Daniel 9:20 - Chayahuita (Shahui)

²⁰ Ina pochin nontato oshanëhuë Yosë shaꞌhuitërahuë. Israiroꞌsa oshanënanta shaꞌhuitërahuë. Quirosarin marënta nontërahuë.

Daniel 9:20 ပူးပေါင်းရင်းမြစ်များ

Nehemías 1:6

Onpopionta Sinioro nontëranquënsoꞌ natanco. Israiroꞌsacoisoꞌ, quëma piyapinënpitacoi. Inapita marëꞌ tahuëri tashirë chachin nontaranquën. Tëhuënchachin quiyasoꞌ co natëtëinquënhuëꞌ, oshahuanai. Cantaꞌ, quëmopinëhuëpitaroꞌco chachin oshahuanahuë.

Salmos 145:18

Chinotërinsopitasoꞌ, yaꞌcarísha quëran natanin. Tëhuënchachin nohuantatona chinotopisopita, inapotërin.

Salmos 32:5

Naporoꞌ oshanëhuë shaꞌhuitëranquën. Co noyahuëꞌ ninahuësopita noꞌtëquën shaꞌhuitëranquën. Inapohuatora, yaꞌipi oshanëhuë Sinioro inquitëranco huachi.

Isaías 58:9

Naporoꞌ tëhuënchinsoꞌ nontohuatamaco, aꞌpaniaranquëmaꞌ. Catahuahuanquëmaso marëꞌ chiníquën nontohuatamaco, carimantaꞌ, aꞌpanitënquëma catahuaaranquëmaꞌ. Coꞌso huachi aꞌnapita aparisitohuatanhuëꞌ, co huachi noꞌhuihuatanhuëꞌ, co huachi nonpinapihuatanhuëꞌ,

Isaías 6:5

Ina yonquiato: “¡Maꞌhuantacha caso nicato chiminarahuë paya! ¡Caso co noyahuëꞌ cancantato naponi nonahuë! ¡Aꞌnapitanta ca pochachin cancantopi nipirinhuëꞌ, inapitarëꞌco yaꞌhuërahuë! ¡Napoaporahuëꞌ, Sinioro yaꞌipi nanitapaton yaꞌipi huaꞌanëntërinso quënanahuë!” tënahuë.

Isaías 65:24

Coꞌhuara përashátëraponacohuëꞌ, aꞌpaniarahuë. Nontërinacosonta co tiquiátërasoihuëꞌ, natanahuato aꞌpaniarahuë.

Daniel 9:16

Quëmasoꞌ noyanquën ninansoꞌ nitotërai. Quirosarinquë yaꞌhuëpisopita paꞌpi noꞌhuiton anaꞌintëran. Inapotëranso sanoaton, catahuaantaquëꞌ. Inaso ninanoꞌ, quëma ninanonën. Inaquë chinotiinënquënso marëꞌ pëi acoran. Aꞌnapita nacionoꞌsa ina pirayan yaꞌhuëpisoꞌ, Quirosarinquë yaꞌhuëpisopita yonquiatona tëhuapi. Quiyaora tëhuënëhuëiquë, inapotërinacoi. Shimashonëhuëipitanta tëhuëpi niꞌton, inapotërinacoi.

Hechos 4:31

Nani Yosë nontohuachinara, ina nohuanton, pëiꞌ nacon nacontarin. Ispirito Santori yaꞌipiya noyá yaꞌcoancantërin. Chiníquën cancantatonaꞌ, Yosë nanamën shaꞌhuirapi.

Romanos 3:23

Yaꞌipinpoaꞌ oshahuanëhuaꞌ. Co aꞌnayanpoa tërantaꞌ Yosë pochin cancantërëhuahuëꞌ.

Santiago 3:2

Yaꞌipinpoaꞌ co noyahuëꞌ nicatëhuaꞌ, oshahuanëhuaꞌ. Noyasáchin nonacasosoꞌ saca sacaiꞌ. Noyasáchin nonëhuaꞌ naporini, Yosë pochachin cancanchitërihuahuëꞌ. Co huachi aquëtëꞌ tëhuëꞌitërihuahuëꞌ.

Apocalipsis 21:10

Itohuachincora, huaꞌnarëso pochin niantarahuë. Ispirito Santo nohuanton, panca motopiꞌpaꞌ quëparinco. Inaquë noya ninanoꞌ aꞌnotërinco. Nasha Quirosarin itopisoꞌ. Ina ninanosoꞌ Yosë yaꞌhuërin quëran chachin oꞌmararin.

Apocalipsis 21:2

Ina quëran noyápiachin ninanoꞌ inápa quëran oꞌmararin niꞌnahuë. Yosë yaꞌhuërin quëran oꞌmararin. Quirosarin pochin niponahuëꞌ, noya noya ninin. Noyápiachin yaꞌnorin. Sanapi soꞌyacaso marëꞌ nitaparinso pochin noyápiachin ninin. Nasha Quirosarin itopisoꞌ.