Deuteronomio 1:8 - Chayahuita (Shahui)

⁸ Nani yaꞌipi ina noꞌpaꞌ carinquëma quëtëranquëma huaꞌanëntamaso marëꞌ. Napoaton paꞌsahuatomaꞌ, ina noꞌpaꞌ máco huachi. Iráca shimashonëmapita Apraan, Isaco, Cacopo, inapita nani shaꞌhuitërahuë: ‘Caso Sinioroco niꞌto, quëtaranquëmaꞌ, itërahuë,’ itërinpoaꞌ,” tënin Moisësë.

Deuteronomio 1:8 ပူးပေါင်းရင်းမြစ်များ

Génesis 12:7

Inaquë Siniorori, Apran yaꞌnotahuaton, itërin: “Yaꞌipi iso noꞌpaꞌ, shiparinpita quëtarahuë huaꞌanëntaponaꞌ,” itërin. Naporo chachin Apran Sinioro chinotacaso marëꞌ aꞌnara artaro ninin. Inaquë yaꞌnotërin niꞌton, chinotërin.

Génesis 15:16

Catapini shinpita huënton, yaꞌhuërin piquëran, shiparinpita isëquë chachin huëntaponaꞌ. Amororoꞌsa co noyahuëꞌ nipisoꞌ, co aquëtë huarëꞌ nishátërarinhuëꞌ. Napoaton naporo tahuëriꞌsa huarëꞌ anaꞌintarahuë huachi.

Génesis 15:18

Naporo tahuëri chachin, Sinioro Apranë anoyatërin. Anoyataton itapon: —Shiparinpita iso noꞌpaꞌ quëtarahuë: Iquipito iꞌ quëran huarëꞌ Iopiratisiiꞌ pancaiꞌpaꞌ, huaꞌanëntopiso naniarin.

Nehemías 9:15

Tanahuachinarantaꞌ, inápaquë cosharo yaꞌhuërinso quëtëran. Yamorohuachinarantaꞌ, natëtë quëran iꞌsha ocoitëran. Noꞌpaꞌ quëtamaso quihuitëranquë yaꞌcaritohuachinara: ‘Yaꞌconatoma huaꞌanëntoco huachi,’ itëran.

Éxodo 33:1

Siniorori naquëranchin Moisësë itaantarin: —Israiroꞌsa Iquipito quëran nani ocoiran. Iporasoꞌ noꞌpaꞌ quëtaꞌhuanquëmasoꞌ nininquë quëpaquë huachi. Inaquësoꞌ, co manta pahuaninhuëꞌ. Nani Apraan, Isaco, Cacopo inapita shaꞌhuitërahuë shinpita ina noꞌpaꞌ quëtaꞌhuasoꞌ. Ina marëꞌ anquëninëhuë aꞌpararahuë noꞌtëquën pacacamaso marëꞌ aꞌnotarinquën. Inaquësoꞌ, cananoꞌsaꞌ, amororoꞌsaꞌ, itiroꞌsaꞌ, huirisiroꞌsaꞌ, iporoꞌsaꞌ, quiposoroꞌsaꞌ, inapita yaꞌhuëapi. Yaꞌhuëapirinahuëꞌ, cari ocoiarahuë.

Deuteronomio 10:11

Naporoꞌ itaponco: ‘Paꞌmaton, israiroꞌsa quëpaquëꞌ. Paatona shimashonënapita noꞌpaꞌ quëtaꞌhuaso shaꞌhuitërahuëquë yaꞌcoinaꞌ,’ itërinco,” itërin.

Deuteronomio 26:15

Quëmasoꞌ, inápaquë noya noya pëiquë yaꞌhuërëso pochin yaꞌhuëtëran. Inaquë yaꞌhuëaponahuëꞌ, isoroꞌpaquë yaꞌhuëraiso nitotëran. Israiroꞌsacoisoꞌ, quëma piyapinënpitacoi niꞌton, catahuamiatocoi. Noꞌpaꞌ quëtërancoisontaꞌ, nóya. Co manta pahuaninhuëꞌ. Shimashonëhuëpita shaꞌhuitëranso chachin ninin. Inantaꞌ, noya yonquirapiquëꞌ. Quëma nohuanton nani maꞌsha shaꞌnaisopita noya noyachin,’ tosaran,” itërin.

Deuteronomio 26:3

Insosona naporo corto huaꞌan nisarinquë quëpaaton: ‘Siniorosoꞌ Yosënëhuë niꞌton, shimashonëhuëpita iráca shaꞌhuitërin: “Caso Yosëco niꞌto, iso noꞌpaꞌ shiparimapita quëtarahuë,” itërin. Ina shaꞌhuirinso chachin, nani yaꞌconahuë,’ tosaran.

Deuteronomio 30:20

Sinioronënpoasoꞌ Yosë niꞌton, inasáchin cancantatoma nosorocoꞌ. Nosoroatoma noꞌtëquën natëcoꞌ. Inapohuatamaꞌ, huaꞌqui tahuëri noꞌpaꞌ quëtarinquëmaquë, yaꞌhuëaramaꞌ. Nani shimashonëmapita Apraan, Isaco, Cacopo, inapita: ‘Caso Yosëco niꞌto, shiparimapita iso noꞌpaꞌ quëtarahuë,’ itërin,” tënin Moisësë.

Deuteronomio 31:7

Ina quëran Moisësësoꞌ, Cosoi përarin. Naporoꞌ yaꞌipi israiroꞌsa niꞌtonënquë, huaꞌan acocaso marëꞌ shaꞌhuitërin: “Ama tëꞌhuaton, nisha nisha yonquiquësohuëꞌ. Siniorori shimashonënpoapita iráca: ‘Caso Yosëco niꞌto, iso noꞌpaꞌ shiparimapita quëtarahuë,’ itërin. Naporinso chachin quëmari isopita quëparahuaton, ina noꞌpaꞌ ahuaꞌanëntaran.

Deuteronomio 34:4

Naporoꞌ Siniorori itapon: “Iso mini noꞌpaꞌ, Apraan, Isaco, Cacopo, inapita: ‘Caso Yosëco niꞌto, iso noꞌpaꞌ shiparimapita quëtarahuë,’ taꞌto shaꞌhuitërahuësoꞌ. Quëmaora yaꞌpiranën quëran chachin niꞌcamaso nohuantato, aꞌnotëranquën. Napoaponahuëꞌ, quëmasoꞌ co inaquë yaꞌconaranhuëꞌ,” itërin.

Deuteronomio 4:1

Moisësëri israiroꞌsa nontaton itapon: “Iporaso huachi, Sinioro pënëntërinsoꞌ natëcoꞌ. Camairinquëmasopitantaꞌ, natëcoꞌ. Nani yaꞌipi carinquëma aꞌchintëranquëmaꞌ. Ama topinan quëran natanatomarahuëꞌ, ina nohuantërinso nicoꞌ. Inapohuatamaꞌ, noya nanpitoma Yosë quihuitërinpoasoꞌ noꞌpaquë yaꞌconatoma huaꞌanëntaramaꞌ. Shimashonënpoapita shaꞌhuitërinso chachin quëtarinpoaꞌ.

Deuteronomio 6:10

Naquëranchin Moisësëri israiroꞌsa pënëantarin: “Shimashonënpoapita Apraan, Isaco, Cacopo, inapita nani shaꞌhuitërin: ‘Caso Yosëco niꞌto, iso noꞌpaꞌ quëtaranquëmaꞌ,’ itërin. Shaꞌhuitërinso chachin Sinioronënpoa inaquë ayaꞌcoaninquëmaꞌ. Inaquësoꞌ, panca ninanoroꞌsa noyápiachináchin yaꞌhuërin. Co canpitari ninamahuëꞌ.

Deuteronomio 7:12

Naquëranchin Moisësëri israiroꞌsa nontaantarin: “Iporasoꞌ nani Sinioro camaitërinsopita shaꞌhuitëranquëmaꞌ. Ina natëtomaꞌ, ina inachachin nicoꞌ. Inapohuatamaꞌ, Sinioronënpoa canpoarëꞌ anoyatërinso yonquiarin. Ina yonquiaton noya catahuarinpoaꞌ. Nani shimashonënpoapita shaꞌhuitërin niꞌton, catahuaarinpoaꞌ.

Deuteronomio 7:13

Nosoroatënquëma catahuaarinquëma niꞌton, ina nohuanton naꞌa huiꞌnama yaꞌhuëtarinquëmaꞌ. Huiꞌnamapitantaꞌ, inapochachin catahuamiatarin. Trico, sipata, inapita shaꞌnamasontaꞌ, noya noyatarin. Ina nohuanton huinonta oꞌocamasoꞌ, tomanta capamasoꞌ, co pahuantarinquëmahuëꞌ. Ina nohuanton ohuacanëmantaꞌ, ohuicanëmanta naꞌasarin. Shimashonënpoapita shaꞌhuitaton: ‘Caso Yosëco niꞌto, iso noꞌpaꞌ quëtaranquëmaꞌ,’ itërin. Ina niꞌton quëtarinquëmaꞌ. Inaquë yaꞌcontapamaꞌ, inapotarinquëmaꞌ.

Deuteronomio 7:8

Napoaton Iquipito quëran ocoirinquëmaꞌ. Inaquë canpitasoꞌ, chiníquën sacatatoma parisitëramaꞌ. Inapoápiramahuëꞌ, Sinioro nosororinquëmaꞌ. Nosoroatënquëma chiníquën nanantaton huaraon quëran nichaꞌërinquëmaꞌ. Naporahuaton shimashonënpoapita shaꞌhuitërinsoꞌ nanicaso marëꞌ napotërinpoaꞌ.

Deuteronomio 8:1

Naquëranchin Moisësë israiroꞌsa nontaantarin: “Yaꞌipi Yosë camaitërinsopita nani ipora shaꞌhuitaranquëma niꞌton, natëcoꞌ. Inapohuatamaꞌ, notohuaroꞌ naꞌasaramaꞌ. Naporahuaton, shimashonënpoa noꞌpaꞌ quëtacasoꞌ shaꞌhuitërinquë yaꞌhuëpisopita minsëaramaꞌ.

Deuteronomio 9:5

Tëhuënchachin co canpita noya ninamaso marëꞌ, inapita noꞌpanëna masaramahuëꞌ. Inapita co noyahuëꞌ nipiso marëꞌ, aꞌpararin. Naporahuaton, shimashonëmapita: Apraan, Isaco, Cacopo, inapita shaꞌhuitërinsoꞌ yonquiaton inapotarin.

Hebreos 6:13

Apraan yonquicoꞌ. Iráca Yosëri itërin: “Casoꞌ Yosëco niꞌto, noꞌtëquën nontëranquën. Quëma naꞌcon catahuaaranquën. Ca nohuanto, aꞌna tahuëri huiꞌnan yaꞌhuëtarinquën. Naporahuaton, oshaquëran notohuaroꞌ shiparinpitantaꞌ yaꞌhuëtarinquën,” itërin. Yosësoꞌ chini chiníquën nanantërin. Co aꞌnaꞌ yaꞌhuërinhuëꞌ ina quëran chini chiníquën nanantërinsoꞌ. Napoaton: “Casoꞌ Yosëco niꞌto, noꞌtëquën nontëranquën,” itërin.

Josué 1:6

Ama tëꞌhuatonhuëꞌ, chiníquën cancantëquëꞌ. Carinquën catahuaranquën inimicoroꞌsa minsëaran. Inapita minsërahuaton, noꞌpanëna israiroꞌsa patomataran. Nani shimashonënapita quëtaꞌhuasoꞌ shaꞌhuitërahuë niꞌton, inapotaran.

Jueces 2:1

Sinioro anquëninënso Quiricaro quëran pipirahuaton, Poquimo itopiquë pantarin. Inaquë cancontarahuaton, israiroꞌsa itapon: “Carinquëma Iquipito noꞌpaꞌ quëran ocoiranquëmaꞌ. Ocoirahuatënquëmaꞌ, iso noꞌpaquë quënanquëmaꞌ. Iso noꞌpasoꞌ, shimashonëmapita nani shaꞌhuitërahuë quëtaꞌhuanquëmaso marëꞌ: ‘Caso Yosëco niꞌto, iso noꞌpaꞌ shiparimapita quëtarahuë,’ itërahuë. Ina quëran canpitanta shaꞌhuitëranquëmaꞌ: ‘Canpitaroꞌco anoyatërahuësoꞌ co onporonta nishataponhuëꞌ. Canpitanta napoaponahuëꞌ, ama Canaanquë yaꞌhuëpisopitarëꞌquëmaꞌ, anoyatocosohuëꞌ. Mamanshi moshacaiso marëꞌ artaroroꞌsa nipisoꞌ ataꞌhuantocoꞌ,’ itëranquëmaꞌ. Napotopiranquëmahuëꞌ, canpitaso co natëramacohuëꞌ. Co natëtatomahuëꞌ paꞌpi noꞌhuípiro ninamaꞌ.