Daniel 2:22 - Chayahuita (Shahui)

²² Aꞌnaquën maꞌsha, co nitotochináchinhuëꞌ. Napoaponahuë quëmari anitotohuatana, nitotopi huachi. Quëmaso tahuëri pochin ninan niꞌton, co tashinanquë tëranta naꞌpitarinënhuëꞌ.

Daniel 2:22 ပူးပေါင်းရင်းမြစ်များ

Génesis 41:16

—Co caora nohuanton nitotërahuëꞌ. Quëma piyapinënco niꞌto, Yosë chachin anitotohuachinco, shaꞌhuitaranquën. Maꞌsona noya nicacaso marëꞌ, shaꞌhuitaranquën, itërin.

Salmos 104:2

Quëmasoꞌ noyasáchin nicaton, tahuëri pochin cancantëran. Nëꞌmëtëquë paꞌshintërëso pochin piꞌiroꞌtënta acoran.

Isaías 41:22

Onpoatonsona iráca napopisopita naporinsoꞌ, aꞌna tahuërinta maꞌsona onpocaso yaꞌhuëarinsoꞌ, inapita shaꞌhuitocoi. Napohuatamaꞌ, yonquirápoi. Noꞌtëquën nanihuachin, natëarainquëma huachi.

Isaías 41:26

¡Co inso mamanshinquëma tërantaꞌ, coꞌhuara ina naniyátërasohuëꞌ shaꞌhuiramahuëꞌ! Insonquëma tëranta coꞌhuara ina naniyátërasohuëꞌ shaꞌhuirama naporini, ‘tëhuënchachinchi noꞌtëquën shaꞌhuipi paya,’ chitohuëꞌ. Co inquëma tëranta ina shaꞌhuiramahuëꞌ. Co insonta nonamasoꞌ nataninhuëꞌ.

Isaías 42:9

Niꞌcoꞌ. Yaꞌnan shaꞌhuirahuësopitasoꞌ nani nanirin. Iporaso coꞌhuara naniyátërasohuëꞌ, nasha nininsopita yaꞌhuërëꞌ, shaꞌhuitaantaranquëmaꞌ,” tënin.

Isaías 45:7

Ca nohuanton tahuëri yaꞌhuërin. Ca nohuanton chachin tashinta yaꞌhuërin. Ca nohuanton noya yaꞌhuëpi. Ca nohuanton chachin maꞌsha onpopi. Ca Sinioroco, yaꞌipi inapita acorahuë.

Daniel 2:11

Natanancoisosoꞌ, co onpo nitotochináchinhuëꞌ. Co piyapimiasoꞌ, ina pochin shaꞌhuitiinquënso nanitërinhuëꞌ. Yosëroꞌsaráchin aꞌna nanitomaraiꞌ. Napoaponahuëꞌ, inapitaso co canpoarëꞌ yaꞌhuëpihuëꞌ, itaantapi inahuarintaꞌ.

Daniel 2:19

Naporo tashi Siniorori huaꞌnarëso pochin yaꞌnotahuaton, yaꞌipi anitotërin. Napoaton “Yosparinquën,” itaton, iso pochin Yosë nontërin: “¡Ma noyanquëncha quëmaso Sinioro paya! Quëmasáchin yaꞌipi piyapiꞌsa chinochinën. Yaꞌipi nitotëran. Yaꞌipi nanitaparan.

Daniel 2:47

Ina quëran Naniri itapon: —Canpita Yosë chinotëramasosoꞌ, yaꞌipi yosëroꞌsa quëran chini chiníquën nanantërin. Yaꞌipi copirnoroꞌsa huaꞌanëntërin. Inasáchin co nitotacasohuëꞌ nininsonta anitotërin. Napoaton huaꞌnarahuëso anitotatënquën, maꞌsona tapon naporinsontaꞌ, anitotërinquën, itërin.

Daniel 5:11

Isëquë aꞌnara quëmapi yaꞌhuërin. Inasoꞌ, noya yosëroꞌsa ispiritonëni onpo nanpicasona anitotërin. Paꞌpi yonquínahuan niꞌton, tata Napocotonocori noyá nohuitërin. Aꞌnapita quirica nitotoroꞌsa quëran yonqui yonquínahuan niꞌton, inapita huaꞌanën nicacaso marëꞌ acorin.

Daniel 5:14

Quëma yonquiatënën: “Inasoꞌ, noya yosëroꞌsa ispiritonëni yaꞌcoancantërin. Yonquinën quëraonta yonqui yonquíchararin,” itërinaco.

Mateo 13:13

Napoaton inapita huëꞌpachinara, sacai pochin aꞌchintërahuë. Natanaponaraihuëꞌ, co natëapihuëꞌ. Nicaponaraihuëꞌ, co yonquiapihuëꞌ.

Juan 1:9

Shaꞌhuitërinpoaso chachin Quisocristo isoroꞌpaquë oꞌmarin. Oꞌmarahuaton, yaꞌipi piyapinpoaꞌ aꞌpintimarinpoaꞌ. Inasáchin noꞌtëquën anitotërinpoaꞌ.

Juan 21:17

Ina quëran naquëranchin itantarin: —Iya Simon, ¿tëhuënchachin nosororanco ti? itantarin. Cararoꞌ natanin niꞌton, Pitro sëtërin. —Yaꞌipi Sinioro nitotëran. Nosororanquën mini, ina nitotëran, itërin. —Imarinacosopitasoꞌ, ohuicaroꞌsa pochin nipi niꞌton, noya aꞌpaiquëꞌ.

Juan 8:12

Ina quëran piyapiꞌsaꞌ aꞌchintantarin. —Casoꞌ aꞌpintatë pochin nicato, yaꞌipi piyapiꞌsaꞌ noꞌtëquën anitotarahuë. Imapatamaco, co huachi tashinan pochin cancantaramahuëꞌ. Tahuëri pochin cancantaramaꞌ. Ina pochin cancantohuatamaꞌ, Yosë nohuitatomaꞌ nanpimiataramaꞌ.

1 Corintios 4:5

Napoaton iporasoꞌ ama nishaꞌhuirapiahuasohuëꞌ. Aꞌna tahuëri Sinioro oꞌmantahuachin, yaꞌipi piyapinpoaꞌ tëniarinpoaꞌ. Yaꞌipi ninëhuasopita anitotarinpoaꞌ. Poꞌoana quëran ninëhuasopitantaꞌ aꞌninquëchin shaꞌhuitarinpoaꞌ. Yonquirëhuasopitantaꞌ nitotërin. Maꞌmarësona tërantaꞌ naporëhuasoꞌ anitotarinpoaꞌ. Naporoꞌ yaꞌipinpoaꞌ noꞌtëquën nontarinpoaꞌ. Noya nipatëhuaꞌ, noya niꞌsarinpoaꞌ.

Efesios 3:5

Iráca co iso nanan nitotopihuëꞌ. Iporasoꞌ Quisocristo acorincoisopita nitotërai. Pënëntonaꞌpiroꞌsantaꞌ nitotopi. Ispirito Santo anitotërincoi aꞌchinaꞌhuaiso marëꞌ.

1 Timoteo 6:16

Inasáchin co taꞌhuantarinhuëꞌ. Nanpirápon inasoꞌ. Noya noya niꞌton, huënaráchin pochin yaꞌnorin. Co yaꞌcarichinachinhuëꞌ. Iráca quëran huarëꞌ co insontaꞌ Yosë quënaninhuëꞌ. Ipora huantaꞌ co quënanarihuarahuëꞌ, yaꞌipi piyapiꞌsari chinochinaꞌ. Yaꞌipiya nanitaparin. Amen.

Hebreos 4:13

Yaꞌipi ninëhuasopita Yosësoꞌ nitotërin. Poꞌoana quëran nipirëhuahuëꞌ, yaꞌipi niꞌninpoaꞌ. Co piꞌpisha tërantaꞌ inasoꞌ nonpintarihuahuëꞌ. Yaꞌipi yonquirëhuasopitantaꞌ noyá nitotërin. Ayaroꞌ tahuëri yaꞌipinpoaꞌ ninëhuasopita aipitarinpoaꞌ. Naporoꞌ coisë pochin nontarinpoaꞌ. Nontohuachinpoaꞌ, noꞌtëquën shaꞌhuitacasoꞌ yaꞌhuapon.

Santiago 1:17

Yosësoꞌ noyasáchin yonquirinpoaꞌ. Noya noya cancantacaso marëꞌ catahuarinpoaꞌ. Inasáchin noya aꞌpintërinpoaꞌ noꞌtëquën yonquicaso marëꞌ. Piꞌi, yoqui, tayora, inapita inari acopirinhuëꞌ, co yaꞌipi tahuëri noya aꞌpininhuëꞌ. Aꞌna tashintaꞌ co mantaꞌ aꞌpininhuëꞌ. Yosëso nipirinhuëꞌ co ina pochin nininhuëꞌ. Nani tahuëriya nosoroatonpoaꞌ, catahuarinpoaꞌ.

1 Juan 1:5

Noya nanan Quisocristo anitotërincoi. Ina nanan chachin shaꞌhuitaranquëmaꞌ. “Yosësoꞌ noyasáchin ninin. Tahuëri pochin cancantërin. Co piꞌpisha tërantaꞌ tashi pochin cancantërinhuëꞌ,” itërincoi.