Daniel 2:45 - Chayahuita (Shahui)

^45-46 Ina tapon naporin huaꞌnaranquë motopi quëran naꞌpi notarintaton huaꞌnamia, shaꞌpi huaꞌna, tëshiroꞌpaꞌ, prata, oro, inapita niꞌnomorinsoꞌ. Yosëso chini chiníquën nanantaton, aꞌna tahuëri maꞌsona onpocasoꞌ anitotërinquën. Huaꞌnaranso noꞌtëquën shaꞌhuitëranquën. Maꞌsona tapon naporinsontaꞌ, noꞌtëquën shaꞌhuitëranquën, itërin. Naporoꞌ Napocotonosoꞌ, Naniri notënanquë isonin. Isonin quëran noꞌpaquë huarëꞌ monshorahuaton mosharin. Ina quëran piyapinënpita camairin, maꞌsha tëparahuatona Naniri moshacaisoꞌ. Yonarin pochin nininsonta aꞌpërahuatonaꞌ, moshacaiso camaitërin.

Daniel 2:45 ပူးပေါင်းရင်းမြစ်များ

Génesis 41:26

Canchisë ohuacaꞌ noyápiachin nipisopita, canchisë piꞌipi tapon huaꞌnaran. Canchisë trico motoꞌ noyápiachin nipisopitantaꞌ, ina chachin tapon naporin.

Génesis 41:28

Napotëranquënso chachin mini nisarin. Piyapinënco nipirahuëꞌ, Yosë maꞌsona yanininso nani shaꞌhuitëranquën.

Génesis 41:32

Caso piyapinënco nipirahuëꞌ shaꞌhuitaranquën. Nani Yosë yonquirin inapocasoꞌ. Naporahuaton co huaꞌquiya quëranhuëꞌ naniarin. Napoaton ina nohuanton, catoro inachachin huaꞌnaran.

2 Samuel 7:22

Quëmaso Sinioro, Yosënquën. Chini chiníquën nanantëran. ¡Ma nóyacha quëmasoꞌ ninan paya! Shimashonëhuëipita yáshaꞌhuitërinacoi: ‘Co insonta ina pochin yaꞌhuërinhuëꞌ. Co aꞌna yosë tëranta ina pochin nininhuëꞌ,’ itërinacoi.

Nehemías 4:14

Inapotopirahuëꞌ, tëꞌhuatopisoꞌ nicato yaꞌipi huaꞌanoꞌsaꞌ, maꞌhuanoꞌsaꞌ, sacatoroꞌsaꞌ, inapita shaꞌhuitërahuë: —Ama inapita tëꞌhuatocosohuëꞌ. Siniorosoꞌ chini chiníquën nanantaton, paꞌpi huëhuëpiro ninin. Ina catahuarinpoa niꞌton, ahuëtocoꞌ. Iyanpoapita, huiꞌnanpoapita, saꞌanpoaꞌ, pëinënpoaꞌ, inapita yonquiatëhuaꞌ, ahuëtahuaꞌ, itërahuë.

Nehemías 9:32

Quëmaso Yosënëhuëinquën. Chini chiníquën nanantaton paꞌpi huëhuëpiro nininsopita ninan. Nosororancoisoꞌ co nishatërinhuëꞌ. Quiyarëꞌquën anoyatëransontaꞌ, inachachin nisárin. Napoaton parisitëraisoꞌ noꞌtëquën tantiaquëꞌ. Copirnonëhuëipita, huaꞌanoꞌsaꞌ, corto huaꞌanoꞌsaꞌ, pënëntonaꞌpiroꞌsaꞌ, shimashonëhuëipita, yaꞌipicoi nani nohuantaso parisitërai. Asiria copirnoroꞌsa quëran huarëꞌ aparisitërinacoisoꞌ, ipora huanta inapoarai.

Salmos 145:3

Siniorosoꞌ, chini chiníquën nanantërin. Inasáchin noya noya chinotahuaꞌ. Chiníquën nanantërinsoꞌ, co inquënpoa tëranta nitotarihuahuëꞌ.

Salmos 2:9

Huaꞌna huaraquë copirnoroꞌsa ataꞌhuantaran. Noꞌpaꞌ huëꞌëta nipatërëso pochin nitaran,’ itërinco,” tënin.

Salmos 96:4

Yosëso chini chiníquën nanantërin. Inasáchin chinotacaso yaꞌhuërin. Mamanshiroꞌsasoꞌ topinan quëran tëꞌhuatopi. Yosë tëhuënchinsoꞌ tëꞌhuatacaso yaꞌhuërin.

Isaías 28:16

Napoaton Sinioro naporin: “Niꞌquëꞌ. Sionquë aꞌnara naꞌpi acoarahuë. Noyá huayonpinan nisahuaton, paꞌpi paꞌton. Inari pëi achiniarin. Ina, pëi simintonën pochin nisarin. Insosona natëhuachinco, co tëꞌhuarëꞌna yaꞌhuëaponhuëꞌ.

Daniel 2:24

Yosë nontahuaton Nanirisoꞌ, Arioco nicapon paꞌnin. Quënanconahuaton: —Ama tëpacoisohuëꞌ. Copirnoquë quëpaco huaꞌnarinso shaꞌhuitaꞌhuaso marëꞌ, itërin.

Daniel 2:44

Ina copirnoroꞌsa huaꞌanëntasoiꞌ, Yosë inápaquë yaꞌhuërinso huaꞌanëntarin. Ina huaꞌanëntërinsoꞌ, co onporonta taꞌhuantarinhuëꞌ. Co aꞌnapita nacionoꞌsari minsëarinhuëꞌ. Aꞌnapita huaꞌanëntopisoꞌ, yaꞌipi ataꞌhuantapon. Yaꞌhuërëꞌ ina huaꞌanëntërinsosoꞌ, yaꞌhuëmiatapon.

Malaquías 1:11

Yaꞌipi isoroꞌpaquë nisha nisha piyapiroꞌsa yaꞌhuëpisoꞌ, noya nicatonaco natërinaco. Inapotatonaco yonarin pochin nininsoꞌ, chinotiinacoso marëꞌ aꞌpëpi. Naporahuaton noya nininsopita maꞌsha quëshirinaco.

Mateo 21:24

—Inta nipachin, carinquëmantaꞌ natainquëmaꞌ. Ina shaꞌhuitohuatamaco, nanan quëtërincosoꞌ shaꞌhuitaranquëmaꞌ.

Mateo 24:35

Isoroꞌpaꞌ taꞌhuantarin. Piꞌiroꞌtëntaꞌ taꞌhuantarin. Ca nanamëhuëso nipirinhuëꞌ co onporontaꞌ taꞌhuantarinhuëꞌ. Noꞌtëquën nonahuë niꞌton, yaꞌipi shaꞌhuitëranquëmaso chachin naniarin huachi.

Lucas 17:20

Ina quëran Parisioroꞌsari huëcapairahuatonaꞌ, itaponaꞌ: —¿Onporotaꞌ Yosë isoroꞌpaquë huaꞌanëntarin? itopi. —Yosë huaꞌanëntohuachin iyaroꞌsaꞌ, co aꞌninquëchin yaꞌnoarinhuëꞌ.

Deuteronomio 10:17

Siniorosoꞌ Yosë niꞌton, yaꞌipi yosëroꞌsa quëran chini chiníquën nanantërin. Yaꞌipi huaꞌanoꞌsantaꞌ, huaꞌanëntërin. Co incari tëranta inasoꞌ, camaiaponhuëꞌ. Chini chiníquën nanantaton, paꞌpi tëꞌhuatoro yaꞌnorin. Yaꞌipi piyapiꞌsa napopináchin niꞌnin. Co incari tëranta inasoꞌ: ‘Pahuërëꞌinquën, ama anaꞌintocosohuëꞌ’ co itaponhuëꞌ.

Apocalipsis 1:19

Niꞌnansoꞌ ninshitëquëꞌ. Apira Yosë nohuanton, naquëranchin nani maꞌsha niantaran. Ipora naporapisoꞌ, aꞌna tahuëri maꞌsha onpocasontaꞌ, inapita aꞌnochinquën ninshitantaquëꞌ.

Apocalipsis 19:17

Ina quëran aꞌna anquënintaꞌ quënantarahuë. Inápaquë piꞌi aꞌpininquë huanirahuaton, soporoꞌsaꞌ përasarin. Yaꞌipi chanaroꞌ caꞌtëroꞌsaꞌ chiníquën përasarin. —Huëcoꞌ Yosëri ataꞌhuantarinsopita caꞌquicoꞌ.

Apocalipsis 4:1

Ina quëran inápaquë nëꞌpërahuato, quënanahuë. Yosë yaꞌhuërinquë chachin yaꞌcoana niꞌsoatërin, niꞌnahuë. Naporahuaton, inápa quëran yaꞌnan nontërincosoꞌ nontaantarinco. Tronpita pihuipiso pochin natanahuë. —Isëquë huëntaquëꞌ. Nani maꞌsha aꞌnochinquën. Aꞌna tahuëri maꞌsha onpocasoꞌ ninoto, anitotaranquën, itërinco.