Colosenses 2:2 - Chayahuita (Shahui)

² Yaꞌipinquëmaꞌ yonquiatënquëmaꞌ, Yosë nontárahuë. “Catahuaquëꞌ Sinioro chiníquën cancanchinaꞌ. Noya ninosoroꞌinaꞌ. Ina quëran aꞌna huëntoínchin pochin nisapi. Ma noyacha quëmasoꞌ yonquirancoi paya. Catahuaquëꞌ quëma nanamën noya yonquiꞌinaꞌ. Quisocristo chachin nohuichinaꞌ. Iracasoꞌ co piyapiꞌsari nohuitopirinahuëꞌ. Iporaso nipirinhuëꞌ anohuitërancoi. Ina nohuitatoi, tëhuënchachin noya cancantarai,” itërahuë, Yosë nontato.

Colosenses 2:2 ပူးပေါင်းရင်းမြစ်များ

1 Reyes 3:28

Naporinso yaꞌipi israiroꞌsa natantopi. Ina natantatonaꞌ, paꞌyanpi huachi: “Tëhuënchachin Yosëri catahuarin. Napoaton yonquínahuan pochin noꞌtëquën shaꞌhuirin,” topi.

Isaías 32:17

Noyasáchin nicatonaꞌ, sano yaꞌhuëaponaꞌ. “Sinioro catahuarincoi,” tëcatonaꞌ, noya yaꞌhuëmiataponaꞌ.

Isaías 40:1

Sinioro naporin: “Piyapinëhuëpita noya nontatomaꞌ, achinicancancoꞌ.

Isaías 53:11

Paꞌpi parisitërinso piquëran: “Tëhuënchachin yaꞌipi nanirahuë huachi,” tosarin. Ina nitotaton noya cancantarin. Sinioro piyapinënsoꞌ, noꞌtëquënáchin ninin. Inapoaton naꞌa piyapiꞌsa nichaꞌësarin. Co noyahuëꞌ nipiso marëꞌ parisitaton inapotarin.

Jeremías 9:24

Insonquëma tërantaꞌ, ‘Ma noyacha caso ninahuë paya,’ yatopatamaꞌ, Sinioroco ninahuësoꞌ nitotatoma nohuitohuatamaco tëhuënchinsoꞌ, noꞌtën chachin napoaramaꞌ. Casáchin yaꞌipiroꞌpaꞌ huaꞌanëntato nosororanquëmaꞌ. Co noyahuëꞌ nipatamaꞌ noꞌtëquën anaꞌintaranquëmaꞌ. Noya nipatamasoꞌ noya niꞌsaranquëmaꞌ. Cá pochin cancantopisopita paꞌyatarahuë. Ca Sinioroco shaꞌhuitaranquëmaꞌ,” tënin.

Mateo 11:25

Naporoꞌ noya cancantaton, Yosë nontërin: “¡Ma noyacha Tata yonquiran paya! Quëmasoꞌ chini chiníquën nanantëran. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntëran. Aꞌnaquën Tata nani maꞌsha nitotaponaraihuëꞌ: ‘Quiyaora noya noya nitotarai,’ topiso marëꞌ, co nanamën anitotëranhuëꞌ. Imarinacosopitaso nipirinhuëꞌ, co onpopinchin nitotaponaraihuëꞌ: ‘Catahuaco Sinioro co caora nanitërahuëꞌ,’ topachinara, quëma nanamën chachin anitotëran. Ina marë: ‘Yosparinquën,’ itëranquën.

Mateo 11:27

Ina quëran piyapiꞌsaꞌ aꞌchintantarin. “Tata Yosë nohuanton, pënëntarahuë. Yaꞌipi nanamën anitotërinco piyapiꞌsaꞌ aꞌchintacaꞌhuaso marëꞌ. Huiꞌninco niꞌton, inasáchin noya nohuitërinco. Inapochachin Tata Yosë nohuitërahuë. Casáchin noya nohuitërahuë. Aꞌnaquëontaꞌ cari anohuitohuato, nohuitapi antaꞌ.

Mateo 13:11

“Yosë huaꞌanëntërinsoꞌ co insontaꞌ inaora yonquinën quëran nitotërinhuëꞌ. Canpitasoꞌ yaꞌipiya aꞌchintaranquëmaꞌ. Aꞌnapitaso nipirinhuëꞌ co yaꞌipi aꞌchintarahuëꞌ. Pënënto nanan quëransáchin aꞌchintarahuë.

Lucas 1:1

Quisocristo isoroꞌpaquë oꞌmaton, nóya ninin. Naꞌa piyapiꞌsari ina naporinsoꞌ nani ninshitopi.

Juan 10:30

Caso Tatahuëroꞌco napopináchin cancantërahuë, itërin Quisosori.

Juan 10:38

Co yanatëpiramacohuëꞌ, nani maꞌsha Yosë pochin ninahuë niꞌton, natëco. Ina quëran nitotarama Tata Yosë pochachin ninahuësoꞌ. Tata Yosëntaꞌ ca pochachin ninin, itërin.

Juan 16:15

Yaꞌipi tatahuë yonquirinsoꞌ nitotërahuë. Ina pochin yonquirahuë cantaꞌ. Napoaton Ispirito Santo oꞌmahuachin, ca nonahuëso chachin aꞌchintarinquëmaꞌ.

Juan 17:3

Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.

Juan 5:17

Quisosoriso nipirinhuëꞌ itërin: —Tatahuësoꞌ co ipora huantaꞌ chinotërinhuëꞌ. Sacatárin piyapiꞌsaꞌ catahuacaso marëꞌ. Cantaꞌ co chinotërahuëꞌ. Nani tahuëri piyapiꞌsaꞌ catahuarahuë, tënin.

Juan 5:23

Ina quëran yaꞌipi piyapiꞌsaꞌ noya niꞌsarinaco. Tatahuë noya niꞌpiso pochachin niꞌsarinaco. Ina marëꞌ nanan quëtërinco. Co noya niꞌpatamacohuëꞌ, Tatahuëntaꞌ co noya niꞌnamahuëꞌ. Ina aꞌpaimarinco.

Juan 6:69

Nani natërainquën. Quëmasoꞌ noyasáchin ninan. Yosë aꞌpaimarinquën, tënai, itërin Simon Pitrori.

Hechos 4:32

Yaꞌipi Quisoso natëpisopita noya niniꞌtonaꞌ, yaꞌhuëpi. Napopianachin yonquipi. Aꞌnaya aꞌnaya pahuantohuachinara, niquëtopi. Co mantaꞌ niapiratopihuëꞌ.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

Romanos 16:25

Nani tahuëriya Yosë chinotahuaꞌ. Yaꞌipi nanitaparin. Ina achinicancaninquëmaꞌ imamiatacamaso marëꞌ. Nanamën tëninso pochachin catahuarinquëmaꞌ. Ina nanan chachin aꞌchintëranquëmaꞌ. Quisocristo nanamën inasoꞌ. Iráca quëran huarëꞌ co nanamën nitotopirinahuëꞌ, iporasoꞌ Yosë anitotërinpoaꞌ.

Romanos 2:4

Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

1 Corintios 14:31

Inapoatomaꞌ, aꞌnaya aꞌnayanquëmaꞌ pënëntocoꞌ. Yaꞌipinquëmaꞌ noya noya yonquicamaso marëꞌ nipënëncoꞌ. Napohuatamaꞌ, canpita capini niachinicancanaramaꞌ.

1 Corintios 2:12

Imarëhuasopitasoꞌ co piyapi yonquipisoꞌ imarëhuahuëꞌ. Yosë nohuanton, Ispirito Santo yaꞌcoancantërinpoaꞌ. Aꞌchintinpoaso marëꞌ aꞌpatimarinpoaꞌ. Yaꞌcoancantohuachinpoara, Yosë yonquirinpoasoꞌ anitotërinpoaꞌ.

Gálatas 3:28

Yosësoꞌ co nisha nisha yonquirinpoahuëꞌ. Aꞌnaquënpoaꞌ cotio piyapinpoaꞌ, aꞌnaquëontaꞌ nisha piyapiꞌsaꞌ. Aꞌnaquëontaꞌ patronoꞌsaꞌ, aꞌnaquënsoꞌ piyapinënpita. Aꞌnaquën sanapiꞌsaꞌ, aꞌnaquënpoaꞌ quëmapinpoaꞌ nipirëhuahuëꞌ, yaꞌipinpoaꞌ Quisocristo imapatëhuaꞌ, aꞌna huëntoínchin pochin ninëhuaꞌ.

Efesios 1:7

Quisocristo corosëquë chiminaton, nichaꞌërinpoaꞌ. Huënainën paꞌnin niꞌton, oshanënpoaꞌ inquitërinpoaꞌ. Inaora nohuanton, Yosë naꞌcon nosororinpoaꞌ.

Efesios 3:16

Napoaton canpita yonquiatënquëmaꞌ, Yosë nontërahuë. “Quëmasoꞌ Sinioro chini chiníquën nanantëran. Noya noyanquën niꞌton, imarinënsopita nosoroaton, catahuaquëꞌ chiníquën cancanchinaꞌ. Ispirito Santori achinicancain noya noya imainënquën.

Efesios 3:3

Iráca quëran huarëꞌ Yosë yonquirin nichaꞌëinquëmasoꞌ. Napoaponahuëꞌ, co piyapiꞌsaꞌ anitotërinhuëꞌ. Iporaso nipirinhuëꞌ inaora nohuanton, anitotërinco niꞌton, nani piꞌpian ninshitëranquëmaꞌ.

Efesios 6:22

Canpitataquë aꞌpaarahuë onpohuinsona yaꞌhuëraisoꞌ shaꞌhuitinquëmaso marëꞌ. Ina natanpatamaꞌ, chiníquën cancantaramaꞌ.

Filipenses 2:1

Quisocristo achinicancaninquëmaꞌ. Naꞌcon nosororinquëmaꞌ niꞌton, noya cancantaramaꞌ. Ispirito Santo yaꞌcoancantohuachinquëmaꞌ, catahuarinquëmaꞌ. Catahuahuachinquëmaꞌ, noya ninosoroaramaꞌ.

Filipenses 3:8

Ina naꞌcon naꞌcon nohuantato, inasáchin yonquirahuë. Iráca cotioroꞌsaꞌ noya niꞌninaco. Huaꞌanoꞌsaquë huarëꞌ noya niꞌpirinacohuëꞌ, Quisocristo imapatëra, aꞌporinaco. Noꞌhuipirinacohuëꞌ, co ina yonquirahuëꞌ. Iráca yonquirahuësoꞌ amoro pochin nicato, co piꞌpisha tërantaꞌ nohuantërahuëꞌ. Quisocristo nohuitaꞌhuasoráchin nohuantërahuë. Ina nohuitacasoꞌ noya noya, tënahuë. Inasáchin huaꞌanëntërinco.

Colosenses 1:26

Iráca iso nanan co nitotopihuëꞌ. Iporaso nipirinhuëꞌ imarëhuasopita anitotërinpoaꞌ. Yonquirinso chachin anitotërinpoaꞌ.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

Colosenses 1:9

Naporo quëran huarëꞌ canpita yonquiatëinquëmaꞌ, Yosë nontërai. Nani tahuëriya nontatoi, itërai: “Quëmasoꞌ Sinioro tëhuënchachin anitotërancoi noꞌtëquën natëcaꞌhuainquënso marëꞌ. Corosasëquë imarinënsopita naꞌcon catahuaquëꞌ. Yaꞌipi nohuantëransoꞌ anitotëquëꞌ. Ispirito Santori catahuain noꞌtëquën yonquiꞌinaꞌ.

Colosenses 2:19

Inapitasoꞌ co tëhuënchachin Quisocristo imapihuëꞌ. Inasáchin motënpoaꞌ pochin nicaton, huaꞌanëntarinpoaꞌ. Niꞌcoꞌ. Nonënpoaꞌ nisha nisha yaꞌhuëtërin. Motënpoari yaꞌipi camairin noya sacatacaiso marëꞌ. Inapochachin imarëhuasopitantaꞌ Quisocristoíchin noya camairinpoaꞌ. Achinirinpoaꞌ soꞌsorëso pochin nicacaso marëꞌ. Ina pochin nicacasoꞌ Yosë nohuantërin.

Colosenses 3:14

Nóya ninosorocoꞌ. Ina naꞌcon naꞌcon Yosë nohuantërin. Noya ninosorohuatëhuaꞌ, noya noya nisarëhuaꞌ. Inapohuatëhuaꞌ, tëhuënchachin nóya cancantarihuaꞌ.

Colosenses 4:3

Quiya marëntaꞌ Yosë nontocoꞌ. Paꞌsápato, Quisocristo nanamën aꞌchinpirahuëꞌ. Ina marëꞌ tashinan pëiquë poꞌmorinaco. Naꞌa piyapiꞌsaꞌ co nanamën nitochátërapihuëꞌ. Inahuantaꞌ nitochinaꞌ. Napoaton Yosë nontohuatamaꞌ, quiya marëntaꞌ nontocoꞌ catahuaincoi aꞌchintohuatoira, Yosë nanamën nohuanchinaꞌ.

Colosenses 4:8

Canpitantaꞌ onporaisona nitotacamaso marëꞌ aꞌpataranquëmaꞌ. Achinicancainquëmaso marëntaꞌ aꞌpataranquëmaꞌ.

1 Tesalonicenses 1:5

Quisocristo nanamën aꞌchintohuatëinquëmara, co topinan quëran aꞌchintërainquëmahuëꞌ. Ispirito Santo chachin catahuarincoi aꞌchinaꞌhuaisoꞌ. Canpitantaꞌ catahuarinquëmaꞌ noya natanacamaso marëꞌ. “Noꞌtëquën nontërinpoaꞌ,” taꞌtomaꞌ, yaꞌipi cancanëma quëran natëramaꞌ. Ina nicatoi: “Tëhuënchachin Yosëri huëntonënquë ayaꞌconin,” tënai. Canpitataquë yaꞌhuapoi, noya imarai canpitantaꞌ noya imacamaso marëꞌ.

1 Tesalonicenses 3:2

Timotio aꞌpatërainquëmaꞌ nitotacaso marëꞌ. Inantaꞌ noya imarin. Yosëri acorin Quisocristo nanamën aꞌchinacaso marëꞌ. Achinicancainquëmaso marëꞌ aꞌpatërainquëmaꞌ.

1 Tesalonicenses 5:14

Canpita capini iyaroꞌsaꞌ nipënëncoꞌ. Aꞌnaquën co yasacatopihuëꞌ. Inapita pënëncoꞌ ama chiroinasohuëꞌ. Aꞌnaquën maꞌsha onpohuachinara, Yosë yananiantopi. Inapitantaꞌ noya nontocoꞌ chiníquën cancanchinaꞌ. Aꞌnaquëontaꞌ cancanëna quëran co chinipihuëꞌ. Catahuacoꞌ ama Yosë nanianchinasohuëꞌ. Inapohuatamaꞌ, ama insontaꞌ noꞌhuicosohuëꞌ. Sanoanan quëran pënëncoꞌ.

1 Timoteo 3:16

Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ. Yosë huiꞌnin isoroꞌpaquë oꞌmaton, piyapi chachin nasitimarin. Ispirito Santo chachin anitotërinpoaꞌ Yosë huiꞌnin nininsoꞌ. Nanpiantahuachina, anquëniroꞌsarintaꞌ quënanpi. Imapisopitari yaꞌipi parti paatonaꞌ, nanamën shaꞌhuiraꞌpiapi. Naꞌa piyapiꞌsaꞌ natëpi. Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.

Hebreos 10:22

Napoaton Quisocristoíchin natëtëhuaꞌ, yaꞌipi cancanënpoa quëran Yosë nontahuaꞌ. Nani oshanënpoaꞌ inquitërinpoaꞌ niꞌton, noya cancantarëhuaꞌ. Quisocristo anoyacancantërinpoaꞌ niꞌton, noya iꞌquë amarëso pochin noyápiachin cancantarihuaꞌ.

Hebreos 6:11

Chiníquën cancantatomaꞌ, yaꞌipinquëmaꞌ imamiatocoꞌ. “Yosë co naniantarinpoahuëꞌ. Aꞌna tahuëri yaꞌhuërinꞌpaꞌ quëpantarinpoaꞌ,” taꞌtomaꞌ, chiminaquë huarëꞌ nóya imacoꞌ.

2 Pedro 1:10

Napoaton iyaroꞌsaꞌ, naꞌcon yonquicoꞌ yaꞌipi cancanëma quëran huarëꞌ imacamaso marëꞌ. Yosë huayonatënquëmaꞌ, nontërinquëmaꞌ niꞌton, noyá matërëso pochin imamiatocoꞌ. Inapohuatamaꞌ, co nisha cancantatomaꞌ, aꞌpoaramahuëꞌ.

2 Pedro 1:3

Quisocristosoꞌ chiníquën nanantaton, yaꞌipiya nanitaparin. Ina imapatëhuaꞌ, catahuarinpoaꞌ Yosë pochin cancantacaso marëꞌ. Ina Yosë anohuitërinpoaꞌ. Huëntonënquë nani ayaꞌconinpoaꞌ. Inasoꞌ nóya niꞌton, nohuantërin canpoantaꞌ inapochachin cancantacasoꞌ. Ina nohuitohuatëhuaꞌ, catahuarinpoaꞌ onporahuatësona noya noya chinotacasoꞌ.

2 Pedro 3:18

Canpitaso nipirinhuëꞌ, Sinioro Quisocristoíchin yonquicoꞌ. Inaora nohuanton, nosororinquëmaꞌ niꞌton, nani tahuëri yacatahuarinquëmaꞌ. Inasáchin yonquihuatamaꞌ, oshaquëran noya noya nohuitaramaꞌ. Inasoꞌ nichaꞌësarinpoaꞌ. Yaꞌipi piyapiꞌsari chinochinaꞌ. Ayaroꞌ tahuëriquë huarëꞌ inasáchin yonquiaꞌahuaꞌ. Amen. Nani ninshitëranquëma huachi. Pitro

1 Juan 3:19

Tëhuënchachin aꞌnapita nosorohuatëhuaꞌ, noꞌtëquën Yosë nanamën imasarëhuaꞌ. Ina quëran co huachi tëꞌhuatacasoꞌ yaꞌhuëtarinpoahuëꞌ. “Tatanpoa pochin niꞌton, noya niꞌninpoaꞌ,” taꞌtëhuaꞌ, noya cancantarihuaꞌ.

1 Juan 5:7

Tata Yosë noya anitotërinpoaꞌ huiꞌnin natëcasoꞌ. Niꞌcoꞌ. “Carayaꞌpi inachachin shaꞌhuihuachina, naporo huarëꞌ natëtërëꞌ,” topi. Inapochachin cancanënpoaquë Ispirito Santo shaꞌhuitërinpoaꞌ. Quisocristontaꞌ iꞌquë aporihuanpachina, yaꞌipiya Yosë natërin. Naporahuaton, canpoa marëꞌ chiminpachina, huënainën paꞌnin. Cara chachin napopináchin anitotërinpoaꞌ.