Colosenses 2:18 - Chayahuita (Shahui)

¹⁸ Nisha aꞌchinaꞌpiroꞌsaso nipirinhuëꞌ taponaꞌ: “Quiyasoꞌ anquëniroꞌsaꞌ chinotërai. Huaꞌnarëso pochin quënanai. Co canpitasoꞌ quiya pochin nipatamahuëꞌ, co noya cancantaramahuëꞌ,” itohuachinënquëmaꞌ, ama piꞌpisha tërantaꞌ natëtocosohuëꞌ. Inapitasoꞌ nonpinatonaꞌ, “Nani maꞌsha Yosë anitotërincoi niꞌton, noya noyacoi,” topirinahuëꞌ, inahuara yonquinëna quëran napopi.

Colosenses 2:18 ပူးပေါင်းရင်းမြစ်များ

Génesis 3:13

Napotohuachina, sanapi yaꞌhuërëꞌ tahuërëtahuaton, itapon: —¿Onpoatonta naporansoꞌ? itërin. —Yaꞌhuan nonpintërinco niꞌton, caꞌnahuë, tënin sanapi.

Copo naporinso' 38:2

“Chiníquën nanantërahuësoꞌ, co noꞌtëquën nitotatonhuëꞌ, ¡co manta nitotëransohuë pochin quëmasoꞌ nonan!

Mateo 24:24

Naꞌa nonpin nanan pënëntonaꞌpiroꞌsaꞌ huëcaponaꞌ. ‘Casoꞌ Cristoco’ tosapi aꞌnaquën. ‘Casoꞌ ninotonaꞌpico,’ tosapi aꞌnaquëontaꞌ. Sacaiꞌ nininsopita nisapi piyapiꞌsaꞌ nonpintacaiso marëꞌ. Huayoninsopitantaꞌ nonpintochinaichin nisapi.

Romanos 1:25

Yosëri noꞌtëquën anitotopirinhuëꞌ, ina aꞌporahuatonaꞌ, nonpin nanan natëpi. Maꞌsha isoroꞌpaquë yaꞌhuërinsopita moshatonaꞌ, chinotopi. Yosëriáchin yaꞌipiya ninin nipirinhuëꞌ, co inasoꞌ chinotopihuëꞌ. Tëhuënchachin inasáchin chinotacasoꞌ yaꞌhuërin, tënahuë. Amen.

Romanos 16:18

Quisocristosoꞌ huaꞌanënpoaꞌ nipirinhuëꞌ, co inapitarisoꞌ natëpihuëꞌ. Inahuara nohuantopisoráchin yonquipi. Noyasha nonaponaraihuëꞌ, co noꞌtëquën nonpihuëꞌ. Co noya nitotopiquëhuëꞌ aꞌchintohuachinara, aꞌnaroáchin nonpintopi.

1 Corintios 13:4

Piyapiꞌsaꞌ nosorohuatëhuaꞌ, co yanoꞌhuirihuahuëꞌ. Noya nontatëhuaꞌ, catahuarihuaꞌ. Piyapiꞌsaꞌ nosorohuatëhuaꞌ, co noyapatëhuaꞌ, noꞌhuiarihuahuëꞌ. Co nocantarihuahuëꞌ. “Casoꞌ noya noyaco,” co tarihuahuëꞌ.

1 Corintios 3:3

Co noyahuëꞌ yonquiramasopita co nanianchátëraramahuëꞌ. Canpita capini ninoyapatomaꞌ, ninoꞌhuiramaꞌ. ¿Onpoatontaꞌ canpitaora nohuantëramasoachin yonquiconamaꞌ? Nisha nisha yonquiatomaꞌ, co imapisopitahuë pochin cancantëramaꞌ.

1 Corintios 4:18

Aꞌnaquëmaso nipirinhuëꞌ nocanatomaco, “Quiyasoꞌ Paono quëran naꞌcon naꞌcon nitotërai. Napoaton co huachi yahuëꞌninhuëꞌ,” topiramahuëꞌ.

1 Corintios 4:6

Aꞌchintohuatëinquëmara iyaroꞌsaꞌ, Yosëíchin yonquirai. Aporosërëꞌcoi aꞌchintërainquëmasoꞌ ninshitëranquëmaꞌ canpitantaꞌ quiya pochin yonquicamaso marëꞌ. Yosë quiricanënáchin natëcasoꞌ yaꞌhuërin. Aꞌna quëmapi noya noya aꞌchintohuachinquëmaꞌ, ama inasáchin paꞌyatocosohuëꞌ.

1 Corintios 8:1

Aꞌnaquën maꞌsha tëparahuatonaꞌ, nosha acopi mamanshi chinotacaiso marëꞌ. “¿Noya ipora ina nosha paꞌanatëꞌ capacasoꞌ ti?” itëramaco niꞌton, shaꞌhuichinquëmaꞌ. Tëhuënchachin iyaroꞌsaꞌ co mamanshisoꞌ nanpirinhuëꞌ, nitotërëhuaꞌ. Nani naꞌcon nitotarihuarahuëꞌ, co aꞌnapita nosorohuatëhuahuëꞌ, topinan quëran nitotatëhuaꞌ, ninocanarihuaꞌ. Nipirinhuëꞌ, piyapi nosorohuatëhuaꞌ, catahuarëhuaꞌ noya noya Yosë imacaiso marëꞌ.

1 Corintios 9:24

Quëmapiꞌsaꞌ nicanacaiso marëꞌ taꞌahuachinara, aꞌnaíchin canatërin. Nani ina nitotëramaꞌ. Aꞌnapitasoꞌ co chiníquën taꞌatonahuëꞌ, co canatopihuëꞌ. Canpitantaꞌ chiníquën taꞌapiso pochin cancantatomaꞌ, naꞌcon yonquicoꞌ noya noya cancantamaso marëꞌ.

2 Corintios 11:3

Aꞌnaquënso nipirinhuëꞌ yaanishacancantërinënquëmaꞌ. Iráca yaꞌhuani Ipa nonpintërinso pochin yanonpintërinënquëmaꞌ ama Quisocristoíchin yonquicamaso marëhuëꞌ.

2 Corintios 12:20

Canconpato, co noya niꞌsaranquëmahuëꞌ nimara. Canpitantaꞌ co noya niꞌsaramacohuëꞌ nimara. Napoaton sëtato, yonquiáranquëmaꞌ. Ipora huantaꞌ aꞌnaquëmaꞌ nimara ninoꞌhuiaramaꞌ, niaꞌpitaramaꞌ, iquianan quëran ninontaramaꞌ, nipinosaramaꞌ, ninocanaramaꞌ, nisha nisha yonquiaramaꞌ nimara, tënahuë yonquiato.

Efesios 4:17

Quisocristo nanan quëtërinco niꞌton, pënënaranquëmaꞌ. Naꞌa piyapiꞌsaꞌ co imatonaraihuëꞌ, topinan quëran yaꞌhuërapi. Somaraya pochin cancantatonaꞌ, nisha nisha yonquipi. Co natantochináchinhuëꞌ cancantopi niꞌton, co Yosë nanamën nitotopihuëꞌ. Co Yosë yonquiatonaraihuëꞌ, co mantaꞌ Yosë nohuitopihuëꞌ. Ama inapita pochin nicosohuëꞌ.

Efesios 5:6

Aꞌnaquën yanonpintatënënquëmaꞌ, napopi: “Quisocristo imapomarahuëꞌ, maꞌsona nohuantëramasoꞌ nicoꞌ, co anaꞌintarinquëmahuëꞌ,” itopirinënquëmahuëꞌ, ama piꞌpian tërantaꞌ natëcosohuëꞌ. Co Yosë natëpisopitahuëꞌ chiníquën anaꞌintarin.

Filipenses 3:14

Co nisha nisha yonquirahuëꞌ. Quëmapiꞌsaꞌ nicanatonaꞌ taꞌapiso pochin cancantato, Quisocristoíchin yonquiárahuë ina pochin cancantaꞌhuaso marëꞌ. Nani tahuëri nani tahuëri napoarahuë. Ina quëran aꞌna tahuëri Yosëꞌpaꞌ cancontahuato, noya niꞌsarinco. Quisocristo anoyacancantërinco niꞌton, inápaquë quëpantarinco.

Colosenses 2:23

Ina pochin nipënënpachinaꞌ, yonquínahuan pochin yaꞌnopirinahuëꞌ. “Maꞌsha aꞌporahuatoi, parisitërai. Parisitopiraihuëꞌ, ahuantërai. Ina marëꞌ Yosë noya noya niꞌnincoi,” topirinahuëꞌ, co noꞌtëquën yonquipihuëꞌ. Ina pochin nipirinahuëntaꞌ, co piꞌpian tërantaꞌ nanitopihuëꞌ co noyahuëꞌ yonquipisopita naniantacaisoꞌ.

Colosenses 2:4

Aꞌnaquënso nipirinhuëꞌ nisha aꞌchinpi. Ama Quisocristoíchin yonquicamaso marëhuëꞌ noyásha nontarinënquëmaꞌ. Niꞌcona nonpintochinënquëmaꞌ.

Colosenses 2:8

Aꞌnaquënso nipirinhuëꞌ nisha aꞌchinpi. Niꞌcona oshaquëran anishacancantochinquëmaꞌ. Nonpin nanan inahuara yonquipisoꞌ aꞌchinapi. Piyapiꞌsaꞌ yonquipisoráchin imasapi. Quisocristo aꞌchininsoꞌ co imapihuëꞌ. Nisha nisha isoroꞌpaquë chiníquën nanantopisopita yonquiatonaꞌ, nisha pënëntapi. Yaocoirinënquëmaꞌ. Canpitaso nipirinhuëꞌ ama inapita natëcosohuëꞌ.

1 Timoteo 1:7

“Quiyasoꞌ maistrocoi. Yaꞌipi pënëntërinsoꞌ nitotërai,” topirinahuëꞌ, co noꞌtëquën nitotopihuëꞌ. Chiníquën nonpirinahuëꞌ, co nitotopihuëꞌ.

1 Timoteo 4:1

Tëhuënchachin Ispirito Santo ninoton, aꞌninquëchin shaꞌhuitërinpoaꞌ: “Aꞌna tahuëri aꞌnaquën piyapiꞌsaꞌ Yosë nanamën aꞌporapi. Sopai natëtonaꞌ, nonpin nanan aꞌchinpachinaꞌ, imasapi. Ayaroꞌ tahuëri yaꞌcaritohuachin, naporapi,” tënin.

2 Pedro 2:14

Sanapi quënanpachinara, monshitacaisoráchin yonquipi. Co nanitopihuëꞌ naniantacaisoꞌ. Co chiníquën cancantopisopitahuëꞌ nonpintatonaꞌ, anishacancantapi. Huënsonquë maꞌsha manëso pochin nonpintapi. Maꞌsharáchin yonquiatonaꞌ, noyapatopi. Napoaton Yosëri anaꞌintarin.

1 Juan 2:26

Aꞌnaquën yanonpintarinënquëmaꞌ niꞌton, ninshitaranquëmaꞌ.

Apocalipsis 12:9

Inapotatonaꞌ, panca yaꞌhuan pochin nininsoꞌ inápa quëran tëꞌyatopi. Inasoꞌ sopai chachin, Satanasë itopisoꞌ. Yaꞌipi piyapiꞌsaꞌ yanonpintërin. Ina minsërahuatonaꞌ, anquëninënpitarë chachin isoroꞌpaquë tëꞌyatopi.

Apocalipsis 13:14

Nisha nisha acoarin, sacaiꞌ nininsoꞌ. Maꞌsha paꞌpi tëꞌhuatoroꞌ nininsoꞌ niꞌtonënquë naporin. Piyapiꞌsari niꞌpachinaꞌ: “Tëhuënchachin inasoꞌ Yosë,” tosapi. Notohuaroꞌ piyapiꞌsaꞌ nonpintarin. Ina quëran itapon: “Panca mamanshi niahuaꞌ. Sahuëniquë ahuëatonaꞌ shitëpapirinahuëꞌ, noyataantarinsoꞌ nonanatëhuaꞌ chinotahuaꞌ,” itohuachinaꞌ, nisapi.

Apocalipsis 13:8

Huaꞌhuayatërahuëꞌ piyapiꞌsari natëapi. Carniroaꞌhua imapisopitaíchin co ina chinotapihuëꞌ. Inasoꞌ aꞌna quirica yaꞌhuëtërin. Nanpirin quirica itopisoꞌ. Inaquë nininënpita nani ninshitërin. Isoroꞌpaꞌ ninin quëran huarëꞌ imapisopita ninoton, inaquë ninshitërin. “Canpoa marëꞌ Carniroaꞌhua chiminin,” taꞌtonaꞌ, ina imasapi. Aꞌnapitaso nipirinhuëꞌ co nanpirin quiricaquë nininënpita yaꞌhuërinhuëꞌ niꞌton, maꞌsha marë quëran pipirinsoꞌ chinotapi.

Apocalipsis 19:10

Naporoꞌ isonahuato, yachinotopirahuëꞌ. “Ama chinotocosohuëꞌ. Casoꞌ anquënico. Co Yosëcohuëꞌ. Canpita pochachin cantaꞌ Yosë natërahuë. Quisoso nanamën imaramaꞌ niꞌton, Yosëíchin yonquiquëꞌ,” itërinco. Quisoso nanamënáchin aꞌchinpatëhuaꞌ, noꞌtëquën pënëntarëhuaꞌ.

Apocalipsis 3:11

Co huaꞌquiya quëranhuëꞌ oꞌmantararahuë. Ama naniantatomacohuëꞌ, imamiatoco. Niꞌcona sopai minsëchinquëmaꞌ. Ina minsëhuachinquëmaꞌ, co inápaquë canaaramahuëꞌ.