Colosenses 1:16 - Chayahuita (Shahui)

¹⁶ Yosë nohuanton, inarë chachin yaꞌipi maꞌsha ninin. Inápaquë yaꞌhuërinsopita, isoroꞌpaquë yaꞌhuërinsopita, inapita acorin. Aꞌnaquën quënanëꞌ. Aꞌnaquënso co quënanëhuëꞌ. Anquëniroꞌsaꞌ, inápaquë chiníquën nanantërinsopita, nisha nisha nininsopita, inapitantaꞌ ninin. Quisocristoíchin chinotacaiso marëꞌ yaꞌipiya yaꞌhuërin. Ina marëꞌ acorin.

Colosenses 1:16 ပူးပေါင်းရင်းမြစ်များ

Nehemías 9:6

Istrasëntaꞌ, Yosë nontaton tapon: “Quëmasáchin Sinioronquën. Quëmari yaꞌipi piꞌiroꞌtë acoran. Yaꞌipi yaꞌhuërinsopitarë chachin ninan. Isoroꞌpaꞌ, marë, inapitanta ninan. Yaꞌipi inaquëpita yaꞌhuërinsopitarë chachin acoran. Quëma nohuanton yaꞌipi yaꞌhuëapi. Quëma nohuanton chachin yaꞌipi nanpiapi. Piꞌiroꞌtëquë yaꞌhuërinsopita chinotarinën.

Isaías 43:21

Piyapinëhuëpitasoꞌ, chinotiinacoso marëꞌ cari acorahuë.

Isaías 44:24

Siniorosoꞌ nichaꞌërinquëmaꞌ. Coꞌhuara nasichátërasënquëmahuëꞌ acorinquëmasoꞌ, naporin: “Ca mini Sinioroco. Yaꞌipi maꞌsha cari acorahuë. Cari piꞌiroꞌtë nëꞌmëtë pëi pochin ótënahuë. Ca nohuanton isoroꞌpanta chinirin. Caoraíchin acorahuë. Co insonta catahuarincohuëꞌ.

Juan 1:10

Isoroꞌpaquë oꞌmarin. Iráca Tata Yosë nohuanton, yaꞌipi maꞌsha ninin. Inari acopirinhuëꞌ, co piyapiꞌsari nohuitopihuëꞌ.

Juan 1:3

Naporoꞌ Yosë yonquirin yaꞌipi maꞌsha acocasoꞌ. Ina nohuanton, huiꞌnini acorin. Yaꞌipi maꞌsha ninin. Co aꞌnaya tërantaꞌ inaora yaꞌhuërinhuëꞌ. Co acorinhuëꞌ naporini, co mantaꞌ yaꞌhuëꞌitonhuëꞌ.

Romanos 11:36

Yaꞌipi maꞌsha Yosëri ninin. Ina nohuanton, co taꞌhuantarëhuahuëꞌ. Yosëíchin paꞌyatacaso marëꞌ yaꞌhuërëhuaꞌ. Inaora nohuanton, anoyacancantërinpoaꞌ. Ma noyacha Yosëso paya, itahuaꞌ. ¡Inasáchin chinotahuaꞌ! Amen.

Romanos 8:38

Yosë nosoromiatërinpoaꞌ. Nanpihuatëhuara, nosororinpoaꞌ. Chiminpatëhuantaꞌ, co patarinpoahuëꞌ. Anquëniroꞌsaꞌ, sopairoꞌsaꞌ, tanan huaꞌyanoꞌsaꞌ, inapita co nanitopihuëꞌ Yosë quëran osërëinpoasoꞌ. Ipora tahuëriꞌsaꞌ maꞌsha onpotopirinënpoahuëꞌ, co patarinpoahuëꞌ. Aꞌna tahuërintaꞌ maꞌsha onpotohuachinënpoaꞌ, co Yosë naniantarinpoahuëꞌ.

Romanos 9:5

Shimashonënpitasoꞌ Yosëri chachin huayonin. Ina quëran Cristo isoroꞌpaquë oꞌmahuachina, Israiro sanapi quëran nasitërin. Inasoꞌ Yosë chachin. Yaꞌipiya huaꞌanëntërinpoaꞌ. ¡Ma noyacha inaso paya! tënëhuaꞌ. Amen.

1 Corintios 8:6

Canpoaso nipirinhuëꞌ Tata Yosëíchin chinotërëhuaꞌ. Yaꞌipi maꞌsha ninin. Ina marëꞌ acorinpoaꞌ. Quisocristoíchin huaꞌanëntërinpoaꞌ. Ina nininpoaꞌ. Nani nichaꞌërinpoaꞌ ina nohuitatëhuaꞌ nanpicaso marëꞌ.

Efesios 1:10

Ina tahuërinën nanihuachin, Quisocristo yaꞌipiya huaꞌanëntarin. Isoroꞌpaquë yaꞌhuërinsopita, inápaquë yaꞌhuërinsopita inapita huaꞌanëntarin. Aꞌna huëntoínchin pochin acoarin. Ina Yosë naꞌcon nohuantërin.

Efesios 6:12

Inimiconënpoaꞌ co piyapi pochin quënanëhuahuëꞌ. Sopai huaꞌansoꞌ yaminsërinpoaꞌ. Naꞌa sopairoꞌsantaꞌ inápaquë yaꞌhuatonaꞌ, yacamairinënpoaꞌ. Co quënanpirëhuahuëꞌ, yonquinënpoa quëran yacamairinënpoaꞌ co noyahuëꞌ nicacaso marëꞌ. Iporasoꞌ notohuaroꞌ piyapiꞌsaꞌ tashi pochin cancantatonaꞌ, sopai natëpi. Inari camairin niꞌton, paꞌpi co noyahuëꞌ yonquipi.

Deuteronomio 4:39

Napoaton noya yonquirahuatomaꞌ: ‘Sinioroíchin Yosësoꞌ. Inápaquë huaꞌanëntërinso pochachin isoroꞌpaquënta huaꞌanëntarin. Co aꞌna ina pochin yaꞌhuërinhuëꞌ,’ tocoꞌ.

Filipenses 2:10

Napoaton Quisocristo yonquiatonaꞌ, yaꞌipi piyapiꞌsari isonahuatonaꞌ chinochinaꞌ. Inápaquë yaꞌhuërinsopita, isoroꞌpaquë yaꞌhuërinsopita, noꞌpaanaquë yaꞌhuëpisopita, inapitarintaꞌ chinochinaꞌ.

Colosenses 1:15

Tata Yosësoꞌ co quënanëhuëꞌ. Nipirinhuëꞌ, huiꞌnin isoroꞌpaquë oꞌmaton, paꞌpin anohuitërinpoaꞌ. Inantaꞌ Yosë chachin niꞌton, nóya anohuitërinpoaꞌ. Coꞌhuara isoroꞌpaꞌ yaꞌhuëyátërasohuëꞌ, huiꞌniontaꞌ inápaquë yaꞌhuërin.

Colosenses 1:20

Iráca oshahuanëhuaꞌ niꞌton, yaꞌipinpoaꞌ Yosë inimicotopirëhuahuëꞌ. Yosë nohuanton, Quisocristo chiminin nanan anoyatinpoaso marëꞌ. Isoroꞌpaquë yaꞌhuërinsopita, inápaquë yaꞌhuërinsopita, yaꞌipiya nohuantërin anoyatacasoꞌ. Canpoa marëꞌ huënainën paꞌnin. Corosëquë chiminin niꞌton, co huachi Yosë inimicotacasoꞌ yaꞌhuërinhuëꞌ.

Colosenses 2:10

Canpoantaꞌ ina imapatëhuaꞌ, co mantaꞌ pahuantarinpoahuëꞌ noya noya cancantacaso marëꞌ. Yosë chachin nohuitarëhuaꞌ. Huaꞌanoꞌsaꞌ, anquëniroꞌsaꞌ, sopairoꞌsaꞌ, inapita chiníquën nanantopirinahuëꞌ, Quisocristosoꞌ chini chiníquën nanantërin. Co ina nohuantohuachinhuëꞌ, co mantaꞌ nanitapihuëꞌ nicacaisoꞌ.

Colosenses 2:15

Quisocristosoꞌ chini chiníquën nanantërin. Corosëquë chiminaton, yaꞌipi sopai huaꞌanoꞌsaꞌ, sopairoꞌsaꞌ, inapita aꞌninquëchin minsërahuaton, atapanin. Co huachi inapita nanitapihuëꞌ shaꞌhuirapiinpoasoꞌ.

Hebreos 1:2

Iporaso nipirinhuëꞌ, huiꞌnin quëran nontërinpoaꞌ. Iráca Yosëri shaꞌhuitohuachina, Quisocristori isoroꞌpaꞌ, inápaquë yaꞌhuërinsopita, yaꞌipi ninin. Aꞌna tahuëri Yosë nohuanton, yaꞌipi huaꞌanëntarin.

Hebreos 2:10

Yosëri yaꞌipiya ninin. Inasáchin yonquicaso marëꞌ nininpoaꞌ. Ina nohuanton, huiꞌnin parisitërin huëntonënquë ayaꞌcoinpoaso marëꞌ. Naꞌaquënpoaꞌ imarëhuaꞌ. Imapatëhuaꞌ, anoyacancantërinpoaꞌ. Huiꞌninpita pochin Yosë niꞌninpoaꞌ. Quisocristo parisitërin niꞌton nanitërin nichaꞌëinpoasoꞌ. Napoaton, “noya parisichin,” tënin Yosë. Nosoroatonpoaꞌ, naporin.

1 Pedro 3:22

Nanpiantarahuaton, Yosëꞌpaꞌ pantarin. Yosë inchinan quëran huënsëaton, chini chiníquën nanantarin. Yaꞌipi anquëniroꞌsaꞌ, huaꞌanoꞌsaꞌ, chiníquën nanantërinsopita inapitari natëpi huachi.