Colosenses 1:23 - Chayahuita (Shahui)

²³ Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Colosenses 1:23 ပူးပေါင်းရင်းမြစ်များ

Ezequiel 18:26

Noya ninaꞌpi nipirinhuëꞌ, noya nisarinso aꞌporahuaton co noyahuëꞌ nipachin, co noyahuëꞌ nininsopitari naꞌintarin niꞌton, chiminapon.

Marcos 16:15

Ina quëran itaantarin: “Yaꞌipi parti, iyaroꞌsaꞌ, pacoꞌ. Yaꞌipi piyapiꞌsaꞌ noya nanan carinquëmaꞌ shaꞌhuitëranquëmasoꞌ shaꞌhuitocoꞌ.

Lucas 22:32

Caso nipirinhuëꞌ iyasha, nani Yosë nontërahuë ama aꞌpoancoso marëhuëꞌ. Napoaton co naniantomiatarancohuëꞌ. Noya imaantahuatanco, iyanpita achinicancanquëꞌ, itërin.

Lucas 6:48

Inasoꞌ, natëricho quëran yapëirin. Yapëihuachina, noya yonquiaton, noya pëiaquë yonirin. Naꞌpitëꞌ quënanahuaton, naꞌpitëquë chachin natëricho quëran pëirin. Pamatohuachina, opotopirinhuëꞌ, co anotërinhuëꞌ. Chiniiꞌ niponahuëꞌ, co yatëꞌyatërinhuëꞌ.

Juan 15:6

Nara sëꞌpaꞌ nohuishatohuachina, ahuirin. Masahuatonaꞌ, pënquë tëꞌyatopi ahuiquitacaiso marëꞌ. Inapochachin co imamiatohuatamacohuëꞌ, Yosë anaꞌintarinquëmaꞌ.

Hechos 1:25

inantaꞌ paaton, aꞌnapita aꞌchintacaso marëꞌ? Cotasë co huachi nanitërinhuëꞌ. Nani aꞌporinquën niꞌton, parisitopiquë paꞌnin,” itopi.

Hechos 1:8

Iporaso nipirinhuëꞌ Ispirito Santo naꞌcon catahuarinquëmaꞌ. Yaꞌcoancantohuachinquëmaꞌ, nóya pënëntaramaꞌ. Ina nohuanton, nani maꞌsha nanitaparamaꞌ. Yaꞌipi naporahuësoꞌ niꞌnamaꞌ, nani nitotëramaꞌ. Aꞌnapitantaꞌ shaꞌhuitocoꞌ. Quirosarinquë chachin shaꞌhuitocoꞌ. Ina quëran yaꞌipi Cotia parti paatomaꞌ, shaꞌhuitoncoꞌ. Samaria partintaꞌ shaꞌhuitoncoꞌ. Yaꞌipi parti paatomaꞌ, shaꞌhuitëraꞌpiacoꞌ, itërin Quisosori.

Hechos 11:23

Inaquë canconahuaton, “Tëhuënchachin nisha piyapiꞌsantaꞌ imasapi. Yosëri naꞌcon catahuarin,” taꞌton, noya cancantërin. Pirnapisoꞌ noya quëmapi. Yosë noya natërin. Ispirito Santori noyá yaꞌcoancantërin niꞌton, piyapiꞌsaꞌ pënënin: “Ama Sinioro aꞌpocosohuëꞌ. Yaꞌipi cancanëma quëran huarëꞌ imamiatocoꞌ,” itërin. Pënënpachina, aꞌnapitantaꞌ Quisoso imapi.

Hechos 14:22

Cara ninanoquë chachin Quisoso imapisopita pënënaꞌpiapi. “Ama iyaroꞌsaꞌ Quisoso aꞌpocosohuëꞌ. Imamiatocoꞌ. Aꞌnapita aparisitarinënpoaꞌ. Parisitacasoꞌ yaꞌhuërin. Parisitatëhuaꞌ, Yosë huaꞌanëntërinquë yaꞌconarëhuaꞌ. Napoaton noya ahuantocoꞌ,” itopi. Pënënpachinara, achinicancanpi.

Hechos 2:5

Ina ninanoquë chachin naꞌa cotioroꞌsaꞌ yaꞌhuëapi. Nisha nisha parti quëran huëꞌpi Yosë chinotacaiso marëꞌ. Napoaton nisha nisha nananquë nonpi.

Hechos 20:24

Yatëpapirinacohuëntaꞌ, co casoꞌ tëꞌhuatërahuëꞌ. Co ina yonquirahuëꞌ. Sinioro Quisoso natëaꞌhuasoáchin cancantërahuë. Iráca ina shaꞌhuitërinco aꞌchinaꞌhuaso marëꞌ. ‘Yosëri yaꞌipi piyapi nosoroaton, anoyacancantacasoꞌ nohuantërin. Ina noya nanan chachin aꞌchintonquëꞌ,’ itërinco. Napoaton paato, aꞌchintárahuë. Co chiminaꞌhuasoꞌ tëꞌhuatërahuëꞌ.

Hechos 26:16

Iporaso nipirinhuëꞌ huaniquëꞌ. Nani acoranquën piyapiꞌsaꞌ shaꞌhuitamaso marëꞌ. Nani niꞌnanco. Aꞌna tahuëri nohuantërahuësoꞌ aꞌnotaranquën. Yaꞌipi shaꞌhuiráquëꞌ.

Hechos 4:12

Quisocristoíchin anoyacancantërinpoaꞌ. Co aꞌna nanitërinhuëꞌ nichaꞌëinpoasoꞌ. Inaíchin nanitërin nichaꞌëinpoasoꞌ, itërin Pitrori.

Romanos 10:18

¿Co natanpihuëꞌ ti? ¡Nani mini natanpi! tënahuë. Yosë quiricanënquë naporin: “Nisha nisha parti nanamën shaꞌhuitopi. Yaꞌipi parti nahuinin,” tënin Yosë quiricanënquë.

Romanos 15:16

Quisocristo chachin aꞌparinco nisha nisha piyapiꞌsaꞌ aꞌchintaꞌhuaso marëꞌ. Nanamën aꞌchintarahuë inapitantaꞌ imacaiso marëꞌ. Aꞌchinato, Yosë marëꞌ sacatarahuë. Nisha piyapiꞌsantaꞌ imapachinaꞌ, Ispirito Santori yaꞌcoancantarin. Noyápiachin cancan quëtarin. Ina marëꞌ Yosëri noya niꞌsarin.

Romanos 2:7

Noyasáchin nipatëhuaꞌ, noya niꞌsarinpoaꞌ. Yosë yonquiatëhuaꞌ, noya acoinpoaso marëꞌ naꞌcon nohuantohuatëhuaꞌ, ananpitaantarinpoaꞌ. Inarëꞌquënpoaꞌ yaꞌhuëmiatarihuaꞌ.

Romanos 5:5

Inasáchin ninahuatëhuaꞌ, tëhuënchachin co naniantarinpoahuëꞌ niꞌton, co tapanarihuahuëꞌ. Ispirito Santo aꞌpatimarinpoaꞌ. Yaꞌcoancantohuachinpoaꞌ: “Ma noyacha Yosë nosororinpoa paya,” tarihuaꞌ. Ispirito Santo chachin Yosë nosororinpoasoꞌ anitotërinpoaꞌ.

1 Corintios 15:58

Napoaton iyaroꞌsaꞌ chiníquën cancantocoꞌ. Nosororanquëmaꞌ niꞌton, pënënaranquëmaꞌ: Ama nisha nisha yonquicosohuëꞌ. Naporahuaton, paatomaꞌ aꞌnapita aꞌchintëraꞌpiacoꞌ. Sinioro catahuahuachinquëmaꞌ, co onporontaꞌ topinan quëran aꞌchinaramahuëꞌ. Aꞌchinpatamaꞌ, Yosëri nohuantërinsopita imasapi huachi.

1 Corintios 3:5

Co ca imamacosoꞌ yaꞌhuërinhuëꞌ. Aporosëntaꞌ co imacaisoꞌ yaꞌhuërinhuëꞌ. Quiyantaꞌ topinan piyapicoi nipiraihuëꞌ, Yosë shaꞌhuitërincoi niꞌton, aꞌchintërainquëmaꞌ. Natanpatamaꞌ, Yosë imasaramaꞌ.

2 Corintios 10:1

Ca Paonoco sanoanan quëran pënënanquëmaꞌ. Aꞌnaquën napopi: “Paono aquë quëran ninshitohuachinpoara, chiníquën nanan aꞌpatirinpoaꞌ. Isëquë chachin yaꞌhuapon, tëꞌhuatatonpoaꞌ, co chiníquën pënëninpoahuëꞌ,” topi natantërahuë. Quisocristosoꞌ chiníquën nanantaponahuëꞌ, co noꞌhuirinpoahuëꞌ. Sanoanan quëran pënëninpoaꞌ. Ina pochin cancantato, cantaꞌ sanoanan quëran pënënanquëmaꞌ.

2 Corintios 11:23

“Quisocristo shaꞌhuitërincoi niꞌtoi, natërai,” itopirinënquëmahuëꞌ. ¡Casoꞌ naꞌcon naꞌcon natërahuë! Inapitasoꞌ nocaninaco niꞌton, huaꞌyantërinso pochin nonato, piꞌpian inapita pochin nonchinquëmaꞌ noꞌtëquën yonquicamaso marëꞌ. Yosë marëꞌ casoꞌ chini chiníquën sacatërahuë. Paꞌsápato, Yosë nanamën aꞌchinahuë. Ina marëꞌ naꞌcon naꞌcon parisitaporahuëꞌ, ahuantërahuë. Inantaꞌ shaꞌhuichinquëmaꞌ. Aꞌchinahuëso marëꞌ naꞌaroꞌ tashinan pëiquë poꞌmorinaco. Naꞌaroꞌ ahuërinaco. Shitëparinaco.

2 Corintios 3:6

Ina nani acorincoi aꞌchinaꞌhuaiso marëꞌ. Acohuachincoira, catahuarincoi nasha quëran anoyatërinso aꞌchintaꞌhuainquëmaso marëꞌ. Ina imapatëhuaꞌ, Ispirito Santo catahuarinpoaꞌ Yosë nohuitatëhuaꞌ nanpimiatacaso marëꞌ. Iráca anoyatërinso Moisësëri ninshitopirinhuëꞌ. Ina imapatëhua, co onporontaꞌ noya cancantërëhuahuëꞌ. “Co natëhuatamahuëꞌ, chiminpatamaꞌ, anaꞌintacasoꞌ yaꞌhuërin,” tënin. Co ina aꞌchintërainquëmahuëꞌ.

2 Corintios 4:1

Yosë nosoroatoncoi, acorincoi ina nanamën aꞌchinaꞌhuaiso marëꞌ. Ina yonquiatoi, co yaaꞌporaihuëꞌ.

2 Corintios 6:1

Yosë acorincoi nanamën aꞌchinaꞌhuaiso marëꞌ. Acoatoncoi, catahuarincoi aꞌchintaꞌhuainquëmaso marëꞌ. “Yosë nosoroatonpoaꞌ, yanichaꞌërinpoaꞌ,” itërainquëmaꞌ. Ama topinan quëran natancosohuëꞌ. Imaco huachi.

Gálatas 4:11

Noꞌtëquën iyaroꞌsaꞌ aꞌchintopiranquëmahuëꞌ, naniantëramaꞌ nimara, tënahuë. “Topinan quëran aꞌchintërahuë nimara,” taꞌto sëtërahuë.

Gálatas 5:5

Nipirinhuëꞌ, ina imapatëhuaꞌ, Ispirito Santo catahuarinpoaꞌ. “Quisocristoíchin anoyacancantërinpoaꞌ,” topatëhuaꞌ, Yosë noya niꞌsarinpoaꞌ, tënëhuaꞌ. Oshanënpoaꞌ inquitatonpoaꞌ, tëhuënchachin noyápiachin cancan quëtarinpoaꞌ. Ina ninarëhuaꞌ.

Gálatas 5:7

Canpitaso noya imasapiramahuëꞌ, ¿inta nonpintatënquëmaꞌ, nisha ayonquirinquëmaꞌ? tënahuë.

Gálatas 6:9

Ama Yosë naniantatëhuahuëꞌ, noya niahuaꞌ. Noya nicacasoꞌ ama amiahuasohuëꞌ. Chiníquën cancantohuatëhuaꞌ, Yosë noya niꞌsarinpoaꞌ. Ina marëꞌ tahuëri nanihuachin, acanaarinpoaꞌ.

Efesios 1:18

Yaꞌipi nanamën Sinioro noyá anitotëquëꞌ. Quëma huëntonënquë chachin ayaꞌconancoi noya cancantaꞌhuaiso marëꞌ. Catahuaquëꞌ ina yonquiatonaꞌ, noya cancanchinaꞌ. Aꞌna tahuëri yaꞌhuëranquë chachin noya noya yaꞌhuëcontarai. Ina naꞌcon yonquiꞌinaꞌ.

Efesios 2:21

Quisocristo imapatëhuaꞌ, Yosë acoarinpoaꞌ ina pëinën pochin nicacaso marëꞌ. Catahuahuachinpoaꞌ, noya niniꞌtëhuaꞌ yaꞌhuërëhuaꞌ. Aꞌnapitantaꞌ aꞌnaya aꞌnaya Quisocristo imapachinaꞌ, yaꞌconapi antaꞌ. Nóya pëiꞌ Yosë chinotacaso marëꞌ acorëso pochin nisarëhuaꞌ.

Efesios 3:17

Yaꞌipi cancanëna quëran natëtatonaꞌ, Quisocristoíchin yonquiꞌinaꞌ. ‘Cancanëhuëquë yaꞌhuërarin,’ taꞌtonaꞌ, noya noya nohuichinën. Catahuaquëꞌ noya nosoroꞌinën. Yaꞌipi piyapiꞌsantaꞌ nosoroꞌinaꞌ, Nara itëquën acopoꞌ paꞌpachina, co inpaninhuëꞌ. Inapochachin inapitantaꞌ ‘Quisocristo naꞌcon nosororincoiꞌ,’ taꞌtonaꞌ, aꞌnapitantaꞌ nosoroꞌinaꞌ. Noya ninosorohuachinaꞌ, Ispirito Santori catahuararin chiníquën cancantacaisoꞌ.

Efesios 4:16

Ina natëhuatëhuaꞌ, noya niniꞌtëhuaꞌ, yaꞌhuarihuaꞌ. Yaꞌipinpoaꞌ nicatahuacasoꞌ yaꞌhuërin. Nisha nisha nicatahuarihuaꞌ noya noya imacaso marëꞌ. Quisocristo chachin catahuahuachinpoaꞌ, noya nicatahuarihuaꞌ. Ina quëran ninosoroatëhuaꞌ, yaꞌipinpoaꞌ noya noya cancantarihuaꞌ.

Deuteronomio 4:19

Piꞌiroꞌtënta nëꞌpëhuatamaꞌ, niꞌcona piꞌi, yoqui, tayoraroꞌsaꞌ, inapita quënanatoma moshachináchin cancantotamaꞌ. Inapitasoꞌ yaꞌipi piyapiꞌsa aꞌpintacaso marëꞌ acorin. Canpoaso nipirinhuëꞌ, Yosëíchin chinotacaso yaꞌhuërin.

Colosenses 1:25

Yosë acorinco imapisopita catahuaꞌhuaso marëꞌ. Canpitantaꞌ aꞌchintaranquëmaꞌ. Yaꞌipi nanamën aꞌchinaꞌhuaso marëꞌ acorinco.

Colosenses 2:7

Niꞌcoꞌ. Maꞌsha shaꞌpatëra, itën acopoꞌ noꞌpaquë paꞌpachina, noya huanirin. Inapochachin canpitantaꞌ Quisocristo noya chinpitocoꞌ. Inasáchin yonquicoꞌ achinicancainquëmaꞌ. Nani iyasha noꞌtëquën aꞌchintërinquëmaꞌ niꞌton, yaꞌipi cancanëma quëran Quisocristo natëcoꞌ. “Yosë naꞌcon nosororinpoaꞌ,” taꞌtomaꞌ, nani tahuëri “Yosparinquën Sinioro,” itocoꞌ.

1 Tesalonicenses 3:3

Canpitantaꞌ parisitapiramahuëꞌ, co nohuantëraihuëꞌ nisha nisha yonquicamasoꞌ. Co ina marëꞌ aꞌpocasoꞌ yaꞌhuërinhuëꞌ. Quisocristo imapatëhuara, aparisitërinënpoaꞌ. Yosë nohuanton, ina marëꞌ parisitarëhuaꞌ, nani nitotëramaꞌ.

1 Tesalonicenses 3:5

Napoaton casoꞌ co huachi ahuantatohuëꞌ, Timotio aꞌpatëranquëmaꞌ onpopinsona imaramasoꞌ nitotaꞌhuaso marëꞌ. Sopai yanonpintërinpoaꞌ Yosë aꞌpocaso marëꞌ. Minsërinquëmaꞌ naporini, topinan quëran aꞌchinchitënquëmahuëꞌ. “Co huachi noya imamaraihuëꞌ,” taꞌtoi, Timotio aꞌpatërainquëmaꞌ.

1 Tesalonicenses 5:8

Canpoaso nipirinhuëꞌ tahuëri pochin cancantacasoꞌ yaꞌhuërin. Napoaton noya yonquiatëhuaꞌ, Yosë imamiatahuaꞌ. Niꞌcoꞌ iyaroꞌsaꞌ. Inimicoroꞌsaꞌ huëꞌpachinara, sontaroꞌsaꞌ co topinan paꞌpihuëꞌ. Coton huaꞌna quëran nininsoꞌ aꞌmopi. Cascontaꞌ huaꞌna quëran nininsoꞌ yancopi ama inimicori ohuanacaso marëhuëꞌ. Noya nitapahuachinara, co inimicori minsërinhuëꞌ. Huaꞌna aꞌmopiso pochin canpoantaꞌ Yosë natëahuaꞌ catahuainpoaꞌ. Ina natëtëhuaꞌ, noya ninosoroaꞌahuaꞌ. “Yosë aꞌpaiarinpoaꞌ. Oꞌmahuachin, noyá nichaꞌësarinpoaꞌ,” taꞌtëhuaꞌ noya ninahuaꞌ.

2 Tesalonicenses 2:16

Sinioro Quisocristo catahuainquëmaꞌ chiníquën cancantacamaso marëꞌ. Inaora nohuanton, Tata Yosëntaꞌ nosoroatonpoaꞌ, achinicancamiatërinpoaꞌ. Aꞌna tahuëri yaꞌhuërinquë chachin quëpantarinpoaꞌ. Shaꞌhuitërinpoaꞌ niꞌton, ina ninarëhuaꞌ.

1 Timoteo 1:12

Ina marëꞌ Sinioro Quisocristo achinicancaninco. “Noꞌtëquën natëarinco,” taꞌton, acorinco aꞌchinaꞌhuaso marëꞌ. Napoaton: “Yosparinquën Sinioro,” itërahuë.

1 Timoteo 2:7

Ina nanan shaꞌhuicaꞌhuaso marëꞌ Yosë acorinco. Aꞌparinco nisha piyapiꞌsaꞌ aꞌchintaꞌhuaso marëꞌ. “Yosë noꞌtëquën nontërinpoaꞌ. Ina natëcoꞌ,” itërahuë. Tëhuënchachin noꞌtëquën nonahuë, co nonpinahuëꞌ.

1 Timoteo 3:16

Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ. Yosë huiꞌnin isoroꞌpaquë oꞌmaton, piyapi chachin nasitimarin. Ispirito Santo chachin anitotërinpoaꞌ Yosë huiꞌnin nininsoꞌ. Nanpiantahuachina, anquëniroꞌsarintaꞌ quënanpi. Imapisopitari yaꞌipi parti paatonaꞌ, nanamën shaꞌhuiraꞌpiapi. Naꞌa piyapiꞌsaꞌ natëpi. Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.

Tito 3:7

Napoaton iporasoꞌ Yosë noya niꞌninpoaꞌ. Iráca oshahuanpirëhuahuëꞌ, inaora nohuanton, nosoroatonpoaꞌ, nanan anoyatërinpoaꞌ. “Huëntonënquë ayaꞌconinpoaꞌ niꞌton, aꞌna tahuëri yaꞌhuërinꞌpaꞌ yaꞌhuëcontarihuaꞌ,” taꞌtëhuaꞌ, ninarëhuaꞌ. Inatohuaꞌ nanpimiatarihuaꞌ.

Hebreos 10:38

Cancanëma quëran huarëꞌ natëhuatamaco, noya niꞌsaranquëmaꞌ niꞌton, noya nanpimiataramaꞌ. Nipirinhuëꞌ aꞌpohuatamaco, paꞌpi co noyahuëꞌ niꞌsaranquëmaꞌ,” tënin.

Hebreos 3:14

Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

Hebreos 3:6

Quisocristoso nipirinhuëꞌ co inpriatohuëꞌ. Yosë huiꞌnin chachin niꞌton, chini chiníquën nanantërin. Paꞌpin natëton, nóya huaꞌanëntarinpoa huachi. Napoaton chiníquën cancantatëhuaꞌ, chiminaquë huarëꞌ Quisocristo natëahuaꞌ. “Co naniantarinpoahuëꞌ,” taꞌtëhuaꞌ, noya cancantahuaꞌ. Imamiatohuatëhuaꞌ, piyapinënpita chachin nisarihuaꞌ.

Hebreos 4:14

Iporasoꞌ Quisoso imarëhuaꞌ. Yosë huiꞌnin chachin inasoꞌ. Nani inápaquë panantarahuaton, Yosëꞌpaꞌ yaꞌhuarin. Corto huaꞌan chini chiníquën nanantërinso pochin Yosëri acorin catahuainpoaso marëꞌ. Napoaton ama ina naniantatëhuahuëꞌ, imamiatahuaꞌ.

Hebreos 6:19

Niꞌcoꞌ. Nanchaquë paꞌpachinara, aꞌna tahuëri panca ihuan nacapipi. Chiníquën coꞌsacaitërin. Naporoꞌ huaꞌna quëquën nininsoꞌ aꞌsonahuatonaꞌ, tëꞌyaitopi. Acopoiꞌ noꞌpaquë niꞌtoromahuachina, sano yanponin. Co coꞌsacairi tërantaꞌ chiꞌhuincarinhuëꞌ. Inapochachin canpoantaꞌ aꞌna tahuëri maꞌsha onporëhuaꞌ, parisitërëhuaꞌ, sëtërëhuaꞌ, naporëhuaꞌ. Inapohuatëhuaꞌ, Yosë yonquiaꞌahuaꞌ. “Inasoꞌ noꞌtëquën nontërinpoaꞌ. Nichaꞌësarinpoaꞌ. Co onporontaꞌ naniantarinpoahuëꞌ,” topatëhuaꞌ, sano cancantarihuaꞌ. Yosësoꞌ co quënanarihuarahuëꞌ, inápaquë yaꞌhuárin. Ina yonquiatëhuaꞌ, ninarëhuaꞌ.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.

1 Pedro 1:5

Tata Yosë yaꞌipiya nanitaparin. “Yosë co quënanpirëhuahuëꞌ, catahuarinpoaꞌ,” topatëhuaꞌ, noya aꞌpaiarinpoaꞌ. Maꞌsha onpohuatëhuaꞌ, catahuarinpoaꞌ ahuantacasoꞌ. Ayaroꞌ tahuëri nóya nichaꞌësarinpoaꞌ. Nani yonquirin oꞌmantacasoꞌ. Aꞌna tahuëri niꞌsarëhuaꞌ. Oꞌmantaquë huarëꞌ aꞌpaiarinpoaꞌ.

1 Juan 2:27

Canpitaso nipirinhuëꞌ Ispirito Santo yaꞌhuëtërinquëmaꞌ. Quisocristo imaramaꞌ niꞌton, ina nohuanton, yaꞌcoancantërinquëmaꞌ. Nani tahuëri aꞌchintarinquëmaꞌ. Cancanëmaquë Yosë nanamën aꞌchintarinquëmaꞌ. Co onporontaꞌ nonpintërinquëmahuëꞌ. Noꞌtëquën aꞌchintërinquëmaꞌ niꞌton, co aꞌnapita aꞌchintinquëmasoꞌ yaꞌhuërinhuëꞌ. Ina natëhuatamaꞌ, noꞌtëquën yonquiaramaꞌ. Shaꞌhuitërinquëmaso pochachin Quisocristo imamiatocoꞌ.

Apocalipsis 2:10

Ipora tahuëriꞌsaꞌ naꞌcon parisitapiramahuëꞌ, ama tëꞌhuacosohuëꞌ. Sopai nohuanton, tashinan pëiquë poꞌmoarinënquëmaꞌ. Yosë aꞌpocamaso marëꞌ napotarinënquëmaꞌ. Shonca tahuëri pochin parisitaramaꞌ. Tëpapirinënquëmaontaꞌ, ama aꞌpocosohuëꞌ. Imamiatohuatamaco, inápaquë acanaranquëmaꞌ. Inatohuaꞌ nanpimiataramaꞌ.