Daniel 7:15 - Chayahuita (Shahui)

^15-17 Yaꞌipi inapita niꞌsahuato, paꞌpi paꞌyanahuë. Co napion ancantato, aꞌnara inaquë huaniárinsoꞌ, paaparahuë: ‘Yaꞌipi niꞌnahuësopita ¿maꞌta tapon naporin? Shaꞌhuitoco canta nitochi topirahuë,’ itërahuë. Napotohuatora: ‘Catapini maꞌsharoꞌsa pochin niꞌnansopitasoꞌ, catapini copirnoroꞌsa tapon naporin. Inapitasoꞌ huaꞌanëntohuachinaꞌ, yaꞌipiroꞌpaꞌ huaꞌanëntaponaꞌ.

Daniel 7:15 ပူးပေါင်းရင်းမြစ်များ

Génesis 41:8

Tashiramiachin huaraonsoꞌ huaꞌnarinso yonquiaton, co napion cancantërin. Napoaton piyapinënpita camairin yaꞌipi Iquipito noꞌpaquë ninotonaꞌpiroꞌsa huëcacaiso marëꞌ. Quirica nitotoroꞌsanta amatërin. Inapita huëꞌpachinara, huaꞌnarinsoꞌ shaꞌhuitërin. Shaꞌhuitopirinhuëꞌ, co incari tëranta nanitërinhuëꞌ maꞌsona tapon huaꞌnarinso shaꞌhuitacaisoꞌ.

Daniel 2:1

Napocotono paꞌpin yaꞌhuërënamën Copirno yaꞌconinsoꞌ, nani cato piꞌipitarin. Naporoꞌ inaso nisha nisha huaꞌnaton, paꞌyanin. Ina yonquirápaton co huachi huëꞌëcaso nanitërinhuëꞌ.

Daniel 4:19

Shaꞌhuitohuatora, Naniriso paꞌyanin. Paꞌyanaton, huaꞌquimiachin tachianantërin. Napopirinhuëꞌ: “Ama huaꞌnarahuëso marëꞌ paꞌyanquësohuëꞌ. Maꞌsona tapon naporinso marëꞌ tëranta co paꞌyanacaso yaꞌhuërinhuëꞌ,” itërahuë. Napotohuatora: “¡Maꞌhuantacha sinioro copirno nisaran paya! maꞌsona tapon huaꞌnaransoꞌ, inimiconënpita marëꞌ huaꞌnaran naporini, ¡noya noya niitonhuëꞌ!

Daniel 7:1

Pirsasaro copirno Papironiaquë nani aꞌna piꞌira huaꞌanëntarin. Naporoꞌ Nanirisoꞌ, aꞌna tashi huëꞌërinquë huaꞌnarin. Capayatahuaton noya noya nininsopita huaꞌnarinsoꞌ, ninshitërin.

Daniel 7:28

Isëquë huarëꞌ shaꞌhuitëranquëmasoꞌ nanirin. Caso ina yonquiato co napion cancantërahuë. Naporahuato caniaꞌpi ninatanahuë. Napoaporahuëꞌ, co inso tëranta huaꞌnarahuëso shaꞌhuitërahuëꞌ.”

Habacuc 3:16

Inapita natanato paꞌyanëhuëquë shaꞌpianantërahuë. Paꞌhuëhuëntaꞌ, yamo yamóshin ninatanahuë. Yaꞌipi nonëhuëntaꞌ, co chinirinhuëꞌ ninatanahuë. Inapopirahuë mini: “Ipora ahuërarinacosopita sontaroꞌsasoꞌ, Siniorori iꞌhuërëtaton aꞌpayanarin. Tahuërinën nanihuachin, napotarin,” taꞌto sano cancantërahuë.

2 Pedro 1:14

Co huaꞌquiya quëranhuëꞌ chiminarahuë. Sinioro Quisocristo nani anitotërinco.