Colosenses 3:5 - Chayahuita (Shahui)

⁵ Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

Colosenses 3:5 ပူးပေါင်းရင်းမြစ်များ

Mateo 15:19

Co noyahuëꞌ yonquihuatamara, tëpatëramaꞌ, nitëhuananpitëramaꞌ, monshihuanacasoáchin yonquiramaꞌ, ihuatëramaꞌ, nonpintëramaꞌ, pinotëramaꞌ.

Romanos 1:26

Napoaton Yosëri tananpitërin paꞌpi co noyahuëꞌ cancantacaiso marëꞌ. Sanapiꞌsaꞌ co huachi soꞌinaꞌ nohuantopihuëꞌ. Sanapi capini nisëꞌhuacaisoꞌ nohuantopi. Co ina pochin nicacasohuëꞌ nipirinhuëꞌ.

Romanos 1:29

Paꞌpi co noyahuëꞌ nipi. Nimonshitacaisoráchin yonquipi. Naꞌcon oshahuanpi. Aꞌna piyapi maꞌshanënpita nohuantapapi. Piyapi chinotopi. Niapiratopi. Aꞌnaquën tëpatopi. Ninoꞌhuipi. Nonpinápi. Noꞌhuitápi. Aꞌnapita nonpinapipi.

Romanos 6:13

Niꞌcoꞌ. Imiramaꞌ, nantëmaꞌ, yaꞌpiramaꞌ, huëratëmaꞌ, nanamëmaꞌ, inapita yaꞌhuëtërinquëmaꞌ. Inapita quëran co noyahuë nicacaso yaꞌhuëpirinhuëꞌ. Ama nohuantocosohuëꞌ. Yosë natëcamasoáchin yonquicoꞌ. Chiminama quëran nanpiantëramaso pochin cancantatomaꞌ, yaꞌipi nonëma quëran huarëꞌ noyasáchin nicoꞌ.

Romanos 6:6

Catoꞌ cancan pochin yaꞌhuëtërinpoaꞌ. Aꞌna cancansoꞌ sopai yanatërin. Quisocristo imarëhuaꞌ niꞌton, co noyahuëꞌ cancantërëhuasoꞌ corosëquë patanantërëso pochin nitërëhuaꞌ. Ama huachi sopai natëcaso marëhuëꞌ napotërëhuaꞌ. Co noyahuëꞌ cancantërëhuasoꞌ chimininso pochin nitahuaꞌ.

Romanos 7:23

Aꞌna cancan nohuantërin. Aꞌna cancanso nipirinhuëꞌ, co nohuantërinhuëꞌ. Co noyahuëꞌ nicacasoáchin yonquirin. Ina canarinco niꞌton, co noyahuëꞌ ninahuë.

Romanos 7:5

Iráca, canpoara nipaꞌyatacasoáchin yonquirëhuaꞌ. Co noyahuëꞌ cancantërëhuaꞌ. Pënënpachinënpoara, aquë aquëtëꞌ co noyahuëꞌ yonquiatëhuaꞌ, co noyahuëꞌ ninëhuaꞌ. Ina marëꞌ chiminpatëhuaꞌ, parisitomiatacasoꞌ yaꞌhuërin.

Romanos 8:13

Co noyahuëꞌ ninëhuasopita co aꞌpoasëhuahuëꞌ, chiminpatëhuaꞌ parisitomiatacasoꞌ yaꞌhuërin. Nipirinhuëꞌ, co noyahuëꞌ ninëhuasopita tëpatë pochin nitohuatëhuaꞌ, nanpimiatarihuaꞌ. Ispirito Santo catahuarinpoaꞌ co noyahuëꞌ ninëhuasopita tëpatë pochin nitacaso marëꞌ.

1 Corintios 5:1

Aꞌnaquënsoꞌ co noyahuëꞌ nicaton, monshihuanin, topi natantërahuë. Inasoꞌ paꞌpin saꞌin monshitërin. Inapoaton, paꞌpi co noyahuëꞌ ninin. Co imapisopitahuë tërantaꞌ co onporontaꞌ ina pochin nipihuëꞌ.

1 Corintios 6:11

Iráca aꞌnaquëmaꞌ ina pochin nipiramahuëꞌ. Sinioro Quisocristo imapatamara, oshanëmaꞌ inquitërinquëmaꞌ. Nani anoyacancantërinquëmaꞌ niꞌton, Yosë noya niꞌninquëmaꞌ. Ispirito Santo chachin catahuarinquëmaꞌ noya cancantacasoꞌ.

1 Corintios 6:13

Aꞌnaquën napopi: “Cosharoꞌ yaꞌhuërin anpopitë marëꞌ. Anpopitëntaꞌ yaꞌhuërin cosharo marëꞌ,” topi. Inaso nipirinhuëꞌ, aꞌna tahuëri Yosë nohuanton, cosharoꞌ, anpopitëꞌ, inapita taꞌhuantarin. Niꞌton, co coshatërëhuaso marëꞌ oshahuanëhuahuëꞌ. Napoaponahuëꞌ, monshihuanacasoꞌ paꞌpi co noyahuëꞌ. Co Yosë nohuantërinhuëꞌ monshihuanacasoꞌ. Co ina marëꞌ nonënpoaꞌ acotërinpoahuëꞌ. Sinioro natëcaso marëꞌ acotërinpoaꞌ. Nonënpoantaꞌ nichaꞌërin.

1 Corintios 6:18

Napoaton ama piꞌpisha tërantaꞌ monshihuancosohuëꞌ. Ihuatacasoꞌ, noꞌpicasoꞌ, inapita nicacasoꞌ co noyahuëꞌ, nipirinhuëꞌ, co atapicancaninpoahuëꞌ. Monshihuanpatamaꞌ, nitapicancanaramaꞌ. Nonëmantaꞌ tapiaramaꞌ.

2 Corintios 12:21

Iráca aꞌnaquëmaꞌ co noyahuëꞌ yonquiramaꞌ. Monshihuanamaꞌ, sanapirachin yonquiramaꞌ. Ipora huantaꞌ aꞌnaquëmaꞌ inapoaramaꞌ nimara. Co ina naniantohuatamahuëꞌ, canconpato, paꞌpi sëtarahuë. Carinquëmaꞌ aꞌchintëranquëmasoꞌ niꞌton, Yosë atapanarinco. Co oshanëmaꞌ aꞌpohuatamahuëꞌ, chiníquën asëtaramaco.

Gálatas 5:24

Quisocristo corosëquë chiminaton, oshanënpoaꞌ inquitërinpoaꞌ. Napoaton canpoantaꞌ ina imapatëhuaꞌ, co noyahuëꞌ yonquirëhuasopita corosëquë patanantatë pochin nitatëhuaꞌ, naniantacasoꞌ yaꞌhuërin. Co huachi nohuantarihuahuëꞌ sopai pochin cancantacasoꞌ.

Efesios 4:19

Inapitasoꞌ nitotaponaraihuëꞌ, co nohuantopihuëꞌ noya nicacaisoꞌ. Co noyahuëꞌ nisáponaraihuëꞌ, co nitotapanpihuëꞌ. Monshihuanacaisoáchin yonquipi. Co noyahuëꞌ yonquiatonaꞌ, aꞌnaratipita nipi.

Colosenses 2:11

Iráca Yosë chinotopisopita marca niacotopi. Iporaso nipirinhuëꞌ Quisocristo imapatëhuaꞌ, nisha acotërinpoaꞌ. Co nonënpoaquë acotërinpoahuëꞌ. Cancanënpoaꞌ anoyatërinpoaꞌ. Co noyahuëꞌ yonquirëhuasopita inquitatonpoaꞌ, anoyacancantërinpoaꞌ niꞌton, nóya cancantarihuaꞌ.

1 Tesalonicenses 4:3

Yosë nohuantërin noyasáchin nicacasoꞌ. Ama piꞌpian tërantaꞌ monshihuancosohuëꞌ.

1 Tesalonicenses 4:5

Aꞌnaquën co Yosë nohuitatonahuëꞌ, ichihuëꞌëcaisoachin yonquiatonaꞌ, aꞌnaroáchin mapi. Ama inapita pochin cancantocosohuëꞌ. Tëhuënchachin nosoroatomaꞌ, macoꞌ.

1 Timoteo 6:10

Coriquiráchin paꞌyatohuatëra, nisha nisha yonquirëꞌ. Co noyahuëꞌ ninëꞌ. Nonpinëꞌ, ihuatërëꞌ, noꞌhuitërëꞌ, ina pochin yonquirëꞌ. Aꞌnaquën coriquiráchin yonquiatonaꞌ, Yosë aꞌpopi. Ina quëran cancanëna quëran co huachi noya cancantopihuëꞌ. Sëtatonaꞌ, chiníquën parisitapi.

Hebreos 12:16

Niꞌcona nisha nisha cancantotamaꞌ. Ama monshihuancosohuëꞌ. Noyápiachin cancantocoꞌ. Ama maꞌsha yonquiatomaꞌ, Yosë naniantocosohuëꞌ. Isao iráca naporinsoꞌ yonquicoꞌ. Maꞌsharáchin yonquiaton, co onpopinchin Yosë yonquirinhuëꞌ. Tanaton, iin nontërin: “¿Yosë naꞌcon catahuainquënsoꞌ nohuantëran ti? Co casoꞌ ina yonquirahuëꞌ. Cosharoꞌ naꞌcon naꞌcon nohuantërahuë,” itërin.

Hebreos 13:4

Quëmapiꞌsaꞌ saꞌapachinaꞌ, ama aꞌna sanapi yonquiꞌinasohuëꞌ. Sanapiꞌsantaꞌ soꞌyahuachinaꞌ, ama soꞌinaꞌ tëhuananpichinasohuëꞌ. Ama mantaꞌ monshihuainasohuëꞌ. Monshihuanpatamaꞌ, Yosë chiníquën anaꞌintarinquëmaꞌ.

Hebreos 13:5

Ama coriquiráchin paꞌyatocosohuëꞌ. Co naꞌcon maꞌsha yaꞌhuëtopirinquëmahuëꞌ, sano cancantocoꞌ. Ama naꞌcon naꞌcon nohuantocosohuëꞌ. Yosë chachin nani shaꞌhuitërinpoaꞌ. “Co onporontaꞌ pataranquëmahuëꞌ. Co naniantaranquëmahuëꞌ,” itërinpoaꞌ.

Santiago 4:1

¿Onpoatomataꞌ ninoꞌhuitomaꞌ, yaniahuëramaꞌ? tënahuë, yonquiato. Canpitaora cancanëma quëran nisha nisha maꞌsha nohuantëramaꞌ niꞌton, co noyahuëꞌ cancantëramaꞌ. Nipaꞌyatacasoáchin yonquiramaꞌ. Napoaton ninoꞌhuiramaꞌ.

1 Pedro 2:11

Nosororanquëmaꞌ iyaroꞌsaꞌ niꞌton, pënënaranquëmaꞌ. Quisocristo imatomaꞌ, co isoroꞌpaquë yaꞌhuëmiataramahuëꞌ. Yosëꞌpaꞌ yaꞌhuëmiataramasoꞌ. Napoaton ama maꞌsha isoroꞌpaquë yaꞌhuërinsopitaráchin yonquicosohuëꞌ. Isoroꞌpaquë noꞌpiápi, monshihuanapi, taparosáchin nonatonaꞌ, capa cancantapi. Ama ina pochin cancantocosohuëꞌ. Ina pochin cancantohuatamaꞌ, sopai minsëarinquëmaꞌ, co Yosë pochin cancantaramahuëꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Apocalipsis 22:15

Aꞌnaquënso nipirinhuëꞌ, co onporontaꞌ Yosë yaꞌhuërinquë paꞌsapihuëꞌ. Niꞌni pochin cancantopisopita, pënotonoꞌsaꞌ, monshihuanaꞌpiroꞌsaꞌ, tëpatoroꞌsaꞌ, mamanshi chinotopisopita, inapita aipiran yaꞌhuëmiatapi. Aꞌnaquëontaꞌ nonpinápi niꞌton, co nohuantapihuëꞌ noꞌtën nanan imacaisoꞌ. Inapitantaꞌ co onporontaꞌ Yosëꞌpaꞌ paꞌsapihuëꞌ.