Colosenses 3:1 - Chayahuita (Shahui)

¹ Quisocristo chiminpachina, Yosëri ananpitaantarin. Canpitantaꞌ imaramaꞌ niꞌton, anoyacancantërinquëmaꞌ noya noya yonquicamaso marëꞌ. Napoaton Quisocristo yonquirinso chachin nohuantocoꞌ. Nani tahuëri yonquirácoꞌ ina pochin cancantacamaso marëꞌ. Inasoꞌ inápaquë yaꞌhuërarin. Yosë inchinan quëran huënsëaton, ina pochachin chini chiníquën nanantarin.

Colosenses 3:1 ပူးပေါင်းရင်းမြစ်များ

Salmos 110:1

Yosëri Sinioronëhuë shaꞌhuitërin: “Inchinanëhuë quëran huënsëquëꞌ. Inimiconënpita carinquën minsëchinquën,” itërin.

Salmos 16:11

Onporahuatosoꞌ nanpimiataꞌhuasoꞌ, quëma aꞌchintaranco. Nani tahuëri catahuaranco niꞌton, noya cancantarahuë. Quëmaquëꞌpaꞌ nipato, capa cancantomiatarahuë.

Mateo 26:64

—Ca mini inaco. Yosë quëran quëmapico niꞌto, aꞌna tahuëri niantaramaco. Inápaquë paꞌpato, Yosë inchinanën quëran ahuënsëarinco. Ina quëran chitoroꞌ huancana oꞌmantararahuë niantaramaco, itërin.

Mateo 6:20

Inápaquë yaꞌhuërinsopitaso nipirinhuëꞌ, yaꞌhuëmiatarin. Yosë naꞌcon yonquiatomaꞌ, noya nicoꞌ. Ina marëꞌ naꞌcon sacatocoꞌ inápaquë acanamiachinquëmaꞌ. Inatohuaꞌ co mantaꞌ mocaponhuëꞌ. Co noꞌsoni pëꞌyaponhuëꞌ. Co chiꞌchirotaponhuëꞌ. Co ihuatëroꞌsaꞌ yaꞌconatonaꞌ ihuaponënpoahuëꞌ. Napoapon.

Mateo 6:33

Napoaton Yosë naꞌcon naꞌcon yonquicoꞌ. Aꞌnapitantaꞌ catahuacoꞌ huaꞌanëntërinquë yaꞌconacaiso marëꞌ. Yosë nontocoꞌ noyasáchin yonquicamaso marëꞌ. Ina pochin cancantohuatamaꞌ, catahuarinquëmaꞌ. Ina nohuanton, maꞌsha pahuantërinquëmasopita yaꞌhuëtarinquëmaꞌ.

Marcos 12:36

Iráca Ispirito Santo nohuanton, Tapi chachin ninshitërin. Cristo ninoton, naporin: Yosëri Sinioronëhuë shaꞌhuitërin. “Inchinanëhuë quëran huënsëquëꞌ inimiconënpita cari minsëchinquën,” itërin Yosëri, tënin Tapi.

Marcos 14:62

—Ca mini inaco. Aꞌna tahuëri niꞌsaramaco. Yosë quëran quëmapico niꞌto, Yosë chiníquën nanantaton, inchinan quëran ahuënsëarinco. Ina quëran chitoroꞌ huáncana oꞌmantararahuë niantaramaco, itërin Quisosori.

Marcos 16:19

Nani caꞌtanoꞌsanënpita nontohuachina, inápaquë Sinioro Quisoso panantarin. Yosëri quëpantarahuaton, inchinanën quëran ahuënsërin.

Lucas 12:33

Ama naꞌcon maꞌsha yontoncosohuëꞌ. Maꞌsha yaꞌhuëtohuachinquëmaꞌ, paꞌanahuatomaꞌ, saꞌahuaroꞌsaꞌ quëtocoꞌ. Inapotohuatamaꞌ, Yosë acanaarinquëmaꞌ. Isoroꞌpaquë maꞌsha aꞌnaroáchin mocarin. Ihuarinënpoaꞌ. Maꞌshari aꞌquirin. Inapaquëso nipirinhuëꞌ Yosë acanahuachinpoaꞌ, yaꞌhuëtomiatarinpoaꞌ.

Lucas 20:42

iráca Ispirito Santo nohuanton, Tapiri chachin Cristo ninorin. Sarmoquë ninshitaton, naporin: Yosëri Sinioronëhuë shaꞌhuitërin: “Inchinanëhuë quëran huënsëquëꞌ

Lucas 22:69

Nipirinhuëꞌ, ipora quëran huarëꞌ casoꞌ Yosë quëran quëmapico niꞌto, Yosë inchinanën quëran huënsëapo. Inaquë chiníquën nanantarahuë, itërin.

Hechos 2:34

Tapi co nanpiantaton, inápaquë pantarinhuëꞌ, nitotërëhuaꞌ. Napoaponahuëꞌ, ninshitaton, tapon: ‘Yosëri Sinioronëhuë shaꞌhuitërin: “Inchinanëhuë quëran huënsëquëꞌ

Hechos 7:55

Istipanso nipirinhuëꞌ Ispirito Santori noyá yaꞌcoancantërin niꞌton, inápaquë nëꞌpëtërin. Yosë yaꞌhuërinso chachin niꞌnin. Huënaráchin huënaráchin yaꞌnorin. Quisoso Yosë inchinanën quëran huaniárin, niꞌnin.

Romanos 8:34

Yosë noya niꞌninpoa niꞌton, co insonta nanitërinhuë anaꞌintinpoasoꞌ. Quisocristo oshanënpoaꞌ inquitinpoaso marëꞌ chiminin. Ina quëran nanpiantarin. Yosë inchinanën quëran yaꞌhuaton, canpoa marëꞌ Yosë nontárin.

Romanos 8:6

Co noyahuëꞌ nicacasoráchin paꞌyatohuatëhuara, chimipi pochin niconëhuaꞌ. Co Yosë nohuitërëhuahuëꞌ. Nipirinhuëꞌ, Ispirito Santo paꞌyatatëhuaꞌ natëhuatëhuaꞌ, Yosë nohuitatëhuaꞌ, nanpimiatarihuaꞌ. Noya yonquiatëhuaꞌ, sano cancantarihuaꞌ.

2 Corintios 4:18

Isoroꞌpaquë yaꞌhuërinsopita co naꞌcon naꞌcon yonquirëhuahuëꞌ. Iporasoꞌ parisitarihuarahuëꞌ, co ina marëꞌ sëtarihuahuëꞌ. Yosë naꞌcon naꞌcon yonquiarëhuaꞌ. Ina nohuitacasoáchin cancantarihuaꞌ. Isoroꞌpaquë yaꞌhuërinsopita quënanpirëhuahuëꞌ, co yaꞌhuëmiatarinhuëꞌ. Taꞌhuantarin. Yosë noya yonquirinpoasosoꞌ co quënanpirëhuahuëꞌ, yaꞌhuëmiatarin.

Efesios 4:10

Quisocristo chachin isoroꞌpaquë oꞌmarahuaton, inápaquë panantarin. Yosë yaꞌhuërinquë chachin panantarahuaton, huaꞌyanën chachin aꞌpatimarinpoaꞌ yaꞌcoancantinpoaso marëꞌ. Yaꞌipi parti yaꞌhuaton, yaꞌipi huaꞌanëntarin.

Efesios 5:22

Sanapiꞌsaꞌ Sinioro natëtonaꞌ, soꞌinantaꞌ natëinaꞌ.

Colosenses 2:20

Iráca Quisocristo chiminin. Canpitantaꞌ ina imapatamaꞌ, inarëꞌquëmaꞌ chiminamaso pochin ninamaꞌ niꞌton, co huachi aꞌnapita pochin nisha nisha chiníquën nanantopisopita imaramahuëꞌ. Inapitasoꞌ inahuara yonquinëna quëran nisha aꞌchinpi. “Nani maꞌsha natëhuatoi, chaꞌësarai,” taꞌtonaꞌ, “Ama ina caꞌcosohuë. Ama piꞌnicosohuëꞌ. Ama sëꞌhuayátëracosohuëꞌ,” itarinënquëmaꞌ. ¿Maꞌmarëtaꞌ ipora huantaꞌ ina natëcamasoꞌ yonquiramaꞌ? tënahuë yonquiato.

Colosenses 3:2

Ama maꞌsharáchin yonquicosohuëꞌ. Yosëꞌpaꞌ yaꞌhuërinsopita yonquirácoꞌ.

Hebreos 1:13

Ina quëran huiꞌnin itantarin: “Chiníquën nanantaton, inchinanëhuë quëran huënsëquëꞌ yaꞌipi inimiconënpita carinquën minsëchinquën,” itërin Yosëri. Co inso anquëni tërantaꞌ ina pochin nontërinhuëꞌ.

Hebreos 1:3

Inasoꞌ paꞌpin pochachin noya nóya ninin. Ina pochachin niꞌton, inasáchin Yosë noꞌtëquën anohuitërinpoaꞌ. Chiníquën nanantërin niꞌton, ipora huantaꞌ ina nohuanton, maꞌsha yaꞌhuërarin. Co yonquirinpoahuëꞌ naporini, yaꞌipiya taꞌhuanchitërihuahuëꞌ. Iráca oshanënpoaꞌ inquitinpoaso marëꞌ chiminin. Chiminpirinhuëꞌ, nanpiantarahuaton, inápaquë panantarin. Inaquë panantarahuaton, Yosë inchinanën quëran huënsërin. Chiníquën nanantaton, huaꞌanëntarin.

Hebreos 10:12

Quisocristoso nipirinhuëꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarahuaton, Yosë inchinanën quëran huënsëarin.

Hebreos 12:2

Quisocristo naꞌcon yonquiaꞌahuaꞌ. Inasáchin catahuarinpoaꞌ Yosë natëcasoꞌ. Naporahuaton, inasáchin catahuarinpoaꞌ noya noya natëtacasoꞌ. Isoroꞌpaquë oꞌmahuachina, chiníquën parisitërin. Corosëquë parisitohuachina, naꞌcon tëhuapirinahuëꞌ, co ina yonquirinhuëꞌ. “Chiminpato, piyapiꞌsaꞌ nichaꞌësarahuë,” taꞌton, nóya cancantërin. Ina quëran inápaquë panantarahuaton, Yosë inchinanën quëran chachin huënsëarin.

Hebreos 8:1

Noꞌtëquën shaꞌhuitaranquëmaꞌ. Quisocristo inápaquë panantarahuaton, Yosë inchinanën quëran chachin huënsërin. Corto huaꞌan chini chiníquën nanantërinso pochin niꞌton, nanan anoyatërinpoaꞌ.

1 Pedro 3:22

Nanpiantarahuaton, Yosëꞌpaꞌ pantarin. Yosë inchinan quëran huënsëaton, chini chiníquën nanantarin. Yaꞌipi anquëniroꞌsaꞌ, huaꞌanoꞌsaꞌ, chiníquën nanantërinsopita inapitari natëpi huachi.