Daniel 3:28 - Chayahuita (Shahui)

²⁸ Naporoꞌ copirnosoꞌ: “¡Ma noyacha Yosëso paya! Inasoꞌ, Satraco, Misaco, Api-nico, inapitari chinotërin. Inapita nichaꞌëcaso marëꞌ anquëninën aꞌpaimarin. Inapitasoꞌ Yosëíchin cancantopi niꞌton, co nohuantopihuëꞌ aꞌna yosë isonahuatona moshacaisoꞌ. Napoaton co chimirin tëranta tëꞌhuatatonaraihuëꞌ, ¡ca copirnoco nisapirahuëꞌ, co natërinacohuëꞌ!

Daniel 3:28 ပူးပေါင်းရင်းမြစ်များ

Génesis 9:26

Ina quëran taantarin: “Siniorosoꞌ, Yosënëhuë. Inari Simo noya nicaton noya yaꞌhuëcaso marëꞌ catahuain. Canaansoꞌ, Simo piyapinën niin.

Esdras 1:3

Napoaton Sinioro piyapinënquëma nipatamaꞌ, pacoꞌ. Paatoma ina chinotacaso pëiꞌ, Quirosarinquë nicontacoꞌ. Siniorosoꞌ Yosënëma niꞌton, catahuarinquëma pëinën nitamasoꞌ. Inasoꞌ Yosë, Quirosarinquë yaꞌhuërin.

Esdras 6:11

Isontaꞌ, camaitërahuëso natëcoꞌ: Insosona iso camaitërahuësopita co natëtohuachinahuëꞌ, anaꞌintocoꞌ. Pëinënquë huica yaꞌhuërinso pishointocoꞌ. Inapotahuatoma ahuanicoꞌ. Ina ahuaniramaquë, inapa quëran pitacoꞌ. Inapotohuatamaꞌ, yaꞌhuarataton chiminapon. Naporahuatoma pëinëonta ohuatoco yamoraꞌin.

Salmos 103:20

Anquëniroꞌsanquëmanta chiníquën nanantapomarahuëꞌ, Sinioro chinotocoꞌ. Canpitaso ina camaihuachinquëma aꞌnaroáchin natëramaꞌ.

Salmos 33:18

Sinioro chinotopisopitaso nipirinhuëꞌ, inari aꞌpaimiatarin. Noya nicatona natëpisopitasoꞌ, inapotarin.

Salmos 33:21

Ina yonquiatoi capa cancantërai. “Inasoꞌ, noyasáchin nicaton catahuararincoi,” taꞌtoi naporai.

Salmos 34:22

Piyapinënpitasoꞌ, Siniorori nichaꞌësarin. ¡Inasáchin chinotopisopitasoꞌ, co onporonta anaꞌintacaso yaꞌhuëaponhuëꞌ!

Éxodo 20:5

Ama monshorahuatoma inapita moshacosohuëꞌ. Ama piꞌpian tëranta chinotocosohuëꞌ. Casáchin Sinioroco niꞌto, aꞌpitëranquëmaꞌ. Co natëhuatamacohuëꞌ, anaꞌintaranquëma huachi. Huiꞌnamapita, shiparimapita, huiꞌnama shinpitaquë huarëꞌ anaꞌintarahuë.

Isaías 50:10

(-)

Daniel 2:47

Ina quëran Naniri itapon: —Canpita Yosë chinotëramasosoꞌ, yaꞌipi yosëroꞌsa quëran chini chiníquën nanantërin. Yaꞌipi copirnoroꞌsa huaꞌanëntërin. Inasáchin co nitotacasohuëꞌ nininsonta anitotërin. Napoaton huaꞌnarahuëso anitotatënquën, maꞌsona tapon naporinsontaꞌ, anitotërinquën, itërin.

Daniel 3:25

—Napoaponahuëꞌ, caso catapini yaꞌpi pënquë co tonpopinanhuëꞌ, ¡noya paꞌsapi niꞌnahuë! Aꞌnaso nipirinhuëꞌ, Yosë anquëninën pochin niꞌnahuë, tënin.

Daniel 4:34

Noyataꞌhuaso tahuëri nanihuachina, ca Napocotonoco inápaquë nëꞌpëtërahuë. Naporo chachin huaꞌyantërahuësoꞌ, noyatërahuë ninatanahuë. Noyatahuato: “Yosparinquën Sinioro,” itërahuë. Inaso yaꞌhuëmiatërin niꞌton, chinotërahuë: “Quëmasoꞌ Sinioro chiníquën nanantëran. Naporansoꞌ, inachachin nisápon. Shihuëipita onpo huënton ocoipirinahuë tërantaꞌ, quëmasoꞌ huaꞌanëntápon.

Daniel 6:16

Napotohuachinara, camaitërin: “Naniri quëcatomaꞌ, paꞌpiniꞌ yaꞌhuërinquë tëꞌyatocoꞌ,” tënin. Coꞌhuara tëꞌyachátërasoihuëꞌ: —Quëmaso Naniri, Sinioroíchin cancantaton natëran. Ina nichaꞌëinquën, itërin.

Daniel 6:26

Yaꞌipi huaꞌanëntërahuëso noꞌpaquë, Naniriri chinotërinso Yosë tëꞌhuatatomaꞌ, nóya niꞌcoꞌ. Inasáchin Yosë yaꞌhuëmiatërinsoꞌ. Huaꞌanëntërinsoꞌ, co onporonta taꞌhuantaponhuëꞌ. Chiníquën nanantërinsontaꞌ, co nitiquiaponhuëꞌ.

Mateo 4:10

—Inca co nohuantërahuëꞌ. Quëmasoꞌ sopai huaꞌanquën. Patoco huachi. Yosë quiricanën quëran shaꞌhuitërinpoaꞌ: “Sinioroíchin chinotëquëꞌ. Inasáchin natëcasoꞌ yaꞌhuërin,” tënin, itërin Quisosori.

Hechos 4:19

Napotopirinahuëꞌ, Pitro Coansharë chachin co yanatëtopihuëꞌ. —Yosë natëtoi, co nanitëraihuëꞌ canpita natëcaꞌhuainquëmasoꞌ. Co quiyasoꞌ nanitëraihuëꞌ taꞌtahuaisoꞌ. Niꞌnaisoꞌ shaꞌhuirápoi. Natanaisontaꞌ shaꞌhuirápoi. “Co Yosë natëcasoꞌ yaꞌhuërinhuëꞌ,” ¿tënamaꞌ ti? itopi.

Hechos 5:19

Yono tashiꞌ Sinioro anquëninën huëꞌsahuaton, yaꞌcoana iꞌsoatiirin. Caꞌtanoꞌsaꞌ aipiran quëparahuaton, shaꞌhuitërin:

Romanos 12:1

Yosë naꞌcon nosororinpoaꞌ niꞌton, yaꞌipi cancanëma quëran, iyaroꞌsaꞌ, ina imacoꞌ. Iráca Yosë chinotohuachinara, maꞌsha tëpapi. Canpitaso nipirinhuëꞌ Yosë marëꞌ nanpitomaꞌ, nohuantërinsoráchin nicoꞌ. Ina yonquiatomaꞌ, nani tahuëri noyasáchin nicoꞌ. Ina Yosë nohuantërin. Inapohuatamaꞌ, Yosë noya chinotaramaꞌ.

1 Corintios 13:3

Yaꞌipi maꞌshanënpoaꞌ saꞌahuaroꞌsaꞌ quëtopirëhuahuëꞌ, co tëhuënchachin nosorohuatëhuahuëꞌ, topinan quëran quëtarihuaꞌ. “Pën quëran yatëpapirinacohuëntaꞌ, imamiatarahuë,” tarihuarahuëꞌ, co piyapiꞌsaꞌ nosorohuatëhuahuëꞌ, co mantaꞌ Yosëꞌpaꞌ canarihuahuëꞌ.

Filipenses 1:20

Co nohuantërahuëꞌ piꞌpian tërantaꞌ Yosë naniantaꞌhuasoꞌ. Inasoꞌ noyasáchin yonquirinpoaꞌ niꞌton, co atapanarincohuëꞌ, tënahuë. Coisë ocoiaponco nimara. Tëpaponco nimara. Co ina nitotërahuëꞌ. Co ina yonquirahuëꞌ. Ocoihuachinco, chiníquën cancantato, aꞌchiantarahuë aꞌnapitantaꞌ imacaiso marëꞌ. Tëpahuachinaco, piyapiꞌsaꞌ nicatonaco, naꞌcon naꞌcon Quisocristo yonquiaponaꞌ, tënahuë. Quisocristo natëcaꞌhuasoráchin yonquirahuë.

Hebreos 1:14

Inapitasoꞌ inpriatonënpita pochin niꞌton, Yosëri camairin. Aꞌpaimarin imarëhuasopita catahuainpoaso marëꞌ. Yosë chachin nichaꞌësarinpoaꞌ. Nani ina nitotëramaꞌ.

Hebreos 11:37

Aꞌnaquëontaꞌ naꞌpiquë tëꞌyaratonaꞌ, tëpapi. Aꞌnaquëontaꞌ sërichoquë yatonatonaꞌ, tëpapi. “Yosë aꞌpocoꞌ, tëpachinënquëmaꞌ,” itopirinahuëꞌ, co yaaꞌpopihuëꞌ. Aꞌnaquëontaꞌ sahuëni quëran tëpapi. Aꞌnaquën co tëpapirinahuëꞌ, imapiso marëꞌ chiníquën aparisitopi. Yatëpahuachinara, taꞌapi. Co huachi yaꞌhuëmia yaꞌhuëpihuëꞌ. Capa aꞌmocaisoꞌ niꞌton, ohuica shaꞌhuëtëꞌ, chipo shaꞌhuëtëꞌ inapita aꞌmopi. Co mantaꞌ yaꞌhuëtopihuëꞌ. Chiníquën parisitopi.

1 Pedro 1:21

Quisocristo anoyacancantërinquëmaꞌ niꞌton, Yosë nohuitatomaꞌ, natëramaꞌ: “Tëhuënchachin catahuarinpoaꞌ,” tënamaꞌ. Quisocristo chiminaponahuëꞌ, Yosëri ananpitaantarin. Inápaquë quëpantarahuaton, chiníquën nanan quëtërin. Napoaton Yosëíchin imaramaꞌ. “Canpoantaꞌ ananpitaantarinpoaꞌ,” taꞌtomaꞌ, ninaramaꞌ.

Apocalipsis 12:11

Carniroaꞌhua chiminaton, huënainën quëran anoyacancantërinpoaꞌ niꞌton, sopai minsërëhuaꞌ. Nanamën shaꞌhuitatëhuaꞌ, minsërëhuaꞌ. Yatëpapirinënpoahuëntaꞌ, co aꞌporëhuahuëꞌ, tosapi.