Colosenses 1:7 - Chayahuita (Shahui)

⁷ Ipapërasë aꞌchintërinquëmaꞌ, inaroꞌcoi nóya ninosororaisoꞌ. Quiya pochachin natëton, Quisocristo nanamën aꞌchinarin. Co quiyasoꞌ nanitëraihuëꞌ canpitataquë pacaꞌhuaisoꞌ niꞌton, ina aꞌparahuë aꞌchintinquëmaso marëꞌ. Co chirorinhuëꞌ aꞌchinacasoꞌ.

Colosenses 1:7 ပူးပေါင်းရင်းမြစ်များ

Números 12:7

Piyapinëhuë Moisësëso nipirinhuëꞌ, co ina pochin anitotërahuë. Inasoꞌ, yaꞌipi piyapinëhuëpita quëran noꞌtë noꞌtëquën natërinco.

Mateo 18:29

Ina quëmapintaꞌ isonahuaton, naꞌcon mosharin. ‘Nosoroco iyasha oshaquëran yaꞌipi pahuërëaranquën,’ itopirinhuëꞌ,

Mateo 24:45

Ina quëran itaantarin: “Niꞌcoꞌ, iyaroꞌsaꞌ. Oꞌmacaꞌhuasoꞌ tahuëri aꞌna patron pochin nisarahuë. Inasoꞌ aquë yapaꞌpachina, inpriatonën shaꞌhuitërin. ‘Piyapinëhuëpita noya niꞌquëꞌ. Cosharoꞌ, maꞌsha, inapita pahuantohuachinaꞌ, quëtëraꞌpiaquëꞌ,’ itahuaton, paꞌnin.

Mateo 25:21

‘¡Ma noyacha sacatëran paya! Natëranco niꞌquëhuarëꞌ, chiníquën nanan quëchinquën naꞌcon huaꞌanëntamaso marëꞌ. Pëinëhuëquë huëquëꞌ, noya cancantahuaꞌ,’ itërin huaꞌanëni.

1 Corintios 4:17

Ina marëꞌ Timotio aꞌpatëranquëmaꞌ. Inasoꞌ noya niꞌnahuë. Aꞌchintohuatëra, Quisocristo imarin niꞌton, huiꞌnahuë pochin niꞌnahuë. Nóya Sinioro imarin. Yaꞌipi naporahuësoꞌ ayonquiarinquëmaꞌ noya noya imacamaso marëꞌ. Insëquësona paꞌpatëra, Quisocristo nanamënsáchin aꞌchinahuë. Imapisopita niyontonpachinara, aꞌchintërahuë.

1 Corintios 4:2

Inpriatonpoꞌ nipatëra, huaꞌanënpoꞌ noꞌtëquën natëcasoꞌ yaꞌhuërin. Inapochachin Yosë huaꞌanëntërincoi niꞌton, inasáchin natëcasoꞌ yaꞌhuërin.

1 Corintios 7:25

Iporasoꞌ co saꞌarinsopitahuëꞌ, co soꞌyarinsopitahuëꞌ, inapita maꞌsona onpocasoꞌ shaꞌhuichinquëmaꞌ. Quisocristo isoroꞌpaquë nipon, co ina aꞌchinpirinhuëꞌ, catahuarinco noꞌtëquën pënënaꞌhuasoꞌ. Nosoroatonco, acorinco nanamën aꞌchinaꞌhuaso marëꞌ. Napoaton nanitëramaꞌ natëamacosoꞌ, tënahuë.

2 Corintios 11:23

“Quisocristo shaꞌhuitërincoi niꞌtoi, natërai,” itopirinënquëmahuëꞌ. ¡Casoꞌ naꞌcon naꞌcon natërahuë! Inapitasoꞌ nocaninaco niꞌton, huaꞌyantërinso pochin nonato, piꞌpian inapita pochin nonchinquëmaꞌ noꞌtëquën yonquicamaso marëꞌ. Yosë marëꞌ casoꞌ chini chiníquën sacatërahuë. Paꞌsápato, Yosë nanamën aꞌchinahuë. Ina marëꞌ naꞌcon naꞌcon parisitaporahuëꞌ, ahuantërahuë. Inantaꞌ shaꞌhuichinquëmaꞌ. Aꞌchinahuëso marëꞌ naꞌaroꞌ tashinan pëiquë poꞌmorinaco. Naꞌaroꞌ ahuërinaco. Shitëparinaco.

Efesios 5:21

Quisocristosoꞌ huaꞌanëmaꞌ niꞌton, ina yonquiatomaꞌ, imaramasopita capini nicatahuacoꞌ. Yaꞌipinquëmaꞌ nipënënatomaꞌ, ninatancoꞌ.

Filipenses 2:25

Iporaso nipirinhuëꞌ Iya Ipapirotito aꞌpatantaranquëmaꞌ. Iꞌhua chachin aꞌpatiramaco catahuaincoso marëꞌ. Canquihuachina, nóya catahuarinco. Achinicancaninco. Naporahuaton, inantaꞌ Quisocristo nanamën aꞌchinin. Ina marëꞌ parisitaponahuëꞌ, noya ahuantërin. Iporaso nipirinhuëꞌ canpitataquë panantaꞌin, tënahuë.

Colosenses 4:12

Ipapërasëntaꞌ canpitataquë yaꞌhuërinsoꞌ saludos aꞌpatarinquëmaꞌ. Inantaꞌ Quisocristo natëton, noya nanan aꞌchinarin. Nani tahuëri canpita marëꞌ Yosë nontárin. “Catahuaquëꞌ Sinioro yaꞌipi nohuantëransoꞌ nitochinaꞌ. Noya nitotatonaꞌ imamiachinën,” itárin.

Colosenses 4:7

Iya Tiquico aꞌpataranquëmaꞌ. Inasoꞌ nóya niꞌnahuë. Iyahuë pochachin nosororahuë. Noya catahuarinco. Inantaꞌ Sinioro natëton, noya nanan aꞌchinarin. Onpopinsona yaꞌhuërahuësoꞌ shaꞌhuitarinquëmaꞌ.

Colosenses 4:9

Iya Onisimontaꞌ paꞌsarin, canpitataquë yaꞌhuërinsoꞌ. Inantaꞌ iyahuë pochin nosororahuë. Yosë natëton, noya imarin. Inapita canconpachinaꞌ, yaꞌipi isëquë yaꞌhuëraisopita maꞌsona onporaisoꞌ shaꞌhuitarinënquëmaꞌ.

1 Timoteo 4:6

Nani pënënanquën. Ina nanan aꞌchinpatan, noya nisaran. Quisocristo noya niꞌsarinquën. Cosharoꞌ achinirinposo pochin Yosë nanamën natëhuatan, achinicancanarinquën. Noꞌtëquën aꞌchintërainquën niꞌton, noya imasaran.

2 Timoteo 2:2

Piyapiꞌsaꞌ niyontonpachinara, Yosë nanamën aꞌchintërahuë. Quëmantaꞌ natanan. Inapochachin quëmantaꞌ caraíchin quëmapiꞌsaꞌ huayonahuaton, ina nanan chachin aꞌchintantaquëꞌ. Noya natërinsopita aꞌchintëquëꞌ. Inahuanta aꞌnapita aꞌchintacaiso marëꞌ inapotëquëꞌ.

Filemón 1:23

Iya Ipapërasë saludos aꞌpatarinquën. Inantaꞌ Quisocristo imarin niꞌton, tashinan pëiquë yaꞌhuarin.

Hebreos 2:17

Napoaton isoroꞌpaquë oꞌmaton, piyapi chachin nasitimarin. Co piyapi pochin nasitërinhuëꞌ naporini, co catahuainpoasoꞌ nanichitonhuëꞌ. Piyapi pochachin inantaꞌ niꞌton, noyá nohuitërinpoaꞌ. Corto huaꞌan chini chiníquën nanantërinso pochin nicaton, canpoa marëꞌ Yosë nontarin nanan anoyatinpoaso marëꞌ. Nosoroatonpoaꞌ, chiminin oshanënpoaꞌ inquitinpoaso marëꞌ. Inasoꞌ co nonpintërinpoahuëꞌ.

Hebreos 3:2

Yosëri acohuachina, noꞌtëquën natërin. Iráca Moisësëntaꞌ Yosë natëton, yaꞌipi piyapinënpita catahuarin.