39

Yosë nohuanton, Ispirito Santo aꞌpatimarinpoaꞌ. Canpitantaꞌ yaꞌcoancantarinquëmaꞌ. Huiꞌnamapitantaꞌ yaꞌcoancantarin. Aꞌnaquëontaꞌ aquë yaꞌhuëpirinahuëꞌ, Yosë nohuanton, imasapi. Imapachinaꞌ, Ispirito Santori yaꞌcoancantarin inahuantaꞌ, itërin.

Deuteronomio 30:1

Naquëranchin Moisësëri israiroꞌsa nontaantarin: “Nani carinquëma shaꞌhuitëranquëmaꞌ. Sinioro noꞌtëquën natëhuatamasoꞌ, catahuamiatarinquëmaꞌ. Shiparimapitanta natëhuachinaꞌ, inapotarin. Napoaponahuëꞌ, coꞌsoꞌ ina natëhuatamahuëꞌ, ama huachi noya yaꞌhuëcamaso marëhuëꞌ shaꞌhuitatënquëma aparisitarinquëmaꞌ. Shiparimapitanta coꞌsoꞌ natëhuachinahuëꞌ, inapotarin. Yosë nohuanton inimicoroꞌsa minsërahuatënquëmaꞌ, noꞌpaꞌ quëtërinquëma quëran áquë nacionoꞌsaquë, quëpaponquëmaꞌ. Inaquë yacapatapoma pochin, canpitaso ipora napotëranquëmasoꞌ yonquiapomaꞌ. Shiparimapitanta inapotohuachina, cancan yonquiapona inahuantaꞌ. Canpita huayonamaso yaꞌhuërin. Yanatëtohuatamaꞌ, natëtaramaꞌ. Co yanatëtohuatamahuëꞌ, co natëtaramahuëꞌ.

Deuteronomio 30:15

Yaꞌipinquëma noya natancoꞌ: Ipora tahuëri quëtaranquëma huayonacamaso marëꞌ. Noyasáchin nipatamaꞌ, noya nanpiaramaꞌ. Yaꞌhuërëꞌ co noyahuëꞌ nicacasoáchin cancantohuatamaꞌ, co noya nanpiaramahuëꞌ. Chiminamaso yaꞌhuërin.

Deuteronomio 30:16

Ipora shaꞌhuitëranquëmasopita natëtomaꞌ, Sinioro nosoromiatohuatamaꞌ, noya yaꞌhuëaramaꞌ. Pënëntërinsopita, camaitërinsopita, aꞌchininsopita, inapita natëcoꞌ. Inapita natëtoma ina nonanpatamaꞌ, huaꞌqui tahuëri niꞌsaramaꞌ. Naporahuaton naꞌa huiꞌnamapita yaꞌhuëtarinquëmaꞌ. Sinioronënpoaso Yosë niꞌton, yaꞌconarama noꞌpaquë, noya catahuamiatarinquëmaꞌ.

Deuteronomio 31:17

Napoaponahuëꞌ, inapopiso marëꞌ carinta chiníquën noꞌhuito tananpitarahuë. Manta tëranta yaꞌhuëpachinantaꞌ, co huachi inapita yonquiarahuëꞌ. Paꞌpi parisitatona naporo huarëꞌ: ‘Tëhuënchachin Sinioro aꞌporinpoa niꞌton, poꞌsarëhuaꞌ,’ tëcaponaꞌ.

Deuteronomio 31:28

Yaꞌipi ansianoꞌsaꞌ, yaꞌipi huaꞌanoꞌsanëmaꞌ, inapita isëquë quëcoꞌ. Canpita shaꞌhuitaranquëmaso chachin inapitanta shaꞌhuichi. Nani natanamaco niꞌton, noꞌtëquën shaꞌhuitaranquëmaꞌ. Piꞌiroꞌtëꞌ, isoroꞌpaꞌ, inapita yaꞌhuërinso niꞌnëhuaꞌ. Inapochachin shaꞌhuitaranquëmasontaꞌ, noꞌtëquën nisarin. Ina niꞌton: ‘Co shaꞌhuitërinpoahuëꞌ,’ co tosaramahuëꞌ.

Deuteronomio 32:1

“Piꞌiroꞌtëꞌ, isoroꞌpaꞌ, canpitanta natancoꞌ. Piyapi pochin nicatoma natanco nonsarahuë.

Deuteronomio 4:1

Moisësëri israiroꞌsa nontaton itapon: “Iporaso huachi, Sinioro pënëntërinsoꞌ natëcoꞌ. Camairinquëmasopitantaꞌ, natëcoꞌ. Nani yaꞌipi carinquëma aꞌchintëranquëmaꞌ. Ama topinan quëran natanatomarahuëꞌ, ina nohuantërinso nicoꞌ. Inapohuatamaꞌ, noya nanpitoma Yosë quihuitërinpoasoꞌ noꞌpaquë yaꞌconatoma huaꞌanëntaramaꞌ. Shimashonënpoapita shaꞌhuitërinso chachin quëtarinpoaꞌ.

Deuteronomio 4:25

Noyaroꞌpaquë yaꞌconpatamaꞌ, huaꞌqui yaꞌhuëapoma pochin, huiꞌnamapita yaꞌhuëtarinquëmaꞌ. Shiparimapitanta yaꞌhuëtohuachinquëmaꞌ, mashotarama huachi. Co naporo tëranta mamanshi nicacaso yaꞌhuërinhuëꞌ. Sinioro naniantotamaꞌ. Ama manta nonanatomaꞌ, moshacosohuëꞌ. Co Sinioro natëtomahuëꞌ inapohuatamaꞌ, paꞌpi co noyahuëꞌ nisaramaꞌ. Ina marëꞌ chiníquën noꞌhuiarinquëmaꞌ.

Deuteronomio 4:26

Piꞌiroꞌtëꞌ, isoroꞌpaꞌ, inapita yaꞌhuërinso niꞌnëhuaꞌ. Inapochachin shaꞌhuitaranquëmasontaꞌ, noꞌtëquën nisarin. Cortaniiꞌ aquëtëran noꞌpaꞌ yaꞌhuërinsoꞌ macatoma huaꞌanëntopiramahuëꞌ, mamanshi moshacaso marëꞌ nipatamaꞌ, co huaꞌqui inaquë yaꞌhuëaramahuëꞌ. Naꞌcon naꞌconquëma chiminaramaꞌ.

Deuteronomio 4:6

Natëtatomaꞌ, ina inachachin nicoꞌ. Inapohuatamaꞌ, nisha nisha piyapiꞌsa naꞌcon nitotatoma yonquínahuanoꞌsa ninamasoꞌ, nitotapi huachi. Ina nitotohuachinaꞌ: ‘¡Ma noyacha inapitaso pënëntërinso nanan yaꞌhuëtopi paya! Napoaton naꞌcon nitotatonaꞌ, yonquínahuanoꞌsa nipi,’ tosapi.

Deuteronomio 6:2

Ina pochin mini Sinioro noya nicatë natëcaso yaꞌhuërin. Pënëntërinsopita, camaitërinsopita, inapita chiminaquë huarëꞌ natëcoꞌ. Naporahuaton huiꞌnamapita, shiparimapita, inapitanta natëchinaꞌ. Inapohuatamaꞌ, huaꞌqui tahuëri niꞌsaramaꞌ.

1 Timoteo 5:21

Tata Yosë Quisocristorë chachin niꞌsarinpoaꞌ. Anquëniroꞌsaꞌ acorinsopitantaꞌ niꞌsarinënpoaꞌ. Napoaton api, yaꞌipiya noꞌtëquën pënënquëꞌ. Ama aꞌnaroáchin anaꞌintëquësohuëꞌ. Noya natantëquëꞌ noꞌtëquën nitotacaso marëꞌ. Ina quëran noꞌtëquën yonquiaton, pënënquëꞌ. Inso tërantaꞌ co noyahuëꞌ nipachina, pënënacasoꞌ yaꞌhuërin.