Deuteronomio 12:10 - Chayahuita (Shahui)

^10-11 Cortaniiꞌ pëntontohuatamaꞌ, Sinioro noꞌpaꞌ quëtarinquëmaquë yaꞌhuëmiataramaꞌ. Yaꞌipi inimicoroꞌsa minsërahuatomaꞌ, sano cancantarama huachi. Naporoꞌ insëquësona Siniorori huayonin niꞌton, ina chinotacaso nëꞌmëtë pëi acoaramaꞌ. Inaquë ipora camairanquëmasopita Sinioro quëshiaramaꞌ. Ina noya nicatoma maꞌsharoꞌsa tëpapomaꞌ. Aꞌnaquën noyá ahuiquitapomaꞌ. Aꞌnaquënsoꞌ, piꞌpian ahuiquitapomaꞌ. Nani maꞌsha quëran diesmoroꞌsantaꞌ, inaquë quëpatapomaꞌ. Catahuatamaso marënta camaitopisoꞌ, quëpapomaꞌ. Maꞌsona Sinioro quëtacasoꞌ shaꞌhuitohuatamaꞌ inanta quëpatapomaꞌ.

Deuteronomio 12:10 ပူးပေါင်းရင်းမြစ်များ

1 Reyes 8:56

“¡Ma noyacha Sinioroso paya! Shaꞌhuitërinpoaso chachin israiroꞌsanpoa noya yaꞌhuërëhuaꞌ. Moisësë quëran anitotërinpoaso chachin, noya catahuarinpoaꞌ.

Éxodo 33:14

—Carinquën chachin caꞌtanaranquën niꞌton, sano cancantaran, itërin Siniorori.

Proverbios 1:33

Inquëmaso napoaponahuëꞌ, noya natanatomaco natëtohuatamaꞌ, sano yaꞌhuëaramaꞌ. Co manta maꞌsha onpocasoꞌ tëꞌhuataramahuëꞌ,” tënin.

Jeremías 23:6

Ina copirno nicasoꞌ, Cota huënton israiroꞌsa chaꞌëponaꞌ. Aꞌnapita israiroꞌsantaꞌ, sano cancan quëran yaꞌhuëaponaꞌ. Nininën nohuitatonaꞌ, ‘Sinioro nichaꞌërinpoasoꞌ,’ itaponaꞌ,” tënin.

Ezequiel 34:25

Noya yaꞌhuëcaiso marëꞌ inapitaroꞌco anoyatarahuë. Ca nohuanton niꞌniroꞌsa ayapon. Ama ohuicanëhuëpita apicaiso marëhuëꞌ napoapon. Inapohuato tananoꞌsaquë topinan huëꞌëponaꞌ. Co manta tëꞌhuatapihuëꞌ.

Ezequiel 34:28

Co huachi nisha piyapiroꞌsari huaꞌanëntapihuëꞌ. Co niꞌniroꞌsari tëranta caponahuëꞌ. Co incari tëranta aꞌpayanaponhuë niꞌton, co huachi tëꞌhuarëꞌna yaꞌhuëaponahuëꞌ.

Deuteronomio 33:12

Mincamin huënton israiroꞌsanta yonquiaton, tapon: “Mincamin huënton israiroꞌsasoꞌ, Siniorori nosororin. Napoaton inahuasoꞌ, sano yaꞌhuaponaꞌ. Chini chiníquën nanantërinsoari paꞌpoyarápon. Motopiaꞌhuanënpitaquë yaꞌhuëaton, paꞌpoyarápon,” tënin.

Deuteronomio 33:28

Israiroꞌsanpoasoꞌ, co manta tëꞌhuatarihuarahuëꞌ yaꞌhuëarihuaꞌ. Shiparinpoapitantaꞌ, napoaponaꞌ. Shaꞌpatëhuaꞌ, notohuaroꞌ tricoro yaꞌhuëapon capacasoꞌ. Notohuaroꞌ oparo yaꞌhuëapon oꞌocasoꞌ. Co onporonta oꞌnan pahuantarinpoahuëꞌ.

Deuteronomio 4:22

Napoaton caso iso Moapo noꞌpaquë chachin chiminarahuë. Co Cortaniiꞌ pëntontarahuëꞌ. Canpita tëhuënchinsoꞌ pëntontatomaꞌ, ina noyaroꞌpaꞌ huaꞌanëntaramaꞌ.

Deuteronomio 9:1

Naquëranchin Moisësëri israiroꞌsa nontaantarin: “Natanco israiroꞌsanquëmaꞌ: Nani nanirin Cortaniiꞌ pëntontatomaꞌ, chini chiníquën nacionoꞌsa yaꞌcontatoma minsëamasoꞌ. Inaquë inápa pairahuan ninanoroꞌsa yaꞌhuëpirinhuëꞌ, canpitari yaꞌcontatoma minsëaramaꞌ.

Josué 3:17

Corto huaꞌanoꞌsasoꞌ, Siniororëꞌ anoyatopiso caposonën pitënpi quëran huanirápi. Cortaniiꞌ huinquintërinso huáncana huanisoiꞌ, yaꞌipi aꞌnapita israiroꞌsasoꞌ, noꞌpaꞌ paꞌtatona pëntonpi.

Josué 4:12

Nopino, Cato, inapita Israiro huëntonoꞌsantaꞌ pëntonpi. Manasisi patoma huënton israiroꞌsantaꞌ, napopi. Moisësëri camairinso chachin noyá niacorahuatona pëntonpi. Inahuaꞌton quëchitapi.

1 Samuel 7:12

Ina quëran Samoirosoꞌ, panca naꞌpi macacaiso camaitërin. Ina macatona Mispa quëran Sën itopiso motopiaꞌhuayaquë ira paꞌninsoꞌ huáncana acorin. Ina naꞌpi acorinsoꞌ, aninihuanin: “Ipini-sëri,” itërin. “Isëquë huarëꞌ Sinioro catahuarinpoaꞌ,” tapon ina pochin nohuitërin.