Daniel 9:15 - Chayahuita (Shahui)

¹⁵ Quëmaso Sinioro Yosënëhuëinquën. Chiníquën nanantaton piyapinënpitacoi Iquipito quëran ocoirancoi. Inapotatoncoi sacóshin nahuinan. Quiyaso napoaponahuëꞌ, co noyahuëꞌ nicatoi oshahuanai.

Daniel 9:15 ပူးပေါင်းရင်းမြစ်များ

1 Reyes 8:51

Israiroꞌsasoꞌ, quëma piyapinënpita. Quëmari huaꞌanëntëran. Shimashonënpita Iquipitoquë aparisitápirinahuëꞌ, ocoiran. Huaꞌna asoquipiso ornoquë pochin parisitapirinahuëꞌ, napotëran.

Nehemías 1:10

Quiyasoꞌ quëma piyapinënpitacoi. Chini chiníquën nanantaton Iquipito quëran ocoirancoi.

Nehemías 1:6

Onpopionta Sinioro nontëranquënsoꞌ natanco. Israiroꞌsacoisoꞌ, quëma piyapinënpitacoi. Inapita marëꞌ tahuëri tashirë chachin nontaranquën. Tëhuënchachin quiyasoꞌ co natëtëinquënhuëꞌ, oshahuanai. Cantaꞌ, quëmopinëhuëpitaroꞌco chachin oshahuanahuë.

Nehemías 9:10

Iquipito copirnonta anaꞌintaton, nani maꞌsha paꞌpi huëhuëpiroꞌ nininsopita aꞌnotëran. Piyapinënpitarë chachin anaꞌintaton, napotëran. Israiroꞌsa co quëꞌyatonaraihuëꞌ aparisitapi niꞌton, anaꞌintaton, napotëran. Inapoaton iporasoꞌ, sacóshin nahuinan.

Éxodo 32:11

Moisësëso napoaponahuëꞌ, noyasha nontaton Sinioro itapon: —Ama Sinioro napotëquësohuëꞌ, chiníquën nanantaton nani Iquipito quëran israiroꞌsa ocoiran.

Éxodo 6:1

Moisësëri napotohuachina, Yosëso tapon: —Tëhuënchachin Iquipito copirno anaꞌintomiatërahuësoꞌ, niꞌsaran. Naporo co ahuantatonhuëꞌ: “¡Manóton pipico huachi!” itaponquëmaꞌ, itërin.

Éxodo 6:6

Napoaton piyapinëhuëpita iso pochin shaꞌhuitëquëꞌ: “Caso Sinioroco. Carinquëma Iquipito quëran ocoiaranquëmaꞌ. Iporasoꞌ chiníquën asacatopirënënquëmahuëꞌ, carinquëma chiníquën nanantato nichaꞌësaranquëmaꞌ. Chiníquën aparisitërinënquëma niꞌton, carinta noꞌtëquën iꞌhuërëtarahuë. Ocoirahuatënquëmaꞌ, piyapinëhuëpita pochin niꞌsaranquëmaꞌ. Canpitantaꞌ, casáchin chinotaramaco. Iporasoꞌ iquipitoroꞌsa chiníquën asacatatënquëma aparisitapirinënquëmahuëꞌ, ocoiaranquëmaꞌ. Ocoihuatënquëmaꞌ, Sinioroco ninahuësoꞌ nitotarama huachi. Iráca nani Apraan shaꞌhuitërahuë noꞌpaꞌ quëtaꞌhuasoꞌ. Isaco, Cacopo, inapitanta inachachin shaꞌhuitërahuë. Inaquë quëparahuatënquëma ina noꞌpa chachin ahuaꞌanëntaranquëmaꞌ. Caso Sinioroco, tënin,” itëquëꞌ, itërin.

Éxodo 9:16

Napoaponahuëꞌ, quëmaso ca nohuanto nanpiaran. Nani acoranquën chiníquën nanantërahuësoꞌ, aꞌnotaꞌhuanquënso marëꞌ. Anaꞌintëranquënsoꞌ nitotohuachinaꞌ, yaꞌipi parti nahuinarahuë huachi.

Isaías 55:13

Sarsaroꞌsa yaꞌhuërënamën, pino nararoꞌsa aꞌshinapon. Ihuatatëroꞌsa yaꞌhuërënamën, arayan nararoꞌsa aꞌshinapon. Inapohuato: ‘¡Ma noyacha Sinioroso paya!’ tëcaponaꞌ. Ina pochin acorahuësoꞌ, yaꞌhuëmiatapon. Co incari tëranta ataꞌhuantaponhuëꞌ,” tënin Sinioro.

Isaías 64:4

Quëmasoꞌ, ninarinënquënsopita catahuacaso marëꞌ nani maꞌsha ninan. Ina pochin aꞌnanta nininsoꞌ, co onporonta natanchinpihuëꞌ. Co niꞌchinpihuëꞌ.

Jeremías 14:20

Tëhuënchachin Sinioro co noyahuëꞌ ninai. Shimashonëhuëipitantaꞌ, co noyahuëꞌ nipi. Inapoatoi oshahuanai.

Daniel 9:5

Tëhuënchachin quiyasoꞌ co noyahuëꞌ nicatoi oshahuanai. Co costaransohuëꞌ ninai. Co quëma yaꞌhuëransohuë pochin cancantatoi yaꞌhuërai. Camaitëransopita, shaꞌhuiransopita, inapita aꞌporai.

Lucas 15:21

‘Co noyahuëꞌ ninahuë, tata. Nonpintëranquën. Co Yosë natëtohuëꞌ, oshahuanahuë. Co noyahuëꞌ ninahuëso marëꞌ co huachi huiꞌnan pochin cancantancosoꞌ yaꞌhuërinhuëꞌ,’ itërin paꞌpin.

Lucas 18:13

Aꞌnaso nipirinhuëꞌ co yaꞌcaritërinhuëꞌ. Tapanaton, monshoárin. Oshanën marëꞌ sëtërin. ‘Tata Yosë, casoꞌ oshahuanco. Nosoroatonco, oshanëhuë inquitoco,’ itërin.

2 Corintios 1:10

Piꞌpishachin shichiminpiraihuëꞌ, Yosë naꞌcon catahuarincoi niꞌton, chaꞌërai. Nani tahuëri niꞌsárincoi. “Co onporontaꞌ naniantarincoihuëꞌ. Aꞌna tahuëri parisitaantapiraihuëꞌ, nichaꞌësarincoi,” taꞌtoi noya cancantërai.