Daniel 2:47 - Chayahuita (Shahui)

⁴⁷ Ina quëran Naniri itapon: —Canpita Yosë chinotëramasosoꞌ, yaꞌipi yosëroꞌsa quëran chini chiníquën nanantërin. Yaꞌipi copirnoroꞌsa huaꞌanëntërin. Inasáchin co nitotacasohuëꞌ nininsonta anitotërin. Napoaton huaꞌnarahuëso anitotatënquën, maꞌsona tapon naporinsontaꞌ, anitotërinquën, itërin.

Daniel 2:47 ပူးပေါင်းရင်းမြစ်များ

Génesis 41:39

Piyapinënpita napotahuaton, Cosi itapon: —Co aꞌna quëmapi quëmá quëran yonqui yonquínahuan niꞌton, noya noya nitotërinso yaꞌhuërinhuëꞌ. Yosë chachin yaꞌipi inapita anitotërinquën. Napoaton carinquën acoaranquën pëinëhuëquë, yaꞌhuërënamëhuë camaitacaso marëꞌ. Yaꞌipi piyapinëhuëpitanta natëinënquënso yaꞌhuërin. Copirnoco niꞌto, casáchin quëmá quëran chini chiníquën nanantarahuë.

2 Reyes 5:15

Nani noyatohuachina yaꞌipi caꞌtaninsopitarë chachin Irisio nicapona panantapi. Cantonahuaton: —Yaꞌipi isoroꞌpaquë nisha nisha mamanshi moshapirinahuëꞌ, co inapitaso Yosëhuëꞌ. Isëquësáchin Yosëso yaꞌhuërin tënahuë. Ina nitotato, quëshiranquënsopita maquë topirahuë, itërin.

Salmos 72:11

Yaꞌipi copirnoroꞌsa ina notënanquë isoinaꞌ. Yaꞌipi nacionoꞌsaquë yaꞌhuëpisopitari natëinaꞌ.

Salmos 96:4

Yosëso chini chiníquën nanantërin. Inasáchin chinotacaso yaꞌhuërin. Mamanshiroꞌsasoꞌ topinan quëran tëꞌhuatopi. Yosë tëhuënchinsoꞌ tëꞌhuatacaso yaꞌhuërin.

Daniel 2:19

Naporo tashi Siniorori huaꞌnarëso pochin yaꞌnotahuaton, yaꞌipi anitotërin. Napoaton “Yosparinquën,” itaton, iso pochin Yosë nontërin: “¡Ma noyanquëncha quëmaso Sinioro paya! Quëmasáchin yaꞌipi piyapiꞌsa chinochinën. Yaꞌipi nitotëran. Yaꞌipi nanitaparan.

Daniel 2:22

Aꞌnaquën maꞌsha, co nitotochináchinhuëꞌ. Napoaponahuë quëmari anitotohuatana, nitotopi huachi. Quëmaso tahuëri pochin ninan niꞌton, co tashinanquë tëranta naꞌpitarinënhuëꞌ.

Daniel 2:30

Ina canta anitotërinco. Co aꞌnapita piyapiꞌsa quëran naꞌcon naꞌcon nitotërahuëso marëꞌ anitotërincohuëꞌ. Maꞌsona tapon huaꞌnaranso anitotaꞌhuanquënso marëꞌ anitotërinco. Shaꞌhuitohuatënquën quëmanta quëhuënaton yonquiráransoꞌ, noꞌtëquën nitotaran huachi.

Daniel 2:37

Quëma sinioro copirno yaꞌipi copirnoroꞌsa quëran chini chiníquën nanantëran. Yosë inápaquë huaꞌanëntërinso nanan quëtërinquën niꞌton, yaꞌipi huaꞌanëntëran. Ina nohuanton chiníquën nanantëran. Ina nohuanton chachin yaꞌipiya quëran noya nicatënën natërinën.

Daniel 3:15

Iporaso nipirinhuëꞌ, moshacamaso yaꞌhuërin. Mosica piꞌnirahuachinaꞌ, mamanshi anitërahuësoꞌ isonama quëran noꞌpaquë huarëꞌ monshorahuatomaꞌ, moshaaramaꞌ. Coꞌsoꞌ inapohuatamahuëꞌ, naporo chachin orno huënaratapaquë tëꞌyatarinënquëmaꞌ. Inapotohuachinquëmaꞌ, ¡co inso yosë tërantaꞌ, nichaꞌëinquëmaso nanitaponhuëꞌ! itërin.

Daniel 3:28

Naporoꞌ copirnosoꞌ: “¡Ma noyacha Yosëso paya! Inasoꞌ, Satraco, Misaco, Api-nico, inapitari chinotërin. Inapita nichaꞌëcaso marëꞌ anquëninën aꞌpaimarin. Inapitasoꞌ Yosëíchin cancantopi niꞌton, co nohuantopihuëꞌ aꞌna yosë isonahuatona moshacaisoꞌ. Napoaton co chimirin tëranta tëꞌhuatatonaraihuëꞌ, ¡ca copirnoco nisapirahuëꞌ, co natërinacohuëꞌ!

Daniel 3:29

Napoaton inso tëranta isopita huiꞌnapiꞌsa Yosë chinotopiso pinopachin, tëpaꞌinaꞌ. Inapotahuatona yaquiꞌinaꞌ. Pëinëonta amoro tëꞌyatacaiso marëꞌ yaꞌhuëapon. Intohuasona yaꞌhuëpirinahuë tërantaꞌ, inapochinaꞌ. Ma nananquësona nonpachinantaꞌ, inapotacaiso yaꞌhuërin. Co aꞌna yosë ina pochin nichaꞌëcaso nanitërinhuëꞌ niꞌton, inapochinaꞌ,” tënin.

Daniel 4:17

Ina pochin aꞌpaito anquëniroꞌsa camaitopi. Yosëso chini chiníquën nanantaton, isoroꞌpaquënta huaꞌanëntërin. Ina yaꞌipiya quëran nitotacaiso marëꞌ napoarin. Ina nohuanton copirnoroꞌsanta huaꞌanëntopi. Insosona nohuantërinsoꞌ copirno nicacaso marëꞌ acorin. Sano sano piyapi nininsoꞌ, aꞌna nacion camaicaso marëꞌ acorin,’ tënin.

Daniel 4:25

Quëmasoꞌ copirnonquën nipiranhuëꞌ, piyapiroꞌsa yaꞌhuërin quëran ocoiaponën. Maꞌsharoꞌsarëꞌquën yaꞌhuëaran. Toro pochin pasto caꞌsaran. Poroncayontaꞌ, shipitáponquën. Ina pochin sinioro copirno canchisë piꞌipi yaꞌhuapon. ‘Yosëso chini chiníquën nanantaton, yaꞌipi isoroꞌpanta huaꞌanëntërin. Ina nohuanton insosona nohuantërinsoꞌ, copirno nicacaso marëꞌ acorin,’ tëcama huarëꞌ noyataran huachi.

Daniel 4:32

Piyapiroꞌsa yaꞌhuërin quëran ocoiaponën. Inapotohuachinën, maꞌsharoꞌsapitarëꞌquën yaꞌhuapon. Tororoꞌsa pochin canchisë piꞌipi pasto capon. ‘Yosëso chini chiníquën nanantaton yaꞌipi isoroꞌpaquë nacionoꞌsanta huaꞌanëntërin. Ina nohuanton insosona nohuantërinsoꞌ, copirno nicacaso marëꞌ acorin,’ tëcama huarëꞌ ina pochin nisaran,” itërin natanin.

Daniel 5:11

Isëquë aꞌnara quëmapi yaꞌhuërin. Inasoꞌ, noya yosëroꞌsa ispiritonëni onpo nanpicasona anitotërin. Paꞌpi yonquínahuan niꞌton, tata Napocotonocori noyá nohuitërin. Aꞌnapita quirica nitotoroꞌsa quëran yonqui yonquínahuan niꞌton, inapita huaꞌanën nicacaso marëꞌ acorin.

Amós 3:7

Inapita naporinso pochachin canta maꞌsha yanipatora, piyapinëhuëpita pënëntonaꞌpiroꞌsaꞌton anitotarahuë.

1 Corintios 14:25

Cancanëna quëran yonquipisopita aꞌninquëchin shaꞌhuitapi niꞌton, ina yonquiatonaꞌ, oshanëna marëꞌ sëtapi. Isonahuatonaꞌ, Yosë chinotapi: “Tëhuënchachin Yosë catahuarinquëmaꞌ,” itarinënquëmaꞌ.

Deuteronomio 10:17

Siniorosoꞌ Yosë niꞌton, yaꞌipi yosëroꞌsa quëran chini chiníquën nanantërin. Yaꞌipi huaꞌanoꞌsantaꞌ, huaꞌanëntërin. Co incari tëranta inasoꞌ, camaiaponhuëꞌ. Chini chiníquën nanantaton, paꞌpi tëꞌhuatoro yaꞌnorin. Yaꞌipi piyapiꞌsa napopináchin niꞌnin. Co incari tëranta inasoꞌ: ‘Pahuërëꞌinquën, ama anaꞌintocosohuëꞌ’ co itaponhuëꞌ.

1 Timoteo 6:15

Tahuëri nanihuachin, Yosë nohuanton, oꞌmantararin. Yosëíchin huaꞌanëntërinpoaꞌ. Yaꞌipi huaꞌanoꞌsaꞌ ina natëinaꞌ. Copirnoroꞌsarintaꞌ natëinaꞌ. “Ma noyacha Yosëso paya,” ichinaꞌ.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.

Apocalipsis 17:14

Inapitasoꞌ Carniroaꞌhua yaminsëatonaꞌ, quira nisapirinahuëꞌ, co nanitapihuëꞌ minsëcaisoꞌ. Inari minsëapon. Inasoꞌ Quisocristo chachin. Chini chiníquën nanantarin niꞌton, yaꞌipiya huaꞌanëntarin. Inasáchin natëcasoꞌ yaꞌhuërin. Piyapinënpitari imasapi. Yosëri huayonin niꞌton, natëmiatapi,” itërinco anquëni.

Apocalipsis 19:16

Aipi aꞌmorinsoquë nani ninshitërin: iso quëmapi chini chiníquën nanantaton, yaꞌipi copirnoroꞌsantaꞌ, huaꞌanëntarin. inasáchin natëcasoꞌ yaꞌhuërin tënin. Tonamënquëntaꞌ ina chachin ninshitërin.