Daniel 4:34 - Chayahuita (Shahui)

³⁴ Noyataꞌhuaso tahuëri nanihuachina, ca Napocotonoco inápaquë nëꞌpëtërahuë. Naporo chachin huaꞌyantërahuësoꞌ, noyatërahuë ninatanahuë. Noyatahuato: “Yosparinquën Sinioro,” itërahuë. Inaso yaꞌhuëmiatërin niꞌton, chinotërahuë: “Quëmasoꞌ Sinioro chiníquën nanantëran. Naporansoꞌ, inachachin nisápon. Shihuëipita onpo huënton ocoipirinahuë tërantaꞌ, quëmasoꞌ huaꞌanëntápon.

Daniel 4:34 ပူးပေါင်းရင်းမြစ်များ

2 Samuel 22:31

Quëmaso Sinioro ninansopita, noyasáchin ninin. Co manta tëhuëranhuëꞌ. Catahuancoiso shaꞌhuitërancoisopitasoꞌ, natëpiro ninin. Sontaroꞌsa iscotonëni paꞌpoyarin. Inapochachin quëmanta natërinënquënsopita paꞌpoyaquëꞌ.

Copo naporinso' 1:21

—Ipora huaꞌhuatapo, co manta yaꞌhuëtërincohuëꞌ. Chiminpatontaꞌ, co manta quëpapohuëꞌ. Sinioro nohuanton maꞌsha yaꞌhuëtopirincohuëꞌ, ina nohuanton capa niantarin. ¡Ma noyacha Sinioroso paya! tënin.

Salmos 107:15

Siniorosoꞌ nosoromiatërinpoa niꞌton, nani maꞌsha onporëhuaquë paꞌyápiro ninin. Inapoaton catahuarinpoaꞌ. Ina marëꞌ, “Yosparinquën Sinioro,” itahuaꞌ.

Salmos 107:22

“Ma noyacha Siniorosoꞌ nosororinpoa paya,” taꞌtëhua ina chinotahuaꞌ. Noya ancantatëhuaꞌ, nani maꞌsha naporinso shaꞌhuiahuaꞌ.

Salmos 107:31

Siniorosoꞌ nosoromiatërinpoa niꞌton, nani maꞌsha onporëhuaquë paꞌyápiro ninin. Inapoaton catahuarinpoaꞌ. Ina marëꞌ, “Yosparinquën Sinioro,” itahuaꞌ.

Salmos 107:8

Sinioroso nosoromiatërinpoa niꞌton, nani maꞌsha onporëhuaquë paꞌyápiro ninin. Inapoaton catahuarinpoaꞌ. Ina marëꞌ, “Yosparinquën Sinioro,” itahuaꞌ.

Salmos 121:1

Motopiroꞌsa nëꞌpërahuato naporahuë: “¿Incha iporasoꞌ catahuaincoso marëꞌ huëꞌnëpoya?” tënahuë.

Salmos 145:13

Quëma huaꞌanëntërancoisosoꞌ, yaꞌhuëmiatarin. Co onporonta quëmasoꞌ huaꞌan quëran pipiaranhuëꞌ.

Salmos 66:7

Inasoꞌ, chiníquën nanantaton huaꞌanëntomiatarin. Yaꞌipi nacionoꞌsa aꞌpaiarin. Ama co natantochináchinhuëꞌ cancantopisopitari yaꞌhuërëtacaiso marëhuëꞌ, aꞌpaiarin.

Daniel 2:44

Ina copirnoroꞌsa huaꞌanëntasoiꞌ, Yosë inápaquë yaꞌhuërinso huaꞌanëntarin. Ina huaꞌanëntërinsoꞌ, co onporonta taꞌhuantarinhuëꞌ. Co aꞌnapita nacionoꞌsari minsëarinhuëꞌ. Aꞌnapita huaꞌanëntopisoꞌ, yaꞌipi ataꞌhuantapon. Yaꞌhuërëꞌ ina huaꞌanëntërinsosoꞌ, yaꞌhuëmiatapon.

Daniel 4:2

Yosë chini chiníquën nanantaton napotërincosoꞌ, canpitanta shaꞌhuichinquëmaꞌ. Ina nitotohuatamaꞌ canpitanta catahuaponquëma niꞌton, shaꞌhuitaranquëmaꞌ: ¡Maꞌpitacha inaso ninin paya! Co piyapinpoa nanitaparëhuasohuëꞌ, inaso ninin. Ina huaꞌanëntërinsosoꞌ, yaꞌhuëmiatapon. Onpo shinpoapita huënton yaꞌhuëpirinhuë tërantaꞌ, ina chiníquën nanantërinsosoꞌ, inachachin nisápon.

Daniel 4:26

Motën, itën, inapita inaquëranchin quëparitacaisosoꞌ, naquëranchin huaꞌanëntamaso tapon naporin. ‘Yosëso yaꞌipi isoroꞌpanta huaꞌanëntërin,’ topatan, naquëranchin huaꞌanëntaantaran.

Daniel 4:32

Piyapiroꞌsa yaꞌhuërin quëran ocoiaponën. Inapotohuachinën, maꞌsharoꞌsapitarëꞌquën yaꞌhuapon. Tororoꞌsa pochin canchisë piꞌipi pasto capon. ‘Yosëso chini chiníquën nanantaton yaꞌipi isoroꞌpaquë nacionoꞌsanta huaꞌanëntërin. Ina nohuanton insosona nohuantërinsoꞌ, copirno nicacaso marëꞌ acorin,’ tëcama huarëꞌ ina pochin nisaran,” itërin natanin.

Daniel 4:36

Naporo chachin noya yonquiantarahuë. Yaꞌipi huaꞌanëntërahuëso huaꞌanëntaantarahuë. Naporahuaton noya nicatonaco piyapinëhuëpita natëantarinaco. Ayonquirinacosopita, chiníquën nanantopisopita huaꞌanoꞌsa acorahuësoꞌ, inapita huëcapairahuatonaco, yoniantarinaco. Naquëranchin copirno yaꞌcoantarahuato, iráca chiníquën nanantërahuë quëran, chini chiníquën nanantaantarahuë.

Daniel 5:18

Yosë chini chiníquën nanantërinsoari, iráca tata Napocotono copirno nicacaso marëꞌ acorin. Inari chiníquën nanan quëtërin niꞌton, noya noya huaꞌanëntërin. Ina marëꞌ naní quëran noya nicatona tëꞌhuatopi.

Daniel 5:21

Co huachi nanitërinhuëꞌ piyapiꞌsa huáncana yaꞌhuëcasoꞌ. Napoaton ocoihuachinara, tanan moraroꞌsarëꞌ yaꞌhuërin. Tororoꞌsa pochin pasto caꞌnin. Poroncayori shipitárin. Naporin. “Yosëso chini chiníquën nanantaton yaꞌipi isoroꞌpaquë nacionoꞌsantaꞌ, huaꞌanëntërin. Ina nohuanton insosona nohuantërinsoꞌ copirno nicacaso marëꞌ acorin,” tëcaquë huarëꞌ noyatërin.

Daniel 6:26

Yaꞌipi huaꞌanëntërahuëso noꞌpaquë, Naniriri chinotërinso Yosë tëꞌhuatatomaꞌ, nóya niꞌcoꞌ. Inasáchin Yosë yaꞌhuëmiatërinsoꞌ. Huaꞌanëntërinsoꞌ, co onporonta taꞌhuantaponhuëꞌ. Chiníquën nanantërinsontaꞌ, co nitiquiaponhuëꞌ.

Daniel 7:14

Inapotohuachinara, yaꞌipi noya noya huaꞌanëntacaso marëꞌ Ansianori chini chiníquën nanan quëtërin. Inapotohuachina, yaꞌipi nacionoꞌsaquë yaꞌhuëpisopitari, nisha nisha nananquë nonpisopitari ina chinotapi. Chiníquën nanantërinsoꞌ, co onporonta nishataponhuëꞌ. Huaꞌanëntërinsontaꞌ, co onporo taꞌhuantaponhuëꞌ.

Daniel 9:14

Quëmaso Sinioro Yosënëhuëinquën niꞌton, noya coisë pochin ninan. Napoaton poꞌpin parisiaꞌhuaiso aꞌpatiirancoi. Quëmasoꞌ noyasáchin nipiranhuëꞌ, quiyaso co yanatërainquënhuëꞌ.

Jonás 1:14

Napohuachina, Sinioro nontopi huachi: “Sinioro. Quëmaso nohuantëransoráchin ninan. Iso quëmapi naꞌinin quëran poꞌsarai nipachina, ama yaꞌipicoi taquiitaꞌhuaiso nohuantëquësohuëꞌ. Yaꞌhuërëꞌ inaso co manta tëhuëpirinhuëꞌ tëꞌyaitohuatoi, chimanapon. Napohuachin, ama ina naꞌinchincoisohuëꞌ,” itopi.

Lucas 18:13

Aꞌnaso nipirinhuëꞌ co yaꞌcaritërinhuëꞌ. Tapanaton, monshoárin. Oshanën marëꞌ sëtërin. ‘Tata Yosë, casoꞌ oshahuanco. Nosoroatonco, oshanëhuë inquitoco,’ itërin.

Juan 5:26

Tata Yosë inaora nohuanton, nanpirin. Inari piyapiꞌsaꞌ nanpicasoꞌ quëtërin. Inapochachin cantaꞌ ina nohuanton, nanpirahuë. Naporahuaton, aꞌnapitantaꞌ ananpitaꞌhuasoꞌ nanitaparahuë.

Deuteronomio 32:4

Inasoꞌ, nóya paꞌpoyarinpoaꞌ. Maꞌsha nipachina, co tëhuërinhuëꞌ. Noꞌtëquënáchin nicaton nóya ninin. Inasoꞌ Yosë, noꞌtëquënáchin nonin. Topinansoꞌ co onporonta piyapi maꞌsha onpotërinhuëꞌ. Noꞌtëquënáchin ninin. Inaíchin Yosësoꞌ.

1 Timoteo 1:17

Napoaton Yosëíchin natëahuaꞌ. Nani tahuëriya: “¡Ma noyacha Yosëso paya!” itahuaꞌ. Inasoꞌ co onporontaꞌ taꞌhuantaponhuëꞌ. Co quënanpirëhuahuëꞌ, huaꞌanëntomiatërinpoaꞌ. Inaíchin chinotacasoꞌ yaꞌhuërin. Ama onporontaꞌ ina naniantahuasohuëꞌ. Amen.

1 Timoteo 6:16

Inasáchin co taꞌhuantarinhuëꞌ. Nanpirápon inasoꞌ. Noya noya niꞌton, huënaráchin pochin yaꞌnorin. Co yaꞌcarichinachinhuëꞌ. Iráca quëran huarëꞌ co insontaꞌ Yosë quënaninhuëꞌ. Ipora huantaꞌ co quënanarihuarahuëꞌ, yaꞌipi piyapiꞌsari chinochinaꞌ. Yaꞌipiya nanitaparin. Amen.

Apocalipsis 10:6

“Yosë niꞌsárinco niꞌton, co nonpinahuëꞌ. Inasoꞌ iráca quëran huarëꞌ yaꞌhuaton, co onporontaꞌ ayaponhuëꞌ. Isoroꞌpaꞌ, marë, piꞌiroꞌtëꞌ, yaꞌipi yaꞌhuërinsopita inari ninin. Tëhuënchachin co huachi huaꞌqui quëranhuëꞌ anaꞌintomiatarin.

Apocalipsis 11:15

Ina quëran yaꞌnatontarinsoꞌ anquënintaꞌ, pihuiantarin. Pihuihuachina, inápaquë chiníquën nonsapi, natanahuë. “Iráca quëra huarëꞌ naꞌa copirnoroꞌsaꞌ yaꞌhuëpirinahuëꞌ, iporasoꞌ Yosëri yaꞌipiya huaꞌanëntarin. Quisocristorë chachin huaꞌanëntomiatarin. Co onporontaꞌ pipiapihuëꞌ,” tosapi.

Apocalipsis 4:10

ansianoꞌsantaꞌ Yosë yonquiapi. “Tëhuënchachin huaꞌanëntërinpoaꞌ. Co onporontaꞌ chimianinhuëꞌ,” taꞌtonaꞌ, cato shonca catapini chachin isonahuatonaꞌ, chinotapi: “Quëmasáchin nóyanquën,” itatonaꞌ, Yosëri ayancotërinsoꞌ, shiranën notënanquë acoantapi. Chinotatonaꞌ, itaponaꞌ:

Apocalipsis 4:9

Apira apira chinotapi. “¡Ma noyacha Yosëso paya! Yaꞌipi piyapiꞌsari chinochinaꞌ. Naꞌcon catahuarinpoaꞌ niꞌton, ‘Yosparinquën Sinioro,’ itahuaꞌ. Inasoꞌ huaꞌanëntomiatarinpoaꞌ. Co onporontaꞌ taꞌhuantarinhuëꞌ,” topachinara,